“Ke le Beetše Mohlala”
“Ke le Beetše Mohlala”
‘Le swanetše go ba barutiši ka baka la nako.’—BA-HEBERE 5:12 bapiša le NW.
1. Ke ka baka la’ng mantšu a Ba-Hebere 5:12 ka tlhago a dira gore Mokriste a ikwe a tshwenyegile ka tekanyo e itšego?
GE O dutše o bala mantšu a buduletšwego a temana ya rena ya sehlogo, na o ikwa o tshwenyegile ka tekanyo e itšego? Ge e ba go le bjalo, ga o nnoši. Ka ge re le balatedi ba Kriste, re a tseba gore re swanetše go ba barutiši. (Mateo 28:19, 20) Re a tseba gore mehla yeo re phelago go yona e dira gore e be mo go akgofilego gore re rute ka bokgoni bja rena ka moka. E bile re a tseba gore go ruta ga rena go ka bolela lehu goba bophelo go bao re ba rutago! (1 Timotheo 4:16) Ka gona, re ka ipotšiša ka mo go kwagalago gore: ‘Na ke tloga ke le morutiši yo ke swanetšego go ba yena? Nka kaonefatša bjang?’
2, 3. (a) Morutiši yo mongwe o ile a hlalosa bjang motheo wa go ruta gabotse? (b) Jesu o re beetše mohlala ofe mabapi le go ruta?
2 Go tshwenyega mo go bjalo ga se gwa swanela go re nyamiša. Ge e ba re nagana ka go ruta e le feela dilo tšeo di nyakago bokgoni bjo itšego bjo bo kgethegilego, re ka ikwa re nyamišitšwe ke tebelelo ya go dira dikaonefatšo. Lega go le bjalo, motheo wa go ruta gabotse ga se bokgoni eupša ke selo se itšego seo se lego bohlokwa kudu. Ela hloko seo morutiši yo mongwe yo a nago le phihlelo a se ngwadilego ka pukung yeo e lego mabapi le taba ye: “Go ruta gabotse ga se feela taba ya bokgoni bjo itšego goba mekgwa, dithulaganyo goba ditiro. . . . Se segolo kudu go ruta ke taba ya lerato.” Go ba gona, pono ya gagwe e be e le ya mabapi le modiro wa borutiši. Lega go le bjalo, ntlha ya gagwe e ka ba yeo e swanelago kudu modirong wa borutiši woo re o dirago re le Bakriste. Seo se bjalo bjang?
3 Morutiši yo e lego Mohlala wa rena go ruteng Jesu Kriste o boditše balatedi ba gagwe gore: “Ke Le beetše mokxwa [“mohlala,” NW].” (Johane 13:15) O be a šupa go mohlala wa gagwe wa go bontšha boikokobetšo, eupša mohlala woo Jesu a re beetšego wona ka ntle le pelaelo o akaretša modiro wa gagwe o mogolo ge e be e le motho mo lefasengwa go ruta batho ditaba tše dibotse tša Mmušo wa Modimo. (Luka 4:43) Ga bjale, ge e ba o swanetše go kgetha lentšu letee leo le hlalosago bodiredi bja Jesu, ka ntle le pelaelo o tla kgetha lentšu “leratô,” na o be o ka se dire bjalo? (Ba-Kolose 1:15; 1 Johane 4:8) Lerato la Jesu la go rata Tatagwe wa legodimong Jehofa, e be e le le legolo. (Johane 14:31) Ka gona, e le morutiši Jesu o ile a bontšha lerato ka ditsela tše pedi tše oketšegilego. O be a rata ditherešo tšeo a bego a di ruta le batho bao a bego a ba ruta. Anke re lebišeng tlhokomelo ka mo go tseneletšego dibopegong tše tše pedi tša mohlala woo a re beetšego wona.
