Hlagolelang go Kwa ge Bofelo bo Dutše bo Batamela

“Yêna-eo [Silo] dithšaba di tlo mo kwa.”—GENESI 49:10.

1. (a) Nakong e fetilego, go kwa Jehofa gantši go be go akaretša’ng? (b) Jakobo o boletše boporofeta bofe mabapi le go kwa?

GO KWA Jehofa gantši go akaretša go kwa baemedi ba gagwe. Se se akareditše barongwa, bapatriareka, baahlodi, baperisita, baporofeta le dikgoši. Sedulo sa dikgoši tša Isiraele se ile sa ba sa bitšwa sedulo sa bogoši sa Jehofa. (1 Koronika 29:​23) Lega go le bjalo, ka manyami ba bantši ba babuši ba Isiraele ba ile ba se kwe Modimo, ba itlišetša manyami le go balata ba bona. Eupša Jehofa ga se a ka a tlogela batho ba gagwe ba botegago ka go se kwanantšhe ba se na kholofelo; o ile a ba homotša ka kholofetšo ya go hloma Kgoši e ka se ušwego, yoo baloki ba tla thabelago go mo kwa. (Jesaya 9:​5, 6) Mopatriareka Jakobo yo a bego a le kgaufsi le go hwa o ile a porofeta ka mmuši yo wa nakong e tlago ka gore: “Molamó wa boxoši ó ka se tloxé xo Juda; lepara la mmuši xa le tlo-xe mo ’naong tša xaxwe, xo bê xo tlê Mokhutšiši. Xomme Yêna-eo dithšaba di tlo mo kwa.”—Genesi 49:10.

2. Leina “Silo” le bolela’ng, gomme bogoši bja gagwe bo tla akaretša’ng?

² “Silo” ke lentšu la Sehebere leo le bolelago “Bjo e Lego bja Gagwe.” Ee, Silo o be a tla hwetša bohwa bja bogoši, bjalo ka ge bo swantšheditšwe ke molamo, le matla a go laela bjalo ka ge a swantšhetšwa ke lepara la mmuši. Go feta moo, bogoši bja gagwe ga bo akaretše feela bana ba Jakobo, eupša le “ditšhaba” ka moka.  Se se dumelelana le kholofetšo ya Jehofa go Aborahama e rego: “ ’Me bana [“peu,” PK] ba xaxo e tlo ba beng ba dikxôrô tša manaba a bôná. Xomme dithšaba ka moka tša lefase di tlo šexofala.” (Genesi 22:​17, 18) Jehofa o ile a kgonthišetša go tsebja ga “peu” ka 29 C.E. ge a be a tlotša Jesu wa Natsaretha ka moya o mokgethwa.—Luka 3:​21-23, 34; Ba-Galatia 3:16.

Mmušo wa Jesu wa Pele

3. Jesu o amogetše bogoši bofe ge a rotogetše legodimong?

³ Ge Jesu a rotogetše legodimong, ga se a thoma le go buša batho lefaseng le semeetseng. (Psalme 110:1) Lega go le bjalo, o ile a amogela ‘mmušo’ le balata bao ba bego ba mo kwa. Moapostola Paulo o ile a hlaola mmušo woo ge a be a ngwala gore: “Ké Yêna [Modimo] a re [Bakriste ba tloditšwego ka moya] ubutšexo matleng a lefsifsi, a re khudušetša mmušong wa Morwa-moratwa wa xaxwe.” (Ba-Kolose 1:​13, mongwalo o sekamego ke wa rena.) Go lopollwa mo go thomile ka Pentekoste ya 33 C.E. ge moya o mokgethwa o be o tšhollelwa go balatedi ba Jesu ba botegago.—Ditiro 2:​1-4; 1 Petro 2:9.

4. Ke ka ditsela dife barutiwa ba Jesu ba pele ba ilego ba bontšha go kwa ga bona, gomme Jesu o ile a ba hlaola bjang e le sehlopha?

