Tšwelang Pele le Diriša Dilo tše le Ithutilego Tšona

“Le dirê tše Le di rutilwexo la di amoxêla, la kwa tšôna; tše Le bonexo nna kè di dira, dirang tšôna; xomme Modimo wa khutšô ó tlo ba le lena.”—BA-FILIPI 4:9.

1, 2. Ka kakaretšo, na Beibele e na le tutuetšo maphelong a bao ba ipolelago gore ke badumedi? Hlalosa.

“BODUMEDI bo a Matlafala, Eupša Boitshwaro bo a Phuhlama.” Sehlogo se sa ditaba ka lengwalong la ditaba la Emerging Trends se ile sa dira kakaretšo ya mafelelo a nyakišišo yeo e dirilwego nageng ka bophara kua United States. Go molaleng gore naga yeo e bile le koketšego ya palo ya batho bao ba bago gona kerekeng gomme ba bolela gore bodumedi bo kgatha tema e bohlokwa maphelong a bona. Lega go le bjalo, pego e re: “Go sa šetšwe dipalo-palo tše tše di kgahlišago, ma-Amerika a mantši a na le dipelaelo mabapi le tutuetšo yeo bodumedi bo nago le yona maphelong a motho ka o tee ka o tee le setšhabeng ka kakaretšo.”

² Boemo bjo ga bo hwetšwe feela nageng e tee. Lefaseng ka bophara, batho ba bantši bao ba bolelago gore ba amogela Beibele e bile ke badumedi ga ba dumelele Mangwalo gore a be le tutuetšo le ge e le efe ya kgonthe maphelong a bona. (2 Timotheo 3:5) Moetapele wa sehlopha se sengwe sa nyakišišo o itše: “Re sa dutše re hlompha Beibele kudu, eupša ge e le tabeng ya go tloga re fetša nako re e bala, re ithuta yona le go e dirišaseo ke selo se se fetilwego ke nako.”

3. (a) Beibele e kgoma bjang bao ba fetogago Bakriste ba kgonthe? (b) Balatedi ba Jesu ba diriša bjang keletšo ya Paulo yeo e begilwego go Ba-Filipi 4:9?

³ Lega go le bjalo, boemo ke bjo bo fapanego ka Bakriste ba kgonthe. Go diriša keletšo e tšwago ka Lentšung la Modimo go tlišitše diphetogo tseleng ya bona ya go nagana le boitshwarong. Le gona motho e mofsa yo ba mmontšhago o lemogwa ke ba bangwe gabonolo. (Ba-Kolose 3:​5-10) Go balatedi ba Jesu, Beibele ga se puku yeo e sa dirišwego yeo e tlalago lerole šelefong. Ka mo go fapanego, moapostola Paulo o boditše Bakriste kua Filipi gore: “Le dirê tše Le di rutilwexo la di amoxêla, la kwa tšôna; tše Le bonexo nna kè di dira, dirang tšôna; xomme Modimo wa khutšô ó tlo ba le lena.” (Ba-Filipi 4:9, mongwalo o sekamego ke wa rena.) Bakriste ba dira go feta go fo amogela therešo ya Lentšu la Modimo. Ba dira seo ba ithutago sona, ba tšwela pele ba diriša keletšo ya Beibeleka lapeng, mošomong, ka phuthegong le dibopegong ka moka tša bophelo.

4. Ke ka baka la’ng e le tlhohlo go diriša melao ya Modimo?

⁴ Go diriša melao le melao ya motheo ya Modimo ga go bonolo. Re phela lefaseng leo le lego ka tlase ga matla a Sathane Diabolo, yoo Beibele e mmitšago “modimo wa lefase lé.” (2 Ba-Korinthe 4:4; 1 Johane 5:​19) Ka go rialo, go bohlokwa gore re itiše malebana le selo le ge e le sefe seo se tlago go re šitiša go tšwela pele tseleng ya go botegela Jehofa Modimo. Ke bjang re ka bago babotegi?

