Bagoeledi Ba Mmušo Ba A Bega

‘Lentšu la Modimo ke le Matla’

SEHLAKAHLAKENG sa Caribbean sa letšatši le le fišago sa kua Jamaica, bontši bja batho ba tlwaelane le Beibele. Ge e le gabotse King James Version, e ka hwetšwa mo e ka bago ka legaeng le lengwe le le lengwe gomme batho ba bone gore “Lentšu la Modimo ké le le phelaxo, ké le matla.” (Ba-Hebere 4:​12) Matla a a kgona go fetola maphelo, go etša ge go bontšhitšwe phihlelong ye e latelago.

Monna yo a bitšwago Cleveland o be a sa tšwa go fihla gae a e-tšwa mošomong ge yo mongwe wa Dihlatse tša Jehofa a be a mo etela. Ka morago ga go boledišana ka dintlha tše dingwe tša Mangwalo, Hlatse e ile ya mo tlogelela thušo ya go ithuta Beibele, e lego puku ya Tsebo e Išago Bophelong bjo bo sa Felego. Cleveland ga se a lemoga kamoo Lentšu la Modimo le bego le tla ba le matla ka gona bophelong bja gagwe.Cleveland o be a atiša go rapela gararo ka letšatši, a kgopela Modimo gore a mo thuše go hwetša tsela ye e nepagetšego ya go Mo rapela. Cleveland o be a kgodišegile gore batswadi ba gagwe ba be ba sa rapele ka tsela e nepagetšego, eupša ka morago ga go hlahloba madumedi a mangwe, o ile a nyama kudu. Le ge a be a kwele ka ga Dihlatse tša Jehofa, o be a tloga a belaela ge e ba di e-na le therešo. Go sa šetšwe pelaelo ya gagwe yeo e bego e mo dira gore a dika-dike, Cleveland o ile a dumela go ithuta Beibele le Hlatse yeo e bego e mo etetše. Ka baka la’ng? Ka gobane a be a nyaka go bontšha Dihlatse gore di fošitše!

Kapejana Cleveland o ile a ithuta gore ditswalano tše di gobogilego tšeo a bego a e-na le tšona le basadi ba babedi ba fapanego di be di sa kgahliše Modimo. (1 Ba-Korinthe 6:​9, 10) Ka morago ga dithuto tše pedi feela, o ile a tia sebete ka go fediša ditswalano tša gagwe le basadi bao. Gape o ile a thoma go ba gona dibokeng tša Bokriste Holong ya Mmušo. Eupša se se ile sa bonagala e le teko e nngwe gape.

Cleveland o be a tloga a le mafolofolo sehlopheng sa setšhaba sa gabo sa kgwele ya maoto, gomme dipapadi tša sona di be di thulana le go ba gona ga gagwe dibokeng. O be a tla dira’ng? Go sa šetšwe kgateletšo e matla go tšwa go dibapadi-gotee le yena, mohlahli le bagwera, Cleveland o ile a dira phetho ya go tlogela sehlopha sa kgwele ya maoto. Ee, Lentšu la Modimo le be le thoma go ba le matla, le mo tutueletša go dira se se botse!Matla a Lentšu la Modimo a ile a bonagala gape ge Cleveland a be a thoma go abelana tsebo ya gagwe ya Beibele le ba bangwe. (Ditiro 1:8) Ka baka leo, ba babedi ba sehlopha seo a bego a se bapalela ba ile ba thoma go ba gona dibokeng tša Dihlatse tša Jehofa. Ka morago ga gore Cleveland a swanelege go ba mogoeledi wa ditaba tše dibotse, o ile a hwetša lethabo le legolo bodireding, a diriša Lentšu la Modimo go thuša ba bangwe.

Ka go tšwela pele a tutuetšwa ke matla a Lentšu la Modimo, mafelelong Cleveland o ile a bontšha boineelo bja gagwe go Jehofa ka kolobetšo ya meetseng gomme o neilwe tokelo ya go hlankela e le modiredi wa nako e tletšego le mohlanka wa bodiredi ka phuthegong.

Kua Jamaica le lefaseng ka moka, batho ba dikete ba ithutile gore ka kgonthe Lentšu la Modimo “ké le le phelaxo, ké le matla.”

[Mmapa/Seswantšho go letlakala 8]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

JAMAICA

[Mothopo]

Map and globe: Mountain High Maps® Copyright © 1997 Digital Wisdom, Inc.