Ke Mang yo o Swanetšego go Mmotegela ka go se Kwanantšhe?

“Naga ya gabo rena: . . . a e dule e nepile; ke naga ya gabo rena, go sa šetšwe gore e nepile goba e fošitše.”—Stephen Decatur, molaodi wa dikepe tša ntwa wa United States, 1779-​1820.

POTEGO e sa kwanantšhego ka mo go sa belaetšego ya go botegela naga ya gabo motho e lebelelwa ke ba bantši e le boikarabelo bjo bogolo. Ba bangwe ba ka ngwalolla mantšu a Stephen Decatur ka gore ‘Bodumedi bja-ka, a bo dule bo nepile; ke bodumedi bja-ka go sa šetšwe gore bo nepile goba bo fošitše.’

Ka mo go kwagalago, naga goba bodumedi bjo bo nyakago potego ya rena e sa kwanantšhego gantši bo laolwa ke lefelo leo re belegetšwego go lona, eupša phetho ya gore ke mang yo re swanetšego go mmotegela ke ya bohlokwa kudu gore re ka fo e tlogelela gore e itiragalele. Lega go le bjalo, go belaela potego e sa kwanantšhego yeo motho a godišitšwego ka yona go nyaka sebete gomme go tšweletša ditlhohlo.

 Teko ya Potego e sa Kwanantšhego

Mosadi yo a goletšego kua Zambia o re: “Ke be ke sekametše bodumeding go tloga ge ke sa le yo monyenyane. Thapelo ya ka mehla ya lapa ka phapošing e kgethwa, go bina matšatši a bodumedi le go ba gona ka mehla tempeleng e be e le karolo ya tsela yeo ke godišitšwego ka yona. Bodumedi bja-ka le borapedi di be di sepedišana kudu le setšo sa-ka, setšhaba le lapa.”

Lega go le bjalo, ge a be a e-na le nywaga ya go obelela e masome-pedi, o ile a thoma go ithuta Beibele le Dihlatse tša Jehofa gomme kapejana ka morago ga moo o ile a dira phetho ya go fetoša bodumedi bja gagwe. Na se e be e le go se botege?

Zlatko o godišeditšwe kua Bosnia, gomme o ile a lwa ka lebakanyana ntweng yeo e ilego ya aparetša naga ya gabo. Le yena o ile a thoma go ithuta Beibele le Dihlatse tša Jehofa. Ga bjale o gana go lwa le motho le ge e le mang. Na ga a botege?

Tsela yeo o arabago dipotšišo tšeo ka yona e ithekgile ka boemo bja gago bja kgopolo. Mosadi yo go boletšwego ka yena pejana o re: “Setšhabeng sa gešo, go fetoša bodumedi bja motho moo go sepedišana le lenyatšo la go se lebalelwe; go be go lebelelwa e le go se botege, go eka lapa la gabo motho le setšhaba.” Ka mo go swanago, bao e bego e le bahlabani gotee le Zlatko ba be ba lebelela batho le ge e le bafe bao ba ganago go lwa ka lehlakoreng la bona e le baeki. Eupša bobedi mosadi yoo le Zlatko ba dumela gore mohuta o phagamego wa potego e sa kwanantšhegogo botegela Modimo ka go se kwanantšheo tutuetša ditiro tša bona. Sa bohlokwa kudu, Modimo o lebelela bjang bao ba nyakago go mmotegela ka go se kwanantšhe?

