Bafsa Bao ba Ratago Therešo
Bafsa Bao ba Ratago Therešo
NYWAGA e dikete e fetilego mopsalme wa mo-Hebere o ile a botšiša gore: “Lesoxana le ka thakxa bya’ng thsepelô ya lôna?” (Psalme 119:9) Ye e sa dutše e le potšišo e swanetšego le lehono ka gobane bafsa ba lebeletšane le mathata a mantši lefaseng. Boitshwaro bjo bo gobogilego bja botona le botshadi bo dirile gore bafsa ba bantši ba swarwe ke AIDS, gomme mo e ka bago seripa sa palo ya bao ba swerwego ke bolwetši bjo bjo bošoro ke ya ba nywaga ya magareng ga e 15 le 24. Le gona go dirišwa gampe ga dihlare-tagi go baka mathata a mantši le go fokotša maphelo a bafsa. Mmino o gobogilego; difilimi tša bošoro le tše gobogilego, dipontšho tša TV le dibidio le diswantšho tšeo di kgothaletšago bootswa tše di lego go Internet di ba le tutuetšo e boifišago go bafsa. Ka gona, potšišo e botšišitšwego ke mopsalme ke e tlogago e tshwenya batswadi ba bantši le bafsa lehono.
Mopsalme yena yoo o ile a araba potšišo ya gagwe: “Ké xe le lôta Lentšu la xaxo.” Ka ntle le pelaelo, Lentšu la Modimo e lego Beibele le na le tlhahlo e botse bakeng sa bafsa, gomme ka go e latela, bafsa ba bantši ba a atlega bophelong. (Psalme 119:105) Anke re ahla-ahleng mehlala e mengwe ya bafsa bao ba ratago Modimo gomme ba katanelago go dula ba tiile moyeng lefaseng le phegelelago maipshino le la go rata dilo tše di bonagalago.
Ba Leboga Tlhahlo ya Batswadi
Jacob Emmanuel e be e le modiredi wa mmulamadibogo wa nako e tletšego ka nywaga e mmalwa pele ga ge a ka hlankela ofising ya lekala ya Dihlatse tša Jehofa kua Mexico. O gopola ka tebogo kamoo lerato la gagwe la go rata tirelo ya Modimo le ilego la hlagolelwa ka gona: “Batswadi ba-ka e bile tutuetšo e kgolo, gaešita le ge bana babo rena ba bangwe ba nago le phihlelo bao ke bego ke gwerane le bona le bona ba thušitše kudu. Ba ntutueleditše gore ke rate modiro wa boboledi. Ba ile ba ntlhahla go nkiša tseleng e nepagetšego; ga se ka ka ka kwa ba nkgatelela.”
David, yo a šetšego a feditše nywaga e mmalwa a le bodireding bja nako e tletšego, o gopola kamoo a ilego a kgahlega ka gona ge batswadi ba gagwe ba thoma go hlankela e le babulamadibogo ba kgethegilego ge yena le ngwanabo e be e sa le ba banyenyane. Ka morago ga lehu la tatagwe, mmagwe o ile a tšwela pele tirelong ya bobulamadibogo bjo bo kgethegilego. Gaešita le ge a be a bolela ditaba tše dibotse, o be a ba hlokomela. David o re: “Ga se ba ka ba nkgapeletša gore ke be mmulamadibogo, eupša re ile ra thabela kudu lethabo la go bula madibogo re le lapa mo e lego gore segwera le tikologo di ile tša ntutueletša go dira se se swanago.” David o bolela mabapi le bohlokwa bja thuto le tlhokomelo tša batswadi gore: “Bošego bjo bongwe le bjo bongwe, mma o be a re balela dikanegelo tše tšwago ka pukung ya From Paradise Lost to Paradise Regained. * Tsela yeo a bego a re anegela tšona e ile ya re thuša gore re rate go ja dijo tša moya.”
