Bakriste ba ba sa Tšeego Lehlakore Mehleng ya Bofelo
Bakriste ba ba sa Tšeego Lehlakore Mehleng ya Bofelo
“Bôná xa se ba lefase, byalo ka Nna kè se wa lefase.”—JOHANE 17:16.
1, 2. Jesu o ile a bolela’ng ka tswalano ya balatedi ba gagwe le lefase, gomme mantšu a gagwe a rotoša dipotšišo dife?
BOŠEGONG bja mafelelo bja bophelo bja gagwe e le motho yo a phethagetšego, Jesu o ile a rapela thapelo e telele barutiwa ba gagwe ba theeditše. Thapelong yeo, o boletše selo se itšego seo se hlalosago maphelo a Bakriste ba therešo ka moka. Ge a bolela ka balatedi ba gagwe o itše: “Nna ke ba neile ’ntšu la xaxo; ’me lefase le ba hlôya ka xe e se ba xalô, byalo ka Nna kè se wa xalô. Xa ke kxopele xore O ba tlošê lefaseng; ke ba kxopêlêla xo phêmêlwa bobe. Bôná xa se ba lefase, byalo ka Nna kè se wa lefase.”—Johane 17:14-16.
2 Jesu o ile a bolela ka makga a mabedi gore balatedi ba gagwe e ka se be karolo ya lefase. Go feta moo, go aroga ga bona go tla lebiša dikgohlanong—lefase le be le tla ba hloya. Lega go le bjalo, Bakriste ga se ba swanela go boifa; Jehofa o tla ba šireletša. (Diema 18:10; Mateo 24:9, 13) Ka baka la mantšu a Jesu, re ka botšiša ka mo go swanetšego gore: ‘Ke ka baka la’ng Bakriste ba therešo e se karolo ya lefase? Go bolela’ng go se be karolo ya lefase? Ge e ba Bakriste ba hloilwe ke lefase, ba lebelela lefase bjang? Ba lebelela bjang mebušo ya lefase ka mo go kgethegilego?’ Dikarabo tša Mangwalo dipotšišong tše ke tša bohlokwa ka gobane di re kgoma ka moka ga rena.
“Re tšwa Modimong”
3. (a) Ke eng seo se re dirago gore re aroge lefaseng? (b) Go na le bohlatse bofe bja gore lefase le “rapaletše bobeng”?
3 Tswalano ya rena ya kgaufsi le Jehofa ke lebaka le lengwe leo ka lona re sego karolo ya lefase. Moapostola Johane o ngwadile gore: “ ’Na re tseba xore re tšwa Modimong; ’me lefase ka moka le rapaletše bobeng.” (1 Johane 5:19) Go molaleng gore mantšu a Johane ka lefase ke a therešo. Dintwa, bošoro, bonaba, kgateletšo, go se botege le boitshwaro bjo bo gobogilego ke tšeo di atilego lehono go nea bohlatse bja tutuetšo ya Sathane e sego ya Modimo. (Johane 12:31; 2 Ba-Korinthe 4:4; Ba-Efeso 6:12) Ge motho a e-ba yo mongwe wa Dihlatse tša Jehofa, a ka se dire goba a dumelelana le mekgwa e fošagetšego, gomme seo se mo dira gore a se be karolo ya lefase.—Ba-Roma 12:2; 13:12-14; 1 Ba-Korinthe 6:9-11; 1 Johane 3:10-12.
