Khomotšo Dinakong tša Mathata

DITABA tša mehleng ye ga se tšeo di homotšago. Motho yo mongwe o ngwadile gore: “Ditiragalo tša gona bjale ke tšeo di nyamišago kudu moo e lego gore gantši ga re kgone go dira phetho ya ge e ba re na le sebete se se lekanego sa go bogela ditaba tša iri ya botshelela.” Lefase le tletše ka ntwa, ditiro tša botšhošetši, tlaišego, bosenyi le malwetšibobe bjoo kgaufsinyana bo ka re kgomago ka go lebanya, ge e ba go se gwa tšwa go e ba bjalo.

Beibele e boletše e sa le pele ka go lebanya ka boemo bjo bja ditaba. Ge a hlalosa mehla ya rena, Jesu o itše go tla ba le dintwa tše kgolo, mauba a malwetši, tlhaelelo ya dijo le ditšhišinyego tša lefase. (Luka 21:​10, 11) Ka mo go swanago, moapostola Paulo o ngwadile ka “dinako tše hlobaetšago tšeo go lego thata go lebeletšana le tšona,” ge batho e tla ba ba šoro, ba megabaru le ba go se rate go loka. O biditše nako yeo gore ke ‘mehla ya bofelo.’—2 Timotheo 3:​1-5, NW.

Ka gona, ge ditaba di hlalosa maemo a lefase di na le go swana ka tsela e itšego le seo Beibele e se boletšego e sa le pele. Eupša di swana feela ka tlhaloso ya maemo a lefase. Beibele e nea kgopolo yeo ditaba di sa e neego. Ka Lentšu la Modimo leo le buduletšwego, re ka kwešiša e sego feela lebaka leo ka lona go nago le bobe bjo bokaakaa eupša re ka kwešiša gape le gore bokamoso e tla ba eng.

 Kamoo Modimo a Lebelelago Bokgopo ka Gona

Beibele e hlalosa kamoo Modimo a lebelelago ka gona maemo a gateletšago a mehla ya rena. Gaešita le ge a bone e sa le pele mathata a lego gona ga bjale, ga a a dumelele e bile ga se a ikemišetša go a kgotlelela ka mo go sa felego. Moapostola Johane o ngwadile gore: “Modimo ké Yêna leratô.” (1 Johane 4:8) Jehofa o tloga a e-na le taba kudu ka batho gomme o hloile bobe ka moka. Ke mo go swanetšego gore re ka retologela go Modimo bakeng sa khomotšo, ka ge a lokile gomme a na le matla le maikemišetšo a go fediša bobe lefaseng. Mopsalme o ngwadile gore: “[Kgoši ya Modimo e hlomilwego legodimong e] tlo hlakodiša modiitšana xe a lla, le mohlaki xe a hlôka monamodi. [E] tlo xauxêla mosenyi le mohloki; meôya ya bahumanexi [e] tlo e phološa. Meôya ya bôná [e] tlo e lokolla mohlakong, bošorong; ’me madi a bôná [e] tlo a sema selô se bohlôkwa.”—Psalme 72:​12-14.

Na o kwela bao ba tlaišegago bohloko? Mohlomongwe o ba kwela bohloko. Go kwelana bohloko ke seka seo Jehofa a se tsentšego ka go rena, ka gobane re bopilwe ka seswantšho sa gagwe. (Genesi 1:​26, 27) Ka gona, re ka kgodišega gore Jehofa o kgomega ka go tlaišega ga batho. Jesu yo a bego a tseba Jehofa ga kaone kudu go feta motho le ge e le ofe, o rutile gore Jehofa o na le kgahlego e tseneletšego ka rena gomme o tletše kwelobohloko e lerato.—Mateo 10:​29, 31.

Tlholo ka boyona e hlatsela gore Modimo o na le taba le batho. Jesu o boletše gore Modimo “letšatši la xaxwe ó le hlabišetša ba babe le ba boló; le pula ya xaxwe ó e nešetša baloki le bakxôpô.” (Mateo 5:​45) Moapostola Paulo o boditše batho ba motseng wa Lisitara gore: “[Modimo ga a] ka a lesa xo ithlatsêla ka xo re sétša ka dilô tše ntši, à re fa dipula dì e-tšwa lexodimong, à hoša dipelo tša rena ka dijô le ka thabô.”—Ditiro 14:17.

Ke Mang yo a Ikarabelago ka Bokgopo?

Le gona ke mo go lemogegago gore Paulo o boletše le batho ba Lisitara gore: “Ké Yena [Modimo], e sa le mola kxalê, a lesitšexo dithšaba ka moka di sepelê ka ditsela tša tšôna.” Ka gona, ditšhabagoba batho ka bobonaba ikarabela kudu ka bontši bja ditlaišego tšeo ba ikhwetšago ba le ka gare ga tšona. Modimo ga se a swanela go bewa molato.—Ditiro 14:16.

Ke ka baka la’ng Jehofa a dumelela dilo tše mpe go direga? Na o tla ka a dira selo le ge e le sefe ka tšona? Karabo dipotšišong tše e ka hwetšwa feela ka Lentšung la Modimo. Ke ka gobane karabo e tswalana kgaufsi le motho yo mongwe wa moya le kgang yeo a e tsošitšego lefelong leo le sa bonagalego la moya.

[Mothopo wa Seswantšho go letlakala 3]

Upper left, Croatia: UN PHOTO 159208/S. Whitehouse; starving child: UN PHOTO 146150 BY O. MONSEN

[Diswantšho go letlakala 4]

Batho ba na le kwelobohloko. Na Modimo ga a na taba le go tlaišega ga batho?