Ikokobeletšeng Bolaodi bja Modimo ka Potego e sa Kwanantšhego

“Gobane Jehofa ke moahlodi wa rena; Jehofa ke e a re beelago melao; Jehofa ke kgoši ya rena.”—JESAYA 33:​22, PK.

1. Ke mabaka afe ao a dirilego gore Isiraele ya bogologolo e be ya moswana-noši gare ga ditšhaba?

SETŠHABA sa Isiraele se ile sa hlongwa ka 1513 B.C.E. Ka nako yeo, se be se se na motse-mošate, se se na naga ya gabo sona e bile se se na kgoši e bonagalago. Batho ba sona e be e kile ya ba makgoba. Lega go le bjalo, setšhaba seo se sefsa e be e le sa moswana-noši ka tsela e nngwe. Jehofa Modimo e be e le Moahlodi wa sona yo a sa bonagalego, Molai le Kgoši ya sona. (Ekisodo 19:​5, 6; Jesaya 33:​22) Ga go na setšhaba se sengwe seo se ka bolelago seo!

2. Ke potšišo efe e rotogago mabapi le kamoo Isiraele e bego e rulagantšwe ka gona, gomme ke ka baka la’ng karabo e le bohlokwa go rena?

² Ka ge Jehofa e le Modimo wa thulaganyo e bile e le Modimo wa khutšo, re tla letela gore setšhaba le ge e le sefe seo a se bušago e be se se rulagantšwego gabotse. (1 Ba-Korinthe 14:​33) Ka ntle le pelaelo go be go le bjalo ka Isiraele. Eupša ke bjang mokgatlo o bonagalago wa lefaseng o ka hlahlwago ke Modimo yo a sa bonagalego? Re dira gabotse ka go ela hloko tsela yeo Jehofa a ilego a buša setšhaba sa bogologolo, re ela hloko ka mo go kgethegilego kamoo ditirišano tša gagwe le Isiraele di bontšhago bohlokwa bja go ikokobeletša bolaodi bja Modimo ka potego e sa kwanantšhego.

Kamoo Isiraele ya Bogologolo e Bego e Bušwa ka Gona

3. Ke ditokišetšo dife tše di šomago tšeo Jehofa a di diretšego go hlahla batho ba gagwe?

³ Gaešita le ge Jehofa e be e le Kgoši ya Isiraele e sa bonagalego, o ile a kgetha banna ba botegago e le baemedi ba gagwe ba bonagalago. Go be go na le dikgošana, dihlogo tša malapa a lešika la bo-tate le banna ba bagolo go hlankela batho e le baeletši le baahlodi. (Ekisodo 18:​25, 26; Doiteronomio 1:​15) Lega go le bjalo, ga se ra swanela go phetha ka gore ka ntle le tlhahlo ya Modimo banna bao ba nago le boikarabelo ka tsela e itšego ba ka ahlola ditaba ka bohlale bjo bo se nago bosodi le kwešišo. Ba be ba sa phethagala, gomme ba be ba sa kgone go tseba seo se lego ka dipelong tša barapedi-gotee le bona. Lega go le  bjalo, baahlodi bao ba boifago Modimo ba be ba ka nea badumedi-gotee le bona keletšo e thušago ka gobane e be e theilwe Molaong wa Jehofa.—Doiteronomio 19:​15; Psalme 119:​97-100.

4. Ke ditshekamelo dife tšeo baahlodi ba botegago ba Isiraele ba bego ba tshwenyegile ka go di phema, gomme ka baka la’ng?

⁴ Lega go le bjalo, go ba moahlodi go be go nyaka mo gontši go feta go fo tseba Molao. Ka ge ba be ba sa phethagala, banna ba bagolo ba be ba swanetše go phakgamela go thibela ditshekamelo le ge e le dife tša bona tša bongangatše bjalo ka boithati, go beba sefahlego le megabarutšeo di ka senyago kahlolo ya bona. Moše o ba boditše gore: “Le se kê la beba sefahloxô kahlolong; Le kwê mmôtlana byalo ka xe Le e-kwa e moxolo; Le se kê la šia sefahloxô sa motho; ka xobane kahlolô ké ya Modimo.” (Mongwalo o sekamego ke wa rena.) Ee, baahlodi ba Isiraele ba be ba ahlola legatong la Modimo. Yeo e be e le tokelo e boifišago gakaakang!—Doiteronomio 1:​16, 17.