Potego e sa Kwanantšhego ya KgonthePontšho ya Lerato

Kgoši Dafida o ile a re go Jehofa Modimo: “Yo botho O mo kwiša botho [“potego e sa kwanantšhego,” NW].” (2 Samuele 22:​26) Lentšu la Sehebere leo le fetoletšwego e le “potego e sa kwanantšhego” mo le fetišetša kgopolo ya go ba botho bjo ka lerato bo ikgomaganyago le selo go fihlela morero wa sona wa mabapi le selo seo o phethagaditšwe. Ka boemo bja kgopolo bjo bo swanago le bja mma yo a nago le ngwana yo a anyago, ka lerato Jehofa o ikgomaganya le bao ba mmotegelago ka go se kwanantšhe. Jehofa o ile a bolela mabapi le bahlanka ba gagwe bao ba botegago ka go se kwanantšhe ba Isiraeleng ya bogologolo gore: “A fa mosadi a ka lebala leseanyana l’axwe, a lesa xo šôkêlwa ngwana yo a mmelexexo?Le xe yêna a ka lebala, Nna nka se Xo lebale.” (Jesaya 49:​15) Bao ba ratago go bea go botegela Modimo ka go se kwanantšhe ka godimo ga tšohle maphelong a bona ba kgonthišetšwa tlhokomelo ya gagwe e lerato.

Go botegela Jehofa ka go se kwanantšhe go ithekgile ka lerato. Go tutuetša motho go rata seo Jehofa a se ratago le go hloya dilo tše kgopo tšeo Jehofa a di hloilego. (Psalme 97:​10) Ka ge seka se segolo sa Jehofa e le lerato, go botegela Modimo ka go se kwanantšhe go thuša go thibela motho go dira dilo ka tsela yeo e sego ya lerato. (1 Johane 4:8) Ka gona ge e ba motho a fetoša ditumelo tša gagwe tša bodumedi ka baka la go botegela Modimo ka go se kwanantšhe, seo ga se bolele gore ga a sa rata lapa la gabo.

Go Botegela Modimo ka go se KwanantšheSeka se se Holago

Mosadi yoo go boletšwego ka yena pejana o hlalosa ditiro tša gagwe ka tsela ye: “Ka go ithuta ga-ka Beibele, ke ile ka tseba Jehofa e le Modimo wa therešo gomme ke ile ka ba le tswalano ya motho ka noši le yena. Jehofa ga a swane le medimo e mengwe yeo ke bego ke e rapela nakong e fetilego; ke yo a leka-lekanego ka mo go phethagetšego ka lerato, toka, bohlale le matla. Ka ge Jehofa a nyaka boineelo bjo bo feletšego, ke ile ka swanelwa ke go tlogela medimo e mengwe.

“Batswadi ba-ka ba be ba mpotša leboelela gore ke be ke sa ba kgahliše le gatee le gore ke be ke ba nyamiša. Ke ile ka hwetša se se le thata kudu ka ge go amogelwa ke batswadi ba-ka go bolela mo gontši go nna. Eupša ge ke dutše ke gola ka mo go tšwelago pele tsebong ya therešo ya Beibele, kgetho e ile ya ba molaleng go nna. Ke be nka se kgone go furalela Jehofa.

“Go kgetha go botegela Jehofa ka go se kwanantšhe go e na le go botegela ditšo tša bodumedi ga go bolele gore ga ke botegele lapa lešo. Ke katanela go ba bontšha ka mantšu le ka ditiro gore ke kwešiša kamoo ba ikwago ka gona. Eupša ge e ba ke sa botegele Jehofa ka go se kwanantšhe, gona ke thibela lapa lešo go mo tseba le gona seo e be e tla ba go se botege e le ka kgonthe.”

 Ka mo go swanago, motho ga se moeki ge go botegela Modimo ka go se kwanantšhe go nyaka gore a dule a sa tšee lehlakore go tša dipolitiki le go phema go tsogela ba bangwe. Zlatko o hlalosa ditiro tša gagwe ka gore: “Gaešita le ge ke godišitšwe ke le Mokriste ka leina fela, ke ile ka nyala motho yo e bego e se Mokriste. Ge ntwa e thoma, mahlakore ka bobedi a be a nyaka potego ya-ka e sa kwanantšhego. Ke ile ka gapeletšega go kgetha gore ke lwa ka lehlakoreng lefe. Ke ile ka lwa ntweng ka nywaga e meraro le seripa. Mafelelong nna le mosadi wa-ka re ile ra tšhabela kua Croatia moo re ilego ra gahlana le Dihlatse tša Jehofa.