Go Rata Ditherešo tša Modimo Moo go Lego Kgale go le Gona
4. Jesu o ile a godiša bjang lerato la go rata dithuto tša Jehofa?
4 Boemo bja kgopolo bja morutiši ka taba yeo a rutago ka yona bo na le mafelelo a magolo go boemo bja thuto ya gagwe. Ka ntle le pelaelo, go hloka kgahlego le ge e le gofe ga morutiši go tla bonagala gomme gwa fetela go barutwana ba gagwe. Jesu o be a na le kgahlego ka ditherešo tša bohlokwa tšeo a rutilego ka tšona mabapi le Jehofa le Mmušo wa Gagwe. Lerato la Jesu la go rata taba ye e be e le leo le tseneletšego. O ile a godiša lerato leo bjalo ka morutwana. Nywageng e mentši ya go ba gona ga gagwe pele e e-ba motho, Morwa e a tswetšwego a nnoši e be e le morutwana yo a nago le phišego. Jesaya 50:4, 5 e bega mantšu a a swanelegago: “Morêna Mong’a-ka ó mphile leleme la ba rutexilexo, xore ke tsebê xo thêkxa molapi ka xo bolêla naê’. Ka mehla ó ntsoša è sa le ka moswana, ó mphafoša tsêbê xore kê theetše byalo ka morutiwa. Morêna Mong’a-ka ó nthibolotše tsêbê; nna ke se xanê, ke se boêlê moraxo.”
5, 6. (a) Ke phihlelo efe yeo ka ntle le pelaelo Jesu a ilego a ba le yona kolobetšong ya gagwe, gomme e bile le mafelelo afe go yena? (b) Ke phapano efe yeo re e hwetšago magareng ga Jesu le Sathane ge e le mabapi le go diriša Lentšu la Modimo?
5 Ge a be a gola e le motho mo lefaseng, Jesu o ile a tšwela pele go rata bohlale bja Modimo. (Luka 2:52) Ke moka, nakong ya kolobetšo ya gagwe o ile a ba le phihlelo ya moswana-noši. Luka 3:21 e re: “Lexodimo la bulêxa.” Ka mo go lego molaleng, ka nako yeo Jesu o ile a kgona go gopola nakong ya go ba gona ga gagwe pele e e-ba motho. Ka morago ga moo o ile a fetša matšatši a 40 a ikona dijo a le lešokeng. O swanetše go ba a ile a thabišwa kudu ke go naganišiša ka ditiragalo tše dintši tša legodimong tša thuto yeo a ilego a e amogela go tšwa go Jehofa. Lega go le bjalo, kapejana ka morago ga moo lerato la gagwe la go rata ditherešo tša Modimo le ile la lekwa.
6 Ge Jesu a be a lapile e bile a swere ke tlala, Sathane o ile a nyaka go mo leka. A phapano e kaakang yeo re e hwetšago magareng ga barwa ba babedi ba Modimo! Bobedi bja bona ba ile ba tsopola Mangwalo a Sehebereeupša ka boemo bja kgopolo bjo bo fapanego ka mo go feletšego. Sathane o ile a kgopamiša Lentšu la Modimo, a le diriša ka go hloka tlhompho bakeng sa go thekga merero ya gagwe ya boithati. Ka kgonthe, lerabele leo le be le tloga le sa hlomphe ditherešo tša Modimo. Ka lehlakoreng le lengwe, Jesu o ile a tsopola Mangwalo ka lerato, a diriša Lentšu la Modimo ka kelohloko karabong e nngwe le e nngwe. Jesu o be a dutše a le gona kgale pele ga ge mantšu ao a buduletšwego a ka ngwalwa fase, lega go le bjalo o ile a a hlompha. E be e le ditherešo tše bohlokwa go tšwa go Tatagwe wa legodimong! O ile a botša Sathane gore mantšu a bjalo a tšwago go Jehofa a be a le bohlokwa kudu go feta dijo. (Mateo 4:1-11) Ee, Jesu o ratile ditherešo ka moka tšeo Jehofa a mo rutilego tšona. Lega go le bjalo, o ile a bontšha bjang lerato leo e le morutiši?
Lerato la go Rata Ditherešo Tšeo a di Rutilego
7. Ke ka baka la’ng Jesu a ile a phema go hlama dithuto tša gagwe ka noši?
7 Lerato la Jesu la go rata ditherešo tšeo a di rutilego ka mehla le be le le molaleng. Go feta moo, go ka ba go bile bonolo gore a godiše dikgopolo tša gagwe ka noši. O be a na le tsebo e nabilego le bohlale. (Ba-Kolose 2:3) Lega go le bjalo, o ile a gopotša batheetši ba gagwe leboelela gore sohle seo a bego a se ruta se be se sa tšwe go yena, eupša se be se e-tšwa go Tatagwe wa legodimong. (Johane 7:16; 8:28; 12:49; 14:10) O ratile ditherešo tša Modimo kudu moo e lego gore o be a ka se dire gore dikgopolo tša gagwe di di tšeele legato.