5. Go tlaleletša go beeng baahlodi, ke ditokišetšo dife tše dingwe tšeo Jehofa a ilego a di dira bakeng sa go hlokomela batho ba gagwe?

⁵ Jehofa o ile a dira ditokišetšo tše dingwe bakeng sa go hlokomela dinyakwa tša moya tša batho ba gagwe. Gaešita le pele ba fihla Nageng ya Kholofetšo, o ile a ba laela go aga tabarenakele, lefelo la borapedi bja therešo. Gape o ile a lokišeletša baperisita go ruta Molao, go nea dihlabelo tša diphoofolo le go fiša diorelo tša mantšibua le tša bošego. Modimo o ile a bea mogolo’ago Moše e lego Arone go ba moperisita yo mogolo wa mathomo wa Isiraele gomme a bea barwa ba Arone gore ba thuše tatago bona ka mediro ya bona.—Ekisodo 28:1; Numeri 3:​10; 2 Koronika 13:​10, 11.

6, 7. (a) Tswalano e be e le efe magareng ga baperisita le ba-Lefi bao e bego e se baperisita? (b) Re ka ithuta’ng ntlheng ya gore ba-Lefi ba be ba šoma mešomo e fapa-fapanego? (Ba-Kolose 3:23)

⁶ Go hlokomela dinyakwa tša moya tša batho ba dimilione tše mmalwa e be e le mošomo o mogolo, gomme baperisita e be e le ba sego kae ka palo. Ka gona ba ile ba direlwa tokišetšo gore ba thušwe ke ditho tše dingwe tša moloko wa Lefi. Jehofa o boditše Moše gore: “Ba-Lefi O ba xafêlê Arone le barwa ba xaxwe. Ba hlaotšwe xo Ba-Isiraele, ’me ba xafetšwe yêna sa ruri.”—Numeri 3:​9, 39.

⁷ Ba-Lefi ba be ba rulagantšwe gabotse. Ba be ba arogantšwe go ya ka malapa a mararoba-Gerisone, ba-Kahathe le ba-Merarile lengwe le le lengwe le na le mošomo wo le swanetšego go o dira. (Numeri 3:​14-17, 23-37) Dikabelo tše dingwe di ka ba di ile tša bonagala di le bohlokwa kudu go feta tše dingwe, eupša ka moka di be di le bohlokwa. Mošomo wa ba-Lefi ba ba-Kahathe o be o nyaka gore ba be kgaufsi le areka e kgethwa ya kgwerano le ditlabakelo tša tabarenakele. Lega go le bjalo, mo-Lefi yo mongwe le yo mongwe, go sa šetšwe gore ke wa Kahathe goba go se bjalo, o ile a thabela ditokelo tše di kgahlišago. (Numeri 1:​51, 53) Ka manyami, ba bangwe ga se ba ka ba leboga ditokelo tša bona. Go e na le go ikokobeletša bolaodi bja Modimo ka potego e sa kwanantšhego, ba ile ba se ke ba kgotsofala gomme ba thoma go ba le boikgogomošo, go rata maemo le lehufa. Mo-Lefi yo a bitšwago Kora e be e le yo mongwe wa bona.

“ ’Me Byale [a] le Nyaka     le Byôna Boperisita?”

8. (a) Kora e be e le mang? (b) Ke eng seo se ka bego se ile sa dira gore Kora a thome go lebelela baperisita ka pono ya motho?

⁸ Kora e be e se hlogo ya lapa la lešika la bo-tate  la Lefi, e bile e be e se hlogo ya malapa a ba-Kahathe. (Numeri 3:​30, 32) Lega go le bjalo, e be e le kgošana e hlomphegago Isiraeleng. Mediro ya Kora e ka ba e ile ya dira gore a šome kgaufsi le Arone le barwa ba gagwe. (Numeri 4:​18, 19) Ka ge a bile hlatse e iponetšego ka mahlo ya go se phethagale ga banna ba, Kora a ka ba a ile a re: ‘Ruri baperisita ba ga se ba phethagala, eupša go letetšwe gore ke ikokobeletše bona! E sego kgale kudu Arone o ile a dira namane ya gauta. Go rapela namane yeo go ile gwa dira gore batho ba gabo rena ba wele borapeding bja medimo ya diswantšho. Ga bjale Arone, e lego ngwanabo Moše o hlankela e le moperisita yo mogolo! A kgethollo e kaakang! Gomme go thwe’ng ka barwa ba Arone e lego Nadaba le Abihu? Ge e le gabotse, ba ile ba bontšha go nyatša ditokelo tša bona tša tirelo moo e lego gore Jehofa o ile a swanela ke go ba bolaya!’ * (Ekisodo 32:​1-5; Lefitiko 10:​1, 2) Go sa šetšwe gore Kora a ka ba a be a nagana eng, go molaleng gore o ile a thoma go lebelela boperisita ka pono ya motho. Se se ile sa lebiša borabeleng bja gagwe malebana le Moše le Arone gomme mafelelong malebana le Jehofa.—1 Samuele 15:​23; Jakobo 1:​14, 15.

