Phihlelo

Ke Tšofetše e Bile ke Khoše Bophelo

KA GE GO ANEGA MURIEL SMITH

Go kokotwa ka modumo o mogolo go ile gwa šišinya mojako wa-ka wa ka pele. Ke be ke sa tšwa go boela gae bakeng sa dijo tša matena ka morago ga go swarega kudu mesong modirong wa boboledi. Ka ge e be e le mokgwa wa-ka, ke be ke bediša meetse bakeng sa go dira teye gomme ke be ke le kgaufsi le go khutšiša maoto a-⁠ka ka seripa sa iri. Go kokota go ile gwa kwagala e le mo go phegelelago kudu, gomme ge ke e-⁠ya mojako, ke ile ka ipotšiša gore e ka ba e le mang yo a nketelago ka nako ye. Kapejana ke ile ka tseba. Banna ba babedi mojako wa-ka ba ile ba itsebiša e le bahlankedi ba maphodisa. Ba ile ba bolela gore ba be ba tlile go phuruputša ntlo ya-ka ba tsoma dipuku tšeo di tšweletšwago ke Dihlatse tša Jehofamokgatlo wo o thibetšwego.

Ke ka baka la’ng Dihlatse tša Jehofa di be di thibetšwe kua Australia, gomme go tlile bjang gore ke be yo mongwe wa tšona? Ka moka tše di thomile ka mpho ye ke e filwego ke mma ka ngwaga wa 1910, ge ke be ke na le nywaga e lesome.

LAPA la gešo le be le dula ka ntlong ya mapolanka lefelong la bodulo la ka ntle ga toropo la Crows Nest ka Leboa la Sydney. Ge ke boa gae ke e-⁠tšwa sekolong letšatšing le lengwe ke ile ka hwetša mma a bolela le monna mojakong wa ka pele. Ke be ke rata go tseba gore monna yo a sa tsebjego yo a bego a apere sutu gomme a rwele mokotla wo o tletšego dipuku e be e le mang. Ke ile ka laela ka dihlong gomme ka ya ka ntlong. Lega go le bjalo, metsotso e sego kae ka morago, mma o ile a mpitša. O ile a re: “Monna yo o na le dipuku tše di kgahlišago, gomme ka moka ga tšona di bolela ka Mangwalo. Ka ge bjale kgaufsinyana e tla be e le letšatši la gago la matswalo, o ka  hwetša roko e mpsha goba dipuku tše. O tla rata eng?”

Ke ile ka araba ka gore: “Mma, ke tla thabela go tšea dipuku.”

Ka gona ge ke na le nywaga e lesome, ke ile ka ba le dibolumo tša mathomo tše tharo tša Studies in the Scriptures, tšeo di ngwadilwego ke Charles Taze Russell. Monna yo a lego mojako o ile a hlalosetša mma gore o tla swanela go nthuša go kwešiša dipuku, ka ge mohlomongwe e tla ba tše thata kudu gore nka di kwešiša. Mma o ile a re o tla thabela go dira bjalo. Ka manyami, kapejana ka morago ga tiragalo ye mma o ile a hwa. Ka mafolofolo tate o ile a hlokomela nna, kgaetšedi ya-ka le ngwanešo, eupša ga bjale go be go na le maikarabelo a oketšegilego ao ke swanetšego go a rwala, gomme a ile a bonagala e le a nolago moko. Lega go le bjalo, masetla-pelo a mangwe a be a le kgaufsi le go direga.

