Na o tla Kgomarela Potego ya Gago?

MAABANE go hwile dithaga tše kae? Ga go na motho yo a tsebago, gomme mohlomongwe ke ba sego kae bao ba nago le tabago na le dinonyana tše dintši kudu. Lega go le bjalo, Jehofa o na le taba. Ge a bolela ka dinonyana tše tšeo go bonagalago di se na mohola, Jesu o boditše barutiwa ba gagwe gore: “Le e tee ya tšôna e ka se wêle fase xe Tata-weno à sa rate.” O okeditše ka gore: “Se boifeng; Le feta dithaxa è le tše ntši.”—Mateo 10:​29, 31.

Ka morago barutiwa ba ile ba kwešiša ka mo go kwagalago kudu kamoo Jehofa a ba lebelelago ba le bohlokwa ka gona. Yo mongwe wa bona e lego moapostola Johane, o ngwadile gore: “Leratô la Modimo le a re ratilexo ka lôna, le bônaxetše ka xe a roma Morwa wa xaxwe Mo-tswalwa-eši, a tla lefaseng xore re phelê ka yêna.” (1 Johane 4:9) Jehofa ga a nee topollo feela eupša e bile o kgonthišetša yo mongwe le yo mongwe wa bahlanka ba gagwe gore: “Nka se kê ka Xo lahla; nka se kê ka Xo tloxêla.”—Ba-Hebere 13:5.

Ka mo go kwagalago, lerato la Jehofa la go rata batho ba gagwe ke leo le sa šišinyegego. Lega go le bjalo, go rotoga potšišo e rego, ‘Na re kgomaretše Jehofa ka mo go tiilego kudu moo e lego gore le ka mohla re ka se tsoge re mo tlogetše?’

Maiteko a Sathane a go Roba Potego ya Rena

Ge Jehofa a be a hlokomediša Sathane ka tsela ya Jobo ya potego, Sathane o ile a arabela ka gore: “Na Jobo o be a tla go rapela ge nkabe a be a sa hwetše selo go tšwa go seo?” (Jobo 1:​9, Today’s English Version) O be a bolela gore go botegela ga batho Modimo ka go se kwanantšhe go ithekgile ka mo go feletšego ka ‘seo ba ka se hwetšago go tšwa go seo.’ Ge e ba se e be e le therešo, potego ya Mokriste le ge e le ofe e be e tla kwanantšhwage e ba seo se newago e be e le seo se lekago e le ka kgonthe.

Tabeng ya Jobo, mathomong Sathane o ile a bolela gore go botegela ga Jobo Modimo ka go se kwanantšhe go be go tla fela ge e ba a ka lahlegelwa ke dithoto tša gagwe tšeo a di ratago kudu. (Jobo 1:​10, 11) Ge thogako ye e be e itlhatsela go ba ya maaka, Sathane o ile a bolela gore: “Motho tše a naxo natšô’ a ka di nthša tšohle xe a hlêkêlêla bophelô bya xaxwe.” (Jobo 2:4) Le ge polelo ya Sathane e ka ba ya kgonthe ka ba bangwe, Jobo o ile a gana go kwanantšha potego ya gagwe. Pego ya histori e hlatsela seo. (Jobo 27:5; 42:​10-17) Na o na le potego e sa kwanantšhego e swanago? Goba na o tla dumelela Sathane a roba potego ya gago? Inagane ge re dutše re hlahloba ditherešo tše itšego tšeo di akaretšago Mokriste yo mongwe le yo mongwe.

Moapostola Paulo o ile a dumela gore potego e sa kwanantšhego ya kgonthe ya Mokriste e ka ba e matla kudu. O ngwadile gore: “Nna ke kxodilwe ruri . . . e ka ba lehu xoba bophelô, . . . le xe e ka ba tša mehleng ya byale, xoba tše di sa tl’o xo tla . . . le sebopya-mang, xa xo se se kxônaxo xo re aroxanya le leratô la Modimo le lexo mo xo Jesu Kriste Mong ’a rena.” (Ba-Roma 8:​38, 39) Re ka ba le kgodišego e swanago ge e ba lerato la rena la go rata Jehofa le le matla. Lerato le bjalo ke tlamo e sa senyegego yeo e lego gore gaešita le lehu le ka se kgone go e fenya.

