Baagišani ba Babotse ba Bohlokwa

“Moaxišani wa kxaufsi ó phala ngwan’eno wa kxolê.”Diema 27:10.

SEITHUTI sa lekgolong la pele la nywaga C.E. se ile sa botšiša Jesu gore: “Xomme wa xešo [“moagišani wa-ka,” NW] ké mang?” Jesu ga se a mo nea karabo ya gore moagišani wa gagwe e be e le mang, eupša o ile a mo nea karabo ya gore ke eng seo se dirago moagišani wa kgonthe. Mohlomongwe o tlwaelane le seswantšho se sa Jesu. Ba bantši ba se tseba e le seswantšho sa mo-Samaria wa kgaugelo gomme se begilwe ka Ebangeding ya Luka. Jesu o laodišitše kanegelo ye ka mokgwa wo:

“Motho e mongwê ó be a foloxa à e-tšwa Jerusalêma a ya Jeriko; ’me a wêla xare xa bahlakodi. Ba mo hlobodiša, ba mo nthša dinthô, ba ikêla, ba mo tloxêla à le makxatheng. Xwa tla moperisita à foloxa ka tsela yeo; a re xo mmôna a aroxa a feta. Xwa tla le Mo-Lefi; xe a fihla felô fao, a mmôna a aroxa a feta. Monna wa Samaria, e a bexo a êta a tla moo a mmôna, a mo xauxêla. A batamêla, a mo tlêmêlêla dinthô à di thšetše makhura le beine; a mo nametša lekaba la xaxwe, a mo iša ngwakong wa baeti, a mo ôkêla xôna. Ka bosasa xe a tloxa, a nthša mašeleng a mabedi, a a nea mong wa ngwakô, a re: Mo ôkê; se O tl’o xo mo nthšetša sôna sa fetiša seo, O tlo bušetšwa xe ke boa. Byale xe O bôna, xo ba bararo bao ké ofe a  tlilexo a ba wa xabô-eo wa xo wêla xare xa bahlakodi?”—Luka 10:​29-36.

Go bonala seithuti se ile sa kwešiša moko wa seswantšho. Ka ntle le go dika-dika se ile sa bolela ka mo go nepagetšego gore yo e bego e le moagišani wa monna yo a gobaditšwego e be e le: “E a mo dirilexo ka kxauxêlô.” Ke moka Jesu o ile a mmotša gore: “Sepela, O y’o dira ka mokxwa woo le wene.” (Luka 10:​37) A seswantšho se matla gakaakang sa seo se bolelwago ke go ba moagišani wa kgonthe! Seswantšho sa Jesu se ka ba sa re tutueletša go ipotšiša gore: ‘Ke moagišani wa mohuta mang? Na setlogo sa-ka sa morafo goba sa setšhaba se ntutuetša go kgetha bao e lego baagišani ba-ka? Na mabaka a bjalo a lekanyetša boikarabelo bja-ka bja go thuša mogagešo le ge e le ofe yo ke mmonago a le bothateng? Na ke dira boiteko bjo bogolo bja go ba moagišani yo mobotse?’

Re Thoma Kae?

Ge e ba re ikwa re swanetše go kaonefatša tabeng ye, re swanetše go thoma ka boemo bja rena bja kgopolo. Dilo tšeo re tshwenyegago ka tšona di swanetše go ithekga ka go ba moagišani yo mobotse. Le gona se se ka tlaleletša go beng ga rena le baagišani ba babotse. Mo e ka bago nywaga e dikete tše pedi e fetilego, Jesu o ile a gatelela molao wa motheo woo wa bohlokwa wa ditswalano tša batho Thutong ya gagwe e tumilego ya Thabeng. O itše: “Tšohle tše Le rataxo xore batho ba Le dirêlê tšôna, le lena Le ba dirêlê tšôna-tšeo.” (Mateo 7:​12) Go swara ba bangwe ka tlhompho, seriti le ka botho go ba kgothaletša go go swara ka tsela e swanago.