Ntwa ya mathomo ya lefase e ile ya thoma ka 1914, gomme ngwaga o tee ka morago ga fao, tatago rena yo a rategago o ile a bolawa. Ga bjale re le ditšhiololo, kgaetšedi ya-ka le ngwanešo ba ile ba ya go dula le ba leloko, gomme ke ile ka romelwa kholetšheng yeo e nago le bodula-barutwana ya Katholika. Ka dinako tše dingwe ke be ke gateletšwa ke bodutu. Lega go le bjalo, ke leboga kudu tokelo yeo ke ilego ka e newa ya go tšwetša pele lerato la-ka la go rata mmino, kudu-kudu go letša piano. Nywaga e ile ya feta, gomme ke ile ka aloga kholetšheng e nago le lefelo la bodula-barutwana. Ka 1919, ke ile ka nyalana le Roy Smith, morekiši wa diletšo tša mmino. Ka 1920, re ile ra thoma lapa, gomme ke ile ka nwelela gape dipelaelong tša letšatši le letšatši tša bophelo. Eupša go thwe’ng ka dipuku tšela?

Moagišani o Aba Therešo ya Moya

Nywageng yeo ka moka, ke be ke dutše ke sepela le “dipuku tša Beibele.” Gaešita le ge ke be ke sa ka ka di bala, ka pelong ya-ka ke be ke tseba gore di be di swere molaetša wa bohlokwa. Ke moka, letšatšing le lengwe mafelelong a bo-1920, Lil Bimson yo e bego e le yo mongwe wa baagišani ba rena o ile a tla go re etela. Re ile ra ya ka phapošing ya bodulo, ra dula fase gomme ra nwa teye.

Kapejana o ile a re: “Le na le dipuku tšeo!”

Ke tlabegile, ke ile ka botšiša gore: “Dipuku dife?”

O ile a šupa dibolumo tša Studies in the Scriptures tšeo di bego di le ka rakeng ya dipuku. Lil o ile a di adima gomme a ya le tšona gae lona letšatšing leo gomme a di bala ka phišego. Go thabišwa ga gagwe ke seo a se badilego kapejana go ile gwa ba molaleng kudu. Lil o ile a hwetša dipuku tše oketšegilego go Barutwana ba Beibele, ka ge Dihlatse tša Jehofa ka nako yeo di be di tsebja bjalo. Go feta moo, ga se a ka a dika-dika go re botša dilo ka moka tšeo a bego a ithuta tšona. E nngwe ya dipuku tšeo a ilego a di hwetša e be e le The Harp of God, gomme kapejana e ile ya feleletša e le ka ntlong ya rena. Bophelo bja-ka tirelong ya Jehofa mafelelong bo ile bja thoma ge ke be ke beela nako ka thoko bakeng sa go bala kgatišo ye e theilwego Beibeleng. Mafelelong, ke ile ka hwetša dikarabo tša dipotšišo tše bohlokwa tšeo kereke ya-ka e sa kgonago go nnea tšona.

Ka mahlatse a-⁠ka, Roy o ile a lebiša tlhokomelo e kgethegilego go molaetša wa Beibele gomme bobedi bja rena re ile ra ba barutwana ba fišegago ba Beibele. Nakong e fetilego, Roy e be e le setho sa ba-Mason ba Lokologilego. Ga bjale lapa la rena le be le kopantšwe borapeding bja therešo, gomme yo mongwe wa bana babo rena o be a swara thuto ya Beibele le lapa ka moka gabedi ka beke. Kgothatšo e tšwelago pele e ile ya tla ge re thoma go ba gona dibokeng tšeo di bego di swarwa ke Barutwana ba  Beibele. Lefelo leo diboka di bego di swarelwa go lona kua Sydney e be e le holo e nyenyane yeo e hirwago lefelong la ka ntle ga toropo la Newtown. Ka nako yeo, go be go na le Dihlatse tša ka tlase ga tše 400 nageng ka moka, gomme bakeng sa bana babo rena ba bantši, go ba gona dibokeng go be go bolela go sepela sebaka se setelele.

Bakeng sa lapa la rena, go ba gona dibokeng go be go bolela go tshela Boemakepe bja Sydney ka mehla. Pele ga ge Leporogo la Boemakepe bja Sydney le ka agwa ka 1932, nakong e nngwe le e nngwe ge re be re tshela re be re swanetše go diriša seketswana. Go sa šetšwe nako le tefo ya leeto le, re ile ra katanela gore re se ke ra fetwa ke dijo le ge e le dife tša moya tšeo Jehofa a bego a di nea. Ka ge ntwa ya bobedi ya lefase e be e thoma, go be go le bohlokwa go dira maiteko a go ikaga ka mo go tiilego therešong ka ge taba ya go se tšee lehlakore e be e tlo kgoma lapa la rena ka go lebanya.

