Na o Swanetše go ba yo a sa Tshwenyegego?

KA NTLE le pelaelo batho ba bantši ba tla nagana gore ke theto go lebelelwa e le bao ba sa tshwenyegego, e le bao ba nago le tshekamelo ya go ba bao ba iketlilego, ba bonolo le ba kgopolo e bulegilego. Lega go le bjalo, go na le sebopego se sengwe sa go se tshwenyege. Beibele e re: “Mašilô a senyêxa ka xo se kxathale.” (Diema 1:​32) Seo se bolela’ng?

Diphetolelo tše dingwe tša Beibele di fetolela lentšu la mathomong la Sehebere ka dipolelwana tše bjalo ka “go se šetše ga ka boomo” (American Standard Version), “boithati” (The New American Bible) le “go se tshwenyege.” (The New English Bible) Ka tsela ye, go se tshwenyege go tswalanywa le go tšwafa le go se šetše ka go rialo go lebiša go botlaela goba bošilo.

Lekgolong la pele la nywaga, Bakriste ba phuthegong ya Laoditsea ba be ba sa šetše goba ba sa tshwenyege ka go fokola ga bona moyeng. Ka boithati ba ile ba ikgantšha ka gore “xa [ba] hloke selô!” Jesu Kriste o ile a ba phošolla, a ba botša gore ba tsošološe phišego ya bona ya Bokriste.—Kutollo 3:​14-19.

Go se tshwenyege e be e le seka sa batho ba mehleng ya Noage. Ba be ba swaregile ka dilo tša bophelo bja letšatši le letšatši, “ba-e-ja, bà e-nwa bà nyala, bà nyadiša . . . , ba be ba sa šetše selô; meetse-fula a bá a tla, a ba tšea ka moka.” Ke moka Jesu o ile a oketša ka gore: “Le maboong a Morwa-motho xo tlo ba byalo.”—Mateo 24:​37-39.

Boporofeta bja Beibele bjo bo phethagaditšwego bo bontšha gore re phela “maboong a Morwa-motho,” Jesu Kriste. Anke le ka mohla re se ke ra ba bao ba sa tshwenyegego, ba go se šetše le ba go ba le boithatiba go se tshwenyege ka tsela e fošagetšego.—Luka 21:​29-36.