⁴ Ka ge e le “batseta ’bakeng sa Kriste,” barutiwa ba tloditšwego ka moya ka go kwa ba ile ba thoma go kgoboketša ba bangwe bao e tlago go ba “ba motse o tee” mmušong woo wa moya. (2 Ba-Korinthe 5:​20; Ba-Efeso 2:​19, PK; Ditiro 1:8) Go oketša moo, ba ba be ba swanetše go dula ka go “bapêlana, kxopolô è le e tee, kêlêlô è le e tee” e le gore ba thabele go amogelwa ke Kgoši ya bona Jesu Kriste. (1 Ba-Korinthe 1:​10) E le sehlopha, ba ile ba bopa “molaki e a bôtêxaxo yo bohlale” goba sehlopha sa molaki e a botegago.—Mateo 24:​45; Luka 12:42.

Go Šegofatšwa ka Baka la go kwa “Molaki” wa Modimo

5. Jehofa o ile a ruta bjang batho ba gagwe ga e sa le go tloga mehleng ya bogologolo?

⁵ Jehofa ka mehla o neile batho ba gagwe barutiši. Ka mohlala, ka morago ga ge ba-Juda ba boile Babele, Esera le banna ba bangwe ba mmalwa ba swanelegago ga se ba fo balela batho Molao wa Modimo, ba ile ba “hlalosa” molao woo, gore Lentšu la Modimo le ‘kwešišege.’—Nehemia 8:8, bapiša le NW.

6, 7. Sehlopha sa molaki se neile bjang dijo tša moya ka nako e swanetšego se diriša Sehlopha se Bušago, gomme ke ka baka la’ng go ikokobeletša sehlopha sa molaki e le mo go swanetšego?

⁶ Lekgolong la pele la nywaga, ge kgang ya lebollo e be e tsoga ka 49 C.E., sehlopha se bušago sa sehlopha seo sa pele sa molaki se ile sa lebeledišiša taba ka thapelo gomme sa fihlelela phetho ya Mangwalo. Ge se be se tsebiša phetho ya sona ka lengwalo, diphuthego di  ile tša kwa taelo yeo e neilwego gomme tša thabela ditšhegofatšo tše humilego tša Modimo. (Ditiro 15:​6-15, 22-29; 16:​4, 5) Ka mo go swanago le mehleng yeno, molaki e a botegago a diriša Sehlopha se Bušago o hlalositše ka mo go kwagalago ditaba tše bohlokwa tše bjalo ka boema-gare bja Bokriste, go kgethega ga madi le go dirišwa ga dihlare-tagi le motšoko. (Jesaya 2:4; Ditiro 21:​25; 2 Ba-Korinthe 7:1) Jehofa o ile a šegofatša batho ba gagwe ka baka la go kwa ga bona Lentšu la gagwe le molaki e a botegago.

⁷ Ka go ikokobeletša sehlopha sa molaki, batho ba Modimo le gona ba bontšha go ikokobeletša ga bona Mong wa bona Jesu Kriste. Go ikokobetša mo go bjalo ke mo go bonagalago kudu mehleng yeno ka baka la bolaodi bja Jesu bjo bo katološitšwego, bjalo ka ge go boletšwe e sa le pele boporofeteng bja Jakobo bja ge a be le diphateng tša lehu.

Silo e ba Mmuši wa Lefase yo a Swanelegago

8. Bolaodi bja Kriste bo ile bja katološwa neng le gona bjang?

⁸ Boporofeta bja Jakobo bo boletše e sa le pele gore Silo o tla laela gore ‘ditšhaba di mo kwe.’ Ka mo go kwagalago, go buša ga Kriste go tla fetela ka kua ga Isiraele ya moya. Bo tla akaretša’ng? Kutollo 11:​15 e araba ka gore: “Mebušô ya lefase e tlile ya ba Mmušô wa Mong wa rena le wa Motlotšwa wa xaxwe. Xomme ó tlo buša xo iša mehleng ya neng le neng!” (Mongwalo o sekamego ke wa rena.) Beibele e utolla gore Jesu o amogetše bolaodi bjoo mafelelong a “mabaka a šupaxo” a boporofeta“mabaka a ba-ntlê”ka 1914. * (Daniele 4:​16, 17; Luka 21:​24) Ngwageng woo, “maboô” a sa bonagalego a Kriste e le Kgoši yeo e lego Mesia a ile a thoma, ka ge go bile bjalo le ka nako ya gagwe ya go “buša xare xa manaba a [gagwe].”—Mateo 24:3; Psalme 110:2.

