Jehofa o a go Hlokomela

“Dipelaêlô tša lena ka moka di lahleleng xodimo xa xaxwe [Modimo], xobane ké Yêna a Le belaêlêlaxo.”—1 PETRO 5:7.

1. Jehofa le Sathane ba fapane ka mo go feletšego ka sebopego sefe se bohlokwa?

JEHOFA le Sathane ba tloga ba sa swane. Motho le ge e le ofe yo a ikwago a batametše go Jehofa a ka ikwa a šišimišwa ke Diabolo. Go fapana mo go boletšwe ka pukung ya ditšhupetšo. Mabapi le mediro ya Sathane bjalo ka ge e ngwadilwe ka pukung ya Beibele ya Jobo, Encyclopædia Britannica (1970) e re: ‘Morero wa Sathane ke go ralala le lefase a nyaka go dira ditiro tša bobe goba a nyaka batho bao ba ka thomeletšwago ka bobe; ka gona morero wa gagwe o fapane le wa “mahlo a Morena,” ao a ralalago lefaseng a matlafatša bohle ba lokilego. (II Chron. xvi, 9). Sathane o na le maseme ka go loka ga batho mo go se nago boithati gomme o dumeletšwe go go leka ka tumelelo le taolo ya Modimo le gona ka tlase ga dithibelo tšeo Modimo a di beilego.’ Ee, a go fapana mo go kaakang!—Jobo 1:​6-12; 2:​1-7.

2, 3. (a) Tlhaloso ya lentšu “Diabolo” e swantšhitšwe bjang go seo se ilego sa diragalela Jobo? (b) Beibele e bontšha bjang gore Sathane o tšwela pele a thomeletša bahlanka ba Jehofa mo lefaseng?

² Lentšu “Diabolo” le tšwa lentšung la Segerika leo le bolelago “mothomeletši,” “sehwirihwiri.” Puku ya Jobo e utolla gore Sathane o ile a thomeletša mohlanka yo a botegago wa Jehofa e lego Jobo ka gore o Mo hlankela ka boithati, ge a be a bolela  gore: “A O re Jobo xe a boifa Modimo, ó dira fêla?” (Jobo 1:9) Pego e lego ka pukung ya Jobo e bontšha gore go sa šetšwe diteko tša gagwe, Jobo o ile a batamela kgaufsi kudu go Jehofa. (Jobo 10:​9, 12; 12:​9, 10; 19:​25; 27:5; 28:​28) Ka morago ga go lekwa ga gagwe, o ile a re go Modimo: “Xo kwa ka ditsêbê ke be ke e-kwa; byale xôna mahlô a-ka a Xo bone.”—Jobo 42:5.

³ Na Sathane o kgaoditše go thomeletša bahlanka ba botegago ba Modimo ga e sa le go tloga mehleng ya Jobo? Aowa. Puku ya Kutollo e bontšha gore mehleng ye ya bofelo, Sathane o tšwela pele go thomeletša bana babo Kriste ba tloditšwego gomme ka mo go kgothišeditšwego o thomeletša le badirišani ba bona ba botegago. (2 Timotheo 3:​12; Kutollo 12:​10, 17) Ka gona, selo se segolo seo ka moka re le Bakriste ba therešo re swanetšego go se dira ke gore re bušwe ke Modimo wa rena yo a hlokomelago, Jehofa, re mo hlankela ka lerato le tseneletšego gomme ka go rialo re hlatsele ditatofatšo tša Sathane e le tša maaka. Ka go dira bjalo, re tla thabiša pelo ya Jehofa.—Diema 27:11.

Jehofa o Nyaka go re Thuša

4, 5. (a) Ka go fapana le Sathane, ke’ng seo Jehofa a se lebelelago mo lefaseng? (b) Ge e ba re tla thabela go amogelwa ke Jehofa, ke’ng seo se nyakegago go rena?