8. Jesu o ile a bea bjang mohlala wa go ithekga ka Lentšu la Modimo mathomong a bodiredi bja gagwe?
8 Ge Jesu a be a thoma bodiredi bja gagwe bja phatlalatša, kapejana o ile a bea mohlala. Ela hloko tsela yeo a ilego a thoma go botša batho ba Modimo gore e be e le Mesia yo a holofeditšwego. Na o ile a fo tšwelela pele ga mašaba, a ipolela gore ke yena Kriste, ke moka a dira mehlolo e makatšago bakeng sa go hlatsela seo? Aowa. O ile a ya sinagogeng, moo batho ba Modimo ba bego ba tlwaetše go bala Mangwalo. Ke gona moo a ilego a bala ka go hlaboša boporofeta bjo bo lego go Jesaya 61:1, 2 gomme a hlalosa gore ditherešo tše tša boporofeta di be di bolela ka yena. (Luka 4:16-22) Mehlolo ya gagwe e mentši e ile ya thuša go kgonthišetša gore o be a thekgwa ke Jehofa. Lega go le bjalo, ka mehla o be a ithekga ka Lentšu la Modimo go ruteng ga gagwe.
9. Jesu o bontšhitše bjang lerato la gagwe la go rata Lentšu la Modimo ka go se kwanantšhe ditirišanong tša gagwe le Bafarisei?
9 Ge baganetši ba Jesu ba bodumedi ba be ba mo hlohla, ga se a ka a leka go ba phala gaešita le ge a be a ka ba fenya gabonolo ntweng e bjalo. Go e na le moo, o ile a dumelela Lentšu la Modimo go ba pepentšha. Ka mohlala, gopola ge Bafarisei ba be ba latofatša balatedi ba Jesu ka gore ba tshetše molao wa Sabatha ka go kga diako tša mabele mašemong le go di ja ge ba be ba feta go ona. Jesu o arabile ka gore: “A xa L’a bala se Dafida a kilexo a se dira mohla wola à swerwe ke tlala, à na le batho ba xaxwe?” (Mateo 12:1-5) Go ba gona, banna bao ba go itira baloki ba swanetše go ba ba be ba badile pego e buduletšwego e lego go 1 Samuele 21:1-6. Ge e ba go le bjalo, ba be ba paletšwe ke go lemoga thuto ya bohlokwa yeo e lego pegong yeo. Lega go le bjalo, Jesu o be a dirile se se fetago go bala pego. O be a naganne ka yona le go e tsenya ka pelong. O ile a rata melao ya motheo yeo Jehofa a e rutilego ka lengwalo leo. Ka gona o ile a diriša pego yeo gotee le mohlala o tšwago ka Molaong wa Moše go bontšha go leka-lekana ga Molao. Ka mo go swanago, lerato la Jesu la go se kwanantšhe le ile la mo tutuetša go lwela Lentšu la Modimo malebana le maiteko a baetapele ba bodumedi a go le kgopamišetša mererong ya bona goba go le uta ka tlase ga moreo wa ditšo tša batho.
10. Jesu o ile a phethagatša bjang diporofeto tša mabapi le boemo bja go ruta ga gagwe?
10 Go rata ga Jesu therešo yeo a bego a e ruta go be go ka se mo dumelele gore a fo ruta feela a sa diriše tlhaologanyo, ka mokgwa woo o bego o tšwafiša goba e se wa tlhago. Diporofeto tše di buduletšwego di šišintše gore Mesia o be a bolela ‘molomo wa gagwe o tšhephile ka mabobo,’ a diriša “dipolelo tše botse.” (Psalme 45:2; Genesi 49:21, PK) Jesu o ile a phethagatša diporofeto tšeo ka go boloka molaetša wa gagwe e le o kgahlišago le o phelago, a diriša “mantšu a bose” ge a dutše a ruta ditherešo tšeo a bego a di rata kudu. (Luka 4:22) Ka ntle le pelaelo phišego ya gagwe e ile ya phediša dika tša gagwe, gomme mahlo a gagwe a be a phadima ka kgahlego ya kgonthe tabeng ya gagwe. E swanetše go ba e be e le mo go thabišago gakaakang go mo theetša, le gona ke mohlala o mobotse gakaakang woo re ka o latelago ge re bolela le ba bangwe ka seo re ithutilego sona!
