Phihlelo

“Nka se Fetoše Selo!”

KA GE GO ANEGA GLADYS ALLEN

Ka dinako tše dingwe ke botšišwa gore, “Ge e ba o be o ka swanela go phela bophelo bja gago gape, o be o tla fetoša’ng?” Nka araba ke kgonthišegile gore, “Nka se fetoše selo!” Anke ke hlalose lebaka leo ka lona ke ikwago ka tsela ye.

SELEMONG sa 1929 ge ke be ke e-⁠na le nywaga e mebedi, selo se itšego se se kgahlišago se ile sa diragalela tate e lego Matthew Allen. O ile a hwetša pukwana ya Millions Now Living Will Never Die!, yeo e gatišitšwego ke Barutwana ba Beibele ba Ditšhaba-tšhaba, bjalo ka ge Dihlatse tša Jehofa di be di tsebja bjalo ka nako yeo. Ka morago ga go bala ka phišego matlakala a sego kae, Tate o ile a re, “Ye ke tsebišo e kgolo kudu yeo nkilego ka e bala!”

Kapejana ka morago ga fao, tate o ile a hwetša dikgatišo tše dingwe go Barutwana ba Beibele. Ga se a ka a senya nako go abelaneng le baagišani ka moka seo a bego a ithuta sona. Lega go le bjalo, go be go se na phuthego ya Dihlatse tša Jehofa setšhabeng sa gabo rena sa magaeng. Ka go lemoga go nyakega ga go ba gona dipokanong tša Bokriste ka mehla, tate o ile a hudušetša lapa Orangeville, Ontario kua Canada ka 1935 ka gobane go be go na le phuthego fao.

Mehleng yeo, ga se ka mehla bana ba bego ba kgothaletšwa go ba gona dibokeng; gantši ba be ba dula ka ntle ga lefelo la diboka gomme ba bapala go fihlela ge batho ba bagolo ba feditše. Se ga se sa ka sa thabiša tate. O ile a nagana gore, “Ge e ba diboka di le bohlokwa go nna, di bohlokwa bakeng sa bana ba-ka.” Ka gona, gaešita le ge a be a sa tšwa go thoma go kopanela, tate o ile a ruta nna, kgaetšedi ya-ka Bob le bo-mogolwa’ka Ella le Ruby go ba gotee le batho ba bagolo dibokeng, gomme re ile ra dira bjalo. Go se go ye kae ke ge bana ba Dihlatse tše dingwe le bona ba e-⁠ba gona. Go ba gona dibokeng le go araba go ile gwa fetoga karolo ya bohlokwa kudu ya maphelo a rena.

Tate o be a rata Beibele, gomme o be a na le tsela  e kgahlišago ya go diragatša dikanegelo tša Beibele. Ka ditiragalo tše, o ile a bjala ka dipelong tša rena tše nyenyane dithuto tše bohlokwa tšeo ke sa dutšego ke di gopola ka lerato le legolo. Yeo ke e gopolago ke gore Jehofa o šegofatša bao ba mo kwago.

Le gona tate o ile a re ruta go diriša Beibele go lwela tumelo ya rena. Re be re tlwaetše go bapala ka yona. Tate o be a ka re, “Ke dumela gore ge ke e-⁠hwa ke ya legodimong. Bjale mpontšheng gore ke fošitše.” Nna le Ruby re be re tla nyakišiša ka gare ga tšhupane (concordance) go hwetša mangwalo ao re ka a dirišago go ganetša thuto yeo. Ka morago ga ge re badile mangwalo ao re a hweditšego, tate o be a tla re, “Seo ke se se kgahlišago, eupša ga se ka tšwa ke kgodišega.” Ka gona re be re tla boela ka go tšhupane. Se gantši se be se tšwela pele ka diiri-iri go fihlela tate a kgotsofetše ka dikarabo tšeo re mo neilego tšona. Ka baka la se, nna le Ruby re ile ra hlangwa gabotse bakeng sa go hlalosa le go lwela ditumelo tša rena.

Go Fenya go Boifa Batho

Go sa šetšwe tlwaetšo e botse yeo ke e hweditšego ka gae le dibokeng tša phuthego, ke swanetše go dumela gore go be go na le dibopego tše dingwe tša ge o le Mokriste tšeo ke ilego ka hwetša e le tše thata. Ka go swana le bafsa ba bantši, ke be ke sa thabele go ba yo a fapanego le ba bangwe, kudu-kudu bao ke bego ke tsena le bona ka klaseng. Teko ya mathomo ya tumelo ya-ka e be e akaretša seo re bego re se bitša megwanto ya tsebišo.

