Re Swanetše go Lebelela Bjang Diteko?

DITEKO! Yo mongwe le yo mongwe o swanetše ke go lebeletšana le tšona. Di ka bakwa ke go se swane ga dimelo, mathata a tša boiphedišo, bolwetši, meleko, kgateletšo ya dithaka ya gore re dire se se fošagetšego, tlaišo, ditlhohlo tša boema-gare bja rena goba go lebeletšana le borapedi bja medimo ya diswantšho gotee le dilo tše dingwe tše dintši. Go sa šetšwe mohuta wa diteko tšeo re lebeletšanago le tšona, gantši di baka pelaelo e kgolo. Re ka swaragana bjang le tšona ka katlego? Na go na le tsela le ge e le efe yeo di re holago ka yona?

Thekgo e Kaone

Kgoši Dafida wa bogologolo o phetše bophelo bjo bo bego bo tletše diteko, lega go le bjalo, o ile a hwa a botega. O kgonne bjang go kgotlelela? O ile a šupa mothopo wa matla a gagwe ge a be a re: “Morêna ké modiši wa-ka; nka se hlôke selô.” Gomme o ile a tšwela pele gore: “Le xe nka sepela molapong wa moriti wa lehu, nka se boife bobe, xobane ó na le nna; molamó wa xaxwe le ’para la xaxwe di nkuša pelo.” (Psalme 23:​1, 4) Ee, Jehofa ke mothopo wa thekgo e tletšego. O ile a diša Dafida dinakong tše di bego di gateletša kudu, gomme o ikemišeditše go re direla se se swanago ge go nyakega.

Re ka hwetša bjang thekgo ya Jehofa? Beibele e šupa tsela ge e re: “Lekang Le bônê xobane Morêna ké yo boló.” (Psalme 34:8) Yeo ke taletšo e borutho, eupša e bolela’ng? Ke kgothatšo gore re hlankela Jehofa gomme re dumelelanya maphelo a rena ka mo go feletšego le thato ya gagwe. Tsela e bjalo e bolela go gafa karolo ya tokologo ya rena, go ikgafa. Mabakeng a mangwe, go ka ba gwa lebiša ditekonggo tlaišega. Lega go le bjalo, bao ba amogelago taletšo ya Jehofa ka pelo ka moka le ka mohla ga ba itshole ge ba dirile seo. Jehofa o tla ba yo botho go bona. O tla ba hlahla le go ba hlokomela moyeng. O tla ba thekga ditekong ka thušo ya Lentšu la gagwe, moya wa gagwe o mokgethwa le phuthego ya Bokriste. Gomme mafelelong o tla ba putsa ka bophelo bjo bo sa felego.—Psalme 23:6; 25:9; Jesaya 30:​21; Ba-Roma 15:5.

Bao ba dirago phetho e fetošago bophelo e le gore ba hlankele Jehofa le bao ba kgomarelago phethong yeo ba hwetša gore Jehofa o phethagatša dikholofetšo tša gagwe ka moka. Yeo e bile phihlelo ya ba-Isiraele ba ilego ba latela Jošua go  ya Nageng ya Kholofetšo. Ge ba fetša go tshela Jorodane, go ile gwa ba le diteko tšeo ba ilego ba swanela go di kgotlelela, dintwa tšeo ba ilego ba swanela go di lwa le dithuto tše bohloko tšeo ba ilego ba swanela go ithuta tšona. Eupša moloko woo o itlhatsetše o botega kudu go feta bo-tatago bona bao ba ilego ba tšwa Egipita gomme ba hwela lešokeng. Lega go le bjalo, Jehofa o ile a thekga ba botegago, gomme pego ya Beibele ge e bolela ka boemo bja bona ge Jošua a fetša go hwa e re: “Morêna a ba khutšiša ka thokô tše xo fêla, a dira tšohle tše a di enetšexo bô-tat’abô . . . Xa xo a’ hlaêla le setee sa tše botse ka moka tše Morêna a di boditšexo ba sethšaba sa Isiraele; ka moka di be di tšweletše.” (Jošua 21:​44, 45) Yeo e ka ba phihlelo ya rena ge e ba re ithekga ka mo go feletšego ka Jehofa ge re le ka tlase ga teko le dinakong tše dingwe ka moka.