⁴ Diabolo o putla-putla le lefase a nyaka go thomeletša le go metša yo mongwe. (Jobo 1:​7, 9; 1 Petro 5:8) Ka mo go fapanego, Jehofa o nyaka go thuša bao ba nyakago matla a gagwe. Moporofeta Hanani o boditše Kgoši Asa gore: “Mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.” (2 Koronika 16:9) A phapano e kaakang magareng ga bomenetša bja lehloyo bja Sathane le tlhokomelo ya Jehofa e lerato!

⁵ Jehofa ga a re lebelele ka sephiring ka maikemišetšo a mabe a go nyaka go hwetša diphošo tša rena. Mopsalme o ngwadile gore: “Xe Wene Morêna Ò latiša molato, xôna xo ka êma mang?” (Psalme 130:3) Karabo ke gore: ga a gona. (Mmoledi 7:​20) Ge e ba re batamela kgaufsi le Jehofa ka dipelo ka moka, mahlo a gagwe a tla re šetša, e sego go re ahlola, eupša go šetša maiteko a rena le go araba dithapelo tša rena bakeng sa go re thuša le go re lebalela. Moapostola Petro o ngwadile gore: “Mahlô a Morêna a bôna baloki; ’tsêbê tša xaxwe di kwa xe ba lla. Xomme sefahloxô sa Morêna se lebile ba xo dira bobe.”—1 Petro 3:12.

6. Ke ka tsela efe taba ya Dafida e lego khomotšo le temošo go rena?

⁶ Dafida o be a sa phethagala gomme o ile a dira sebe se segolo. (2 Samuele 12:​7-9) Eupša o ile a tšhollela Jehofa pelo ya gagwe gomme a mmatamela ka thapelo e tšwago pelong. (Psalme 51:​1-12, mongwalo wa ka godimo.) Jehofa o ile a kwa thapelo ya gagwe gomme a mo lebalela, gaešita le ge Dafida a ile a ba le mafelelo a sa kgahlišego a sebe sa gagwe. (2 Samuele 12:​10-14) Se e swanetše go ba khomotšo le temošo go rena. Ke mo go homotšago go tseba gore Jehofa o ikemišeditše go re lebalela dibe tša rena ge e ba re itshola e le ka kgonthe, eupša ke mo go phafošago go lemoga gore dibe gantši di tliša mafelelo a bohloko. (Ba-Galatia 6:​7-9) Ge e ba re nyaka go batamela kgaufsi le Jehofa, re swanetše go emela kgole ka mo re ka kgonago ka gona le selo le ge e le sefe seo se sa mo kgahlišego.—Psalme 97:10.

Jehofa o Gogela Batho ba Gagwe go Yena

7. Jehofa o lebelela batho ba mohuta ofe, gomme o ba gogela bjang go yena?

⁷ Dafida o ngwadile go e nngwe ya dipsalme tša gagwe gore: “Morêna ké yo moxolo-xolo, ’me ó bôna babôtlana; le wa xo iphaxamiša ó mo tseba ka kxolê.” (Psalme 138:6) Ka mo go swanago, psalme e nngwe e re: “Ké mang a lekanaxo le Morêna Modimo wa rena Mo-dula-phaxamong? O ukametše maxodimo le lefase, ó di bòna di le tlase, A tsoša babôtlana leroleng.” (Psalme 113:​5-7) Ee, Mmopi yo-matla-ohle wa legohle o inama gore a lebelele mono lefaseng, gomme mahlo a gagwe a bona “babôtlana,” batho bao ba ‘llago ba hlokofetše ka go bona makgapa a dirwago.’ (Hesekiele 9:4) O gogela batho ba bjalo go yena ka Morwa wa gagwe. Jesu ge a be a le mo lefaseng o boletše gore: “Xa xo motho e a kxônaxo xo tla xo Nna, xe a sa xôxwe ke Tate e a nthomilexo; . . . Xa xo e a  kaxo tla xo Nna, xe a sa fiwe ke Tate.”—Johane 6:​44, 65.