4. Ke ka ditsela dife tšeo ka tšona re bontšhago gore re ba Jehofa?
4 Johane o itše Bakriste ka go fapana le lefase ba “tšwa Modimong.” Ka moka bao ba ineelago go Jehofa ke ba gagwe. Moapostola Paulo o itše: “Xe re phela re phelêla Morêna; xe re e-hwa re hwêla Morêna. Re ba Morêna xe re phela; le xe re e-hwa re ba xaxwe.” (Ba-Roma 14:8; Psalme 116:15) Ka ge re le ba Jehofa, re mo nea boineelo bjo bo feletšego. (Ekisodo 20:4-6) Le gona, Mokriste wa therešo ga a neele bophelo bja gagwe dilong tše dingwe tša lefase. Le gona, le ge a hlompha diswantšho tša ditšhaba, ga a di rapele, e ka ba ka ditiro goba ka pelong ya gagwe. Ka ntle le pelaelo ga a rapele dinaletšana tša dipapadi goba medimo e mengwe ya mehleng yeno. Go ba gona, o hlompha tshwanelo ya ba bangwe ya go dira seo ba se ratago, eupša o rapela Mmopi a nnoši. (Mateo 4:10; Kutollo 19:10) Se le sona se mo dira gore a aroge lefaseng.
“Mmušô Wa-ka xa se o Tšwaxo ’Faseng Leno”
5, 6. Go ikokobeletša Mmušo wa Modimo go re dira bjang ba arogilego lefaseng?
5 Bakriste ke balatedi ba Kriste Jesu le balata ba Mmušo wa Modimo, e lego seo se ba dirago gore e se be karolo ya lefase. Ge Jesu a be a sekišwa ke Pontio Pilato, o itše: “Mmušô wa-ka xa se o tšwaxo ’faseng leno. Xe mmušô wa-ka o ka be o e-tšwa lefaseng leno, bahlanka ba-ka ba ka be ba o hlabanêla. Byale mmušô wa-ka xa se o tšwaxo mono.” (Johane 18:36) Mmušo ke sedirišwa seo ka sona leina la Jehofa le tla kgethagatšwago, bogoši bja gagwe bja godišwa gomme thato ya gagwe ya dirwa mo lefaseng bjalo ka ge e dirwa legodimong. (Mateo 6:9, 10) Bodireding bja gagwe, Jesu o ile a bolela ditaba tše dibotse tša Mmušo gomme o ile a bolela gore di tla bolelwa ke balatedi ba gagwe go fihla bofelong bja tshepedišo ya dilo. (Mateo 4:23; 24:14, NW) Ka 1914 mantšu a boporofeta a Kutollo 11:15 a ile a phethagatšwa: “Mebušô ya lefase e tlile ya ba Mmušô wa Mong wa rena le wa Motlotšwa wa xaxwe. Xomme ó tlo buša xo iša mehleng ya neng le neng!” Kgaufsinyana, Mmušo woo wa legodimong e tla ba mmušo o nnoši o bušago batho. (Daniele 2:44) Lebakeng le lengwe, gaešita le babuši ba lefase ba tla gapeletšega go dumela bolaodi bja wona.—Psalme 2:6-12.
6 Ba naganne ka seo, Bakriste ba therešo lehono ke balata ba Mmušo wa Modimo, gomme ba latela keletšo ya Jesu ya gore ba ‘tšwele pele ba tsoma mmušo le go loka ga Modimo.’ (Mateo 6:33, bapiša le NW.) Seo ga se ba dire gore ba se botegele naga yeo ba dulago go yona, eupša se ba dira gore ba aroge ka tsela ya moya lefaseng. Ka go swana le lekgolong la pele la nywaga, modiro o mogolo wa Bakriste lehono ke go ‘nea bohlatse bjo bo tseneletšego ka mmušo wa Modimo.’ (Ditiro 28:23) Ga go na mmušo wa batho wo o nago le tshwanelo ya go šitiša modiro woo o neilwego ke Modimo.
7. Ke ka baka la’ng Bakriste ba sa tšee lehlakore, gomme ba bontšhitše bjang se?
7 Ka go dumelelana le go ba ga bona ba Jehofa le go ba balatedi ba Jesu le balata ba Mmušo wa Modimo, Dihlatse tša Jehofa ga di tšee lehlakore dithulanong tša setšhaba le tša ditšhaba-tšhaba tša lekgolong la nywaga la bo-20 le la bo-21. Ga se ba ka ba tšea lehlakore, ga se ba hlabana le motho le ge e le ofe gomme ga se ba gaša phatlalatšo ya maaka ka lebaka le ge e le lefe la go hwetša dilo tše di bonagalago. Pontšhong e kgolo kudu ya tumelo ge ba lebeletšane le kganetšo e bego e bonagala e le e nolago moko, ba latetše melao ya motheo yeo e ilego ya bolelwa go babuši ba Nazi ya Jeremane ka 1934: “Ga re na kgahlego ditabeng tša bopolitiki, eupša re ineetše ka mo go feletšego mmušong wa Modimo ka tlase ga Kriste e le Kgoši ya wona. Re ka se gobatše motho le ge e le mang. Re tla thabela go dula ka khutšo le go dira batho bohle botse ge re hwetša sebaka.”