9, 10. Ke tatofatšo efe yeo Kora le marabele-gotee le yena ba e dirilego malebana le Moše, gomme ke ka baka la’ng ba swanetše go ba ba ile ba phema seo go e-na le go mo latofatša?

⁹ Ka ge e be e le monna yo a nago le tutuetšo, go be go se thata go Kora go ikgobokeletša ba bangwe bao ba nago le boemo bja kgopolo bjo bo swanago le bja gagwe. Yena gotee le Dathane le Abirama ba ile ba hwetša bathekgi ba 250ka moka e le dikgošana tša phuthego. Ba ile ba ya go Moše le Arone ba le gotee gomme ba re: “Hleng ba phuthêxô bohle ké ba bakxêthwa ka moka xa bôná, ’me Morêna ó mo xo bôná! Le re’ng Lè ipea xodimo xa phuthêxô ya Morêna?”—Numeri 16:​1-3.

¹⁰ Go tšwa go seo marabele a bego a se tseba, a swanetše go ba a ile a phema go hlohla bolaodi bja Moše. Pejana ga moo, Arone le Miryama ba be ba sa tšwa go dira selo se se swanago. Ge e le gabotse, ba be ba bile ba neile mabaka a swanago le a Kora! Go ya ka Numeri 12:​1, 2, ba ile ba botšiša gore: “Afa Morêna ó bolêla ka Mošê fêla? A xa a bolêle le ka rena?” Jehofa o be a theeditše. O ile a laela Moše, Arone le Miryama go bokana mojakong wa ngwako wa kgwerano e le gore A ka ba bontšha gore o kgethile mang go ba moetapele. Ke moka, ka mo go kwagalago Jehofa o itše: “Xe mo xo lena xò na le moporofeta, Nna Morêna ke itsebiša xo yêna ka pônô, ke bolêla le yêna ka dilôrô. Xe e le Mošê mohlanka wa-ka xa ke mo dire ka mokxwa woo; mo lapeng la-ka ka moka e a botêxaxo ké yêna.” Ka morago ga moo, Jehofa o ile a otla Miryama ka lephera la lebakanyana.—Numeri 12:​4-7, 10.

11. Moše o ile a lebeletšana bjang le boemo bjo bo bego bo akaretša Kora?

¹¹ Kora le bao ba bego ba le ka lehlakoreng la gagwe ba swanetše go ba ba be ba lemogile tiragalo yeo. Go be go sa kgonege go lokafatša borabele bja bona. Lega go le bjalo, Moše o lekile go boledišana le bona ka go se fele pelo. O ile a ba kgothaletša gore ba leboge kudu ditokelo tša bona ka gore go bona: “A Le sa xalala xe Modimo wa Isiraele à Le hlaotše mo xo sethšaba sa Isiraele, a Le batametša xo Yêna?” Aowa, go be go sa ‘galalege’! Ba-Lefi ba be ba šetše ba na le mo gontši. Ke eng se se oketšegilego seo ba bego ba ka se kganyoga? Mantšu a Moše a tšwelago pele a ile a pepentšha mabaka a lego ka dipelong tša bona: “ ’Me byale [a] Le nyaka le byôna boperisita?” * (Numeri 12:3; 16:​9, 10) Lega go le bjalo, Jehofa o ile a arabela bjang borabeleng bjo malebana le bolaodi bja Modimo?