Morero e be e le gore sehlopha sa bana babo rena le dikgaetšedi se sepele ka go iketla ditarateng tše kgolo tša toropo di rwele maswao a nago le melaetša go ona. Re be re tsebana toropong ya gabo rena ya batho ba ka bago 3 000. Mogwantong o mongwe wa tsebišo, ke be ke sepela mafelelong a mothaladi ke rwele leswao leo le bego le balega ka gore “Bodumedi ke Moreo le Kgwebo ya Bofora.” Ba bangwe ba bao ke tsenago le bona sekolo ba ile ba mpona, gomme gatee-tee ba ile ba ema ka morago ga-ka ba opela gore “Modimo Phološa Kgoši.” Ke ile ka lebeletšana bjang le boemo bjo? Ke ile ka rapela ka phišego gore ke be le matla a go tšwela pele. Ge mafelelong mogwanto o be o fedile, ke ile ka kitimela Holong ya Mmušo go bušetša leswao la-ka gomme ka ya gae. Lega go le bjalo, mohlokomedi o ile a mpotša gore mogwanto o mongwe o be o le kgaufsi le go thoma le gore ba be ba nyaka motho wa mafelelo gore a rwale leswao. Ka gona ke ile ka boela gape, ke rapela ka thata go feta le ge e le neng pele. Lega go le bjalo, mo nakong ye ba ke tsenago le bona ka klaseng ba be ba lapile gomme ba boetše gae. Dithapelo tša-ka bakeng sa matla di ile tša fetoga dithapelo tša go nea tebogo!—Diema 3:⁠5.

Bahlanka ba nako e tletšego ba be ba dula ba amogelegile ka legaeng la gešo. E be e le sehlopha se se thabilego seo go bego go thabiša go ba le sona. Dilong tšeo ke sa di gopolago tša ge ke be ke sa le yo monyenyane, batswadi ba rena ka mehla ba be ba re botša ka bodiredi bja nako e tletšego e le modiro o kaone woo re ka o hwetšago.

Ka go arabela kgothatšong ya bona, ke ile ka thoma modiro wa bodiredi bja nako e tletšego ka 1945. Ka morago ke ile ka tlatša mogolwa’aka Ella, yo a bego a bula madibogo kua London, Ontario. Moo, ke ile ka tlwaelanywa le sebopego se sengwe sa tirelo seo ke bego ke nagana gore nka se tsoge ke kgonne go se dira. Bana babo rena ba be ba tlwaetše go sepela tafola ka tafola dipareng tša lefelong leo gomme ba nea bareki dikopi tša Morokami le Consolation (ga bjale ke Phafoga!). Ka mahlatse, modiro o be o dirwa mantšiboa a Mokibelo, ka  gona ke be ke fetša beke ka moka ke rapelela matla a go ya! Modiro o be o tloga o se bonolo go nna, eupša e be e le o putsago.

Ka lehlakoreng le lengwe, ke ile ka ithuta gape le go aba ditokollo tše kgethegilego tša Consolation tšeo di bego di bolela ka go tlaišwa ga bana babo rena kua dikampeng tša tshwenyo tša Nazi, ke boledišana le bo-rakgwebo ba bohlokwa ba Canada ka mo go kgethegilego go akaretša le balaodi ba mekgatlo e megolo. Go theoša le nywaga, ke hweditše gore ka mehla Jehofa o a re thekga ge feela re ithekga ka yena bakeng sa matla. Ka ge tate a be a tlwaetše go bolela, Jehofa o šegofatša bao ba Mo kwago.

Go Arabela Taletšo ya go Hlankela Kua Quebec

Ka July 4, 1940, modiro wa Dihlatse tša Jehofa o ile wa thibelwa kua Canada. Ka morago, thibelo e ile ya tlošwa, eupša di be di sa dutše di tlaišwa kua profenseng ya Roma Katholika ya Quebec. Lesolo le le kgethegilego la go dirišwa ga pampišana ya mantšu a matla ya Quebec’s Burning Hate for God and Christ and Freedom Is the Shame of All Canada le ile la thongwa bakeng sa go lebiša tlhokomelo go tshwaro e mpe ya bana babo rena fao. Nathan H. Knorr, setho sa Sehlopha se Bušago sa Dihlatse tša Jehofa, o ile a bokana le babulamadibogo ba makgolo motseng wa Montreal go hlalosa mafelelo a seo re bego re le kgaufsi le go se dira. Ngwanabo rena Knorr o ile a re botša gore ge e ba re dumela go tšea karolo lesolong le, re ka letela go swarwa gomme ra išwa kgolegong. Seo e bile sa kgonthe gakaakang! Ge nako e tšwela pele, ke ile ka golegwa ka makga a 15. Ge re be re e-⁠ya tirelong ya tšhemo, re be re kgonthišetša gore re swara poraše ya meno le sekamo gore ge go ka direga gore re fetše bošego re le kgolegong di kgone go re thuša.

