“O Nkiša Meetseng a Makhutšô”

BOEMONG bja leratadima bjo bo fišago dinageng tša Beibele, dinku di swanetše go nwa meetse letšatši le lengwe le le lengwe. Ka gona, karolo e bohlokwa ya modiro wa modiši ke go nea mohlape wa gagwe meetse. Ka dinako tše dingwe badiši ba nweša mehlape ya bona sedibeng, ba tšhela meetse ka megopong e le gore dinku di nwe. (Genesi 29:​1-3) Lega go le bjalo, tikologo ya melatswaneng le dinokaneng e nea ‘meetse a makhutšo,’ kudu-kudu dinakong tša dipula.—Psalme 23:2.

Modiši yo botse o swanetše go tseba moo a tlago go hwetša meetse le mafulo a swanetšego bakeng sa mohlape wa gagwe. Tsebo ya gagwe e tseneletšego ka tikologo e kgonthišetša go phela ga dinku tša gagwe. Dafida, yo a ilego a fetša nywaga e mentši a diša dinku mebotong ya Juda, o ile a swantšha tlhahlo ya Modimo ya moya le ya modiši yo a etelelago pele dinku tša gagwe go ya mafulong a mabotse le meetseng a neago bophelo. Dafida o re: “O nkiša meetseng a makhutšô.”—Psalme 23:​1-3.

Nywaga ka morago, Jehofa o ile a diriša seswantšho se se swanago ka moporofeta wa gagwe Hesekiele. O ile a holofetša go kgoboketša batho ba gagwe go tšwa dinageng tšeo ba gašaganego go tšona go etša ge modiši a kgoboketša dinku tša gagwe. O ile a ba kgonthišetša ka gore: “Ke tlo . . . [ba] tliša mo naxeng ya xatšô, ka [ba] di fihliša dithabeng tša Isiraele, le dinokaneng.”—Hesekiele 34:​13.

Le gona Jehofa Modimo o tshwenyegile kudu ka go nea meetse a moya. Puku ya Kutollo e hlalosa “noka ye e sekilexo ya meetse a bophelô” yeo e elelago go tšwa sedulong sa bogoši sa Modimo. (Kutollo 22:1) Taletšo ya go tla go nwa nokeng ye e ya go batho ka moka. “E a nyorilwexo a a tlê a tšeê meetse a bophelô à fo fiwa fêla.”—Kutollo 22:17.

Meetse a a bophelo a seswantšhetšo a emela ditokišetšo tša Modimo bakeng sa bophelo bjo bo sa felego. Mang le mang a ka thoma go nwa meetse a bjalo ka go ‘tseba Modimo a nnoši wa therešo le moromiwa wa gagwe Jesu Kriste.’—Johane 17:3.