Batseta le Baemedi ba Kriste
8, 9. Ke ka ditsela dife Dihlatse tša Jehofa lehono e lego batseta le baemedi, gomme se se kgoma bjang tswalano ya tšona le ditšhaba?
8 Paulo o ile a itlhalosa gotee le Bakriste-gotee le yena ba tloditšwego e le “batseta ’bakeng sa Kriste, e ke re molomo wa Modimo xe re Le eletša.” (2 Ba-Korinthe 5:20; Ba-Efeso 6:20) Ga e sa le go tloga ka 1914, Bakriste ba tloditšwego ka moya ba ka bolelwa ka mo go swanetšego e le batseta ba Mmušo wa Modimo, woo e lego “bana” ba wona. (Mateo 13:38; Ba-Filipi 3:20; Kutollo 5:9, 10) Go oketša moo, Jehofa o ntšhitše “lešaba le lexolo” la “dinku tše dingwê” ditšhabeng, Bakriste bao ba nago le kholofelo ya go phela lefaseng, go thekga barwa ba tloditšwego modirong wa bona wa botseta. (Kutollo 7:9; Johane 10:16) ‘Dinku tše tše dingwe’ di ka bitšwa “baemedi” ba Mmušo wa Modimo.
9 Motseta le batho bao a šomago le bona ga ba tsena-tsene ditabeng tša naga yeo ba šomago go yona. Ka mo go swanago, Bakriste ga ba tšee lehlakore ditabeng tša bopolitiki tša ditšhaba tša lefase. Ga ba tšee lehlakore ka go thekga goba go lwantšha setšhaba le ge e le sefe, morafo goba sehlopha sa tša kgwebo. (Ditiro 10:34, 35) Ka mo go fapanego, ba ‘direla batho bohle botse.’ (Ba-Galatia 6:10) Go se tšee lehlakore ga Dihlatse tša Jehofa go bolela gore ga go na motho yo a ka ganago molaetša wa tšona ka mo go swanetšego ka go bolela gore di tswalana le lehlakore leo le ganetšago la setšhaba goba morafo o mongwe o kgethollago.
Ba Tsebja ka Lerato
10. Lerato le bohlokwa gakaaka’ng go Mokriste?
10 Go tlaleletša go se se fetilego, Bakriste ga ba tšee lehlakore ditabeng tša lefase ka baka la tswalano ya bona le Bakriste ba bangwe. Jesu o boditše balatedi ba gagwe gore: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:35) Lerato la borwarre ke sebopego sa bohlokwa sa go ba Mokriste. (1 Johane 3:14) Tswalano yeo Mokriste a nago le yona le Bakriste ba bangwe ke ya kgaufsi kudu, ka ge e sepedišana le tswalano yeo a nago le yona le Jehofa le Jesu. Lerato la gagwe ga le felele go bao ba lego ka phuthegong ya gabo. Le akaretša ‘mokgatlo ka moka wa bana babo lefaseng.’—1 Petro 5:9, bapiša le NW.