8, 9. (a) Ke ka baka la’ng ka moka re swanetše go tla go Jesu? (b) Ke’ng seo se kgahlišago mabapi le tokišetšo ya topollo?

⁸ Batho ka moka ba swanetše go tla go Jesu gomme ba bontšhe tumelo sehlabelong sa topollo ka gobane ba belegwe e le badiradibe, ba arogantšwe le Modimo. (Johane 3:​36) Ba swanetše gore ba boelanywe le Modimo. (2 Ba-Korinthe 5:​20) Modimo ga se a ka a emela badiradibe gore ba mo kgopele gore a nee tokišetšo yeo ka yona ba bego ba ka hwetša khutšo le yena. Moapostola Paulo o ngwadile gore: “Modimo, leratô le a re ratilexo ka lôna, ó le bônaxatša ka xe Kriste a re hwêla rè sa le ba-dira-dibe. Xe ešita mola rè sa le manaba ra boêlanywa le Modimo ka xo hwa xa Morwa wa xaxwe, byale xe re boelantšwe le Yêna, a xa se xôna xo tl’o xo kxônêxa-xê ra phološwa ka xo phela xa xaxwe?”Ba-Roma 5:​8, 10.

⁹ Moapostola Johane o ile a kgonthišetša bohlokwa bja therešo ya gore Modimo o boelanya batho le yena, ge a be a ngwala gore: “Leratô la Modimo le a re ratilexo ka lôna, le bônaxetše ka xe a roma Morwa wa xaxwe Mo-tswalwa-eši, a tla lefaseng xore re phelê ka yêna. Leratô xe le le xôna xa se ka xore ké rena re ratilexo Modimo; ké ka xe Yêna a re ratile a roma Morwa wa xaxwe, a ba seloba sa dibe tša rena.” (1 Johane 4:​9, 10) Mogato wa pele o gatilwe ke Modimo, e sego batho. Na o ikwa o batametše Modimo yo a bontšhitšego lerato le legolo gakaakaa bakeng sa rena batho bao re bego re se feela “ba-dira-dibe” eupša e bile re le “manaba”?—Johane 3:16.

Re Swanetše go Tsoma Jehofa

10, 11. (a) Re swanetše go dira’ng gore re tsome Jehofa? (b) Re swanetše go lebelela bjang tshepedišo ya dilo ya Sathane?

¹⁰ Ka ge re tseba, Jehofa ga a re gapeletše gore re tle go yena. Re swanetše go mo tsoma, “[re] mo kwê xe a le xôna, [re] Mo hwetšê, xobane xa a kxolê, ó kxaufsi le e mongwê le e mongwê wa ba re lexo fá.” (Ditiro 17:​27) Re swanetše go lemoga tshwanelo ya Jehofa ya gore a nyake gore re bušwe ke yena. Morutiwa Jakobo o ngwadile gore: “Lobang-xê Le bušwê ke Modimo; Le lwê le Diabolo, ’me ó tlo Le thšaba. Batamêlang Modimo, le Yêna a Le batamêlê. Hlapang diatla, lena Ba-dira-dibe! Hlapišang dipelo, lena ba pelo-pedi.” (Jakobo 4:​7, 8) Ga se ra swanela go dika-dika go ema re tiile malebana le Diabolo le go emela Jehofa.

¹¹ Seo se bolela gore re emele kgole le tshepedišo e kgopo ya dilo ya Sathane. Le gona Jakobo o ngwadile gore: “A xa Le tsebe xore leratô la lefase ké xo dirêla Modimo bonaba? E a rataxo xo xwêrana le lefase, ó itira lenaba la Modimo.” (Jakobo 4:4) Ka mo go fapanego, ge e ba re nyaka go ba bagwera ba Jehofa, re swanetše go letela gore lefase la Sathane le re hloye.—Johane 15:​19; 1 Johane 3:13.

12. (a) Ke mantšu afe a homotšago ao Dafida a ilego a a ngwala? (b) Ke temošo efe yeo Jehofa a ilego a e nea ka moporofeta Asaria?