Sehlogong seo se rego “Go Rata Moagišani wa Gago,” seo se tšwelelago ka makasineng wa The Nation Since 1865, mmegi wa ditaba le mongwadi Lise Funderburg o boletše dilo tše itšego tše bonolo tšeo di ka dirwago go kgothaletša bogwera gare ga baagišani. O ngwadile gore: “Ke nyaka . . . go be le kgokagano ya motho ka noši ditirong tše dintši tše nyenyane tša botho tšeo baagišani ba di direlanagogo išetšana kuranta, go hlokomelelana bana le go rekelana selo se itšego lebenkeleng. Ke nyaka gore tswalano ye e be gona mafaseng ao a lego lekatana kudu, moo ditšhaba di fokodišwago le go hloka tšhireletšego ka baka la go boifa bosenyi.” Ke moka o oketša ka gore: “Go na le moo re swanetšego go thoma gona. Gomme e ka fo ba go moagišani wa gago wa kgaufsi.”

Makasine wa Canadian Geographic le wona o boletše ntlha e holago yeo e ka thušago baagišani go hlagolela go lebelelana ka boemo bja kgopolo bjo bobotse. Mongwadi Marni Jackson o itše: “Go swana le lapa, baagišani ke batho bao o sa ikgethelego bona bophelong bja gago. Ditswalano di nyaka bohlale, ditiro tša go ba šedi le kgotlelelo.”

Baagišani ba Babotse ke Banei ba Babotse

Ke therešo gore bontši bja rena re ikwa re sa lokologa ka go batamela baagišani. Go ka bonagala go le bonolo kudu go phema go ba le kgokagano le go ikaroganya. Lega go le bjalo, Beibele e re “lešexo la monei le phala la monewa.” (Ditiro 20:​35) Ka gona, moagišani yo mobotse o katanela go dira boiteko bja go itlwaelanya le batho bao ba mo dikologilego. Le ge e se gore o nyaka go dira bogwera bja kgaufsi, o dira boiteko bja go boledišana le bona kgafetša-kgafetša, mohlomongwe a thoma ka go myemyela ka tsela ya bogwera goba ka go dumediša.

Ka ge go bontšhitšwe ka mo godimo, ke “ditiro tše dintši tše nyenyane tša botho” tšeo baagišani ba di direlanago tšeo di lego bohlokwa kudu go hlomeng le go bolokeng ditswalano tše botho le baagišani. Ka gona ke mo gobotse go lebelela ditiro tše nyenyane tša botho tšeo re ka di bontšhago moagišani, ka gobane tše gantši di tla godiša moya wa tirišano le go hlomphana. Go feta moo, ka go dira bjalo, re tla latela keletšo ya Beibele e rego: “Yo a swanetšwexo ke tše botse O se mo hlokišê tšôna, xe ’atla sa xaxo sè kxôna xo di dira.”—Diema 3:​27; Jakobo 2:​14-17.

Baagišani ba Babotse ke Baamogedi Bao ba Nago le Tebogo

E tla ba mo go swanetšego ge e ba re ka bolela gore motho yo mongwe le yo mongwe o amogela thušo le dimpho ka boemo bja kgopolo bja go bontšha tebogo. Ka madimabe, ga se ka mehla se se lego bjalo. Dineo tše dintši tša go thuša le dimpho tše di holago di amogetšwe ka mokgwa wa  go se leboge moo e lego gore monei yo a neago ka go tšwa pelong a ka nagana gore, ‘Ke la mafelelo ke dira seo!’ Ka dinako tše dingwe, maiteko a gago ka moka a go dumediša ka bogwera le go emišetša baagišani ba gago letsogo a ka fo tsoša karabelo yeo e sego ya bogwera.

Lega go le bjalo, ge e le gabotse maemong a mantši moamogedi ga se gore ga a na moya wa go bontšha tebogo, gaešita le ge go ka bonagala a le bjalo kantle. Mohlomongwe setšo sa gagwe sa setlogo se mo dira gore a dika-dike goba a be le dihlong gomme se mo dira gore a itshware ka tsela ya go se be le taba, mafelelong a bonagale a se na bogwera. Ka lehlakoreng le lengwe, lefaseng le le se nago tebogo, batho ba bangwe ba ka lebelela go ba ga gago le bogwera e le selo se se sa tlwaelegago goba gaešita le go belaela maikemišetšo a gago. Ba ka nyaka gore o ba kgonthišetše lefsa ka tsela e itšego. Ka gona, go thea ditswalano tša bogwera go ka tšea nako le go nyaka kgotlelelo. Lega go le bjalo, baagišani ba ithutago mokgwa wa go ba banei ba babotse le baamogedi ba babotse ba tla tlaleletša moyeng o mobotse wa tikologo e nago le khutšo le lethabo.