11. Ke bjang boitshwaro bja Dihlatse tša Jehofa bo tutueditšwego ke go ratana ga tšona?
11 Lehono, Dihlatse tša Jehofa di bontšha lerato la tšona la borwarre ka go phethagatša mantšu a Jesaya 2:4 a rego: “Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.” Ka ge ba laiwa ke Jehofa, Bakriste ba therešo ba khutšong le Modimo le ba bangwe. (Jesaya 54:13) Ka baka la ge ba rata Modimo le bana babo bona, e tla ba mo go sa kwagalego go bona go hlabana le Bakriste-gotee le bona—goba motho le ge e le ofe—dinageng tše dingwe. Khutšo ya bona le botee ke karolo e bohlokwa ya borapedi bja bona, pontšho ya gore ba tloga ba na le moya wa Modimo. (Psalme 133:1; Mika 2:12; Mateo 22:37-39; Ba-Kolose 3:14) Ba ‘nyaka khutšo le go e kganyelela,’ ba tseba gore “mahlo a Jehofa a go ba ba lokilego.”—Psalme 34:14, 15, PK.
Kamoo Bakriste ba Lebelelago Lefase ka Gona
12. Dihlatse tša Jehofa di ekiša boemo bofe bja kgopolo bja Jehofa ka batho ba lefaseng, gomme bjang?
12 Jehofa o tsebaditše kahlolo e sa kgahlišego lefaseng le, eupša ga se a tšwa a ahlola batho ka moka ka o tee ka o tee mo lefaseng. O tla dira seo ka Jesu ka nako ya Gagwe e beilwego. (Psalme 67:3, 4; Mateo 25:31-46; 2 Petro 3:10) Ga bjale, o bontšha lerato le legolo bathong. O ile a ba a nea Morwa wa gagwe yo a tswetšwego a nnoši e le gore yo mongwe le yo mongwe a ka ba le sebaka sa go amogela bophelo bjo bo sa felego. (Johane 3:16) Re le Bakriste, re ekiša lerato la Modimo ka go botša ba bangwe ka ditokišetšo tše tša phologo, gaešita le ge maiteko a rena gantši a ganetšwa.
13. Re swanetše go lebelela bjang babuši ba lefase?
13 Re swanetše go lebelela bjang babuši ba lefase? Paulo o arabile potšišo yeo ge a be a ngwala gore: “Batho bohle a ba se xanê xo bušwa ke ba ba filwexo matla a xo buša; xobane xa xo na mmušô o sa tšwexo xo Modimo; mmušô wo o lexo xôna o beilwe ke Modimo, [maemong a wona a lekanyeditšwego, NW].” (Ba-Roma 13:1, 2) Batho ba na le maemo a “lekanyeditšwego” a bolaodi (a magolo goba a manyenyane go a ba bangwe, eupša ka mehla Jehofa o phagame) ka gobane Ra-matla-ohle o ba dumelela gore ba buše. Mokriste o ikokobeletša babuši ba lefase ka gobane seo ke sebopego sa go kwa ga gagwe Jehofa. Lega go le bjalo, go thwe’ng ge e ba go tsoga thulano magareng ga dinyakwa tša Modimo le tša mmušo wa batho?
Molao wa Modimo le wa Kesara
14, 15. (a) Ke ka tsela efe Daniele a ilego a kgona go phema thulano tabeng ya go kwa? (b) Ba-Hebere ba bararo ba ile ba gata mogato ofe ge thulano tabeng ya go kwa e be e ka se phengwe?
14 Daniele le bagwera ba gagwe ba bararo ba nea mohlala o mobotse wa kamoo re ka leka-lekanyago go ikokobeletša mebušo ya batho le go ikokobeletša bolaodi bja Modimo. Ge bafsa ba bararo ba ba-Hebere ba be ba ikhwetša ba le bothopja kua Babele, ba ile ba kwa melao ya naga yeo gomme kapejana ba ile ba kgethelwa tlwaetšo e kgethegilego. Daniele ka go lemoga gore tlwaetšo yeo mohlomongwe e tla lebiša go thulaneng le Molao wa Jehofa, o ile a ahla-ahla taba le balaodi ba bagolo. Ka baka leo, go ile gwa dirwa ditokišetšo tše di kgethegilego tša go hlompha matswalo a ba-Hebere ba bane. (Daniele 1:8-17) Dihlatse tša Jehofa di latela mohlala wa Daniele ge ka bohlale di hlalosetša balaodi boemo bja tšona e le gore di pheme mathata a sa hlokagalego.