Go Thabela Diboka
Bafsa ba bangwe ba hwetša go le thata go thabela diboka tša Bokriste. Ba ba gona feela ka gobane batswadi ba bona ba sepela le bona. Lega go le bjalo, ge e ba ba tšwela pele ba e ba gona dibokeng, ge nako e tšwela pele ba ka thoma go rata diboka. Nagana ka Alfredo, yo a thomilego tirelo ya nako e tletšego
ge a be a na le nywaga e 11. O dumela gore ge a be a na le nywaga e ka bago e mehlano, o ile a leka go tšhaba diboka ka gobane di be di mo robatša eupša batswadi ba gagwe ba be ba ka se mo dumelele gore a robale ka nako ya diboka. O a gopola: “Ge ke dutše ke gola, ke ile ka thoma go ba le kgahlego ka diboka ganyenyane-ganyenyane, kudu-kudu ka morago ga gore ke ithute go bala le go ngwala ka gobane ka nako yeo ke ile ka thoma go nea tlhaloso ka mantšu a-ka.”Cintia, ngwanenyana wa nywaga e 17 yo a hlankelago e le mmulamadibogo wa ka mehla, o bolela kamoo bogwera bjo bobotse bo kgathilego tema e kgolo go hlagoleleng lerato la gagwe la go rata tirelo ya Modimo. O re: “Tswalano e botse le bana babo rena le go ba gona dibokeng ka mehla go dirile gore ke se ke ka ikwa ke hlologela bagwera ba-ka ba lefase le mediro e ratwago ke bafsa, go swana le go ya mafelong a go tantsha. Go theetša ditlhaloso le diphihlelo dibokeng go ile gwa tšweletša ka go nna kganyogo ya go nea Jehofa sohle seo ke nago le sona, gomme ke nagana gore selo se sekaone seo ke nago le sona ke bofsa bja-ka. Ka gona ke ile ka dira phetho ya go bo dirišetša tirelo ya gagwe.”
Lega go le bjalo, o dumela gore: “Go bile le nako yeo ka yona pele ke kolobetšwa mo ke ilego ka hwetša go le bonolo go se be gona dibokeng, ke diriša mošomo wa gae goba modiro o mongwe wa sekolo e le sehlare sa ntšhirela. Ke ile ka foša diboka tše mmalwa, gomme se se ile sa thoma go nkgoma moyeng. Ke ile ka thoma go gwerana le mošemane yo a sa kago a ithuta Beibele. Ka thušo ya Jehofa ke ile ka lokiša ditaba nako e sa le gona.”
Phetho ya Motho ka Noši
Ge Pablo, e lego mofsa yo mongwe yo a hlankelago Jehofa ka nako e tletšego a botšišwa gore ke eng seo a se lebelelago e le senotlelo sa go hlagolela lerato la go rata therešo ya Lentšu la Modimo, o bolela gore: “Ke nagana gore ke dilo tše pedi: thuto ya motho ka noši ya ka mehla le go ba mafolofolo modirong wa boboledi. Ke leboga batswadi ba-ka ge ba nthutile therešo ka Jehofa, gomme ke nagana gore se ke selo se sekaone kudu seo ba ka bago ba ile ba mpha sona. Lega go le bjalo, ke nyaka go kgodišega ka noši ka lebaka leo ka lona ke ratago Jehofa. Ka baka la seo, go bohlokwa go tseba ‘bophara le botelele’ bja therešo ya Beibele. Ke ka tsela ye feela mo re bago le tlhologelo ya go hlologela Lentšu la Jehofa, yeo e bopago “mollô o tukaxo” ka gare ga rena go re dira gore re bolele le ba bangwe ka lona. Phišego yeo ya go fišegela modiro wa boboledi e tla boloka tebogo ya rena ya go leboga therešo e le e phelago.”Ba-Efeso 3:18; Jeremia 20:9.
Jacob Emmanuel, yo go boletšwego ka yena pejana, le yena o gopola bohlokwa bja go dira phetho ya motho ka noši ya go hlankela Jehofa. O bolela gore le ka mohla batswadi ba gagwe ga se ba ka ba mo gapeletša gore a kolobetšwe. “Ke dumela gore ye e bile tsela e kaone ka gobane ke bona mafelelo a mabotse. Ka mohlala, bafsa ba bangwe bao ke bego ke gwerane le bona kudu ba ile ba dira phetho ya go kolobetšwa sammaletee. Gaešita le ge seo se be se lokile, ke kgona go bona gore ba bangwe ba dirile seo ka go gapja ke maikwelo, gomme kapejana ka morago ga moo, phišego ya bona ya go fišegela mediro ya Mmušo e ile ya fela. Nna batswadi ba-ka ga se ba ka ba
nkgapeletša gore ke dire phetho ya go ineela go Jehofa. E bile phetho ya motho ka noši.”Tema e Kgathwago ke Phuthego
Bafsa ba bangwe ba ithutile therešo ya Lentšu la Modimo ka ntle le thušo ya batswadi ba bona. Ka ntle le pelaelo ka tlase ga maemo ao ke tlhohlo go ithuta go dira seo se lokilego gomme o se phegelele.