¹² Ge lefase la Sathane le re lwantšha ka tsela e itšego, re swanetše go batamela Jehofa ka thapelo ka mo go kgethegilego, re kgopele thušo ya gagwe. Dafida yo a bonego letsogo la Jehofa la phološo ka makga a mantši, o ngwadile bakeng sa go re homotša gore: “Morêna ó kxaufsi le bohle ba mmitšaxo, le bohle ba e rexo xe ba mmitša ba rereša. Ó tlo dira tše di tl’o xo kxahla  ba ba mmoifaxo; ó kwa dillô tša bôná, ’me ó a ba phološa. Bohle ba ba mo rataxo ó ba hlôkômetše; ba babe bôná ó tlo ba fediša.” (Psalme 145:​18-20) Psalme ye e bontšha gore Jehofa a ka re šireletša ge e ba re lekwa ka o tee ka o tee le gore o tla šireletša batho ba gagwe e le sehlopha nakong ya ‘tlaišego e kgolo.’ (Kutollo 7:​14) Jehofa o tla batamela kgaufsi le rena ge e ba re dula re mmatametše. A hlahlwa ke “moya wa Morêna,” moporofeta Asaria o boletše seo re ka se lebelelago e le therešo e akaretšago: “Morêna ó êma le lena, le lena Le êma le yêna. Xe Le mo tsoma, Le tlo mmôna. Xe Le ka mo tloxêla, le Yêna ó tlo Le tloxêla.”—2 Koronika 15:​1, 2.

Jehofa o Swanetše go ba wa Kgonthe go Rena

13. Re ka bontšha bjang gore Jehofa ke wa kgonthe go rena?

¹³ Moapostola Paulo o ngwadile ka Moše gore o ile “a xomarêla Eo a sa bonwexo byalo ka e ke ó a mmôna.” (Ba-Hebere 11:​27) Go ba gona, le ka mohla Moše ga se a bona Jehofa e le ka kgonthe. (Ekisodo 33:​20) Eupša Jehofa e be e le wa kgonthe go yena bjalo ka ge eka o Mmone. Ka mo go swanago, ka morago ga diteko tša gagwe, mahlo a Jobo a tumelo a ile a bona Jehofa gabotse, e le Modimo yo a dumelelago bahlanka ba gagwe ba botegago gore ba lebeletšane le diteko eupša le ka mohla a sa ba lahle. (Jobo 42:5) Go boletšwe ka Henoge le Noage gore ba ile ba ‘sepela ba na le Modimo.’ Ba dirile se ka go nyaka go kgahliša Modimo le go mo kwa. (Genesi 5:​22-24; 6:​9, 22; Ba-Hebere 11:​5, 7) Ge e ba Jehofa e le wa kgothe go rena go swana le ge a be a le wa kgonthe go Henoge, Noage, Jobo le Moše, re tla mo “tseba” ditseleng tša rena ka moka, gomme o tla re “thulêla tsela.”—Diema 3:​5, 6.

14. Go bolela’ng go ‘gomarela’ Jehofa?

¹⁴ Pejana ga ge ba-Isiraele ba be ba le kgaufsi le go tsena Nageng ya Kholofetšo, Moše o ile a  ba eletša ka gore: “Le latêlê Morêna Modimo wa lena Le boifê Yêna, Le hlôkômêlê ditaêlô tša xaxwe, Le kwê se a se bolêlaxo, Le mo dirêlê, Le mo xomarêlê.” (Doiteronomio 13:4) Ba be ba swanetše go latela Jehofa, ba mmoife, ba mo kwe le go mo gomarela. Mabapi le lentšu leo le fetoletšwego mo e le go ‘gomarela,’ seithuti se sengwe sa Beibele se bolela gore “ka Sehebere le šupa tswalano ya kgaufsi kudu.” Mopsalme o boletše gore: “Morêna ó kwana le ba ba mmoifaxo.” (Psalme 25:​14) Tswalano ye ya kgaufsi le ya bohlokwa le Jehofa e tla ba ya rena ge e ba e le wa kgonthe go rena le gona ge e ba re mo rata kudu mo e lego gore re tšhaba go mo nyamiša ka tsela le ge e le efe.—Psalme 19:​9-14.