 Ge e ba re na le tswalano e bjalo le Modimo, le ka mohla re ka se tsoge ra botšiša gore, ‘Na ke tla be ke sa hlankela Jehofa nywageng e sego kae e tlago?’ Go se kgonthišege mo go bjalo go tla šišinya gore go botegela ga rena Modimo ka go se kwanantšhe go ithekgile ka seo se ka diregago go rena ge re dutše re phela. Potego ya kgonthe ga e kgongwe ke maemo a ka ntle. E ithekgile ka mohuta wa motho wa ka gare wo re lego yena. (2 Ba-Korinthe 4:​16-18) Ge e ba re rata Jehofa ka dipelo tša rena ka moka, le ka mohla re ka se ke ra mo nyamiša.—Mateo 22:​37; 1 Ba-Korinthe 13:8.

Lega go le bjalo, re swanetše go gopola gore Sathane ka mehla o tsoma go roba potego ya rena. A ka re leka gore re ineele dikganyogong tša nama, re ineele go kgateletšo ya dithaka goba a dumelela gore tlaišego e itšego e dire gore re tlogele therešo. Lefase leo le arogilego go Modimo ke mogwera yo mogolo wa Sathane tlhaselong ye, gaešita le ge go se phethagale ga rena go dira gore mošomo wa gagwe o be bonolo kudu. (Ba-Roma 7:​19, 20; 1 Johane 2:​16) Lega go le bjalo, re na le maemo a mmalwa a kgahlišago ntweng ye, bjo bongwe bja maemo a kgahlišago ke taba ya gore ga se gore ga re tsebe makatika a Sathane.—2 Ba-Korinthe 2:11.

Makatika a Sathane ke afe? Paulo o a hlalositše lengwalong la gagwe leo le yago go ba-Efeso e le “dipogo.” (Ba-Efeso 6:​11) Sathane o bea maano a bohwirihwiri tseleng ya rena e le gore a robe potego ya rena. Re leboga gore re ka kgona go lemoga ditiro tše tša boradia, ka ge re ngwaletšwe mekgwa ya Diabolo ka Lentšung la Modimo. Maiteko a Sathane a go fediša potego ya Jesu le Jobo a bontšha tše dingwe tša ditsela tšeo ka tšona a tsomago go roba potego ya rena ya Bokriste.

Potego ya Jesu e be e ka se Robje

Mathomong a bodiredi bja Jesu, Sathane o bile le sebete sa go leka Morwa wa Modimo ka go mo hlohla gore a fetoše lebje bogobe. A boradia bjo bo kaakang! Jesu o be a se a ja ka matšatši a 40, ka gona ka ntle le pelaelo o be a swere ke tlala kudu. (Luka 4:​2, 3) Sathane o ile a šišinya gore Jesu a kgotsofatše kganyogo ya gagwe ya tlhago kapejana, ka tsela yeo e bego e fapana le thato ya Jehofa. Ka mo go swanago lehono, phatlalatšo ya maaka ya lefase e kgothaletša go kgotsofatša kganyogo kapejana, ka go nagana ganyenyane goba ka go se nagane ka ditla-morago. Molaetša ke o rego, ‘E go swanetše ka wona motsotso wo,’ goba go fo re, ‘E fo e dira!’

Ge nkabe Jesu a ile a tloša bohloko bja go bolawa ke tlala ka ntle le go nagana ka ditla-morago, Sathane a ka be a ile a atlega go direng gore Jesu a kwanantšhe potego ya gagwe. Jesu o ile a lebelela ditaba ka tsela ya moya, gomme o ile a araba ka go tia gore: “Xo ngwadilwe xore motho xa a phele ka boxôbê fêla.”—Luka 4:4; Mateo 4:4.

Ka gona Sathane o ile a fetoša maano a gagwe. A diriša ka mo go fošagetšego Mangwalo ao Jesu a bego a a tsopola, Diabolo o ile a kgothaletša Jesu gore a ikušetše fase a le sehlweng sa tempele. Sathane o ile a bolela gore ‘Morongwa o tla go šireletša.’ Jesu o be a se na maikemišetšo a go nyaka tšhireletšo ya mohlolo go Tatagwe e le feela bakeng sa go lebiša tlhokomelo go yena ka noši. Jesu o itše: “Morêna Modimo wa xaxo O se kê wa Mo leka!”—Mateo 4:​5-7; Luka 4:​9-12.