Moahlodi wa Isiraele o Tsena Ditaba Gare

12. Tswalano e tšwelago pele e amogelegago ya Isiraele le Modimo e be e ithekgile ka eng?

¹² Ge Jehofa a be a nea Isiraele Molao, o ile a botša batho gore ge e ba ba be ba e-kwa, ba tla ba “sethšaba se sekxêthwa” le gore setšhaba se be se ka dula e le se sekgethwa ge feela se amogetše tokišetšo ya Jehofa. (Ekisodo 19:​5, 6) Ga bjale, ge borabele bjo bo dirwago phatlalatša bo tšwela  pele, e be e le nako ya gore Moahlodi le Molai wa Isiraele a tsene ditaba gare! Moše o itše go Kora: “Wêna le lešaba la xaxo ka moka Le tlê pele xa Morêna ka moswana; e tlo ba wêna, le bôná, le Arone. Le tlo swara merufsi, e mongwê le e mongwê ó tlo swara wa xaxwe, a nunetša diôrêlô, a fihliša morufsi le diôrêlô pele xa Morêna; e tlo ba merufsi e makxolo a mabedi a naxo le masome a mahlano; Xomme wêna le Arone Le tlo swara ya lena.”—Numeri 16:​16, 17.

13. (a) Ke ka baka la’ng e be e le boikgogomošo gore marabele a neele diorelo pele ga Jehofa? (b) Jehofa o ile a šomana bjang le marabele?

¹³ Go ya ka Molao wa Modimo, ke baperisita feela bao ba bego ba ka nea diorelo. Kgopolo yona yeo ya gore ba-Lefi bao e sego baperisita ba nee diorelo pele ga Jehofa e be e swanetše go ba e šišintše marabele ao gore a nagane ka mo go nepagetšego. (Ekisodo 30:7; Numeri 4:​16) Ga se gwa ba bjalo ka Kora le bathekgi ba gagwe! Letšatši le le latelago o ile “a tla à rapile phuthêxô ka moka, ba êma mojakô wa Ngwakô wa Kxwêrano.” Pego e re botša gore: “Morêna a botša Mošê le Arone a re: Aroxanang le lešaba lé ke tlê ke le fetšê ka byakô.” Eupša Moše le Arone ba ile ba rapela gore maphelo a batho a bolokwe. Jehofa o ile a dumelelana le dikgopelo tša bona. Ge e le Kora le lešaba la gagwe, “banna bála ba makxolo a mabedi a naxo le masome a mahlano ba ba bexo ba swere diôrêlô, xo tšwile mollô xo Morêna wa ba fiša.”—Numeri 16:​19-22, 35. *

14. Ke ka baka la’ng Jehofa a ile a gata mogato o tiilego malebana le phuthego ya Isiraele?

¹⁴ Ka mo go makatšago, ba-Isiraele bao ba bonego kamoo Jehofa a ilego a dirišana le marabele ga se ba ka ba ithuta thuto. “Ka la ka moswana phuthêxô ka moka ya Ba-Isiraele e omantše Mošê le Arone ya re: Le bolaile sethšaba sa Morêna!” Ba-Isiraele ba be ba le ka lehlakoreng la balogi ba maano-mabe! Mafelelong, go se fele pelo ga Jehofa go ile gwa fela. Ga go le o teegaešita le Moše goba Aroneyo a bego a ka tsena ditaba gare bakeng sa batho lebakeng le. Jehofa o ile a bakela gore kotlo e wele bao ba sa kwego, gomme “ba ba hwilexo ka kôtlô yeo ké ba dikete tše lesome le metšô e mene le makxolo a šupaxo, xò sa balwe bála ba ba hwilexo ka molato wa Kora.”—Numeri 16:​41-49.

15. (a)  Ke ka mabaka afe ba-Isiraele ba bego ba swanetše go amogela boetapele bja Moše le Arone ka go se dika-dike? (b) Pego ye e go rutile’ng ka Jehofa?

¹⁵ Go be go sa hlokagale gore batho bao ka moka ba lahlegelwe ke maphelo a bona. Ge feela nkabe ba ile ba diriša matla a bona a go nagana ditabeng tše. Ba ka be ba ile ba ipotšiša dipotšišo tše bjalo ka tše rego: ‘Ke bomang bao ba ilego ba tšwelela pele ga Farao ka go bea maphelo a bona kotsing? Ke bomang bao ba ilego ba laela gore ba-Isiraele ba lokollwe? Ke mang a nnoši yo a ilego a laletšwa go namela Thaba ya Horebe ka morago ga go lokollwa ga ba-Isiraele go yo bolela le morongwa wa Modimo ba lebantše difahlego?’ Ka ntle le pelaelo pego e kgahlišago ya Moše le Arone e neile bohlatse bja potego ya bona e sa kwanantšhego go Jehofa le lerato la bona la go rata batho. (Ekisodo 10:​28; 19:​24; 24:​12-15) Jehofa ga se a ka a thabela go bolaya marabele. Lega go le bjalo, ge go be go e-ba molaleng gore batho ba be ba tlo phegelela tseleng ya bona ya borabele, o ile a gata mogato o tiilego. (Hesekiele 33:​11) Tše ka moka ke tša bohlokwa bjo bogolo go rena lehono. Ka baka la’ng?

