Dipotšišo tše Tšwago go Babadi

Na Abele o be a Tseba Gore go Nyakega Sehlabelo sa Phoofolo Bakeng sa go Amogelwa ke Modimo?

Pego ya Beibele ka Kaine le Abele ya go dira dihlabelo ke e kopana kudu. Go Genesi 4:​3-5, re bala gore: “Ya re xe xo fetile matšatši, Kaine a išetša Morêna sebexô sa dienywa tša thšemo. Abele yêna a iša sa maitšibulô a dihuswane tša xaxwe, le tše di mahura tša tšôna. Modimo Yêna a thabêla Abele le sebexô sa xaxwe; Fêla, xa a ka a thabêla Kaine le sebexô sa xaxwe.”

Beibele ga e bolele selo gore pele ga tiragalo ye Jehofa o be a neile tsebišo le ge e le efe e lebanyago ka dihlabelo goba gore ke mohuta ofe wa dihlabelo woo o bego o tla amogelega go yena. Ka go rialo, go molaleng gore Kaine le Abele ba ile ba neela dihlabelo tša bona feela go ya ka kgetho ya bona ka noši. Ba be ba thibetšwe go tsena legaeng la batswadi ba bona la mathomo la Paradeise; ba ile ba thoma go kwa ditla-morago tša sebe; gomme ba be ba arogantšwe go Modimo. Ba le seemong sa bona sa sebe le se se hlomolago pelo, ba swanetše go ba ba ile ba bona go nyakega kudu go boela go Modimo bakeng sa thušo. Mohlomongwe go nea ga bona Modimo mpho e be e le tiro ya go ithapa ya gore ba amogelwe ke Modimo.

Mafelelo e bile gore Modimo a amogele sehlabelo sa Abele eupša a gane sa Kaine. Ke ka baka la’ng? Na e ka ba e le ka gobane Abele a ile a neela dilo tše di swanetšego mola Kaine yena a se a dira bjalo? Re ka se kgonthišege gore mohuta wa sehlabelo o be o sa tsene ditabeng ka ge go be go se le o tee wa bona yoo a bego a boditšwe seo se bego se amogelwa le seo se bego se sa amogelwe. Lega go le bjalo, mohlomongwe mehuta ka bobedi e be e amogelega. Molaong woo mafelelong Jehofa a ilego a o nea setšhaba sa Isiraele, dihlabelo tše di amogelegago di be di sa akaretše feela diphoofolo goba dikarolo tša phoofolo eupša gape le mabele a bešitšwego, dingata tša garase, bupi bjo bo šitšwego gabotse, dilo tše di apeilwego le beine. (Lefitiko 6:​19-23; 7:​11-13; 23:​10-13) Ka gona, go molaleng gore e be e se feela dilo tšeo Kaine le Abele ba dirilego dihlabelo ka tšona tšeo di ilego tša dira gore Modimo a amogele se sengwe gomme a se amogele se sengwe.Bapiša le Jesaya 1:​11, Amosi 5:22.Nywaga-kete ka morago, moapostola Paulo o ile a bolela gore: “Ka tumelo Abele o beetše Modimo sehlabelo se se phadišago sa Kaine; ka baka la yona o neilwe bohlatse bja gore o lokile, ga Modimo a bea bohlatse go dineo tša gagwe.” (Ba-Hebere 11:​4, PK) Ka gona, e be e le ka baka la tumelo gore Modimo a amogele Abele e le yo a lokilego. Eupša tumelo go eng? Tumelo kholofetšong ya Jehofa ya gore o be a tla neelana ka Peu, yeo e bego e tla ‘pšhatla hlogo ya noga’ gomme e tsošološe khutšo le go phethagala tšeo batho ba kilego ba di thabela pele. Ka baka la polelo ya gore Peu e tla ‘longwa serethe,’ Abele a ka be a ile a nagana gore go nyakega sehlabelo se se akaretšago tšhollo ya madi. (Genesi 3:​15) Go sa šetšwe seo, therešo ke gore e be e le ka baka la go bontšha ga Abele tumelo mo go ilego gwa dira gore a be le “sehlabelo se se phadišago sa Kaine.”

Ka mo go swanago, Kaine o ile a ganwa, e sego ka baka la ge a ile a neela sehlabelo se se fošagetšego, eupša ka baka la gore o be a se na tumelo, go etša ge go bontšhitšwe ke mediro ya gagwe. Jehofa o ile a bontšha Kaine gabotse gore: “Xe O ka dira xa-botse, a xa se mó Ò tl’o xo inamoloxa!” (Genesi 4:7) Modimo ga se a gana Kaine ka baka la go se kgahlišwe ke sehlabelo sa gagwe. Ge e le gabotse, e be e le ka ge ‘mediro ya gagwe e le e mebe’ya go bonagala ka lehufa, lehloyo gomme ya feleletša ka polaoe lego yeo e dirilego gore Kaine a ganwe ke Modimo.—1 Johane 3:​12.