Nako ya Diteko le Meputso

Mathomong a bo-1930 e be e le dinako tše di thabišago kudu go nna le lapa la-ka. Ke kolobeditšwe ka 1930 gomme ka 1931 ke bile gona kopanong yela e gopolegago ge ka moka ga rena re be re ema ka maoto gomme re dumela go amogela leina le lebotse la Dihlatse tša Jehofa. Nna le Roy re ile ra katanela go phelela leina leo ka go tšea karolo mekgweng le masolong ka moka a go ruta ao mokgatlo o bego o a kgothaletša. Ka mohlala, ka 1932 re ile ra tšea karolo lesolong la pukwana e kgethegilego yeo e bego e hlametšwe go fihlelela mašaba a batho bao ba bego ba tlile go bona go bulwa ga Leporogo la Boemakepe bja Sydney. Selo se segolo ka mo go kgethegilego go rena e bile go dirišwa ga dikoloi tša digodiša-medumo, gomme re bile le tokelo ya gore koloi ya lapa la rena e tsenywe ditlabakelo tša modumo. Ka thekinolotši ye, re ile ra tlatša ditarata tša Sydney ka dipolelo tše di gatišitšwego tša Beibele tšeo di bego di newa ke Ngwanabo rena Rutherford.

Lega go le bjalo, maemo a ile a fetoga gape gomme a ba thata ka mo go oketšegilego. Ka 1932, Tšhaparego e Kgolo e ile ya hlasela Australia ka matla, ka gona nna le Roy re ile ra dira phetho ya go nolofatša maphelo a rena. Tsela e nngwe ye re dirilego se ka yona e bile ka go hudugela kgaufsi le phuthego, gomme ka go rialo re ile ra theoša ditshenyagalelo tša rena tša go sepela kudu. Lega go le bjalo, dikgateletšo tša tša boiphedišo e be e se selo ge poifo ya Ntwa ya II ya Lefase e be e hlasela lefase.

Ka baka la go kwa taelo ya Jesu ya go se be karolo ya lefase, Dihlatse tša Jehofa lefaseng ka bophara di bile bahlaselwa ba tlaišo, gomme Australia e be e sa hlaolwe. Ba hlohleletšwa ke kgalefo e sa laolegego, ba bangwe ba ile ba re bitša Makomanisi. Baganetši ba ba ile ba bolela ka mo go fošagetšego gore Dihlatse tša Jehofa di be di diriša diteišene tša radio tše nne tšeo di bego di na le tšona kua Australia go romela melaetša go madira a Japane.

Bana babo rena ba bafsa bao ba ilego ba biletšwa tirelo ya madira ba ile ba lebeletšana le kgateletšego e kgolo ya go kwanantšha. Ke thabela go bolela gore barwa ba rena ba bararo ka moka ba ile ba emela ditumelo tša bona gomme ba boloka go se tšee ga bona lehlakore. Morwa wa rena yo mogolo e lego Richard, o ile a ahlolelwa dikgwedi tše 18 kgolegong. Morwa wa rena wa bobedi Kevin, o ile a kgona go ngwadiša e le yo a ganago ka baka la letswalo. Lega go le bjalo, ka manyami morwa wa rena yo monyenyane e lego Stuart o ile a hwa kotsing ya sethuthuthu a le tseleng ya gagwe ya go yo phetha go itwela ga gagwe kgorong ya tsheko mabapi le taba ya go se tšee lehlakore. Kotsi ye e be e tloga e le e gateletšago e le ka kgonthe. Lega go le bjalo, go boloka go lebiša tlhokomelo ga rena Mmušong le kholofetšong ya Jehofa ya tsogo go re thušitše go kgotlelela.