11. Ke ka baka la’ng bokgoni bja Jesu e le morutiši bo sa ka bja mo dira gore a ikgogomoše?
11 Na kwešišo e tseneletšego ya Jesu ka ditherešo tša Modimo le polelo ya gagwe e ipiletšago di ile tša mo dira gore a ikgogomoše? Seo gantši se direga tabeng ya barutiši ba batho. Lega go le bjalo, gopola gore Jesu o be a le bohlale ka tsela yeo e bego e bontšha go boifa Modimo. Bohlale bjo bo bjalo ga bo dumelele boikgantšho, ka gobane “bohlale bo na le bao ba ipoetšago.” (Diema 11:2, NW) Go na le selo se sengwe gape seo se ilego sa dira gore Jesu a se ke a ikgogomoša goba go ikgantšha.
Jesu o be a Rata Batho Bao a Bego a ba Ruta
12. Jesu o ile a bontšha bjang gore o be a sa nyake gore balatedi ba gagwe ba ikwe a ba nyenyefatša?
12 Lerato la Jesu la go rata batho ka mo go tseneletšego ka mehla le ile la bonagala dithutong tša gagwe. Le ka mohla dithuto tša gagwe ga se tša ka tša dira gore batho ba ikwe ba nyenyefatšwa, ka go se swane le tšeo tša batho bao ba nago le boikgantšho. (Mmoledi 8:9) Ka morago ga go bona e mengwe ya mehlolo ya Jesu, Petro o be a tlabegile kudu gomme o ile a khunama pele ga Jesu. Eupša Jesu ga se a ka a nyaka gore balatedi ba gagwe ba mmoife ka mo go sa swanelago. O ile a bolela ka boikokobetšo gore: “Se boifê,” ke moka a botša Petro ka modiro o kgahlišago wa go dira barutiwa woo a bego a tla tšea karolo go ona. (Luka 5:8-10) Jesu o be a nyaka gore barutiwa ba gagwe ba tutuetšwe ke lerato la bona ka noši la go rata ditherešo tša bohlokwa mabapi le Modimo, e sego ka go boifa mohlahli wa bona.
13, 14. Jesu o ile a bontšha go kwela batho bohloko ka ditsela dife?
13 Lerato la Jesu la go rata batho bao a bego a ba ruta le ile la bonagala gape ka kwelobohloko yeo a bilego le yona ka bona. “Xe a bôna mašaba a batho a ba šôkêlwa; ka xobane ba be ba lapile, bà lahlexile wa dinku tše di se naxo modiši.” (Mateo 9:36) O ile a ba kwela bohloko boemong bja bona bjo bo setlago pelo gomme o ile a šušumeletšega go ba thuša.
14 Ela hloko kwelobohloko ya Jesu tiragalong e nngwe. Ge mosadi yo a bego a swerwe ke bolwetši bja ngope a e-tla go yena lešabeng gomme a kgoma morumo wa kobo ya gagwe, o ile a fodišwa ka mohlolo. Jesu o ile a kwa matla a e-tšwa go yena, eupša ga se a bona gore ke mang yo a fodišitšwego. O ile a phegelela go hwetša mosadi yoo. Ka baka la’ng? O be a sa nyake go mo ntšha diphošo ka ge a be a tshetše Molao goba melao ya bamangwalo le Bafarisei, bjalo ka ge mohlomongwe mosadi a ka be a be a boifa seo. Go e na le moo, o itše go yena: “Morwedi, tumelo ya gago e go fodišitše. Sepela ka khutšo, gomme o fole bolwetšing bja gago bjo bo kwešago bohloko.” (Mareka 5:25-34, NW) Ela hloko kwelobohloko mantšung ao. Ga se a fo re, “Fola.” Go e na le moo o itše: “O fole bolwetšing bja gago bjo bo kwešago bohloko.” Mareka mo o diriša lentšu leo ka go lebanya le bolelago “go setla,” mohuta wa go itia woo gantši o dirišwago e le go tlaiša. Ka gona, Jesu o be a lemogile gore bolwetši bja gagwe bo be bo dirile gore a tlaišege, mohlomongwe a tlaišwa ke bohloko bjo bo tseneletšego mmeleng le maikwelong. O ile a mo kwela bohloko.
15, 16. Ke ditiragalo dife bodireding bja Jesu tšeo di bontšhago gore o ile a lebelela dika tše dibotse bathong?