Leano la mafelelo leo Sathane a le dirišitšego e be e le le le lebanyago kudu. O ile a leka go dira tumelelano le Jesu ka go mo nea lefase ka moka le letago la lona ka tiro e tee feela ya borapedi. E  bile selo sa mafelelo seo Sathane a bego a ka mo nea. Eupša Jesu o be a ka rapela bjang lenaba le legolo la Tatagwe? Ke mo go sa kwagalego! Jesu o arabile ka gore: “O khunamêlê Morena Modimo wa xaxo, O dirêlê Yêna a nnoši!”—Mateo 4:​8-11; Luka 4:​5-8.

Ka morago ga ge maiteko ao a mararo a paletšwe, Sathane o ile a ‘tlogela Jesu go fihla ka nako e nngwe e loketšego.’ (Luka 4:​13, bapiša le NW.) Se se bontšha gore Sathane o be a dula a phafogetše sebaka sa go ka leka potego ya Jesu. Nako e loketšego e ile ya tšwelela nywaga e mebedi le seripa ka morago ge Jesu a be a thoma go lokišeletša barutiwa ba gagwe bakeng sa lehu la gagwe leo le bego le batametše. Moapostola Petro o itše: “Morêna! A k’O lôtêxê, tšeo di se kê tša Xo dirêxêla.”—Mateo 16:​21, 22.

Na go a kgonega gore keletšo e bjalo ya maikemišetšo a mabotse eupša e le e fošagetšego e ka ba e ile ya kwagala e le e ipiletšago go Jesu, ka ge e be e e-tšwa go yo mongwe wa barutiwa ba gagwe? Kapejana Jesu o ile a lemoga gore mantšu ao a be a bonagatša dikgopolo tša Sathane, e sego tša Jehofa. Kriste o ile a arabela ka mo go tiilego gore: “Tloxa fá pele xa-ka, wene Lenaba; O a nkxopiša, xobane xa O eleletše tša Modimo, O eleletša tša batho.”—Mateo 16:23.

Ka baka la lerato la Jesu la ka mehla la go rata Jehofa, Sathane o ile a se ke a kgona go roba potego ya gagwe. Ga go na selo seo Diabolo a bego a ka kgona go se nea, ga go na teko, go sa šetšwe gore ke e šoro gakaakang, yeo e bego e ka fokodiša go botegela ga Jesu Tatagwe wa legodimong ka go se kwanantšhe. Na re tla ba le boikemišetšo bjo bo swanago ge maemo a dira gore go be thata go kgomarela potego ya rena? Mohlala wa Jobo o tla re thuša go kwešiša kaone ditlhohlo tšeo re lebeletšanago le tšona.

Potego e sa Kwanantšhego ge re Lebeletšane le Mathata

Bjalo ka ge Jobo a ile a lemoga, mathata a ka re wela le ge e le neng. E be e le monna yo a nyetšego gomme a thabile a na le bana ba lesome le lenaneo le lebotse la moya. (Jobo 1:5) Gaešita le ge Jobo a be a sa tsebe, potego ya gagwe go Modimo e ile ya fetoga kgang kua kgorong ya legodimong, gomme Sathane o ile a ikemišetša go roba potego ya gagwe ka tsela le ge e le efe yeo a ka kgonago.

Kapejana, Jobo o ile a lahlegelwa ke dilo tša gagwe tše di bonagalago. (Jobo 1:​14-17) Lega go le bjalo, potego ya Jobo e ile ya lebeletšana le teko ka katlego ka gobane ga se a ka a bota tšhelete. Ge a be a gopola nako ya ge a sa le mohumi, Jobo o itše: “Xe nkabe ke botile dixauta, . . . Xe nkabe ke thabetše bontši bya mahumô, . . . Ké mo le tšôna-tšeo e kabexo è le molato . . . ka xobane nkabe ke hladile Modimo wa maxodimong.”—Jobo 31:​24, 25, 28.

