Go Kgahlegela ga Mehleng Yeno Bao go Thwego ke Bakgethwa

“Na o gopola nako ya ge go be go bonagala re se na kgahlego ka dinkgwete? Seo ga go bonale se ile sa kgoma ma-Amerika a dimilione tše 4,2 ao a ilego a bogela poloko ya Mma Teresa ka Sept. 13. Ga e sa le go tloga go hweng ga gagwe ka Sept. 5, batho ba ile ba hlasela Vatican ka dikgopelo tša gore a tsebatšwe ka molao e le mokgethwa. Batho ba sego kae ga ba kgolwe gore se se tla direga.”Sun-sentinel, United States, October 3, 1997.

MODIRO wa setho le wa go thuša wa moromiwa wa Mokatholika Mma Teresa o lebelelwa e le selo seo bokgethwa bja kgonthe bo se bolelago. Go na le dinkgwete madumeding a mangwe. Lega go le bjalo, mohlomongwe ga go na tšeo di tsebjago ka molao go swana le tšeo di tsebaditšwego e le bakgethwa ke Kereke ya Roma Katholika.

Mopapa John Paul II o tsebaditše batho ba ka godimo ga 450 e le bakgethwa nakong ya pušo ya gagwe ya go ba mopapa, palo e fetago ya bakgethwa bao ba tsebaditšwego ke bo-mopapa ba bangwe ba lekgolong la bo-20 la nywaga ba kopane. * Ke ka baka la’ng go na le go ineela mo go bjalo mo go sa felego go bao go thwego ke bakgethwa, bao bontši bja bona ba sa tsebjego go Makatholika ka kakaretšo?

Ra-thutatumelo wa Notre Dame University e lego Lawrence Cunningham o hlalosa gore: “Kgopolo ya gore go ka ba go na le bokgethwa lefaseng e tsoša kgahlego ya batho. Bakgethwa ba bontšha kgonagalo ya bophelo bja bonkgwete, gaešita le lehono.” Go oketša fao, go bolelwa gore bao go thwego ke bakgethwa ba na le tsela e kgethegilego ya go fihlelela Modimo, e lego seo se dirago gore e be barapeledi ba bao ba phelago. Ge mašaledi goba mašaledi a mmele a bao go thwego ke bakgethwa a hwetšwa, a hlompšha ka tumelo ya gore matla a tšwa go ona.

Katikasema ya Lekgotla la Trent yeo e gatišitšwego lekgolong la nywaga la bo-16 go tsošološa lefsa thuto ya Katholika, e laetše gore: “Re lokafaditšwe ka go phetha gore go hlompha bakgethwa ‘bao ba hwetšego Moreneng,’ go kgopela borapeledi bja bona le go hlompha mašaledi a bona a makgethwa le melora go kgole le go fokodišwa, ga go na ka tsela yeo ditiro tše di fedišago letago la Modimo, eupša di šoma kudu bakeng sa go le oketša, go ya ka bokgole bjoo go bjona kholofelo ya Mokriste e phedišwago le go matlafatšwa gomme yena ka noši a kgahlišwa ke go ekiša dika tša bona.” (The Catechism of the Council of Trent, 1905) Ka ntle le pelaelo Bakriste ba therešo ba nyaka go phela maphelo a thabišago, go batamela Modimo ka tsela e swanetšego le go amogela thušo ya Modimo. (Jakobo 4:​7, 8) Ka gona, go ya ka Lentšu la Modimo ke bomang bao ba swanelegago e le bakgethwa ba kgonthe? Gomme ba kgatha tema efe?

[Mengwalo ya ka tlase]