Ba Lahlegetšwe ke Moputso wa Kgonthe

Ka January 1941, Dihlatse tša Jehofa kua Australia di ile tša ba ka tlase ga thibelo. Eupša, go etša ge baapostola ba Jesu ba dirile, nna le Roy re ile ra kwa Modimo e le mmuši go e na le batho, gomme re ile ra tšwela pele re šoma ka sephiring ka lebaka la nywaga e mebedi le seripa. E be e le ka nako ye moo maphodisa a mabedi a sa aparago yunifomo ao ke boletšego ka ona pejana a ilego a kokota mojakong wa-ka. Go diragetše’ng?

Go ba gona, ke ile ka a laletša gore a tsene. Ge a tsena ka ntlong, ke ile ka botšiša gore, “Na le tla tshwenyega ge nka fo fetša komiki ya-ka ya teye pele ga ge le ka phuruphutša ntlo?” Ka mo go makatšago, a ile a dumela gomme ke ile ka ya ka khitšhing ka rapela Jehofa gomme ka rulaganya dikgopolo tša-ka. Ge ke boa, lephodisa le lengwe le ile la tsena lefelong la rena la go ithuta gomme la tšea selo se sengwe le se sengwe seo le bego le ka se bona se na le leswao la Watchtower go sona, go  akaretša dikgatišo tše di bego di le ka mokotleng wa-ka wa go nea bohlatse le Beibele ya-ka.

Ke moka le ile la botšiša gore: “Na o kgodišegile gore ga o na dikgatišo le ge e le dife tše dingwe tšeo di utilwego ka mapokising? Re na le tsebišo ya gore o ba gona sebokeng beke e nngwe le e nngwe holong e lego mafelelong a tsela ye le gore o iša dipuku tše dintši fao.”

Ke ile ka araba ka gore: “Ke therešo, eupša gona bjale ga di gona fao.”

Le ile la re: “Ee, re tseba seo Mdi. Smith. E bile re tseba le gore dipuku di lotwa ka magaeng a batho ba dulago go dikologa selete.”

A ile a hwetša mapokisi a mahlano ka phapošing ya go robala ya morwa wa rena a nago le dikopi tša pukwana ya Freedom or Romanism.

Le ile la botšiša gore: “Na o kgodišegile gore ga le na selo se sengwe ka karatšheng?”

Ke ile ka re: “Aowa, ga go na selo ka fao.”

Ke moka le ile la bula raka e lego ka phapošing ya bojelo. Le ile la hwetša difomo tše di sego tša tlatšwa selo, tšeo di bego di dirišetšwa go tlatša pego ya phuthego. Le ile la di tšea gomme la gapeletša go ya go lebelela ka karatšheng.

Ke ile ka re: “E-tlang ka tsela ye.”

A ile a ntšhala morago ge ke e-⁠tšwa ke e-⁠ya ka karatšheng gomme ka morago ga go e phuruphutša, a ile a feleletša a tlogile.

Go ba gona, maphodisa ao a be a nagana gore a na le moputso o kgahlišago ka mapokising ao a mahlano! Lega go le bjalo, a be a tlogetše moputso wa kgonthe morago. Mehleng yeo ke be ke hlankela ke le mongwaledi wa phuthego, gomme ke be ke na le lelokelelo la bagoeledi ba phuthego le tsebišo e nngwe e bohlokwa ka ntlong. Ke leboga gore bana babo rena ba re lemošitše gore re itokišetše diphuruphutšo tše bjalo, gomme ke be ke utile mangwalo a ka kelohloko. Ke be ke a tsentše ka gare ga dienfelopo gomme ka a bea ka tlase ga ditšhitswana tša teye, swikiri le folouru. A mangwe ke be ke a bolokile ka gare ga seroba sa dinonyana, seo se bego se le kgaufsi le karatšhe. Ka gona maphodisa a ile a fo feta yona tsebišo ye a bego a e nyaka.