Go Tseba Mokero Lehono

16. (a) Ke bohlatse bofe bjo bo swanetšego go ba bo ile bja kgodiša ba-Juda ba lekgolong la pele la nywaga gore Jesu e be e le moemedi wa Jehofa? (b) Ke ka baka la’ng Jehofa a ilego a tšeela sebaka boperisita bja ba-Lefi, gomme ka eng?

¹⁶ Lehono, go na le “setšhaba” se sefsa seo Jehofa e lego Moahlodi wa sona yo a sa bonagalego, Molai wa sona le Kgoši ya sona. (Mateo 21:​43) “Setšhaba” seo se thomile go ba gona lekgolong la pele la nywaga C.E. Ka nako yeo, tabarenakele ya mehleng ya Moše e be e tšeetšwe legato ke tempele e botse kua Jerusalema, moo ba-Lefi ba bego ba sa šoma. (Luka 1:​5, 8, 9) Lega go le bjalo, ka ngwaga wa 29 C.E., tempele e nngwe ya moya e bile gona, Jesu Kriste e le Moperisita yo Mogolo. (Ba-Hebere 9:​9, 11) Taba ya bolaodi bja  Modimo e ile ya tšwelela gape. Jehofa o be a tlo diriša mang go eta pele “setšhaba” se se sefsa? Jesu o ile a ipontšha a botegela Modimo ka go se kwanantšhe. O ile a rata batho. Gape o ile a dira dipontšho tše dintši tše di kgahlišago. Lega go le bjalo, go etša bo-rakgolokhukhu ba bona ba dinganga, bontši bja ba-Lefi ba ile ba gana go amogela Jesu. (Mateo 26:​63-68; Ditiro 4:​5, 6, 18; 5:​17) Mafelelong, Jehofa o ile a tšeela sebaka boperisita bja ba-Lefi ka bjo bo fapanegoboperisita bja bogoši. Boperisita bjoo bja bogoši bo tšwela pele go fihla le lehono.

17. (a) Ke sehlopha sefe seo se bopago boperisita bja bogoši lehono? (b) Jehofa o diriša bjang boperisita bja bogoši?

¹⁷ Ke bomang bao ba bopago boperisita bjo bja bogoši lehono? Moapostola Petro o araba potšišo yeo lengwalong la gagwe la mathomo le le buduletšwego. Petro o ngwaletše ditho tša batlotšwa tša mmele wa Kriste gore: “Xe e le lena Le moloko wo o hlaotšwexo, Le boperisita bya boxoši, Le sethšaba se sekxêthwa, Le selete se Yêna a lexo Mong wa sôna, xore Le tsebatšê mabothakxa a Eo a Le biditšexo Lé le lefsifsing, a Le biletša seetšeng sa xaxwe se se tlabaxo.” (1 Petro 2:9) Go tšwa mantšung a, go molaleng gore e le sehlopha, balatedi ba tloditšwego ba Jesu ba bopa ‘boperisita bjo bja bogoši,’ bjoo Petro gape a bo biditšego “sethšaba se sekxêthwa.” Ba hlama mokero woo Jehofa a o dirišago bakeng sa go nea batho ba gagwe tayo le tlhahlo ya moya.—Mateo 24:​45-47.

18. Go na le tswalano efe magareng ga bagolo bao ba kgethilwego le boperisita bja bogoši?

¹⁸ Bao ba emelago boperisita bja bogoši ke bagolo bao ba kgethilwego, bao ba hlankelago maemong a boikarabelo ka diphuthegong tša batho ba Jehofa lefaseng ka bophara. Banna ba ba swanelwa ke tlhompho ya rena le thekgo ya pelo ka moka, go sa šetšwe gore ke batlotšwa goba go se bjalo. Ka baka la’ng? Ka gobane, Jehofa o kgethetše bagolo maemo a bona ka moya wa gagwe o mokgethwa. (Ba-Hebere 13:​7, 17) Seo se ka ba bjang?

