Go Phela ka Tlase ga Taolo ya Tumela-khwele

O LEBELETŠANA le motho ka mahlong ge o tloga legaeng la gago. O thetšwa ke lefsika ka kotsi. Nonyana ya mohuta o itšego e a lla bošego. O ba le toro yeo e boa-boago. Tše ke dilo tše bonolo, tše di sa tlišego kotsi go ba bantši. Eupša go batho ba itšego Afrika Bodikela, dilo tše di ka lebelelwa e le dika, ditšhupo goba melaetša e tšwago lefaseng la meoya. Go naganwa gore go ka tla gwa ba le katlego goba masetlapelo go ithekgile ka seka se se diregago le gore se ka ba se bolela eng.

Go ba gona, ditumela-khwele di dutše di kgomaretšwe le ka ntle ga Afrika. Gaešita le ge ba phetše ka nywaga e mentši lekokong leo go lona go nago le boila-Modimo ka semmušo, palo e makatšago ya batho kua China le direpabliking tša yeo e kilego ya bitšwa Soviet Union e sa dutše e kgomaretše ditumela-khwele. Lefaseng la ka Bodikela, ba bantši ba lebelela horoscope ya bona, ba boifa Labohlano leo le welago go di-13, gomme ba phema dikatse tše ntsho. Batho ba bangwe ba Leboa la Kgole ba lebelela dietša tša ge letšatši le dikela ka leboa e le sešupo sa ntwa le leuba la bolwetši. Kua India, AIDS e phatlalatšwa ke baotledi ba dilori bao ba dumelago gore ba swanetše go ba le dikopano tša botona le botshadi e le gore ba dule ba na le thempheretšha e botse ya mmele matšatšing a fišago. Kua Japane, baagi ba dithanele ba dumela gore ge mosadi a tsena ka thaneleng pele ga ge e fetšwa seo se tliša go hloka mahlatse. Le gona ditumela-khwele di a atlega dipapading tše di rulagantšwego. Sebapadi se sengwe sa volleyball se ile sa ba sa bolela gore phenyo ya sona ya tatelano e dirwa ke gore se be se rwala masokisi a maso go e na le a mašweu. Re ka di bala ra se fetše.

Go thwe’ng ka wena? Na mohlomongwe o na le letšhogo la ka sephiring leo le sa hlalosegego? Na o kgongwa ke “tumelo, go dumela go se nene, goba motlwae wo go wona go bonalago go se na tlhaloso e kwagalago”? Karabo ya gago e ka bontšha ge e ba bophelo bja gago bo laolwa ke tumela-khwele, ka gobane yeo ke yona tsela yeo ka yona puku e nngwe ya tšhupetšo e hlalosago lentšu “tumela-khwele.”

Motho yo a dumelelago tumela-khwele gore e kgome diphetho le mokgwa wa gagwe wa bophelo wa letšatši le letšatši o itumelela gore a laolwe ke selo seo ruri a sa se kwešišego. Na seo ke sa bohlale? Na re swanetše go ipea ka tlase ga tutuetšo e bjalo e sa kwagalego le yeo e ka bago e le e mpe? Na tumela-khwele ke bofokodi bjo bo sa gobatšego goba tšhošetšo e sego kotsi?