 Swarelelang ‘Mohlaleng wa Mantšu a se Nago Senyalo’

5. Ke eng seo se bolelwago ke polelwana ya Jesu e rego: “Ntatele ka go se kgaotše”?

⁵ Sebopego se sengwe sa go diriša seo re ithutilego sona se akaretša go thekga borapedi bja therešo ka potego e sa kwanantšhego, go sa šetšwe kganetšo e tšwago go bao e sego badumedi. Kgotlelelo e nyaka maiteko. Jesu o itše: “Ge e ba motho le ge e le ofe a nyaka go ntšhala morago, ga a itatole gomme a tšee kota ya gagwe ya tlhokofatšo a ntatele ka go se kgaotše.” (Mateo 16:​24, NW) Jesu ga se a ka a re re swanetše go mo latela beke feela, kgwedi goba ngwaga. Go e na le moo, o itše: “Ntatele ka go se kgaotše.” Mantšu a gagwe a bontšha gore go ba ga rena barutiwa e ka se be feela ga nakwana maphelong a rena goba boineelo bjo bo fetago bjo bo bago gona lehono gomme ka moso ya ba bo fedile. Go thekga borapedi bja therešo ka potego e sa kwanantšhego go bolela gore re kgotlelele ka potego tseleng yeo re e kgethilego, go sa šetšwe seo se ka diregago. Seo re ka se dira bjang?

6. Mohlala wa mantšu a phedišago woo Bakriste ba lekgolong la pele la nywaga ba ithutilego wona go Paulo ke ofe?

⁶ Paulo o kgothaditše mošomi-gotee le yena Timotheo ka gore: “Mantšu ao a se naxo senyalô, a O a kwilexo xo nna, O tšeê ka mohlala wa ôna, ka tumêlô le ka leratô, le re le hwetšaxo xo Jesu Kriste.” (2 Timotheo 1:​13) Paulo o be a bolela’ng? Lentšu la Segerika leo le fetoletšwego e le “mohlala” ka go lebanya le šupa seswantšho sa ra-bokgabo. Gaešita le ge se se na ditaba ka botlalo, seswantšho se bjalo se na le dibopego tšeo di hlalositšwego gabotse e le gore mmogedi yo a nago le temogo a ka kwešiša seswantšho ka kakaretšo. Ka mo go swanago, mohlala wa therešo woo Paulo a o rutilego Timotheo le ba bangwe o be o sa hlamelwa go nea karabo e lebanyago potšišong e nngwe le e nngwe yeo e ka rotogago. Lega go le bjalo, thuto ye ya kakaretšo e nea tlhahlo e lekanegogo swana le thulaganyo ya polelo ka tsela ya seswantšhoe le gore ba dipelo tše botegago ba kgone go kwešiša seo Jehofa a se nyakago go bona. Go ba gona, e le gore ba kgahliše Modimo ba tla swanela ke go tšwela pele ba swarelela mohlaleng wa therešo ka go diriša seo ba ithutilego sona.

7. Bakriste ba ka kgomarela bjang mohlaleng wa mantšu a phedišago?

⁷ Lekgolong la pele la nywaga, batho ba bjalo ka Himeneo, Alesandere le Fileto ba be ba godiša dikgopolo tšeo di bego di sa dumelelane le ‘mohlala wa mantšu a se nago senyalo.’ (1 Timotheo 1:​18-20; 2 Timotheo 2:​16, 17) Bakriste ba pele ba be ba ka phema bjang go arošwa ke bahlanogi? Ka go ithuta mangwalo a buduletšwego ka kelohloko le ka go a diriša maphelong a bona. Bao ba ilego ba sepela ka go dumelelana le mohlala wa Paulo le wa babotegi ba bangwe ba ile ba kgona go lemoga le go gana selo le ge e le sefe seo se bego se sa dumelelane le mohlala wa  therešo yeo ba e rutilwego. (Ba-Filipi 3:​17; Ba-Hebere 5:​14) Go e na le go ba le ‘bolwetši bja go bata dikgang le diphetolano,’ ba ile ba gatela pele tseleng ya bona e nepagetšego ya boineelo go Modimo. (1 Timotheo 6:​3-6) Re dira se se swanago ge re tšwela pele re diriša ditherešo tšeo re ithutilego tšona. E tloga e le mo go matlafatšago tumelo go bona batho ba dimilione ba hlankelago Jehofa lefaseng ka bophara ba kgomarela ka mo go tiilego mohlaleng woo ba o rutilwego wa therešo ya Beibele.—1 Ba-Thesalonika 1:​2-5.