Ge go Tšwelela Bothata

Moagišani yo mobotse ke motho wa bohlokwa ge go tšwelela masetla-pelo. Dinakong tša mathata, moya wa bogwera bja kgonthe o a bonagala. Go na le dipego tše dintši tša ditiro tše e sego tša boithati tšeo di dirwago ke baagišani dinakong tše bjalo. Masetla-pelo a tlwaelegilego go bonala a dira gore baagišani ba šomišane ka go ithatela le go katana legatong la yo mongwe le yo mongwe wa bona. Gaešita le bao ba nago le dipono tše di ganetšanago gantši ba tla šoma ba bapelane magetla.

Ka mohlala, The New York Times e begile gore ge tšhišinyego e tšhošago ya lefase e hlasela Turkey ka 1999, manaba a kgale a ile a bontšha tlemo e tiilego ya boagišani. Mongwadi wa kuranta wa mo-Gerika Anna Stergiou o ngwadile ka kuranteng ya Athene gore: “Re rutilwe go hloya ma-Turkey ka nywaga e mentši. Eupša bohloko bja bona bjo bo tseneletšego ga bo re thabiše. Re be re kwele bohloko, re ile ra lla nke lehloyo la kgale le be le fedišitšwe ke ge re bona masea a hwilego.” Ge masolo a tša tlhakodišo a be a emišwa ka molao, dihlopha tša tlhakodišo tša ba-Gerika di ile tša gana go kgaotša go nyaka baphologi.

Go tšea karolo modirong wa tlhakodišo ka morago ga ge masetla-pelo a tšweletše ka ntle le pelaelo ke tiro e botse le ya go bontšha go ba le sebete. Gaešita le ge go le bjalo, go phološa bophelo bja moagišani ka go mo hlokomediša pele ga ge kotsi e ka tšwelela ruri go ka lebelelwa e le tiro ya botho ya bohlokwa bjo bogolo. Ka madimabe, histori e bontšha gore bao ba lemošago baagišani ka dikotsi tšeo di tlago gantši ga ba amogelwe, ka ge nakong ya temošo, kotsi ye e batamelago ga e lemogwe gabonolo. Bao ba tlišago temošo gantši ba a ganetšwa. Go nyakega gore mang le mang yo a lekago go thuša batho ba sa lemogego boemo bja bona bja kotsi e be yo a phegelelago kudu le go ikgafa.

Tiro e Kgolo Kudu ya Botho

Lehono, selo se sengwe se segolo kudu go feta kotsi ya tlhago se tlo wela batho. Ke tiro e boletšwego e sa le pele ya Modimo yo Matla ohle yeo e tlago go fediša bosenyi, bokgopo le mathata a swanago le ao lefaseng. (Kutollo 16:​16; 21:​3, 4)  Tiro ye e kgolo ga se yeo mohlomongwe e tlago direga eupša e tla direga e le ka kgonthe! Dihlatse tša Jehofa di fišegela go abelana tsebo e nyakegago le batho ba bantši ka mo go ka kgonegago bakeng sa go phologa tiro ye e lego kgaufsi e tla šišinyago lefase. Ke ka baka leo di phegelelago modirong wa tšona wa boboledi wo o tsebegago lefaseng ka moka. (Mateo 24:​14) Di dira se ka go rata, ka lerato la go rata Modimo le moagišani.

Ka gona, o se dumelele kgethollo goba go selekega go go thibela go theeletša ge Dihlatse di go etela goba di go batamela lefelong le ge e le lefe. Di leka go ba baagišani ba babotse. Ka gona amogela taletšo ya bona ya go ithuta Beibele le wena. Ithute kamoo Lentšu la Modimo le re kgonthišetšago ka gona gore bokamoso bja lethabo bjoo bo tlago ba gona magareng ga baagišani bo batametše. Ka nako yeo, go ka se hlwe go sa ba le kgethollo ya morafo, ya bodumedi goba ya batho go ya ka dihlopha yeo e tlago go senya tswalano ya bogwera bjoo bontši bja rena re tlogago re bo kganyoga.

[Diswantšho go letlakala 6, 7]

Ke mo go botse go dira ditiro tša botho tikologong ya geno

[Mothopo]

Globe: Mountain High Maps® Copyright © 1997 Digital Wisdom, Inc.