“Go ithuteng ga rena Beibele, re ile ra kwešiša gore Jehofa ke yena yo go lego bohlokwa kudu gore re mmotegele ka go se kwanantšhe le gore o nyaka gore re rate baagišani ba rena go sa šetšwe gore ke ba bodumedi goba morafo ofe. Ga bjale nna le mosadi wa-ka re kopantšwe borapeding bja rena go Jehofa gomme ke ithutile gore nka se botegele Modimo ka go se kwanantšhe gomme ka lwa le moagišani wa-ka.”

Potego e sa Kwanantšhego e Agwa ke Tsebo e Nepagetšego

Ka ge Jehofa e le Mmopi wa rena, ke mo go swanetšego gore go mmotegela ka go se kwanantšhe go tle pele dilong ka moka tšeo re bolelago gore re di botegela ka go se kwanantšhe. (Kutollo 4:​11) Lega go le bjalo, go phema gore go botegela Modimo ka go se kwanantšhe go se fetoge go fišegela thoko le seka se se senyago, go swanetše go agwa ka tsebo e nepagetšego. Beibele e re eletša gore: “Sa lena a e bê xo mphsafatšwa moyeng wa dipelo tša lena. Le aparê motho e mofsa, e a bopetšwexo xo etša Modimo xo lokeng . . . [ga] makxonthe.” (Ba-Efeso 4:​23, 24, mongwalo o sekamego ke wa rena.) Monna yo a tumilego yo a ilego a ngwala mantšu ao a buduletšwego o bile le sebete sa go belaela ka potego e sa kwanantšhego yeo a godišitšwego ka yona. Tlhahlobo ya gagwe e ile ya lebiša phetogong e holago.

Ee, Saulo o ile a lebeletšana le teko ya potego e sa kwanantšhego go etša ge ba bantši mehleng ya rena ba lebeletšane le yona. Saulo o godišeditšwe setšong se thata sa lapa la gabo gomme o ile a botegela kudu bodumedi bjo a belegetšwego go bjona ka go se kwanantšhe. Go botegela ka go se kwanantšhe tsela ya gagwe go ile gwa mo tutuetša gore a dire ditiro tša bošoro malebana le bao ba bego ba sa dumelelane le kgopolo ya gagwe. Saulo o be a tsebja ka go hlasela magae a Bakriste le go ba gogela go ya go otlwa gaešita le go bolawa.Ditiro 22:​3-5; Ba-Filipi 3:​4-6.

Lega go le bjalo, ge Saulo a šetše a hweditše tsebo e nepagetšego ya Beibele, o ile a dira seo bontši bja dithaka tša gagwe ba bego ba se lebelela e le se se se nago tlhaologanyo. O ile a fetoša bodumedi bja gagwe. Saulo, yo ka morago a ilego a tsebja e le moapostola Paulo, o ile a kgetha go botegela Modimo ka go se kwanantšhe go e-na le setšo. Go botegela Modimo ka go se kwanantšhe mo go theilwego tsebong e nepagetšego go ile gwa tutuetša Saulo go ba le kgotlelelo, lerato le go ba yo a kgothatšago, ka go fapana le mokgwa wa gagwe wa kgale o senyago le wa go fišegela thoko.

Ke ka Baka La’ng o Swanetše go Botega ka go se Kwanantšhe?

Go dumelela potego ya rena e sa kwanantšhego e agwa ke ditekanyetšo tša Modimo go tliša mehola e bonagalago. Ka mohlala, pego ya 1999 go tšwa go Australian Institute of Family Studies e bontšhitše gore gare ga mabaka a motheo bakeng sa manyalo a swarelelago le ao a kgotsofatšago a akaretša “go  bota le go botega . . . [le] kahlolo e botse ka dilo tša moya.” Nyakišišo e swanago e bontšhitše gore “manyalo a tsepamego le a kgotsofatšago” a tlaleletša gore basadi le banna ba thabe, ba phele gabotse mmeleng le go phela sebaka se se telele le gore manyalo a tsepamego a nea bana sebaka se se kaone sa go thabela bophelo bja lethabo.