Gana ‘Dinonwane’

8. (a) Sathane o tsoma bjang go senya tumelo ya rena lehono? (b) Ke temošo efe ya Paulo yeo e hwetšwago go 2 Timotheo 4:​3, 4?

⁸ Sathane o leka go roba potego ya rena ka go bjala dipelaelo ka seo re se rutilwego. Go etša lekgolong la pele la nywaga, lehono bahlanogi le ba bangwe ba leka go senya tumelo ya bao ba se nago molato. (Ba-Galatia 2:4; 5:​7, 8) Ka dinako tše dingwe ba diriša mothopo wa ditaba go phatlalatša tsebišo e kgopamego goba gaešita le maaka a lego molaleng mabapi le mekgwa le maikemišetšo a batho ba Jehofa. Paulo o lemošitše gore ba bangwe ba be ba tla arošwa therešong. O ngwadile gore: “Xobane xo tlo tla lebaka le ba ka se kexo ba kxôna xo theetša thutô ye e phedilexo; ba tlo ikxobêla baruti ka xo ya le dikxanyoxô tša bôná, ka xo rata xo kwiša ditsêbê bose. Xobane ditsêbê tša bôná di tlo hlala therešô; ba tlo boêla dinonwaneng.”—2 Timotheo 4:​3, 4.

9. Paulo a ka be a be a naganne ka eng ge a be a bolela ka ‘dinonwane’?

⁹ Go e na le go swarelela mohlaleng wa mantšu a se nago senyalo, ba bangwe ba tantšwe ke ‘dinonwane.’ Dinonwane tše e be e le eng? Mohlomongwe Paulo o be a naganne ka dikanegelo tša boikgopolelo tše bjalo ka tšeo di hwetšwago ka pukung yeo go se nago kgonthe ya yona ya Tobit. * Dinonwane le gona di ka be di be di akaretša mabare-bare a huduago maikwelo le a go fo ikgopolela. Ka gona, ba bangweka “dikxanyoxô tša bôná”—​ka bohlale ba ka be ba ile ba forwa ke bao ba bego ba dumelela kgopolo ya go tlogelela dilo ka ditekanyetšo tša Modimo goba bao ba bego ba nyatša bao ba bego ba etelela pele ka phuthegong. (3 Johane 9, 10; Juda 4) Mapheko le ge e le afe ao a bego a le gona, ba bangwe go bonagala ba ile ba kgetha maaka go e na le ditherešo tša Lentšu la Modimo. Kapejana ba ile ba tlogela go diriša dilo tšeo ba ithutilego tšona, gomme se se be se tla ba senya moyeng.—2 Petro 3:​15, 16.

10. Dinonwane tše dingwe tša mehleng yeno ke dife, gomme Johane o ile a gatelela bjang go nyakega ga go ela hloko?

¹⁰ Lehono re ka phema go tanywa ke dinonwane ge e ba re lebeledišiša le go kgetha seo re se theetšago le seo re se balago. Ka mohlala,  mothopo wa ditaba gantši o kgothaletša boitshwaro bjo bo gobogilego. Batho ba bantši ba kgothaletša bo-agnostic goba boila-Modimo bjo bo lebanyago. Bantšha-diphošo ba bagolo ba ganetša boipolelo bja Beibele bja go ba e buduletšwego ke Modimo. Le gona bahlanogi ba mehleng yeno ba tšwela pele go leka go bjala dipeu tša pelaelo e le gore ba fokodiše tumelo ya Bakriste. Moapostola Johane o ngwadile mabapi le kotsi e swanago yeo e ilego ya tšweletšwa ke baporofeta ba maaka lekgolong la pele la nywaga ka gore: “Baratexi! Le se kê la fo dumêla meôya ka moka; sa lena a e bê xo lekola meôya, xore Le bônê xe e tšwa xo Modimo; xobane lefase le hlasetšwe ke baporofeta ba bantši ba maaká.” (1 Johane 4:1) Ka gona re swanetše go ela hloko.

