Lefase Leo le Nago le Dikgopolo tše di Kgopamego ka Potego e sa Kwanantšhego

MANTŠIBOENG a ruthetšego a Labohlano kua Tel Aviv, Isiraele, lesogana le ile la tlatša sehlopha sa bafsa bao ba bego ba letile ka ntle ga nightclub. Metsotswana ka morago sethuthupi se se boifišago se ile sa thuthupa lešabeng.

Yo mongwe wa bao ba ipolayago ka pomo o neetše bophelo bja gagwe a ba a fediša maphelo a bafsa ba bangwe ba 19 ka sehlogo. Ka morago ga tiragalo yeo ngaka e ile ya botša babegi ba ditaba gore: “Ditho tša mmele di be di tletše gohle, ka moka e le tša bafsa, ba banyenyane kudutiragalo e boifišago kudu yeo nkilego ka e bona.”Thurstan Brewin o ngwadile ka go The Lancet gore: “Dika tša gona tšeo yo mongwe le yo mongwe a di dumago, tša go swana le potego e sa kwanantšhego . . . ke tše di ka dirago gore go be le kgonagalo ya gore dintwa di thome gomme go be thata kudu go di fediša.” Ee, go tloga go Dintwa tše Kgethwa tša Bojakane go ya go dipolao tša batho ka bontši tšeo di rulagantšwego tša Jeremane ya Nazi, histori ya batho e šilafaditšwe ka madi a bao ba bolailwego e le ge go thwe go phethwa potego e sa kwanantšhego.

Bahlaselwa Bao ba Oketšegago ba go se Botege

Ka mo go sa ganetšegego, potego e sa kwanantšhego ya go fišegela thoko e ka ba e senyago, eupša go hlaelelwa ke potego e sa kwanantšhego le gona go ka aroganya setšhaba. Webster’s New Encyclopedic Dictionary e re go botega ka go se kwanantšhe go bolela go ‘botegela motho goba kwano’ le “go bontšha go ema ka go tia ge o lebeletšane le teko le ge e le efe ya go tlogela goba ya go bontšha go se botege.” Le ge bontši bja batho ba bolela gore ba duma mohuta wo wa potego e sa kwanantšhego, setšhaba se tlaišwa ke go hlaelelwa ka mo go tseneletšego ke potego e sa kwanantšhego maemong a bohlokwa kuduka gare ga lapa. Dipalo tša tlhalo di oketšegile ka lebelo kudu, di hlohleletšwa ke go nyaka go phethagatša dilo tša motho ka noši, dikgateletšo tša bophelo bja letšatši le letšatši le mafelelo a phatlaletšego a go se botege ka tša botona le botshadi. Le gona, ka go swana le bahlaselwa ba mothuthupo wa kua Tel Aviv, gantši bafsa ke bahlaselwa ba se nago molato.

Pego e nngwe e re: “Gantši thuto ya ngwana ke e nngwe ya tšeo di kgongwago kudu ke go se tsepame ga lapa mo go tšweletšwago ke tlhalo, karogano le motswadi yo a se nago molekane.” Bašemane ba malapeng ao go ona mma e lego motswadi yo a se nago molekane go bonagala ba le kotsing ya go se hwetše thuto e lekanego, go ipolaya le bosenyi bja bafsa. Ngwaga le ngwaga, bana ba milione kua United States ba lebeletšana le tlhalo ya batswadi ba bona, gomme ngwaga le ge e le ofe, seripa-gare sa bana ka moka bao ba belegwego ke batswadi bao ba lego lenyalong nageng yeo go na le kgonagalo ya gore e be bahlaselwa ba tlhalo ka nako ya ge bana bao ba e-na le nywaga e 18. Dipalo-palo di bontšha gore boemo ke bjo bo kwešago bohloko ka mo go swanago go bafsa ba bantši dikarolong tše dingwe tša lefase.

 Potego e sa KwanantšhegoNa ke Tekanyetšo e Phagamego Kudu go ka Fihlelelwa?

Go palelwa ga mehleng yeno ga potego e sa kwanantšhego setšong go dira gore mantšu a Kgoši Dafida e be a swanelago kudu go feta le ge e le neng pele: “Morêna hlakodiša! Xobane ba borapedi ba napa ba fêlêla; xobane ba xo bôtêxa ba napa ba nôtlêxa xar’a bana ba batho.” (Psalme 12:1) Ke ka baka la’ng go na le go ata mo gokaakaa ga go hlokega ga potego e sa kwanantšhego? Roger Rosenblatt ge a ngwala ka makasineng wa Time o itše: “Gaešita le ge potego e sa kwanantšhego e le tekanyetšo e phagamego, ge e le gabotse go na le poifo e kgolo, go se ipote, go ikhola ka dilo le kganyogo yeo e lego dikeng tša rena tša motheo ya go letela gore mohuta wa batho wo re lego wona o fokolago boitshwarong o ka fihlelela tekanyetšo ya potego e sa kwanantšhego.” Ge e hlalosa mehla yeo re phelago go yona, Beibele e bolela ka go se dika-dike gore: “Gobane batho e tlo ba baithati . . . ba go se botege, ba ba se nago maikwelo a borutho a tlhago.”—2 Timotheo 3:​1-5, NW.

Ge re ela hloko tutuetšo e matla yeo potego e sa kwanantšhegogoba go e hlokae nago le yona tseleng yeo motho a naganago ka yona le go dira dilo, re ka botšiša gore, ‘Ke mang yo a swanelwago ke potego ya rena e sa kwanantšhego?’ Ela hloko seo sehlogo se se latelago se se bolelago ka potšišo ye.

[Mothopo wa Seswantšho go letlakala 3]

Photo above: © AFP/CORBIS