Thuto go Tšwa go Mogolodi

“MOXOLODI kua sebakeng o tseba lebaka la wôna . . . xe e le sethšaba sa-ka sôna xa se tsebe molaô wa Morêna.” (Jeremia 8:7) Ka mantšu ao, moporofeta Jeremia o be a bolela kahlolo ya Jehofa malebana le batho ba Juda ba bahlanogi, bao ba bego ba lahlile Jehofa Modimo wa bona gomme ba retologela borapeding bja medimo e šele. (Jeremia 7:​18, 31) Ke ka baka la’ng Jeremia a ile a diriša mogolodi e le mohlala o šomago go ba-Juda bao ba sa botegego?

Go ba-Isiraele, mogolodi, kudu-kudu mogolodi o mošweu o be o tlwaetšwe go bonwa ge o be o huduga go phatša dinaga tša mehleng ya Beibele. Leina la Sehebere la nonyana ye e kgolo ya maoto a matelele yeo e šomago ka thata ke sebopego sa botshadi sa lentšu leo le bolelago gore “yo a botegago ka go se kwanantšhe; yo a nago le botho bjo lerato.” Se ke seo se swanetšego, ka gobane ka go se swane le dinonyana tše dingwe tše dintši, megolodi e mešweu ya tona le ya tshadi e phela e le e mebedi bophelo ka moka. Ka morago ga go fetša marega e le ditikologong tše di ruthetšego, ngwaga o mongwe le o mongwe megolodi e mentši e boela dihlageng tšeo e ilego ya di diriša pele.

Boitshwaro bjo bja tlhago bja mogolodi bo bontšha seka sa potego e sa kwanantšhego ka ditsela tše dingwe tše di lemogegago kudu. Bobedi nonyana ya tona le ya tshadi di tšea karolo go alameleng mae le go fepa mafotwana. Puku ya Our Magnificent Wildlife e hlalosa gore: “E le batswadi, megolodi gantši e botegelana ka go se kwanantšhe. Kua Jeremane mogolodi wa tona o ile wa fofela godimo ga mathale a mohlagase gomme o ile wa fišwa ke mohlagase. Molekane wa yona o ile a tšwela pele go alamela mae a nnoši ka matšatši a mararo, nakong yeo o ile a tlogela sehlaga gatee feela ka nakwana go ya go nyaka dijo. . . . Lebakeng le lengwe, ge mogolodi wa tshadi o be o thuntšwe, tate o ile a godiša mafotwana.”

Ka kgonthe, ka go fo bontšha potego ka tlhago go molekane wa wona wa bophelo ka moka le tlhokomelo e lerato go mafotwana a wona, mogolodi o phethagatša seo se bolelwago ke leina la ona“yo a botegago ka go se kwanantšhe.” Ka gona, megolodi e bile thuto e matla go ba-Isiraele ba sa botegego ba melala e methata.

Go batho ba bantši lehono, go botega ka go se kwanantšhe ke kgopolo e tšwilego fešenenge kgahlišago eupša e le e sa šomego. Go gola ka lebelo ga tlhalo, go tlogela, go radia le mehuta e mengwe ya bofora go bontšha gore go botega ka go se kwanantšhe ga go sa tšeelwa godimo. Ka mo go fapanego, Beibele e godiša kudu go botega ka go se kwanantšhe mo go tutuetšwago ke lerato le botho. E kgothaletša Bakriste gore ba “apare motho yo mofsa yo a bopilwego go ya ka thato ya Modimo tokong ya therešo le potegong.” (Ba-Efeso 4:​24, NW) Ee, motho yo mofsa o re thuša gore re botege ka go se kwanantšhe, eupša le gona re ka ithuta thuto ya potego e sa kwanantšhego go tšwa go mogolodi.