Lehono, go a kgonega gore re ka lahlegelwa ke dilo ka moka tšeo re nago le tšona ka go ponya ga leihlo. Rakgwebo yo e lego yo mongwe wa Dihlatse tša Jehofa o ile a hlalefetšwa tšhelete e ntši kudu, gomme seo sa mo tlogela a se na selo. O dumela ka potego gore: “Ke nyakile ke e ba le tlhaselo ya pelo. Ge e le gabotse, ke nagana gore nkabe ke bile le yona ge nkabe e be e se ka tswalano ya-ka le Modimo. Lega go le bjalo, phihlelo ye e ile ya dira gore ke lemoge ntlha ya gore mehola ya moya e be e sa tle pele bophelong bja-ka. Go thabišwa ke go dira tšhelete go ile gwa šira dilo tše dingwe ka moka.” Ga e sa le go tloga ka nako yeo Hlatse ye e fokoditše modiro wa yona wa kgwebo, gomme e fela e hlankela e le mmulamadibogo wa go thuša, e neela diiri tše 50 goba go feta moo ka kgwedi e le bodireding bja Bokriste. Lega go le bjalo, mathata a mangwe e ka ba a kwešago bohloko kudu go feta go lahlegelwa ga motho ke dithoto.

Jobo o be a se a tšwa a nweletša ka kgopolong ditaba tša mabapi le go lahlegelwa ke mahumo a gagwe ge a be a amogela ditaba tša gore bana ba gagwe ba lesome ba hwile. O ile a tšwela pele a phegeletše gore: “Leina la Morêna a le rêtwê.” (Jobo 1:​18-21) Na re tla kgomarela potego ya rena ge e ba re lahlegelwa kapejana ke ditho tše mmalwa tša malapa a gabo rena? Francisco e lego molebeledi wa Mokriste kua Sepania, o ile a lahlegelwa ke bana ba babedi kotsing e šoro ya pese. O ile a hwetša khomotšo ka go batamela kgaufsi le Jehofa le go oketša modiro wa gagwe bodireding bja Bokriste.

Gaešita le ka morago ga go lahlegelwa ka mo go tšhošago ke bana ba gagwe, teko ya Jobo e be e se ya fela. Sathane o ile a mo hlasela ka bolwetši bjo bo hlaswegago le bjo bohloko. Ka yona nako yeo,  Jobo o ile a amogela keletšo e fošagetšego go tšwa go mosadi wa gagwe. O ile a mo kgothaletša gore: “Roga Modimo gomme o ikhwele!” (PK) Jobo o ile a hlokomologa keletšo ya gagwe, gomme ga se a ka “a senya ka molomo wa xaxwe.” (Jobo 2:​9, 10) Potego ya gagwe e be e se ya ithekga ka lapa la gagwe, eupša e be e ithekgile ka tswalano ya gagwe ya motho ka noši le Jehofa.

Flora yoo monna wa gagwe le morwa wa gagwe yo mogolo ba ilego ba tlogela tsela ya Bokriste nywaga e fetago e lesome e fetilego, o kwešiša maikwelo ao Jobo a swanetšego go ba a bile le ona. O dumela gore: “Ge kapejana o lahlegelwa ke thekgo ya lapa la gago, e ka ba mo go kwešago bohloko. Eupša ke be ke tseba gore ke be nka se hwetše lethabo ge ke le ka ntle ga mokgatlo wa Jehofa. Ka gona ke ile ka ema ke tiile gomme ka bea Jehofa pele ge ke katanela go tšwela pele go ba mosadi le mma yo botse. Ke be ke rapela leboelela, gomme Jehofa o ile a mmatlafatša. Ke motho yo a thabilego ka gobane go sa šetšwe kganetšo ya boikemišetšo ya mmona wa-ka, ke ithutile go ithekga ka mo go feletšego ka Jehofa.”