Ke’ng seo se ka fokodišago kholofelo ya rena go Jehofa? Jesu o ile a šupa selo se sengwe ge a be a re: “Xa xo e a kxônaxo xo hlankêla marêna a mabedi . . . Le ka se kxône xo dirêla Modimo, ’me la dirêla le Mamôna.” (Mateo 6:​24) Ge e ba re bota Jehofa, re ka se ke ra nyaka tšhireletšo mo batho ba bantši lefaseng ba e nyakago gona, e lego dilong tše di bonagalago. Jesu o eleditše balatedi ba gagwe gore: “Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo [dilo tše di lego bohlokwa tše bonagalago] ka moka.” (Mateo 6:​33) Mokriste yo a bolokago pono e leka-lekanego ka dilo tše di bonagalago gomme a bea Mmušo wa Modimo pele bophelong bja gagwe, o dira kgetho e botse. (Mmoledi 7:​12) Go ba gona, go ka mo nyaka se sengwe go dira bjalo. A ka dira boikgafo dilong tše di bonagalago. Lega go le bjalo, o tla buna meputso e mentši. Gomme Jehofa o tla mo thekga.—Jesaya 48:​17, 18.

Seo re Ithutago Sona Ditekong

Go ba gona, go kgetha go ‘leka gomme re bone gore Morena ke yo bolo’ ga go šireletše motho ditiragalong tšeo di sa letelwago tša bophelo; goba go re šireletša ka mo go feletšego ditlhaselong tša Sathane le baemedi ba gagwe bao e lego batho. (Mmoledi 9:​11) Ka baka la se, potego le maikemišetšo a Mokriste di ka lekwa. Ke ka baka la’ng Jehofa a tlogela barapedi ba gagwe gore ba welwe ke diteko tše bjalo? Moapostola Petro o ile a nea lebaka le lengwe ge a be a ngwala gore: “Lè le ba xo hlokofatšwa lebakanyana xe xo swanetše xo ba byalô, Lè le melekong ya mehuta-huta; è le xore xo bônalê xo bôtêxa xa tumêlô ya lena ya thêkô ye e fetaxo ya xauta ye e ônalaxo le xe e lekotšwe ka mollô, xore tumêlô ya lena e hwetšwê è ratêxa, è tumišêxa, è na le letaxô mohla wa pônaxalô ya Jesu Kriste.” (1 Petro 1:​6, 7) Ee, diteko di re nea sebaka sa gore re bontšhe matla a tumelo ya rena le lerato la rena go Jehofa. Gomme di thuša go araba dikwero le ditatofatšo tša Sathane Diabolo.—Diema 27:​11; Kutollo 12:10.

Le gona diteko di re thuša go hlagolela dika tše dingwe tša Bokriste. E le mohlala, ela hloko mantšu a mopsalme a rego: “Morêna ké yo moxolo-xolo, ’me ó bôna babôtlana; le wa xo iphaxamiša ó mo tseba ka kxolê.” (Psalme 138:6) Bontši bja rena ga re ba ikokobeditšego ka tlhago, eupša diteko di ka re thuša go hlagolela seka seo sa bohlokwa. Gopola tiragalo ya morago kua mehleng ya Moše ge ba bangwe ba ba-Isiraele ba be ba hwetša e le mo go tenago go ja manna beke le beke, kgwedi le kgwedi. Go molaleng gore se e be e le teko go bona, gaešita le ge manna e be e le tokišetšo ya mohlolo. Morero wa teko e be e le ofe? Moše o ile a ba botša gore: “Xôna kua lešokeng [Jehofa] a Xo solêla Mana . . . xore a Xo kokobetšê, a Xo lekê.”—Doiteronomio 8:16.

Le rena ka mo go swanago boikokobetšo bja rena bo ka lekwa. Bjang? Ka mohlala, re arabela  bjang ditokišong tša mabapi le mokgatlo? (Jesaya 60:​17) Na re nea thekgo ya pelo ka moka modirong wa boboledi le wa go ruta? (Mateo 24:​14; 28:​19, 20) Na re amogela ka mafolofolo ditlhaloso tša ditherešo tša Beibele ge di newa ke “molaki e a bôtêxaxo yo bohlale.” (Mateo 24:​45-47; Diema 4:​18) Na re ganetša kgateletšo ya go ba le didirišwa tše di se nago mohola, fešene ya morago-rago ya moaparo goba mohuta o mofsa wa koloi? Motho yo a ikokobeditšego o tla kgona go araba dipotšišo tše bjalo ka ee.—1 Petro 1:​14-16; 2 Petro 3:11.