Mathomong re be re dira bontši bja modiro bošego e le gore re se ke ra ipiletša mahlo a batho. Ke be ke tlwaetše go swara dipampišana tše oketšegilego ka mokotleng woo ke bego ke o atha molaleng ka tlase ga jase ya-ka. Mokotla wo o tletšego dipampišana o be o tloga o kokomogile, o dira gore ke bonagale eka ke imile. Seo se ile sa nkhola ge ke be ke tsena ka gare ga senamelwa seo se tletšego sa batho bohle go ya tšhemong. Ka makga a mmalwa lesogana le lengwe leo le sa boifego selo le ile la emelela gomme la nea mosadi yo a bonagalago a imile setulo sa lona.

Ge nako e dutše e tšwela pele, re ile ra thoma go tšea karolo modirong wa go aba dipampišana mosegare. Re ile ra tlogela dipampišana mejakong e meraro goba e mene, gomme ra fetela pele tšhemong e nngwe. Gantši, seo se ile sa atlega. Lega go le bjalo, ge e ba moruti wa Roma Katholika a be a ka tseba gore re be re le tikologong, re ka letela mathata. Tiragalong e nngwe, moruti o ile a hlohleletša sehlopha sa bahlola-mpherefere se se bopilwego ke bana le batho ba bagolo ba 50 goba ba 60 go re foša ka ditamati le mae. Re ile ra tšhabela ka legaeng la kgaetšedi yo e lego Mokriste, moo re ile ra swanela go fetša bošego re robetše lebatong.

Go be go nyakega babulamadibogo ba bantši go bolela go batho bao ba bolelago se-Fora kua Quebec, ka gona ka December 1958 nna le mogolwa’aka Ruby re ile ra thoma go ithuta leleme la se-Fora. Ka morago ga fao re ile ra abelwa ditikologong tše mmalwa tša profense yeo moo go bego go bolelwa se-Fora. Kabelo e nngwe le e nngwe e be e le phihlelo ya moswana-noši. Lefelong le lengwe, re ile ra sepela ka ntlo le ntlo diiri tše seswai ka letšatši ka lebaka la nywaga e mebedi re sa hwetše motho yo a arabago! Batho ba be ba fo tla mojako gomme ba tswalele diširo. Eupša ga se ra ka ra hwa matwa. Lehono, go na le diphuthego tše pedi tše atlegago toropong yeo.

Go Thekgwa ke Jehofa ka Ditsela ka Moka

Re ile ra thoma modiro wa bobulamadibogo bjo bo kgethegilego ka 1965. Kabelong e nngwe ya bobulamadibogo bjo bo kgethegilego, re ile ra kwešiša bohlokwa bjo bo tletšego bja mantšu a Paulo a begilwego go 1 Timotheo 6:⁠8 a rego: “Ké xôna, xe re na le dijô le diaparô, a re kxolweng ke tšôna.” Re ile ra swanela go reka feela seo se lego bohlokwa e le gore re hlokomele ditshenyagalelo tša rena. Ka gona re ile ra beela ka thoko tšhelete ya go lefelela tshepedišo ya go ruthetša ntlo, rente, mohlagase le dijo. Ge re dirile bjalo, re be re šala ka disente tše 25 bakeng sa go di diriša ka mo re nyakago kgwedi ka moka.

Ka tšhelete e nyenyane yeo re bego re e-⁠na le yona, re be re kgona go lefelela go ba le tshepedišo ya go ruthetša ntlo ya rena ka diiri tše sego kae bošego. Ka gona phapoši ya rena ya go robala e be e  sa ke e ruthela go feta di-degree celcius tše 15 gomme gantši e be e tonya kudu. Ke moka, letšatši le lengwe morwa wa yo mongwe wa dithuto tša Beibele tša Ruby o ile a re etela. O swanetše go ba a ile a fihla gae a botša mmagwe gore re bolawa ke phefo, ka gobane ka morago ga fao o ile a re romela ditolara tše lesome kgwedi e nngwe le e nngwe gore re kgone go reka makhura e le gore re ka tlogela seruthufatši se buletšwe ka dinako tšohle. Ga se ra ka ra ikwa re diila ka tsela le ge e le efe. Re be re sa huma, eupša ka mehla re be re na le dinyakwa tša motheo. Re be re bona gore selo le ge e le sefe se oketšegilego e be e le tšhegofatšo. Mantšu a Psalme 37:​25 a rego: “[Ga] kè sešo ka bôna moloki à lahlilwe, le bana ba xaxwe bà diila,” ke a therešo gakaakang!