Go Tsenela Tirelo ya Nako e Tletšego

Ka 1947, bana ba rena ba bagolo ba be ba šetše ba thomile malapa a bona. Ka nako ye, nna le Roy re ile ra phetha gore re ka kgona go thoma bodiredi bja nako e tletšego. Go be go nyakega thušo tšhemong ya ka Borwa bja Australia, ka gona re ile ra rekiša legae la rena gomme ra reka kharabane yeo re ilego ra e rea leina la Mitsipa, e lego leo le bolelago gore “Watchtower.” Mohuta wo wa bophelo o ile wa re dira gore re kgone go bolela mafelong a kgole. Gantši re be re šoma tšhemong e sa abjago ya magaeng. Ke na le dikgopolo tše dintši tše botse tša nako yeo. Ke ile ka swara e nngwe ya dithuto tša-ka le mosadi yo mofsa yo a bitšwago Beverly. Pele a ka tšwela pele go fihlela a kolobetšwa, o ile a tloga tikologong yeo. Nagana ka lethabo la-ka ge nywaga e mentši ka morago kgaetšedi a e-⁠tla go nna kopanong gomme a re ke yena Beverly! Se se ile sa nthabiša gakaakang ka morago ga nywaga yeo ka moka go mmona a hlankela Jehofa gotee le monna wa gagwe le bana.

Ka 1979, ke bile le tokelo ya go ba gona Sekolong sa Tirelo ya Bobulamadibogo. E nngwe ya dilo tšeo di ilego tša gatelelwa sekolong seo e bile gore, e le gore o kgone go kgotlelela bodireding bja bobulamadibogo o swanetše go ba le lenaneo le lebotse la thuto ya motho ka noši. Ke ile ka hwetša seo e le therešo e le ka kgonthe. Go ithuta, diboka le bodiredi e bile bophelo bja-ka ka moka. Ke go lebelela e le tokelo gore ke hlanketše ke le mmulamadibogo wa ka mehla ka nywaga ya ka godimo ga e 50.

Go Lebeletšana le Mathata a tša Maphelo

Lega go le bjalo, nywaga-some e sego kae ya mafelelo e ile ya ntebanya le ditlhohlo tše kgethegilego.  Ka 1962, ke ile ka hlahlobja gomme gwa hwetšwa gore ke na le bolwetši bja mahlo bjo bo bakago bofofu. Ka nako yeo, kalafo yeo e bego e le gona e be e lekanyeditšwe ka tsela e itšego, gomme go bona ga-ka go ile gwa mpefala ka lebelo kudu. Boemo bja maphelo bja Roy le bjona bo ile bja phuhlama, gomme ka 1983 o ile a hwa lehlakore o šoro moo go ilego gwa mo tlogela a hwile ditho go iša bokgoleng bjo itšego gomme a sa kgone go bolela. O ile a hlokofala ka 1986. O nneile thekgo e holago tirelong ya-ka ya nako e tletšego, gomme ke tloga ke mo hlologela e le ka kgonthe.

Go sa šetšwe ditšhitišo tšeo, ke ile ka leka go boloka lenaneo le lebotse la moya. Ke ile ka reka koloi e tiilego, yeo e swanelago tirelo ya tšhemo tikologong ya rena yeo e nyakilego e swana le ya magaeng, gomme ka tšwetša pele tirelo ya-ka ya bobulamadibogo ka thušo ya morwedi wa-ka Joyce. Go bona ga-ka go ile gwa mpefala ganyenyane-ganyenyane go fihlela leihlo la-ka le letee le sa hlwe le sa bona ka mo go feletšego. Dingaka di ile tša le tsenya leihlo la galase. Go sa dutše go le bjalo, ke diriša galase ya go godiša ditlhaka le dikgatišo tša mongwalo o mogolo, ke be ke kgona go fetša diiri tše tharo goba tše hlano ka letšatši ke ithuta ka go diriša leihlo la-ka le letee.

