Bagoeledi Ba Mmušo Ba A Bega

Mentlele wa Tebogo Bakeng sa Holo ya Mmušo

LEFAPHA la Tikologo kua Finland le ile la kgetha ngwaga wa 2000 e le “Ngwaga wa Boalo bja Naga.” Yo mongwe wa barulaganyi o boletše gore “morero wa sehlogo sa nywaga sa boalo bja naga ke go re gopotša ka moka ga rena ka tutuetšo yeo ditikologo tše ditala di nago le yona maphelong a rena a letšatši le letšatši le bophelong bjo bobotse bja rena.”

Ka January 12, 2001, lengwalo le tšwago go Finnish Association of Landscape Industries le ile la fihla ofising ya lekala ya Dihlatse tša Jehofa kua Finland. Lengwalo le ile la hlalosa gore Holo ya Mmušo ya Dihlatse tša Jehofa kua Tikkurila e abetšwe e nngwe ya dimentlele tša sehlogo sa ngwaga sa boalo bja naga ka baka la tikologo ya yona e kgahlišago le serapa sa yona se se adilwego gabotse. Lengwalo le okeditše ka gore “ponagalo ya mabala ka kakaretšo, bobedi selemo le marega, ke e kgahlišago, e botse ka tsela ya bokgabo le ya maemo a godimo.”

Mentlele o ile wa neelwa Dihlatse tša Jehofa Hoteleng ya Rosendahl kua Tampere, Finland, tiragalong yeo go bilego le ditsebi le bo-rakgwebo ba 400. Le gona Finnish Association of Landscape Industries e ile ya lokolla pego e yago go bo-raditaba yeo ka boripana e boletšego gore: “Dikarolong tše fapa-fapanego tša naga, Diholo tša Mmušo tša Dihlatse tša Jehofa ke tšeo ka mehla di rulagantšwego ka tsela e kgahlišago. Tsela yeo tikologo e hlokomelwago ka yona e tsoša kgahlego ya mo e nyakilego e le mofeti ka tsela yo mongwe le yo mongwe. Holo ya Mmušo ya kua Tikkurila ke mohlala o mongwe wa serapa se se kgahlišago kudu. Moago gotee le mabala a yona a magolo a bonagatša go fola le teka-tekano.”

Kua Finland go na le Diholo tša Mmušo tše 233, tšeo bontši bja tšona di dikologilwego ke dirapa tše dibotse. Lega go le bjalo, seo se tlogago se dira gore mafelo a e be a mabotse ke ka baka la gore ke mafelo a borapedi bja therešo le a thuto ya Beibele. Go Dihlatse tša Jehofa tša ka godimo ga dimilione tše tshela go dikologa lefase, Holo ya Mmušoe ka ba e na le ditlabakelo ka moka goba e di hlaelelake lefelo leo le ratwago kudu. Ke ka baka leo di fišegelago go e hlokomela ka lerato le ka mafolofolo. Mejako ya Diholo tša Mmušo e bulegetše bohle setšhabeng sa geno!