Go sa šetšwe kganetšo yeo re ilego ra lebeletšana le yona, ke be ke thabela go bona palo ya batho bao re bego re swara dithuto tša Beibele le bona ba fihlelela tsebo ya therešo. Ba bangwe ba ile ba tsenela bodiredi bja nako e tletšego e le modiro wa bona, e lego seo se ilego sa ntlišetša lethabo le kgethegilego.

Go Lebeletšana le Ditlhohlo tše Difsa ka Katlego

Cornwall, Ontario, e bile kabelo ya rena e mpsha ka 1970. Mo e ka bago ka morago ga ngwaga ge re fihlile Cornwall, mma o ile a babja. Tate o hlokofetše ka 1957, gomme nna le bo-mogolwa’aka ba babedi re ile ra šiedišana ka go hlokomela mma go fihla a e-⁠hwa ka 1972. Badirišani-gotee le rena ba babulamadibogo ba kgethegilego e lego Ella Lisitza le Ann Kowalenko e be e le tlhohleletšo e tsepamego le thekgo e lerato nakong ye. Ge re be re se gona ba ile ba hlokomela dithuto tša rena tša Beibele le maikarabelo a mangwe. Mantšu a Diema 18:​24 ao a rego: “Xo na le moratwa-mmotexi mo-phala-ngwana weno,” ke a therešo gakaakang!

Ka kgonthe bophelo bo tletše ka ditlhohlo. Ka seatla se thekgago se lerato sa Jehofa, ke ile ka kgona go lebeletšana le tšona. Ke sa dutše ke thabela go tšwela pele ka bophelo bja tirelo ya nako e tletšego. Bob yo a hwilego ka 1993, o feditše nywaga e fetago e 20 modirong wa bobulamadibogo, yeo e akaretšago nywaga e 10 ya bohlokwa ya go bula madibogo gotee le mosadi wa gagwe Doll. Mogolwa’aka Ella, yo a hlokofetšego ka October 1998, o butše madibogo ka nywaga e fetago e 30 gomme ka mehla a dula a na le moya wa bobulamadibogo. Ka 1991 mogolwa’aka yo mongwe e lego Ruby, o ile a hlahlobja gomme a hwetšwa a na le bolwetši bja kankere. Lega go le bjalo, o ile a diriša matla a gagwe a lekanyeditšwego go bolela ditaba tše dibotse.  Le yena o ile a dula a na le lethabo go fihla mesong yeo a hwilego ka yona ka September 26, 1999. Le ge ke se sa na bo-mogolwa’aka, ke na le lapa la moya la bana babo rena le dikgaetšedi leo le nthušago go dula ke na le lethabo.

Ge ke lebelela morago bophelong bja-ka, nka fetoša’ng? Ga se ka ka ka nyalwa, eupša ke šegofaditšwe ka batswadi ba lerato, kgaetšedi le bo-mogolwa’aka bao ba ilego ba bea therešo pele maphelong a bona. Ke lebeletše pele go ba bona ka moka ga bona kgaufsinyane tsogong. Ke kgona go kwa tate a nkgokarela gona bjale gomme ke bona megokgo ya mma ge re gokarelana. Ella, Ruby le Bob ba tla be ba taboga ka lethabo.

Mo nakong ye, ke na le maikemišetšo a go tšwela pele ke diriša bophelo le matla ao a ntšhaletšego go reta le go tumiša Jehofa. Tirelo ya bobulamadibogo bja nako e tletšego ke e kgahlišago, ke bophelo bjo bo putsago. Go bjalo ka ge mopsalme a boletše ka bao ba sepelago ditseleng tša Jehofa gore: “O wa mahlatse, le tše botse ké tša xaxo.”—Psalme 128:​1, 2.

[Diswantšho go letlakala 26]

Tate o be a rata Beibele. O re rutile go e diriša go lwela tumelo ya rena

[Seswantšho go letlakala 28]

Go tloga ka go le letshadi go ya go le letona: Ruby, nna, Bob, Ella, mma le tate ka 1947

[Seswantšho go letlakala 28]

Mothalading wa ka pele; go tloga go le letshadi go ya go le letona: Nna, Ruby le Ella re le Kopanong ya Selete ka 1998