Noé o gopola kamoo therešo e mo hotšego kudu ka gona. O be a sekametše go befelweng le bošorong go tloga e sa le yo monyenyane kudu. Ge a be a thoma go ithuta Beibele a na le nywaga e 14, go fela pelo ga gagwe go ile gwa kaonefala e lego selo seo batswadi ba gagwe bao ba bego ba se na kgahlego ka Beibele ba ilego ba se thabela kudu. Ge Noé a be a tšwela pele moyeng, o be a nyaka go diriša bophelo bja gagwe ka mo go tletšego kudu tirelong ya Modimo. Ga bjale o bodireding bja nako e tletšego.
Ka mo go swanago, Alejandro o thomile go ba le kgahlego ka therešo ya Bokriste ge a be a le yo monyenyane kudu, gaešita le ge batswadi ba gagwe ba be ba sa e kgahlegele. Ge a bontšha tebogo ya gagwe ya go leboga therešo o re: “Ke godišitšwe ka lapeng la setšo sa Katholika. Eupša ditshekamelo tša-ka tša boila-modimo bja Bokomanisi di ile tša gola, ka ge kereke e se ya ka ya araba dipotšišo tše di bego di ntlhoba boroko go tloga ge ke sa le yo monyenyane kudu. Mokgatlo wa Jehofa o nthušitše gore ke be le tsebo ya go tseba Modimo. O tloga o phološitše bophelo bja-ka e le ka kgonthe ka gobane ge nkabe ke se ka ithuta Beibele, mohlomongwe nkabe ke ile ka ba le karolo boitshwarong bjo bo gobogilego, go lemalela dino-tagi goba dihlare-tagi. Mohlomongwe nkabe ke bile karolo ya sehlopha sa bafetogedi, e lego seo se ka bego se bile le mafelelo a kwešago bohloko.”Mofsa a ka phegelela bjang go tsoma ga gagwe therešo le go e kgomarela ka ntle le thekgo ya batswadi ba gagwe? Go molaleng gore bagolo le ba bangwe ka phuthegong ba kgatha tema e bohlokwa kudu. Noé o a gopola: “Ga se ka ka ka ikwa ke le noši, ka ge Jehofa ka mehla a be a le kgaufsi kudu le nna. Le gona, ke ile ka thekgwa ke bana babo rena le dikgaetšedi tše dintši tše lerato bao ba ilego ba fetoga botate, bomma le bana bešo ba moya.” Ga bjale o hlankela Bethele gomme o diriša nako ya gagwe tirelong ya Modimo. Ka mo go swanago, Alejandro o laodiša gore: “Selo seo ka mehla ke tla dulago ke se leboga ke gore ke bile le tšhegofatšo ya go ba phuthegong le sehlopha sa bagolo bao ba mpontšhitšego kgahlego e lerato ya motho ka noši. Ke leboga se ka mo go kgethegilego, ka gobane nakong ya ge ke be ke thoma go ithuta Beibele ge ke be ke na le nywaga e 16, le gona go se dudišege ga monagano mo go tlwaelegilego go bafsa go ile gwa nkgoma. Malapa a ka phuthegong ga se a ka a ntlogela le ka mohla. Ka mehla go be go na le motho yo a nkamogelago ka lerato gomme a abelane le nna legae la gagwe le dijo gaešita le pelo ya gagwe.” Ga bjalo Alejandro o bile tirelong ya nako e tletšego ka nywaga ya ka godimo ga e 13.
Batho ba bangwe ba nagana gore bodumedi ke bja batho ba bagolo feela. Lega go le bjalo, bafsa ba bantši ba ithutile therešo ya Beibele e sa le ba banyenyane gomme ba rata Jehofa e bile ba dula ba mmotegela. Mantšu a a Dafida a begilwego go Psalme 110:3 a ka dirišwa go bafsa: “Mohla Ò e-tšwa dirá, sethšaba sa xaxo se tlo ithapa; ba bafsa ba xaxo ba tlo thšêpa ka tše kxethwa bo-ka phoka ngwana wa mahuba.”
Ke tlhohlo go bafsa go ithuta therešo le go e kgomarela. Ke lethabo gakaakang go bona ba bantši ba kgomarela kgaufsi kudu mokgatlo wa Jehofa, ba e-ba gona dibokeng ka mehla le go ithuta Beibele ka phišego. Ka go dira bjalo, ba kgonne go hlagolela lerato la kgonthe la go rata Lentšu la Modimo le tirelo ya gagwe!—Psalme 119:15, 16.
[Mengwalo ya ka tlase]
^ ser. 6 E gatišitšwe ke Dihlatse tša Jehofa ka 1958; ga bjale ga e sa gatišwa.