Na o Lemoga Tlhokomelo ya Jehofa?

15, 16. (a) Psalme 34 e bontšha bjang gore Jehofa o a re hlokomela? (b) Re swanetše go dira’ng ge e ba re na le bothata bja go gopola ditiro tša Jehofa tša go loka tšeo a re diretšego tšona?

¹⁵ E nngwe ya ditiro tša Sathane tša boradia ke go leka go re dira gore re lebale therešo ya gore Modimo wa rena, Jehofa, o hlokomela bahlanka ba gagwe ba botegago ka mehla. Kgoši Dafida wa Isiraele o be a lemoga gabotse letsogo la Jehofa la tšhireletšo gaešita le ge a be a lebeletšane le nako e kotsi kudu. Ge a be a gapeletšega gore a itire segafa pele ga Kgoši Akise wa Gathe, o ile a ngwala koša, psalme e kgahlišago, yeo e akareditšego mantšu a a tumelo: “Xodišang Morêna xotee le nna re phaxamišê ’ina l’axwe rè le mmoxô. Morêna mola kè mo nyaka ó nkwile, a mphološa mo xo tšohle tše ke bexo ke di šia. Morongwa wa Morêna ó xoraxorêla ba ba mmoifaxo; ó a ba namolêla. Lekang Le bônê xobane Morêna ké yo boló, wa lehlôxônôlô ké monna e a mmotilexo. Morêna ó kxaufsi le ba ’pelo di rôbexilexo; ó phološa meôya e kxobetsi. Mahloko a moloki a atile, ’me Morêna ó mo nthša mo xo ôna ka moka.”—Psalme 34:​3, 4, 7, 8, 18, 19; 1 Samuele 21:​10-15.

¹⁶ Na o kgodišegile ka matla a phološago a Jehofa? Na o lemoga tšhireletšo ya gagwe ka barongwa? Na o le motho ka noši o lekile wa bona ge Jehofa a lokile? Ke neng la mafelelo mo o ilego wa lemoga gore Jehofa o go dirile ka go loka? Leka go gopola. Na e bile ka ntlong ya mafelelo  yeo o bilego go yona bodireding, ge o be o ikwa o se sa na matla a go tšwela pele? Mohlomongwe o bile le poledišano e kgahlišago le mong wa ntlo. Na o ile wa gopola go leboga Jehofa ge a go file matla a oketšegilego ao o bego o a hloka le go go šegofatša? (2 Ba-Korinthe 4:7) Ka lehlakoreng le lengwe, o ka swara bothata bja go gopola tiro e itšego ya go loka yeo Jehofa a go diretšego yona. Mohlomongwe o ka swanela ke go nagana seo se diregilego bekeng e fetilego, kgweding e fetilego, ngwagola goba go feta moo. Ge e ba seo se le bjalo, ke ka baka la’ng o sa dire boiteko bjo bo tseneletšego bja go batamela kgaufsi le Jehofa gomme o leke go bona kamoo a go hlahlago ka gona? Moapostola Petro o kgothaleditše Bakriste gore: “Ikokobetšeng ka tlase xa seatla se matla sa Modimo, . . . dipelaêlô tša lena ka moka di lahleleng xodimo xa xaxwe, xobane ké Yêna a Le belaêlêlaxo.” (1 Petro 5:​6, 7) Ka kgonthe, o tla makatšwa ke ka tsela yeo ka yona a go hlokomelago!—Psalme 73:28.