15 Lega go le bjalo, mafelelong thulano tabeng ya go kwa e be e ka se ke ya phengwa. Kgoši ya Babele e ile ya aga seswantšho se segolo molaleng wa Dura gomme ya laela balaodi ba bagolo, go akaretša le balaodi ba dilete tša mmušo go bokana bakeng sa kgakolo. Ka nako yeo, bagwera ba bararo ba Daniele ba be ba kgethilwe go ba balaodi ba selete sa mmušo wa Babele, ka gona taelo e be e ba akaretša. Ka nako e itšego ge modiro o tšwela pele, ka moka bao ba bego ba bokane moo ba be ba swanetše go khunamela seswantšho. Eupša ba-Hebere ba be ba tseba gore se se be se tla thulana le molao wa Modimo. (Doiteronomio 5:8-10) Ka gona ge batho ka moka ba khuname, bona ba ile ba tšwela pele ba eme. Ka go se kwe taelo ya kgoši, ba ile ba lebeletšana le kotsi e boifišago ya lehu, gomme maphelo a bona a ile a phološwa ka mohlolo; eupša ba ile ba kgetha go lebeletšana le kotsi ya lehu go e na le go se kwe Jehofa.—Daniele 2:49–3:29.
16, 17. Baapostola ba ile ba arabela bjang ge ba be ba laelwa go emiša modiro wa boboledi, gomme ka baka la’ng?
16 Lekgolong la pele la nywaga, baapostola ba Jesu Kriste ba ile ba biletšwa pele ga baetapele ba ba-Juda kua Jerusalema gomme ba laelwa gore ba emiše go bolela ka leina la Jesu. Ba ile ba arabela bjang? Jesu o be a ba laetše gore ba dire barutiwa ba ditšhaba ka moka, e lego seo se tla akaretšago Judea. Le gona o be a ba boditše gore e be dihlatse tša gagwe kua Jerusalema gotee le lefaseng ka moka. (Mateo 28:19, 20; Ditiro 1:8) Baapostola ba be ba tseba gore go bona ditaelo tša Jesu di be di emela thato ya Modimo. (Johane 5:30; 8:28) Ka gona, ba itše: “Re swanetše go kwa Modimo e le mmuši go e na le batho.”—Ditiro 4:19, 20; 5:29, NW.
17 Baapostola ba be ba sa rabele. (Diema 24:21) Lega go le bjalo, ge babuši ba batho ba ba thibela go dira thato ya Modimo, ba be ba ka re, ‘Re swanetše go kwa Modimo, e sego motho.’ Jesu o itše re swanetše go ‘ntšhetša Kesara tše e lego tša Kesara; Modimo re mo ntšhetše tše e lego tša Modimo.’ (Mareka 12:17) Ge e ba re sa kwe taelo ya Modimo ka ge batho ba re botša gore re dire bjalo, re nea motho tše e lego tša Modimo. Go e na le moo, re lefa Kesara selo se sengwe le se sengwe seo re mo kolotago sona, eupša re lemoga bolaodi bja Jehofa bjo bo phagamego. Ke Mmuši wa Legohle, Mmopi, yena Mothopo wa bolaodi.—Kutollo 4:11.
Re tla Ema re Tiile
18, 19. Bana babo rena ba bantši ba tšere boemo bofe bjo bobotse, gomme re ka latela bjang mohlala wa bona?
18 Ga bjale, mebušo e mentši ya lefase e lemoga go se tšee lehlakore ga Dihlatse tša Jehofa, gomme re thabela seo. Lega go le bjalo, dinageng tše dingwe Dihlatse di ile tša lebeletšana le kganetšo e šoro. Ngwaga-kgolong wa bo-20 ka moka le go tšwela pele go fihla lehono, ba bangwe ba bana babo rena le dikgaetšedi ba ile ba tlaišega kudu, ka tsela ya moya ba hlabana “thlabanô e botse ya tumêlô.”—1 Timotheo 6:12.