9. Jesu o ile a dira’ng ka morago ga go amogela Mmušo wa gagwe, gomme se se bile le mafelelo afe a sa lebanyego go batho, kudu-kudu go barutiwa ba gagwe?

⁹ Tiro ya Jesu ya mathomo ka morago ga go amogela matla a bogoši e be e swanetše go ba ya go lahlela motho yo a tsebjago ka go se kwe go feta motho le ge e le ofe yo mongweSathane—​gotee le batemona ba gagwe “lefaseng.” Ga e sa le go tloga ka nako yeo, meoya e mebe e baketše batho masetla-pelo a sa hlalosegego, go oketša go kgothaletšeng tikologo yeo e dirago gore go kwa Jehofa e be tlhohlo. (Kutollo 12:​7-12; 2 Timotheo 3:​1-5) Ge e le gabotse, bahlaselwa ba bagolo ba ntwa ya Sathane ya moya ba akaretša le batlotšwa ba Jehofa, “ba ba xomaretšexo melaô ya Modimo, ba ba naxo le bohlatse bya Jesu Kriste” le bagwera ba bona ba “dinku tše dingwê.”—Kutollo 12:​17; Johane 10:16.

10. Ke phethagalo ya diporofeto dife tša Beibele yeo e kgonthišetšago go palelwa ga Sathane ntweng ya gagwe le Bakriste ba therešo?

¹⁰ Lega go le bjalo, Sathane o be a ahloletšwe go palelwa ka gobane le ke “letšatši la Morêna,” gomme ga go na selo seo se ka thibelago Jesu go “tlo fenya.” (Kutollo 1:​10; 6:2) Ka mohlala, o tla kgonthišetša go swaiwa ga mafelelo ga ba-Isiraele ba moya ba 144 000. Le gona o tla šireletša “lešaba le lexolo la batho ba xo sexo motho e a kxônaxo xo ba bala, ba dithšaba ka  moka, le meloko ka moka, le merafô ka moka, le maleme ka moka.” (Kutollo 7:​1-4, 9, 14-16) Lega go le bjalo, ka go se swane le bagwera ba bona ba tloditšwego, ba e tla ba balata ba Jesu ba lefaseng bao ba kwago. (Daniele 7:​13, 14) Go ba ga bona lefaseng lehono go nea bohlatse bjo bo kgodišago bja gore Silo ka kgonthe ke Mmuši wa “mebušô ya lefase.”—Kutollo 11:15.

Bjale ke Nako ya go ‘kwa Ditaba tše Dibotse’

11, 12. (a) Ke bomang feela bao ba tlago go phologa bofelo bja tshepedišo ya gona bjale ya dilo? (b) Ke dimelo dife tšeo di bago gona ka go bao ba hemago “môya wa lefase”?

¹¹ Ka moka bao ba nyakago bophelo bjo bo sa felego ba swanetše go ithuta go kwa, ka gobane Beibele e bolela ka mo go kwagalago gore “bao ba sa tsebego Modimo le bao ba sa kwego ditaba tše dibotse mabapi le Morena wa rena Jesu” ba ka se phologe letšatši la Modimo la tefetšo. (2 Ba-Thesalonika 1:8, NW) Lega go le bjalo, tikologo ya gona bjale e kgopo le moya wa yona wa borabele malebana le melao le melao ya motheo ya Beibele e dira gore go kwa ditaba tše dibotse e be tlhohlo.

¹² Beibele e hlalosa moya wo wa borabele malebana le Modimo e le “môya wa lefase.” (1 Ba-Korinthe 2:​12) Ge a hlalosa mafelelo a wona bathong, moapostola Paulo o ngwaletše Bakriste ba lekgolong la pele la nywaga ba kua Efeso gore: “Le be Le ile le tšôna ka mokxwa wa lefase leno, Lè bušwa ke mmuši wa mmušô wa sebakeng, ke môya wo mehleng yeno o diraxo ka matla mo baneng ba xo se kwe. Le rena ka moka re be re ile le bôná ka dikxanyoxô tša nama ya rena, rè sa dira se se bexo se ratwa ke nama le maikwêlô a rena, rè sa le bana ba ba swanaxo le ba bangwê bao ba ba tswáletšwexo xo tlo xalefêlwa.”—Ba-Efeso 2:​2, 3.