11. Ke tsela efe e nngwe yeo re ka lekago ka yona go bona ge e ba re le tumelong?

¹¹ Tabeng ye Paulo o ngwadile gore: “Itebeledišeng lena beng Le bônê xe Le na le tumêlô.” (2 Ba-Korinthe 13:5) Moapostola o re kgothaleditše go tšwela pele re itebeledišiša go bona ge e ba re sa dutše re dumelelana le ditumelo ka moka tša Bokriste. Ge e ba re sekametše go theetša bangongoregi, re swanetše go itlhahloba ka thapelo. (Psalme 139:​23, 24) Na re sekametše go hwetšeng diphošo bathong ba Jehofa? Ge e ba go le bjalo, ka baka la’ng? Na re kile ra kgopišwa ke mantšu goba ditiro tša motho yo mongwe? Ge e ba go le bjalo, na re lebelela dilo ka kgopolo e swanetšego? Tlaišo le ge e le efe yeo re lebeletšanago le yona tshepedišong ye ya dilo ke ya nakwana. (2 Ba-Korinthe 4:​17) Ke ka baka la’ng re swanetše go tlogela go hlankela Modimo, gaešita le ge re lebeletšana le teko e itšego ka phuthegong? Ge e ba re befedišitšwe ke selo se itšego, na ga go kaone kudu go dira seo re ka se kgonago go rarolla taba ke moka re e tlogele ka diatleng tša Jehofa?—Psalme 4:4; Diema 3:​5, 6; Ba-Efeso 4:26.

12. Ba-Berea ba re beetše bjang mohlala o mobotse?

¹² Go e na le go ba bantšha-diphošo, anke re kgomareleng kgopolo e agago moyeng ka tsebišo yeo re e amogelago ka thuto ya motho ka noši le dibokeng tša phuthego. (1 Ba-Korinthe 2:​14, 15) Le gona go e na le go belaela Lentšu la Modimo, ke ga bohlale gakaakang go ba le boemo bja kgopolo bja ba-Berea ba lekgolong la pele la nywaga bao ba ilego ba hlahlobišiša Mangwalo! (Ditiro 17:​10, 11) Ka gona, a re direng seo re ithutago sona, re gane dinonwane gomme re kgomarele therešong.

13. Re ka phatlalatša bjang dinonwane re sa tsebe?

¹³ Go na le mohuta o mongwe wa nonwane woo re swanetšego go itiša malebana le ona. Go na le dikanegelo tše dintši tšeo di fetišwago, gantši go dirišwa E-mail. Ke ga bohlale go ela hloko dikanegelo tše bjalo, kudu-kudu ge e ba re sa tsebe mothopo wa tsebišo. Gaešita le ge e ba phihlelo goba kanegelo e rometšwe ke Mokriste yo a nago le botumo bjo bobotse, motho yoo a ka be a sa tsebe therešo ka dintlha ka botlalo. Ke ka baka leo go lego bohlokwa go ba šedi mabapi le go boeletša goba go romela dipego tšeo di sa kgonthišetšwago. Ka ntle le pelaelo re ka se nyake go anega “dikanegelo tša maaka tšeo di senyago seo e lego se sekgethwa.” (1 Timotheo  4:7, NW) Ka ge re na le tlamo ya go botšana therešo, re dira ka bohlale ka go phema selo le ge e le sefe seo se tla dirago gore re phatlalatše maaka re sa tsebe.—Ba-Efeso 4:25.

Mehola ya go Diriša Therešo

14. Ke mehola efe yeo e tlišwago ke go diriša dilo tšeo re ithutilego tšona ka Lentšung la Modimo?

¹⁴ Go diriša seo re ithutago sona thutong ya motho ka noši ya Beibele le dibokeng tša Bokriste go tla tliša mehola e mentši. Ka mohlala, re ka hwetša gore ditswalano tša rena le bao re tswalanago le bona tumelong di a kaonefala. (Ba-Galatia 6:​10) Tshekamelo ya rena e tla kaonefala ge re diriša melao ya motheo ya Beibele. (Psalme 19:8) Go feta moo, ka go diriša seo re ithutago sona re “thakxa thutô ya Modimo” gomme re ka gogela ba bangwe borapeding bja therešo.—Tito 2:​6-10.

