Dipotšišo tše Tšwago go Babadi

Mangwalo a nea tlhahlo efe ka go tlwaetšwa ga bana ge yo mongwe wa batswadi e le Hlatse ya Jehofa gomme yo mongwe e se yona?

Melao e mebedi ya motheo ya Mangwalo ya bohlokwa e nea tlhahlo ka go tlwaetšwa ga bana ke motswadi yo e lego Hlatse gomme a na le molekane yoo e sego Hlatse. O mongwe ke wo o rego: “Mo xo batho le Modimo, wa xo kwešešwa ke Modimo.” (Ditiro 5:​29) O mongwe ke wo o rego: “Monna ké hlôxô ya mosadi, byalo ka xe Kriste è le Yêna hlôxô ya phuthêxô.” (Ba-Efeso 5:​23) Molao wo wa bobedi ga o šome feela go basadi bao banna ba bona e lego Dihlatse eupša o šoma gape le go basadi bao banna ba bona e sego Dihlatse. (1 Petro 3:1) Motswadi yo e lego Hlatse a ka leka-lekanya bjang melao ye ya motheo ge a ruta bana ba gagwe?

Ge e ba monna e le yo mongwe wa Dihlatse tša Jehofa, o na le boikarabelo bja go nea dilo tša moya le tša nama go ba lapa la gagwe. (1 Timotheo 5:8) Le ge mma yo a sa dumelego a ka fetša nako e ntši le bana, tate yo e lego Hlatse o swanetše go ruta bana ba gagwe ka go ba nea tlwaetšo ya moya ka gae le ka go ya le bona dibokeng tša Bokriste moo ba tla holwago ke thuto ya boitshwaro bjo bobotse le bogwera bjo bo agago.

Go thwe’ng ge e ba mosadi wa gagwe yo e sego Hlatse a phegelela go ya le bana ba bona lefelong la gagwe la borapedi goba a ba ruta ditumelo tša gagwe? Molao wa naga o ka no mo nea tshwanelo ya go dira bjalo. Go gokeletšwa ga bana ditirong tša borapedi mafelong a bjalo go ka ithekga kudu ka matla a go ruta ga tate dilo tša moya. Ge bana ba dutše ba gola, thuto ya Mangwalo yeo ba e rutwago ke tatago bona e swanetše go ba thuša go latela therešo ya Lentšu la Modimo. Monna yo a dumelago o tla thaba gakaakang ge e ba bana ba gagwe ba ka emela therešo!

Ge e ba mma e le yo mongwe wa Dihlatse tša Jehofa, o swanetše go hlompha molao wa motheo wa bohlogo ge a dutše a kgomegile ka bophelo bjo bobotse bja ka mo go sa felego bja bana ba gagwe. (1 Ba-Korinthe 11:3) Maemong a mantši, molekane wa gagwe yo a sa dumelego a ka se re selo ge e ba mosadi wa gagwe yo e lego Hlatse a nea bana ba bona thuto ya boitshwaro bjo bobotse le ya moya, le thušo e swanago le yeo e a hwetšagala dibokeng tša batho ba Jehofa. Mma a ka thuša monna wa gagwe yo a sa dumelego go bona mohola wa thuto e agago yeo bana ba bona ba e hwetšago ka mokgatlo wa Jehofa. A ka gatelela ka bohlale mohola wa go nweletša melao ya motheo ya Beibele ya boitshwaro bjo bobotse baneng ba bona ka ge ba phela lefaseng leo le phuhlamago boitshwarong.