19. Ke ka tsela efe bagolo ba kgethwago ka moya o mokgethwa?

¹⁹ Banna ba ba bagolo ba fihlelela dinyakwa tšeo di boletšwego ka Lentšung la Modimo, e lego dienywa tša moya wa Modimo. (1 Timotheo 3:​1-7; Tito 1:​5-9) Ka gona, go ka bolelwa gore ba kgethwa ke moya o mokgethwa. (Ditiro 20:​28) Bagolo ba swanetše go tlwaelana ka mo go tseneletšego le Lentšu la Modimo. Go etša Moahlodi yo a Phagamego yo a ba kgethilego, bagolo le bona ba swanetše go hloya selo le ge e le sefe seo se bontšhago go beba sefahlego kahlolong.—Doiteronomio 10:​17, 18.

20. Ke eng seo o se lebogago ka bagolo bao ba šomago ka thata?

²⁰ Go e na le go hlohla bolaodi bja bona, re tloga re leboga e le ka kgonthe bagolo ba rena bao  ba šomago ka thata! Pego ya bona ya tirelo e botegago, yeo bontši bja bona ba bilego le yona ka nywaga-some e mentši, e tutuetša potego ya rena. Ba lokišeletša le go swara diboka tša phuthego ka mafolofolo, ba šoma gotee le rena go boleleng “ditaba tše dibotse tša Mmušo,” le go nea keletšo ya Mangwalo ge re e hloka. (Mateo 24:​14, NW; Ba-Hebere 10:​23, 25; 1 Petro 5:2) Ba a re etela ge re babja gomme ba a re homotša ge re lla. Ba thekga dikgahlego tša Mmušo ka potego e sa kwanantšhego le ka go hloka boithati. Moya wa Jehofa o godimo ga bona; ba amogelwa ke yena.—Ba-Galatia 5:​22, 23.

21. Bagolo ba swanetše go lemoga eng, gomme ka baka la’ng?

²¹ Ke therešo gore bagolo ga se ba phethagala. Ka ge ba lemoga mafokodi a bona, ga ba leke go buša mohlape, e lego “bohwa bja Modimo.” Go e na le moo, ba itebelela e le ‘bašomi-gotee le bona bakeng sa lethabo la bana babo bona.’ (1 Petro 5:3, NW; 2 Ba-Korinthe 1:​24, bapiša le NW.) Bagolo bao ba ikokobeditšego bao ba šomago ka thata ba rata Jehofa, gomme ba a tseba gore ge ba dutše ba mo ekiša kudu, ba tla tliša mehola e oketšegilego ka phuthegong. Ba naganne ka se, ka mehla ba katanela go hlagolela dika tša go boifa Modimo tše bjalo ka lerato, kwelobohloko le go se fele pelo.

22. Go ahla-ahla pego ya Kora go matlafaditše bjang tumelo ya gago ka mokgatlo wa Jehofa o bonagalago?

²² Re thaba gakaakang go ba le Jehofa e le Mmuši wa rena yo a sa bonagalego, Jesu Kriste e le Moperisita wa rena yo Mogolo, ditho tša batlotšwa ba boperisita bja bogoši e le barutiši ba rena gomme bagolo ba botegago ba Bakriste e le baeletši ba rena! Gaešita le ge go se na mokgatlo wo o hlahlwago ke batho wo o ka phethagalago, re thabišwa ke go kgona go hlankela Modimo gotee le badumedi-gotee le rena ba botegago, bao ba ikokobeletšago bolaodi bja Modimo ka lethabo!

[Mengwalo ya ka tlase]

O Ithutile Eng?

• Ke ditokišetšo dife tše lerato tšeo Jehofa a ilego a di dira bakeng sa go hlokomela ba-Isiraele?

• Ke ka baka la’ng go be go sa kgonege go lokafatša borabele bja Kora malebana le Moše le Arone?

• Re ka ithuta’ng tseleng yeo Jehofa a ilego a šomana le marabele?

• Re ka bontšha bjang gore re leboga ditokišetšo tša Jehofa lehono?

[Dipotšišo tša Thuto]

[Seswantšho go letlakala 9]

Na o lebelela kabelo le ge e le efe tirelong ya Jehofa e le tokelo?

[Seswantšho go letlakala 10]

“Le re’ng Lè ipea xodimo xa phuthêxô ya Morêna?”

[Seswantšho go letlakala 13]

Bagolo ba kgethilwego ba emela boperisita bjo bokgethwa