Diteko di re thuša go tšweletša ka go rena seka se sengwe gape se bohlokwakgotlelelo. Morutiwa Jakobo o itše: “Bana bešo, xe Le wêla melekong ya mehuta-huta, Le re: ké lethabô fêla. Le fêlê Le tseba xore xo lekwa xa tumêlô xo tšweletša kxôtlêlêlô.” (Jakobo 1:​2, 3) Go kgotlelela ka katlego diteko tše mmalwa re ithekgile ka mo go feletšego ka Jehofa, go tšweletša go botega le go tsepama. Go re matlafaletša go ganetšana le ditlhaselo tša Sathane tša nakong e tlago, modimo yo a befetšwego wa lefase le.—1 Petro 5:​8-10; 1 Johane 5:​19; Kutollo 12:12.

Bolokang Boemo bjo bo Nepagetšego ka Diteko

Morwa yo a phethagetšego wa Modimo, Jesu Kriste, o ile a lebeletšana le diteko tše dintši ge a be a le mo lefaseng gomme o bunne mehola e megolo ka go di kgotlelela. Paulo o ngwadile gore Jesu “ó ithutile xo kwa ka xôna xo tlaišêxa.” (Ba-Hebere 5:8) Potego ya gagwe e sa kwanantšhego go ba go fihla lehung e ile ya tliša theto leineng la Jehofa gomme ya dira gore Jesu a kgone go neelana ka mohola wa bophelo bja gagwe bjo bo phethagetšego e le motho go ba sehlabelo bakeng sa batho. Seo se ile sa bulela bao ba ilego ba bontšha tumelo go Jesu tsela ya go ba le kholofelo ya bophelo bjo bo sa felego. (Johane 3:​16) Ka ge Jesu a ile a dula a botega ka tlase ga teko, ga bjale ke Moperisita yo Mogolo le Kgoši e hlomilwego.—Ba-Hebere 7:​26-28; 12:2.

Go thwe’ng ka rena? Ka mo go swanago, go botega ga rena ka go se kwanantšhe ge re lebeletšane le diteko go tliša ditšhegofatšo tše dikgolo. Beibele e bolela ka bao ba nago le kholofelo ya go phela legodimong gore: “Wa lehlôxônôlô ké monna wa xo kxôtlêlêla melekong; xobane xe a bonwe xo bôtêxa ó tlo fiwa mphapahlôxô wa bophelô, wo Modimo a o holofeditšexo ba ba Mo rataxo.” (Jakobo 1:​12) Bao ba nago le kholofelo ya go phela mo lefaseng ba na le kgonthišetšo ya gore ge e ba ba kgotlelela ka potego, ba tla hwetša bophelo bjo bo sa felego lefaseng la paradeise. (Kutollo 21:​3-6) Gomme seo se lego bohlokwa kudu ke gore kgotlelelo ya bona ya potego e tliša tumišo leineng la Jehofa.

Ge re dutše re latela dikgatong tša Jesu, re ka kgodišega gore diteko ka moka tšeo re kopanago le tšona tshepedišong ye ya dilo re ka lebeletšana le tšona ka katlego. (1 Ba-Korinthe 10:​13; 1 Petro 2:​21) Bjang? Ka go ithekga ka Jehofa, yo a neago “matla a fetišago a tlwaelegilego” go bao ba ithekgago ka yena. (2 Ba-Korinthe 4:7, NW) Eka kgodišego ya rena e ka swana le ya Jobo yo gaešita le ge a ile a kgotlelela diteko tše bohloko a ilego a bolela ka kgodišego gore: “Xe a ka nteka nkabe ke tlo tšwa bo-ka xauta.”—Jobo 23:10.

[Seswantšho go letlakala 31]

Potego ya Jesu e sa kwanantšhego ka tlase ga teko e ile ya tliša tumišo leineng la Jehofa. Le ya rena e ka ba bjalo