Lega go le bjalo, monna yo a sa dumelego a ka phegelela gore bana ba gagwe ba be bodumeding bja gagwe, ka go ya le bona lefelong la gagwe la borapedi le go ba nea thuto ya bodumedi go ya ka tumelo ya gagwe. Goba monna e ka ba yo a ganetšago bodumedi ka mo go feletšego gomme a phegelela gore bana ba gagwe ba se rutwe thuto le ge e le efe ya bodumedi. Ka ge e le hlogo ya lapa, ke yena a nago le boikarabelo bjo bogolo bja go dira phetho. *

A dutše a hlompha bohlogo bja monna wa gagwe, e le Mokriste yo a ineetšego, mosadi yo e lego Hlatse o tla gopola boemo bja kgopolo bja moapostola Petro le moapostola Johane, bao ba itšego: “Xe e le rena xa re kxône xo lesa xo bolêla tše  re di bonexo le tše re di kwilexo.” (Ditiro 4:​19, 20) Ka go kgomega ka bophelo bjo bobotse bja moya bja bana, mma yo e lego Hlatse o tla hwetša dibaka tša go ba nea tlhahlo ya boitshwaro. O na le boikarabelo go Jehofa bja go ruta ba bangwe ka seo a se tsebago e le therešo, gomme bana ba gagwe ba a akaretšwa. (Diema 1:8, Mateo 28:​18, 20) Mma yo e lego Hlatse a ka lebeletšana bjang le boemo bjo bjalo bjo bo gakantšhago?

Ka mohlala nagana ka taba ya go dumela go Modimo. Mosadi yo e lego Hlatse a ka fo se kgone go swara thuto ya Beibele ye e rulagantšwego le bana ba gagwe ka baka la dithibelo tša monna wa gagwe. Na lebaka le le swanetše go mo dira gore a pheme go botša bana ba gagwe selo le ge e le sefe ka Jehofa? Le gatee. Mantšu a gagwe le ditiro tša gagwe di tla bontšha ka mo go lego molaleng gore o dumela go Mmopi. Ka ntle le pelaelo bana ba gagwe ba tla ba le dipotšišo ka taba yeo. O swanetše go ikwa a lokologile go diriša tokologo ya gagwe ya bodumedi ka go bolela ka go dumela ga gagwe go Mmopi, go akaretša le go bana ba gagwe. Gaešita le ge a ka se kgone go swara thuto ya Beibele le bana goba go ya le bona dibokeng ka mehla, a ka tsenya ka go bona tsebo ya go tseba Jehofa Modimo.—Doiteronomio 6:7.

Mabapi le tswalano magareng ga Hlatse le molekane wa yona yo a sa dumelego, moapostola Paulo o ngwadile gore: “Xobane monna e a sa dumelexo ó kxethexile ka mosadi; le mosadi e a sa dumelexo ó kxethexile ka monna. Xe xo ka be xo se byalo, bana ba lena e ka be e le ba dithšila; xomme byale ba kxethexile.” (1 Ba-Korinthe 7:​14) Jehofa o lebelela tswalano ya lenyalo e le e kgethwa ka baka la molekane yo a dumelago gomme bana ba lebelelwa e le ba bakgethwa mahlong a Jehofa. Mosadi yo e lego Hlatse o swanetše go dira se se lego matleng a gagwe go thuša bana ba gagwe go kwešiša therešo, a tlogelela ditla-morago tša mafelelo diatleng tša Jehofa.

Ge bana ba dutše ba gola, ba swanetše go kgetha gore ba tla ema lehlakoreng lefe ba ithekgile ka tsebišo yeo ba e hweditšego batswading ba bona. Ba ka fo kgetha go dira tumelelanong le mantšu a Jesu a rego: “Yo e rexo xe a rata tat’axwe le mm’axwe, a fetiša xo rata Nna, xa a swanêlwa ke xo ba wa-ka.” (Mateo 10:​37) Le gona ba laelwa gore: “Lena Bana! Kwang batswadi ba lena Moreneng, xobane ké xôna xo loka.” (Ba-Efeso 6:1) Bafsa ba bantši ba kgethile ‘go kwa Modimo e le mmuši’ go e na le motswadi yo e sego Hlatse, go sa šetšwe go tlaišwa ke motswadi yoo. E tla ba mo go putsago gakaakang go motswadi yo e lego Hlatse go bona bana ba kgetha go hlankela Jehofa go sa šetšwe kganetšo!

[Mengwalo ya ka tlase]