13. Bakriste ba ka lebeletšana bjang ka katlego le moya wa lefase, gomme ka mafelelo afe a holago?

¹³ Ka mo go thabišago, Bakriste ba Efeso ga se ba ka ba dula e le makgoba a moya woo wa go se kwe. Go e-na le moo, e ile ya ba bana ba ba kwago ba Modimo ka go ikokobeletša moya wa gagwe le go buna dienywa tša wona tše dintši le tše dibotse. (Ba-Galatia 5:​22, 23) Ka mo go swanago lehono, moya wa Modimomatla a magolo kudu legohlengo thuša ba dimilione go kwa Jehofa, ka mafelelo a gore ba ka ba le “kgodišego e tletšego ya kholofelo go ba go fihla bofelong.”Ba-Hebere 6:​11, NW; Sakaria 4:6.

14. Ke ka tsela efe Jesu a ilego a lemoša Bakriste ka moka bao ba phelago mehleng ya bofelo ka dilo tše itšego tšeo di bego di tla leka go kwa ga bona?

¹⁴ Le gona, dula o gopola gore re na le thekgo e matla ya Silo, yoo yena gotee le Tatagwe ba ka se tlogelego lenaba le ge e le lefemotemona goba mothogo leka go kwa ga rena go feta kamoo re ka go kgotlelelago. (1 Ba-Korinthe 10:​13) Ge e le gabotse, go re thuša ntweng ya rena ya moya, Jesu o hlalositše mathata a itšego a mmalwa ao re tla lebeletšanago le ona mehleng ye ya bofelo. O dirile bjalo ka mangwalo a šupago, ao a a neilego moapostola Johane ka pono. (Kutollo 1:​10, 11) Go kgonthišega ka seo, a be a na le keletšo ya bohlokwa go Bakriste nakong yeo, eupša go šoma ga wona mo gogolo ke ga ‘letšatšing la Morena,’ ga e sa le go tloga ka 1914. Ka gona, ke mo go swanelegago gakaakang gore re ele hloko melaetša ye! *

Phema go se be le Taba, Boitshwaro bjo bo Gobogilego le go Rata Dilo tše di Bonagalago

15. Ke ka baka la’ng re swanetše go itiša malebana le bothata bjo bo ilego bja kgoma phuthego ya Efeso, gomme re ka dira se bjang? (2 Petro 1:​5-8)

¹⁵ Lengwalo la Jesu la pele le be le e-ya go phuthego ya Efeso. Ka morago ga go reta phuthego ka baka la kgotlelelo ya yona, Jesu o itše: “Se ke se sôlaxo xo wene, ké xe leratô la xaxo la pele O le lahlile.” (Kutollo 2:​1-4) Lehono, ka mo go swanago ba bangwe bao e bego e le Bakriste ba mafolofolo ba ile ba lahlegelwa ke lerato la bona le le tseneletšego leo ba bego ba na le lona pele la go rata Modimo. Go lahlegelwa mo go bjalo go ka fokodiša tswalano ya motho le Modimo gomme go swanetše go lokišwa kapejana. Lerato le bjalo le ka tsošološwa bjang? Ka thuto ya ka mehla ya Beibele, go ba gona dibokeng, thapelo le go naganišiša. (1 Johane  5:3) Ke therešo gore se se nyaka ‘boiteko bjo matla,’ eupša bjo e tloga e le bjoo bo swanelago. (2 Petro 1:​5-8) Ge e ba go itlhahloba ka potego go utolla gore lerato la gago le tapile, ka gona phošolla boemo gatee-tee, ka go kwa keletšo ya Jesu e rego: “Xopola mo O wetšexo fase, O sokoloxê O boêlê medirong yela ya pele.”—Kutollo 2:5.

16. Ke ditutuetšo dife tšeo di senyago moyeng tšeo di bilego gona diphuthegong tša Peregamo le Thiathira, gomme ke ka baka la’ng mantšu a Jesu go tšona e le a swanetšego lehono?