Tšwela Pele o Tsoma Jehofa

17. Ke’ng seo se lego bohlokwa ge e ba re tla tšwela pele re tsoma Jehofa?

¹⁷ Go boloka tswalano ya rena le Jehofa e swanetše go ba mosepelo o tšwelago pele. Ge Jesu a be a rapela Tatagwe o ile a re: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Go monya tsebo ka Jehofa le Morwa wa gagwe go nyaka boiteko bjo bo tšwelago pele ka lehlakoreng la rena. Re nyaka thušo ya thapelo le moya o mokgethwa gore re kwešiše “madiba a diphiri tša Modimo.” (1 Ba-Korinthe 2:​10; Luka 11:​13) Le gona re nyaka tlhahlo ya “molaki e a bôtêxaxo yo bohlale” go fepa menagano ya rena ka dijo tša moya tšeo di newago “ka lebaka la xôna.” (Mateo 24:​45) Ka mokero woo, Jehofa o re eleditše gore re bale Lentšu la gagwe letšatši le letšatši, re be gona dibokeng tša rena tša Bokriste ka mehla gomme re tšee karolo ka pelo ka moka modirong wa go bolela ‘ditaba tše dibotse tša mmušo.’ (Mateo 24:​14, bapiša le NW.) Ka go dira bjalo, re tla tšwela pele re tsoma Modimo wa rena yo a hlokomelago, Jehofa.

18, 19. (a) Ke’ng seo re swanetšego go ikemišetša go se dira? (b) Re tla šegofatšwa bjang ge e ba re ema ka go tia malebana le Diabolo gomme re tšwela pele re tsoma Jehofa?

¹⁸ Sathane o dira sohle se se lego matleng a gagwe go tlišetša batho ba Jehofa tlaišo, kganetšo le kgateletšo go tšwa mahlakoreng ka moka. O leka go šitiša khutšo ya rena le go senya boemo bja rena bjo bobotse pele ga Modimo. Ga a nyake gore re tšwele pele ka modiro wa rena wa go hwetša ba dipelo tše di botegago le go ba thuša go ema ka lehlakoreng la Jehofa tabeng ya bogoši bja legohle. Eupša re swanetše go ikemišetša go dula re botegela Jehofa ka go se kwanantšhe, re mmota gore o tla re phološa go yo mobe. Ka go dumelela Lentšu la Modimo go re hlahla le ka go dula re sepedišana le mokgatlo wa gagwe o bonagalago wa lefaseng ka mafolofolo, re ka kgodišega gore o tla re thekga ka mehla.—Jesaya 41:​8-13.

¹⁹ Ka gona, eka ka moka re ka ema re tiile malebana le Diabolo le ditiro tša gagwe tša boradia, ka mehla re tsoma Modimo wa rena yo a rategago, Jehofa, yo a ka se palelwego ke go ‘re thekga le go re tiiša.’ (1 Petro 5:​8-11) Ka go rialo, re tla ‘dula re ipatile ka lerato la Modimo re letetše kgaugelo ya mong wa rena Jesu Kriste ye e išago bophelong bjo bo sa felego.’—Juda 21.

O tla Araba Bjang?

• Lentšu la Segerika bakeng sa “Diabolo” le bolela’ng, gomme Diabolo o dumelelana bjang le tlhaloso yeo?

• Jehofa o fapana bjang le Diabolo ka tsela yeo A lebelelago badudi ba lefaseng?

• Ke ka baka la’ng motho a swanetše go amogela topollo ge a batamela Jehofa?

• Go ‘gomarela’ Jehofa go bolela’ng, gomme re ka tšwela pele bjang re mo tsoma?

[Dipotšišo tša Thuto]

[Seswantšho go letlakala 15]

Go sa šetšwe diteko tša gagwe, Jobo o ile a tseba le go kwešiša gore Jehofa o be a mo hlokometše

[Diswantšho go letlakala 16, 17]

Go bala Beibele letšatši le letšatši, go ba gona dibokeng tša Bokriste ka mehla le go tšea karolo ka mafolofolo modirong wa boboledi go re gopotša gore Jehofa o a re hlokomela