19 Re ka ema re tiile bjang ka go swana le bona? Sa pele, re gopola gore re swanetše go letela kganetšo. Ga se ra swanela go tšhoga goba gaešita le go makala ge re lebeletšana le yona. Paulo o lemošitše Timotheo gore: “Bohle ba ba rataxo xo phela ka borapedi ka Kriste Jesu; le bôná ba tlo hlomarêlwa.” (2 Timotheo 3:12; 1 Petro 4:12) Lefaseng leo go bušago tutuetšo ya Sathane, ke ka baka la’ng re ka se lebeletšane le kganetšo? (Kutollo 12:17) Ge feela re dutše re botega, ka mehla go tla dula go e na le bao ba ‘makalago gomme ba tšwela pele ba bolela ka go re goboša.’—1 Petro 4:4, bapiša le NW.
20. Re gopotšwa ka ditherešo dife tše di matlafatšago?
20 Sa bobedi, re kgodišegile gore Jehofa le barongwa ba gagwe ba tla re thekga. Bjalo ka ge Elisa wa bogologolo a boletše, “ba ba naxô le rena ba feta ba ba naxo le bala.” (2 Dikxoši 6:16; Psalme 34:7) Mohlomongwe e ka ba e le gore Jehofa ka mabaka a gagwe a mabotse, o dumelela kgateletšo ya baganetši go tšwela pele ka nakwana. Lega go le bjalo, ka mehla o tla re nea matla a nyakegago gore re kgotlelele. (Jesaya 41:9, 10) Ba bangwe ba bolailwe, eupša seo ga se re nyamiše. Jesu o itše: “Le se boifê ba ba bolayaxo mmele, bà sa kxone xo bolaya môya; xaxolo Le boifê Eo a kxônaxo xo senya mmele le môya moleteng wa mollô.” (Mateo 10:16-23, 28) Re fo ba “baeng” tshepedišong ye ya dilo. Re diriša nako ya rena mo go ‘fihlelela bjo e lego bophelo bja ruri,’ bophelo bjo bo sa felego lefaseng le lefsa la Modimo. (1 Petro 2:11; 1 Timotheo 6:19) Ga go na motho yo a ka re amogago moputso woo ge feela re dula re botegela Modimo.
21. Re swanetše go dula re gopola’ng?
21 Ka gona, anke re gopoleng tswalano e bohlokwa yeo re nago le yona le Jehofa Modimo. Anke ka mehla re lebogeng tšhegofatšo ya go ba balatedi ba Kriste le balata ba Mmušo. Anke re rateng bana babo rena ka pelo ka moka, gomme anke ka mehla re thabele lerato leo re le amogelago go bona. Go feta moo, anke re eleng hloko mantšu a mopsalme a rego: “Letêla Morêna, O tiê matla, O tlêmê pelo. Letêla Morêna.” (Psalme 27:14; Jesaya 54:17) Ka gona, go swana le Bakriste ba bangwe ba bantši le rena re tla ema ka go tia kholofelong ya rena e kgonthišeditšwego re le Bakriste ba botegago bao ba sa tšeego lehlakore ba e sego karolo ya lefase.
Na o ka Hlalosa?
• Ke bjang tswalano ya rena le Jehofa e re dirago ba arogilego lefaseng?
• Ka ge re le balata ba Mmušo wa Modimo, re ka dula bjang re sa tšee lehlakore lefaseng le?
• Ke ka ditsela dife go rata ga rena bana babo rena go dirago gore re dule re sa tšee lehlakore, re arogile lefaseng?
[Seswantšho go letlakala 15]
Go ikokobeletša ga rena Mmušo wa Modimo go kgoma bjang tswalano ya rena le lefase?
[Seswantšho go letlakala 16]
Mo-Hutu le mo-Tutsi ba šoma gotee ka lethabo
[Seswantšho go letlakala 17]
Bana babo rena ba Bakriste, wa mo-Juda le mo-Arabia
[Seswantšho go letlakala 17]
Mokriste wa mo-Serbia, wa mo-Bosnia le wa mo-Croatia ba thabela go ba gotee
[Seswantšho go letlakala 18]
Ke tsela efe e nepagetšego yeo re swanetšego go e tšea ge babuši ba re laela go roba molao wa Modimo?