Leano le le latelago la Sathane la go roba potego ya Jobo le be le akaretša bagwera ba gagwe ba bararo. (Jobo 2:​11-13) E swanetše go ba e bile mo go gateletšago gakaakang ge ba be ba thoma go mo ganetša. Ge nkabe a ile a dumela mabaka a bona, a ka ba a ile a lahlegelwa ke go holofela ga gagwe Jehofa Modimo. Keletšo ya bona e nyamišago e ka ba e ile ya roba moya wa gagwe le potego ya gagwe gomme ka go rialo maano a Sathane a ka ba a ile a atlega.

Go e na le moo, Jobo o ile a phegelela ka gore: “Nka se ke ka tloša potego ya-ka go nna go fihlela ke e-hwa!” (Jobo 27:5, NW) Ga se a ka a re, ‘Nka se ke ka dumelela lena banna le tloša potego ya-ka!’ Jobo o be a tseba gore potego ya gagwe e be e ithekgile ka yena le lerato la gagwe la go rata Jehofa.

Leano la Kgale le Thopa Mohlaselwa yo Mofsa

Sathane o sa dutše a diriša keletšo e fapogilego goba dipolelo tše di se nago tlhaologanyo tše tšwago go bagwera le badumedi-gotee. Go nyamišwa ka gare ga phuthego go ka fokodiša kgodišego ya rena gabonolo kudu go feta tlaišego e tšwago ka ntle ga phuthego. Mogolo wa Mokriste yoo nakong e fetilego e bego e le lešole ntweng o ile a fapanya seo le bohloko bjoo a ilego a bo kwa ka baka la mantšu a se nago tlhaologanyo le ditiro tša Bakriste-gotee ba itšego. Mabapi le tiragalo ye e hlalositšwego mafelelong o itše: “Ke selo se thata kudu seo nkilego ka lebeletšana le sona.”

Ka lehlakoreng le lengwe, re ka befedišwa kudu ke go se phethagale ga badumedi-gotee le rena moo e lego gore re tlogela go bolela le batho ba itšego goba gaešita le go thoma go se be gona dibokeng tša Bokriste. Go fodiša maikwelo a rena a gobetšego go ka bonagala e le taba ya bohlokwa kudu. Eupša ke mo go nyamišago gakaakang go latela kgopolo e bjalo ya go bonela dilo kgaufsi le go dumelela gore selo sa bohlokwa kudu se re nago le sonatswalano ya rena le Jehofase fokodišwe ke seo ba bangwe ba se dirago goba go se bolela. Ge e ba re dumeletše seo go direga, re tla ba bahlaselwa ba a mangwe a maano a Sathane a kgale.

Ka mo go kwešišegago, re lebelela ditekanyetšo tše phagamego ka phuthegong ya Bokriste. Eupša ge e ba re letela mo gontši go barapedi-gotee le rena, ba sa dutšego ba sa phethagala, ka ntle le pelaelo re tla nyama. Ka mo go fapanego, Jehofa ke yo a leka-lekanego dilong tšeo a di letetšego go bahlanka ba gagwe. Ge e ba re ekiša mohlala wa gagwe, re tla itokišetša go kgotlelela go se phethagale ga bona. (Ba-Efeso 4:​2, 32) Moapostola Paulo o neile keletšo ye: “Xe Le xalefa Le se kê la senya; a letšatši le se dikêlê Lè sa xalefile. ’Me Le se kê la šuthêla Diabolo sebaka.”—Ba-Efeso 4:​26, 27.

Bjalo ka ge Beibele e bontšha ka mo go kwagalago, Sathane o diriša maano a bohwirihwiri a mantši a fapa-fapanego e le gore a hwetšege e ba a ka kgonatsela ya go roba potego ya Mokriste. A mangwe a maano a gagwe ke ao a ipiletšago nameng ya sebe, a mangwe ke ao a kwešago bohloko. Go tšwa poledišanong ye, o ka bona lebaka leo ka lona le ka mohla o sa swanelago go tanywa o sa ikemišetša. Ka lerato la gago la go rata Modimo leo le metšego ka go tia ka pelong ya gago, ikemišetše go hlatsela Diabolo e le moaketši gomme o thabiše pelo ya Jehofa. (Diema 27:​11; Johane 8:​44) Gopola, potego ya kgonthe ya Mokriste le ka mohla ga se ya swanela go kwanantšhwa, go sa šetšwe teko le ge e le efe yeo re lebeletšanago le yona.