15 Jesu le gona o ile a bontšha go rata batho ka go lebelela dika tše dibotse go bona. Ela hloko seo se diragetšego ge a be a gahlana le Nathanaele, yoo ka morago a ilego a ba moapostola. “Jesu a bôna Nathanaele à e-tla xo Yêna, a mmolêla a re: Šó Mo-Isiraele wa makxonthe, a se naxo bomenetša.” Ka mohlolo, Jesu o be a ile a lebelela ka pelong ya Nathanaele, ka go rialo a ithuta mo gontši ka yena. Go ba gona, Nathanaele o be a sa phethagala. O be a na le mafokodi a gagwe, bjalo ka rena ka moka. Ge e le gabotse, ka morago ga ge a kwele ka Jesu, o ile a bolela ka bošilo gore: “Se se botse se se kaxo tšwa Natsaretha e ka ba’ng?” (Johane 1:45-51) Lega go le bjalo, gare ga dilo ka moka tšeo di bego di ka bolelwa ka Nathanaele, Jesu o ile a kgetha selo se se retegago seo a bego a ka lebiša tlhokomelo go sona, potego ya monna yo.
16 Ka mo go swanago, ge mohlankedi wa madiramohlomongwe wa ba-Ntle, mo-Romaa e-ya go Jesu gomme a mo kgopela gore a fodiše lekgoba leo le bego le babja, Jesu o be a tseba gore lešole le be le na le mafokodi. Mohlankedi wa madira wa mehleng yeo ka ntle le pelaelo o be a phetše bophelo bja ditiro tše dintši tša bošoro, go tšholla madi le bja borapedi bja maaka. Lega go le bjalo, Jesu o ile a lebiša tlhokomelo selong se itšego se sebotsetumelo e kgolo ya monna yo. (Mateo 8:5-13) Ka morago, ge Jesu a be a bolela le modiradibe yo a bego a fegilwe kgaufsi le yena koteng ya tlhokofatšo, Jesu ga se a ka a sola monna yo ka baka la bokebekwa bja gagwe bja nakong e fetilego eupša o ile a mo kgothatša ka kholofelo bakeng sa bokamoso. (Luka 23:43) Jesu o be a tseba gabotse gore go lebelela ba bangwe ka tsela e fošagetšego go be go tla fo ba nyamiša. Ka ntle le pelaelo maiteko a gagwe a go hwetša dika tše dibotse go ba bangwe a ile a tutueletša ba bantši go kaonefatša.
Go Rata go Hlankela Batho
17, 18. Jesu o ile a bontšha bjang go rata go hlankela ba bangwe ka go amogela kabelo ya go tla lefaseng?
17 Bohlatse bjo bongwe bjo matla bja lerato la Jesu la go rata batho bao a bego a ba ruta e be e le go rata ga gagwe go ba hlankela. Bophelong bja gagwe bja pele e e-ba motho, Morwa wa Modimo ka mehla o be a dutše a rata batho. (Diema 8:30, 31) E le “Lentšu” la Jehofa goba mmoleledi, o swanetše go ba a ile a thabela ditirišano tše dintši le batho. (Johane 1:1) Lega go le bjalo, lebaka le lengwe leo a tlilego lefaseng ka lona e be e le go ruta batho ka go lebanya kudu, “a ithlakola, a tšea lebopô la mohlanka, a ba e a swanaxo le batho,” a tlogela boemo bja gagwe bjo bo phagamego legodimong. (Ba-Filipi 2:7; 2 Ba-Korinthe 8:9) Ge a be a le mo lefaseng, Jesu ga se a ka a letela gore a hlankelwe. Ka mo go fapanego, o itše: ‘Morwa-motho ga a tlela go direlwa, o tletše go direla le go neela bophelo bja gagwe gore e be topollo ya ba bantši.’ (Mateo 20:28) Jesu o ile a phethagatša mantšu ao ka mo go tletšego.
18 Ka boikokobetšo Jesu o ile a phethagatša dinyakwa tša bao a bego a ba ruta, ka go se dika-dike a hwetšagala ge ba mo nyaka. O ile a phatša Nageng ya Kholofetšo ka maoto, a sepela dikhilomithara tše makgolo maetong a gagwe a boboledi ka maiteko a go fihlelela batho ba bantši kamoo a bego a ka kgona. Ka go se swane le Bafarisei le bamangwalo ba ikgantšhago, o ile a dula a ikokobeditše e bile e le yo a batamelegago. Batho ba mehuta ka mokaba maemo, mašole, baemedi, basadi, bana, badiidi, balwetši gaešita le batho bao ba bego ba ganwa ke setšhababa ile ba mmatamela ka phišego, ba sa boife. Gaešita le ge a phethagetše, Jesu e be e le motho, o be a lapa le go swarwa ke tlala. Lega go le bjalo, gaešita le ge a be a lapile goba a nyaka go khutša goba nako ya setu bakeng sa go rapela, o ile a bea dinyakwa tša ba bangwe ka pele ga tša gagwe.—Mareka 1:35-39.