Ka mehla dinako tša go ithuta di be di le bohlokwa kudu go nna. Ka gona o ka akanya gore ke ile ka tšhoga o šoro gakaakang ge mantšiboeng a mangwe ge ke be ke ithuta, kapejana ke sa hlwe ke sa kgona go bona selo. Go be go le bjalo ka ge eka motho yo mongwe o timile lebone. Ke be ke se sa bona ka mo go feletšego. Ke ile ka tšwela pele ke ithuta bjang? Go ba gona, gaešita le ge gona bjale ke nyakile ke le sefoa, ke ithekga ka dikhasete le ka thekgo e lerato ya lapa la-ka go mpoloka ke tiile moyeng.

Go Kgotlelela go Fihla Mafelelong

Gona bjale, ka ge ke na le nywaga e fetago e lekgolo go na le dilo tše dintši tše di gwahlafetšego boemong bja-ka bja tša maphelo, gomme ke ile ka swanela ke go goga maoto ka tsela e bonagalago. Ka dinako tše dingwe, ke ikwa ke gakanegile ganyenyane. Ge e le gabotse, ka ge gona bjale ke sa kgone go bona ka mo go feletšego, ka dinako tše dingwe ke tloga ke timela e le ka kgonthe! Nka rata go ba le dithuto tša Beibele gape, eupša ka boemo bja-ka bja maphelo gona bjale, ga ke sa kgona go tšwa gomme ka di hwetša. Mathomong, se se ile sa nkgateletša. Ke ile ka swanela ke go ithuta go amogela mafokodi a-⁠ka gomme ke kgotsofalele go dira seo nka kgonago go se dira. Se se be se se bonolo. Lega go le bjalo, ke tokelo gakaakang gore kgwedi e nngwe le e nngwe ke kgona go bega nako yeo ke e feditšego ke bolela ka Modimo wa rena yo mogolo, Jehofa. Ge dibaka tša gore ke bolele ka Beibele di tšwelela, go etša ge baoki, babapatši le batho ba bangwe ba e-⁠tla ka legaeng la-ka, ke diriša sebaka se ka bohlale go bolela le bona.

E nngwe ya ditšhegofatšo tša-ka tše kgotsofatšago kudu ke go bona meloko e mene ya lapa la-ka e hlankela Jehofa ka potego. Ba bangwe ba ba ba ile ba katanela go fihlelela go hlankela e le badiredi ba babulamadibogo mafelong ao go nyakegago thušo e kgolo, go hlankela e le bagolo goba bahlanka ba bodiredi le go hlankela Bethele. Ee, go etša ba bantši ba moloko wa-ka, ke be ke nagana gore bofelo bja tshepedišo ye ya dilo bo tla fihla kgaufsinyana kudu. Eupša ke bone koketšego e kgolo gakaakang nakong ya nywaga-some e šupago ya tirelo ya-ka! Go nkgotsofatša kudu gore ke ile ka tsenya letsogo selong se itšego se segolo gakaakaa.

Baoki bao ba nketelago ba bolela gore ke swanetše go ba ke phedišwa ke tumelo ya-ka. Ke dumelelana le bona. Go ba mafolofolo tirelong ya Jehofa go tliša bophelo bjo bokaone kudu. Go etša Kgoši Dafida, nka bolela e le ka kgonthe gore ke tšofetše gomme ke khoše bophelo.—1 Koronika 29:⁠28.

(Kgaetšedi Muriel Smith o hwile ka April 1 2002, ge sehlogo se se be se feleletšwa. O be a šaletše ke kgwedi e tee gore a be le nywaga e 102, o be a tloga e le mohlala wa go botega le go kgotlelela.)

[Diswantšho go letlakala 24]

Ge ke be ke e-⁠na le nywaga e ka bago e mehlano le ge ke be ke na le nywaga e 19 ge ke gahlana le monna wa-ka Roy

[Seswantšho go letlakala 26]

Koloi ya rena le kharabane yeo re ilego ra e rea Mitsipa

[Seswantšho go letlakala 27]

Ke na le monna wa-ka Roy, ka 1971