15. (a) Mofsa yo mongwe o ile a rapa bjang sebete sa go nea bohlatse sekolong? (b) O ithutile’ng phihlelong ye?

¹⁵ Gare ga Dihlatse tša Jehofa go na le bafsa ba bantši bao ba dirišago seo ba ithutilego sona thutong ya motho ka noši ya Beibele le dikgatišong tša Bokriste gotee le ka go ba gona ka mehla dibokeng tša phuthego. Boitshwaro bja bona bjo bobotse ke bohlatse bjo matla go barutiši le go barutwana-gotee le bona sekolong. (1 Petro 2:​12) Nagana ka Leslie, ngwanenyana wa nywaga e 13 wa kua United States. O dumela gore gantši o be a hwetša go le thata go bolela le bao a tsenago le bona sekolo ka tumelo ya gagwe, eupša letšatši le lengwe seo se ile sa fetoga. “Klase e ile ya bolela kamoo batho ba lekago go go rekišetša dilo ka gona. Ngwanenyana yo mongwe o ile a emiša letsogo gomme a bolela ka Dihlatse tša Jehofa.” Ka ge e le Hlatse, Leslie o ile a arabela bjang? O re: “Ke ile ka lwela tumelo ya-ka, e lego seo ke kgodišegilego gore se makaditše ba bantši ka ge gantši ke dula ke homotše sekolong.” Mafelelo a go ba le sebete ga Leslie e bile afe? Leslie o re: “Ke ile ka kgona go sepedišetša morutwana poroutšha le pampišana ka ge a be a na le dipotšišo tše dingwe.” Jehofa o swanetše go ba a thaba gakaakang ge bafsa bao ba dirišago seo ba ithutilego sona ba rapa sebete sa go nea bohlatse sekolong!—Diema 27:​11; Ba-Hebere 6:10.

16. Sekolo sa Bodiredi sa Pušo ya Modimo se ile sa hola bjang mofsa yo mongwe wa Hlatse?

¹⁶ Mohlala o mongwe ke wa Elizabeth. Go thoma ge a be a e-na le nywaga e šupa le nywageng ya gagwe ka moka sekolong sa mephato ya tlase, ngwanenyana yo o ile a laletša barutiši ba gagwe go tla Holong ya Mmušo nako e nngwe le e nngwe ge a be a na le kabelo Sekolong sa Bodiredi sa Pušo ya Modimo. Ge e ba morutiši a be a ka se kgone go ba gona, Elizabeth o be a dula ka morago ga ge sekolo se tšwile gomme a beele morutiši polelo. Ngwageng wa gagwe wa mafelelo sekolong se se phagamego, Elizabeth o ile a ngwala pego ya matlakala a lesome ka mehola ya Sekolo sa Bodiredi sa Pušo ya Modimo gomme a e balela sehlopha sa barutiši ba bane. Le gona o ile a laletšwa go nea polelo ya mohlala ya Sekolo sa Bodiredi sa Pušo ya Modimo, yeo a ilego a kgetha sehlogo sa gore “Ke ka Baka La’ng Modimo a Dumelela Bokgopo?” Elizabeth o ile a holega lenaneong la thuto leo le dirišwago ke Dihlatse tša Jehofa Sekolong sa Bodiredi sa Pušo ya Modimo. E fo ba yo mongwe wa bafsa ba bantši ba Bakriste bao ba tumišago Jehofa ka go diriša dilo tšeo ba ithutilego tšona ka Lentšung la gagwe.

17, 18. (a) Beibele e nea keletšo efe mabapi le go botega? (b) Monna yo mongwe o ile a kgongwa bjang ke boitshwaro bja go botega bja yo mongwe wa Dihlatse tša Jehofa?