19. Jesu o ile a bea bjang mohlala wa go dirišana le barutiwa ba gagwe ka boikokobetšo, ka go se fele pelo le ka botho?
19 Jesu ka mo go swanago o be a rata go hlankela barutiwa ba gagwe. O dirile bjalo ka go ba ruta ka botho le ka go se fele pelo. Ge ba be ba sa kwešiše kapejana tše dingwe tša dithuto tša bohlokwa, ga se a ka a fela matla, a befelwa goba go ba sola. O ile a tšwela pele go hwetša ditsela tše difsa tša go ba thuša gore ba kwešiše. Ka mohlala, nagana gore ke ka makga a makae moo barutiwa ba ilego ba ngangišana ka gore yo e bego e le yo mogolo gare ga bona ke mang. Go ba go fihlela bošegong bja pele ga lehu la gagwe, leboelela Jesu o ile a hwetša ditsela tše difsa tša go ba ruta go dirišana ka boikokobetšo. Tabeng ye ya boikokobetšo, go etša dilong tše dingwe ka moka, Jesu o be a ka bolela ka mo go swanetšego gore: “Ke Le beetše mokxwa.”—Johane 13:5-15; Mateo 20:25; Mareka 9:34-37.
20. Ke mokgwa ofe wa go ruta woo o ilego wa hlaola Jesu go Bafarisei, gomme ke ka baka la’ng o be o atlega?
20 Ela hloko gore Jesu ga se a fo botša barutiwa ba gagwe gore mohlala e be e le ofe; o ‘beile mohlala.’ O ba rutile ka go ba beela mohlala. Ga se a bolela le bona ka go ba nyenyefatša bjalo ka ge eka o be a itebelela a le boemong bjo bo phagamego, eka ke yo bohlokwa kudu go ka dira dilo tšeo a bego a ba botša gore ba di dire. Yeo e be e le tsela ya Bafarisei. Jesu o boletše ka bona gore: “Ba a bolêla, ’me xa ba dire.” (Mateo 23:3) Ka boikokobetšo Jesu o ile a bontšha barutwana ba gagwe ka go lebanya seo dithuto tša gagwe di bego di se bolela ka go di diriša. Ka gona ge a be a kgothaletša balatedi ba gagwe go phela maphelo a bonolo a go se rate dilo tše di bonagalago, ga se ba ka ba swanela go phopholetša tlhaloso ya seo a bego a se bolela. Ba ile ba bona go ba ga kgonthe ga mantšu a gagwe a rego: “Diphukubyê di na le melete, le dinonyana tša sebakeng di na le dihlaxá; xe e le Morwa-motho xa a na mo a kaxo samiša hlôxô.” (Mateo 8:20) Jesu o ile a hlankela barutiwa ba gagwe ka go ba beela mohlala ka boikokobetšo.
21. Ke eng seo se tlago go ahla-ahlwa sehlogong se se latelago?
21 Ka mo go kwagalago, Jesu e be e le Morutiši yo mogolo kudu yo a kilego a phela! Lerato la gagwe la go rata seo a bego a se ruta le go rata batho bao a bego a ba ruta le be le le molaleng go bohle ba dipelo tše botegago bao ba mmonego le go mo kwa. Ke leo le lego molaleng ka mo go swanago go rena bao lehono re ithutago ka mohlala woo a o beilego. Lega go le bjalo, re ka latela mohlala o phethagetšego wa Kriste bjang? Sehlogo se se latelago se tla ahla-ahla potšišo yeo.
O tla Araba Bjang?
• Motheo wa go ruta gabotse ke ofe, gomme o bontšhitšwe ke mang?
• Ke ka ditsela dife Jesu a bontšhitšego lerato la go rata ditherešo tšeo a di rutilego?
• Jesu o bontšhitše bjang lerato la go rata batho bao a bego a ba ruta?
• Ke mehlala efe yeo e bontšhago go rata ka boikokobetšo ga Jesu go hlankela bao a bego a ba ruta?
[Dipotšišo tša Thuto]
[Seswantšho go letlakala 12]
Jesu o ile a bontšha bjang gore o be a rata melao ya motheo yeo e lego ka Lentšung la Modimo?