¹⁶ Bakriste ba Peregamo le Thiathira ba ile ba retwa ka baka la potego ya bona, kgotlelelo le phišego. (Kutollo 2:​12, 13, 18, 19) Lega go le bjalo, ba be ba tutueditšwe ke batho ba itšego bao ba bego ba bontšha moya o mobe wa Biliama le Isebele, bao ka boitshwaro bjo bo gobogilego bja botona le botshadi le ka borapedi bja Baali ba ilego ba ba bjalo ka ditutuetšo tše di senyago Isiraeleng ya bogologolo. (Numeri 31:​16; 1 Dikxoši 16:​30, 31; Kutollo 2:​14, 16, 20-23) Eupša go thwe’ng ka mehla ya rena‘letšatšing la Morena’? Na ditutuetšo tše bjalo tše mpe di a bonagala? Ee, boitshwaro bjo bo gobogilego ke lebaka le legolo leo batho ba Modimo ba kgaolwago ka lona. Ka gona, go bohlokwa gakaakang gore re pheme ditlwaelano le batho ka mokaka ntle le ka gare ga phuthegobao e lego tutuetšo e senyago boitshwarong! (1 Ba-Korinthe 5:​9-11; 15:​33) Bao ba nyakago go ba balata ba Silo ba kwago ba tla phema boithabišo bjo bo belaetšago gotee le diswantšho tše di kgothaletšago bootswa tšeo di gatišitšwego le tšeo di lego ka go Internet.—Amosi 5:​15; Mateo 5:​28, 29.

17. Pono le boemo bja kgopolo bja batho ba Sarede le ya ba Laoditsea bo bapetšwa bjang le pono ya Jesu ka boemo bja bona bja moya?

¹⁷ Ka ntle le batho ba sego kae, phuthego ya Sarede ga se ya ka ya retwa. E bile le “leina” goba ponagalo ya go ba e phelago, eupša go se be le taba moyeng go be go e kgomaretše moo Jesu a ilego a re e be e “hwile.” Go kwa ditaba tše dibotse go be go dirwa ka go ithola kgwara. A tatofatšo e kaakang! (Kutollo 3:​1-3) Phuthego ya Laoditsea e be e le boemong bjo bo swanago. E be e ikgantšha ka mahumo a dilo tše di bonagalago e re “ke mohumi,” eupša go Kriste e be e ‘nyamiša, e le modiitšana, e le sefofu e bile e hlobotše.’—Kutollo 3:​14-17.

18. Ke bjang motho a ka phemago go ba yo bololo moyeng mahlong a Modimo?

¹⁸ Lehono, ba bangwe bao e bego e le Bakriste ba botegago le bona ba wetše moreong o swanago wa go se kwe. Mohlomongwe ba dumeletše moya wa lefase go ba dira gore ba hlokomologe go akgofa ga nako maphelong a  bona, ka go rialo ba hlagolela boemo bja kgopolo bja go ba bololo moyeng malebana le thuto ya Beibele, thapelo, diboka tša Bokriste le bodiredi. (2 Petro 3:​3, 4, 11, 12) Go bohlokwa gakaakang gore batho ba bjalo ba kwe Kriste ka go diriša mehola ya nakong e tlago ya mahumo a moyaee, “rêka xo [Kriste] xauta ye e tšwaxo meubeng.” (Kutollo 3:​18) Lehumo le bjalo la kgonthe le akaretša go ‘huma mediro e bolo, go rata go nea le go abela ba bangwe.’ Ka go beeletša go didirišwa tše tša moya, re ‘ithuela go thea motheo wa mehla e tlago gore re fihlelele bjo e lego bophelo bja ruri.’—1 Timotheo 6:​17-19.