Lefaseng la mehleng yeno le le sa kgonthišegago, potego e sa kwanantšhego e swana le thapo ya go phološa bophelo yeo e kgokaganyago moruthi yo a katanago le seketswana sa phološo. Ge e ba yo go thwego ke moruthi a sa botege, o tla ikhwetša a sa tsepama bjalo ka ge eka o tšewa-tšewa ke maphoto le moya. Eupša ge e ba potego ya gagwe e sa kwanantšhego e bontšhwa ka mo go sa swanelago, e tla ba bjalo ka ge eka thapo ya gagwe ya go phološa bophelo e tlemagantšwe le sekepe se se nwelelago. Bjalo ka Saulo, a ka ikhwetša a gogetšwe tseleng e senyago. Lega go le bjalo, go botegela Jehofa ka go se kwanantšhe mo go theilwego tsebong e nepagetšego ke thapo ya go phološa bophelo yeo e neago matla le yeo e lebišago go phologeng ga rena.—Ba-Efeso 4:​13-15.

Jehofa o holofetša bao ba mmotegelago ka go se kwanantšhe gore: “Xobane Morêna ó rata tša tokô; baxauxêlwa ba xaxwe xa’ ba lahle; o tlo ba lôtôla neng le neng. Ba ba lôbaxo ké peu ya babe.” (Psalme 37:​28) Kgaufsinyane ka moka bao ba botegelago Jehofa ka go se kwanantšhe ba tla dumelelwa go tsena lefaseng la paradeise, moo ba tla thabelago go lokologa manyaming le bohlokong gomme ba tla thabela ditswalano tša ka mo go sa felego ba lokologile dikaroganong tša bodumedi le dipolitiki.—Kutollo 7:​9, 14; 21:​3, 4.

Gaešita le gona bjale, dimilione tša batho lefaseng ka bophara di lemogile gore lethabo la kgonthe le tšwa feela go botegeleng ga tšona Jehofa ka go se kwanantšhe. Ke ka baka la’ng o sa dumelele gore Dihlatse tša Jehofa di go thuše go hlahloba pono ya gago ka potego e sa kwanantšhego ka thušo ya therešo ya Beibele? Beibele e re botša gore: “Itebeledišeng lena beng Le bônê xe Le na le tumêlô; iphenyekeng!”—2 Ba-Korinthe 13:5.

Go nyakega sebete go belaela ka tumelo ya rena le lebaka leo re e botegelago ka go se kwanantšhe, eupša meputso e ka ba e swanelago maiteko ge mafelelo a ona a re tliša kgaufsi le Jehofa Modimo. Mosadi yo a tsopotšwego pejana o bolela maikwelo a batho ba bantši ge a re: “Ke ithutile gore go botegela Jehofa le ditekanyetšo tša gagwe ka go se kwanantšhe go re thuša go ba le teka-tekano ditirišanong tša rena le malapa a gabo rena le go ba ditho tše kaone tša setšhaba. Go sa šetšwe gore diteko ke tše thata gakaakang, ge e ba re botegela Jehofa ka go se kwanantšhe, ka mehla o tla itlhatsela e le yo a re botegelago ka go se kwanantšhe.”

[Methopo ya Diswantšho go letlakala 4]

Churchill, upper left: U.S. National Archives photo; Joseph Göbbels, far right: Library of Congress

[Diswantšho go letlakala 6]

Tsebo e nepagetšego e ile ya tutuetša Saulo go fetoša morero wa potego ya gagwe e sa kwanantšhego

[Seswantšho go letlakala 7]

Ke ka baka la’ng o sa hlahlobe potego ya gago e sa kwanantšhego ka thušo ya therešo ya Beibele?