‘Lebalelanang ka Bolokologi’

NA O dumela gore Modimo o go lebaletše dibe? Kua United States, go bonala batho ba bantši ba bagolo ba dumela seo. Dr. Loren Toussaint, e lego mongwadi wa pele wa nyakišišo e dirilwego University of Michigan Institute for Social Research, o bega gore go ma-Amerika a 1 423 ao go ilego gwa boledišanwa le ona, ba e ka bago 80 lekgolong ya batho ba bagolo ba nago le nywaga ya ka godimo ga e 45 ba boletše gore Modimo o ba lebaletše dibe.

Lega go le bjalo, ke mo go kgahlišago gore ke feela 57 lekgolong ya bao go ilego gwa boledišanwa le bona bao ba boletšego gore ba ile ba lebalela ba bangwe. Dipalo-palo tšeo di re gopotša mantšu a Jesu a Thutong ya Thabeng a rego: “Xobane xe Le lebalêla batho dikaroxô tša bôná, xôna Tata-weno wa maxodimong, le lena ó tlo Le lebalêla. Fêla, xe Le sa lebalele batho dikaroxô tša bôna, Tata-weno le lena a ka se Le lebalêle dikaroxô tša lena.” (Mateo 6:​14, 15) Ee, go lebalela ga Modimo dibe tša rena go ithekgile ka maemo, go fihla bokgoleng bo itšego go ithekgile ka go ikemišetša ga rena go lebalela ba bangwe.

Moapostola Paulo o ile a gopotša Bakriste ba kua Kolose ka molao wo wa motheo. O ile a ba kgothaletša gore: “Tšwelang pele le kgotlelelana gomme le lebalelana ka bolokologi ge e ba motho a e-na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo.” (Ba-Kolose 3:​13, NW) Ke therešo gore se ga se ka mehla se lego bonolo go se dira. Ka mohlala, ge motho yo mongwe a bolela mantšu a go se naganele le a sego botho ka wena, go ka ba thata go lebalela motho yoo ka seo a se dirilego.

Lega go le bjalo, mehola ya go lebalela ke e mentši. Dr. David R. Williams e lego setsebi sa ditswalano tša batho tša leago, o ile a bolela se mabapi le nyakišišo ya gagwe: “Re hweditše mohuta o itšego wa tswalano e tiilego magareng ga go lebalela ba bangwe le boemo bjo bobotse bja monagano go ma-Amerika a nywaga ya magareng le ao a tšofetšego.” Seo se dumelelana le mantšu a Kgoši Salomo yo bohlale, yo a ilego a ngwala nywaga e 3 000 e fetilego gore: “Pelo-thšweu ké ’phelô bya mmele; lehufa ké bolwetši mašapong.” (Diema 14:​30) Ka ge moya wa go lebalela o godiša ditswalano tše dibotse le Modimo le baagišani ba rena, re na le lebaka le lebotse la go sekamela go lebalelaneng ka bolokologi go tšwa pelong.—Mateo 18:35.