Di Ile tša Retwa ka Baka la go kwa ga Tšona

19. Jesu o ile a nea ditheto le dikgothatšo dife go Bakriste ba Simirina le ba Filadelefia?

¹⁹ Phuthego ya Simirina le ya Filadelefia di tšwa pele e le mehlala ya go kwa, ka gobane mangwalo ao Jesu a di ngwaletšego ona ga a na kgalemelo. Go bao ba Simirina, o itše: “Tlaišêxô ya xaxo ké a e tseba, le bodiitšana bya xaxo. Fêla, O mohumi.” (Kutollo 2:9) A phapano e kaakang go bao ba Laoditsea, bao ba bego ba ikgantšha ka mahumo a lefase eupša bao ge e le gabotse ba bego ba diila! Go ba gona, Diabolo o be a sa thabišwe ke go bona motho le ge e le ofe a bontšha potego le go kwa Kriste. Ka gona, Jesu o lemošitše gore: “Se boifê tše O tl’o xo hlokofatšwa ka tšôna; O tsebê xore Diabolo ó tlo lahlêla ba bangwê ba lena kxolexong xore Le lekwê; xomme Le tlo ba le ditlaišêxô ka matšatši a lesome. Bôtêxa xo fihla lehung, ke tlê ke Xo neê mphapahlôxô wa bophelô.” (Kutollo 2:​10) Ka mo go swanago, Jesu o ile a reta bao ba Filadelefia ka gore: “Wa tla wa xomarêla Lentšu la-ka [goba wa nkwa], wa se latole ’ina la-ka. O tsebê xore ke e-tla. Swara O tiiše se O naxo le sôna, xore mphapahlôxô wa xaxo o se tlo tšewa ke e mongwê.”—Kutollo 3:​8, 11.

20. Ke bjang ba dimilione lehono ba lotilego lentšu la Jesu, gomme go sa šetšwe maemo afe?

²⁰ Ka “letšatši la Morêna,” go thoma ka 1914, mašaledi a botegago le bagwera ba ona ba dinku tše dingwe bao ga bjale ba balelwago go ba dimilione, le bona ba lotile lentšu la Jesu ka go tšea karolo ka mafolofolo bodireding le ka go swarelela ka go tia potegong ya bona. Go swana le bana babo bona ba lekgolong la pele la nywaga, ba bangwe ba ile ba tlaišega ka baka la go kwa ga bona Kriste, gaešita le go lahlelwa dikgolegong le dikampeng tša tlaišo. Ba bangwe ba lotile lentšu la Jesu ka go boloka ‘leihlo le le lokilego,’ go sa šetšwe go dikologwa ke bohumi le megabaru. (Mateo 6:​22, 23) Ee, tikologong e nngwe le e nngwe le boemong bjo bongwe le bjo bongwe, Bakriste ba therešo ka go kwa ga bona ba tšwela pele ba thabiša pelo ya Jehofa.—Diema 27:11.

21. (a) Ke tlamo efe ya moya yeo sehlopha sa molaki se tla tšwelago pele go e phethagatša? (b) Re ka bontšha bjang gore re tloga re nyaka go kwa Silo?

²¹ Ge re dutše re batamela masetla-pelo a magolo, “molaki e a bôtêxaxo yo bohlale” o dula a ikemišeditše go se kwanantšhe go kwa ga ona Mong wa gagwe Kriste. Se se akaretša go lokišeletša dijo tša moya ka lebaka la gona bakeng sa lapa la Modimo. Ka gona anke re tšweleng pele go leboga mokgatlo o kgahlišago wa Jehofa wa pušo ya Modimo le seo o se neago. Ka tsela ye, re bontšha go ikokobeletša ga rena Silo, yoo a tlago go putsa balata ba gagwe ka moka bao ba kwago ka bophelo bjo bo sa felego.—Mateo 24:​45-47; 25:​40; Johane 5:​22-24.

[Mengwalo ya ka tlase]

Na o a Gopola?

• Jesu o be a tla kgatha tema efe bjalo ka ge go boletšwe e sa le pele ke boporofeta bja Jakobo bja ge a be a le diphateng tša lehu?

• Ke bjang re amogelago Jesu e le Silo, gomme ke moya ofe woo re swanetšego go o phema?

• Ke keletšo efe e šomago bakeng sa mehla ya rena yeo e lego ka mangwalong a yago go diphuthego tše šupago tša Kutollo?

• Ke ka ditsela dife re ka ekišago batho bale ba phuthegong ya bogologolo ya Simirina le ya Filadelefia?

[Dipotšišo tša Thuto]

[Diswantšho go letlakala 18]

Jehofa o šegofatša batho ba gagwe ka go kwa “molaki” yo a botegago

[Seswantšho go letlakala 19]

Tutuetšo ya Sathane e dira gore go kwa Modimo e be tlhohlo

[Diswantšho go letlakala 21]

Tswalano e matla le Jehofa e re thuša go mo kwa