¹⁷ Beibele e eletša Bakriste go itshwara ka  potego dilong ka moka. (Ba-Hebere 13:​18) Go se botege go ka senya tswalano ya rena le ba bangwe, gomme sa bohlokwa kudu gwa senya tswalano ya rena le Jehofa. (Diema 12:​22) Boitshwaro bja rena bja go botega bo nea bohlatse bja gore re diriša dilo tšeo re ithutilego tšona gomme bo dirile gore ba bantši ba hlomphe Dihlatse tša Jehofa kudu

¹⁸ Nagana ka phihlelo ya monna wa mohlabani yo a bitšwago Phillip. O ile a timetša tšheke e sa ngwalwago selo yeo e bego e saennwe gomme o ile a se lemoge se go fihlela a e bušetšwa ka poso. Tšheke e ile ya thwalwa ke yo mongwe wa Dihlatse tša Jehofa, gomme lengwalwana leo le bego le kgomareditšwe go yona le ile la bolela gore ditumelo tša bodumedi tša motho yo a e hweditšego di mo tutueditše go e bušetša. Phillip o be a maketše. O itše: “Nkabe ba ntobišitše $9 000!” O kile a nyamišwa ke go utswetšwa kefa ka kerekeng. Go bonala motho yo a bego a mo tseba a ile a mo tšeela kefa, mola motho yo a sa mo tsebego a ile a mmušetša tšheke yeo e lekanago ditolara tše dikete! Ka kgonthe, Bakriste ba botegago ba tumiša Jehofa Modimo!

Tšwelang Pele le Diriša Seo le Ithutilego Sona

19, 20. Re tla holega bjang ka go dira ka go dumelelana le dilo tša Mangwalo tšeo re ithutago tšona?

¹⁹ Bao ba dirišago seo ba ithutilego sona Lentšung la Modimo ba buna mehola e megolo. Morutiwa Jakobo o ngwadile gore: “E a boxêlaxo ruri a bôna se se lexo molaong o tletšexo wa khunoloxô ’me a tiišetša moo, eo xa se mokwi e a xakwaxo, ké modiri wa modirô; ké yêna a tl’o xo dira è le wa lehlôxônôlô.” (Jakobo 1:​25) Ee, ge e ba re dira ka go dumelelana le dilo tša Mangwalo tšeo re ithutago tšona, re tla ba le lethabo la kgonthe e bile re tla kgona go lebeletšana ka katlego kudu le dikgateletšo tša bophelo. Go feta moo, Jehofa o tla re šegofatša gomme ra ba le tebelelo ya bophelo bjo bo sa felego!—Diema 10:​22; 1 Timotheo 6:6.

²⁰ Ka gona, anke o leke ka gohle go ineela thutong ya Lentšu la Modimo. Bokana le barapedi ba Jehofa ka mehla gomme o lebiše tlhokomelo tabeng yeo e ahla-ahlwago dibokeng tša Bokriste. Diriša seo o ithutago sona, tšwela pele o se diriša gomme “Modimo wa khutšô ó tlo ba le [wena].”Ba-Filipi 4:9.

[Mengwalo ya ka tlase]

Na o a Gopola?

• Mohlala wa ‘mantšu a se nago senyalo’ ke ofe, gomme ke bjang re ka tšwelago pele re o swareletše?

• Ke ‘dinonwane’ dife tšeo re swanetšego go di gana?

• Ke mehola efe e tlelago bao ba dirišago dilo tšeo ba ithutago tšona ka Lentšung la Modimo?

[Dipotšišo tša Thuto]

[Seswantšho go letlakala 17]

Bakriste ba pele ba ka be ba ile ba phema bjang go arošwa ke bahlanogi?

[Diswantšho go letlakala 18]

Dipeu tša pelaelo di ka bjalwa ka mothopo wa ditaba, ka Internet le ka bahlanogi ba mehleng yeno

[Seswantšho go letlakala 19]

Ga se ga bohlale go fetiša dipego tšeo di sa kgonthišetšwago

[Diswantšho go letlakala 20]

Dihlatse tša Jehofa di diriša seo di se balago ka Lentšung la Modimo ge di le mošomong, sekolong le mafelong a mangwe