“Na le Tseba Lebaka Leo ke Bušago Tšhelete ya Lena?”

NANA yo e lego mmago bašemane ba bararo yo a se nago molekane wa go dula kua Kaspi Repabliking ya Georgia o ile a nagana gore: ‘Ke tloga ke nyaka tšhelete gakaakang!’ Mesong e mengwe toro ya gagwe ya go hwetša tšhelete e ile ya phethagala. O ile a hwetša di-lari tše 300 kgaufsi le seteišene sa maphodisa. Go be go se na motho moo. E be e tloga e le tšhelete e ntši kudu. Ge e le gabotse, e be e le la mathomo Nana a bona 100 lari ya pampiri ka morago ga nywaga e mehlano go tloga mola lari e bago tšhelete ya naga. Barekiši ba lefelong la gabo ba be ba ka se hwetše tšhelete e ntši gakaalo le ka morago ga go šoma nywaga e mmalwa.

Nana o ile a nagana: ‘Tšhelete ye ke e nyakela’ng ge e ba ke tla lahlegelwa ke tumelo ya-ka, poifo ya-ka ya go nyamiša Modimo le boemo bja-ka bja moya?’ O be a hlagoletše dika tše bjalo tša Bokriste gaešita le go kgotlelela go tlaišega mo go šoro le go bethelwa tumelo ya gagwe.Ge a e-ya seteišeneng sa maphodisa, Nana o ile a bona maphodisa a mahlano a nyaka selo se sengwe a kgwahlišitše. O ile a lemoga gore a be a nyaka tšhelete, ka gona o ile a ya go ona gomme a re: “Na le lahlegetšwe ke selo tsoko?”

A ile a araba ka go re: “Tšhelete.”

“Bokae?”

“Di-lari tše makgolo a mararo!”

Nana o ile a re: “Ke hweditše tšhelete ya lena.” Ke moka o ile a botšiša gore: “Na le tseba lebaka leo ke bušago tšhelete ya lena?” A be a sa tsebe.

O ile a tšwela pele gore: “Ke ka gobane ke yo mongwe wa Dihlatse tša Jehofa, ge nkabe ke se yona, nkabe ke sa ka ka buša tšhelete ya lena.”

Moemedi wa maphodisa yo a bego a lahlegetšwe ke tšhelete o ile a nea Nana di-lari tše 20 e le go mo leboga bakeng sa boitshwaro bja gagwe bja potego.

Taba yeo e ile ya phatlalala kapejana seleteng ka moka sa Kaspi. Letšatšing le le latelago, mosadi yo a šomago go hlwekiša yo a bego a e-tšwa seteišeneng sa maphodisa o ile a botša Nana gore: “Ka mehla [molaodi] o boloka dipuku tša lena ka ofising ya gagwe. Mohlomongwe bjale o tla di thabela le go feta.” Mohlankedi yo mongwe wa maphodisa o ile a ba a re: “Ge e ba batho ka moka e be e le Dihlatse tša Jehofa, ke mang yo a bego a tla dira bosenyi?”