Dipotšišo tše Tšwago go Babadi

Na go fošagetše go petšha ge e ba go akaretšwa feela tšhelete e nyenyane?

Lentšu la Modimo ga le ahla-ahle ka mo go feletšego taba ya go petšha, eupša le bolela ka mo go lekanego go bontšha gore mehuta ka moka ya go petšha ga e dumelelane le melao ya motheo ya Beibele. * Ka mohlala, ke mo go tsebjago kudu gore go petšha go tutuetša megabaru. Ntlha yeo ka boyona ke ya bohlokwa gore e ka elwa hloko ke Bakriste, ka ge Beibele e bolela gore “ba mexabaru” ba ka se be le kabelo Mmušong wa Modimo, gomme e tswalanya go duma le borapedi bja medimo ya diswantšho.​—1 Ba-Korinthe 6:​9, 10; Ba-Kolose 3:5.

Go petšha gape go tutuetša boithati le moya o sa lokago wa phadišano, kganyogo e tseneletšego ya go fenya. Moapostola Paulo o lemošitše malebana le dilo tše bjalo ge a be a ngwala gore: “Re se kê ra ba ba xo kxanthša lefêla, le ba xo rumolana, le ba xo tsebafêlana.” (Ba-Galatia 5:​26) Go oketša moo, go ba bangwe go petšha go kgothaletša go ithekga ka tumela-khwele bakeng sa go hwetša mahlatse. Bapetšhi ba hlagolela mehuta ka moka ya ditumela-khwele, ba holofela gore di tla ba tutuetša go hwetša mahlatse. Ba re gopotša ka ba-Isiraele ba sa botegego bao ba bego ba ‘ipega kua Gadi ka merufsi, ba tšhelela Meni [modimo wa Mahlatse, NW] tše di hlotlilwexo.’​—Jesaya 65:11.

Ba bangwe ba ka bolela gore go petšha ka tšhelete e nyenyane ge ba bapala papadi e se nago moya wa phadišano ya dikarata goba papadi ya letlapeng ­(board game) le ba leloko goba bagwera ba kgaufsi e fo ba boithabišo bjo bo se nago kotsi. Ke therešo gore motho yo mongwe yo a petšhago ka tšhelete e nyenyane a ka fo se ipone a na le megabaru, a na le boithati, a na le moya wa phadišano goba a dumela ditumela-khwele. Lega go le bjalo, go petšha ga gagwe go ka ba le mafelelo afe go bao a petšhago le bona? Bapetšhi ba bantši ba ba lemaletšego go petšha ba thomile ka go petšha ganyenyane ‘feela bakeng sa boithabišo.’ (Luka 16:​10) Tabeng ya bona, boithabišo bjo bo bego bo bonagala bo se na molato bo ile bja fetoga selo se itšego seo se lego kotsi kudu.

Seo ke sa therešo ka mo go kgethegilego moo bana ba akaretšwago. Bana ba bantši ba kwele bose bja go fenya go petšha mo go nyenyane gomme ba lekegile go petšha ka ditšhelete tše dikgolo. (1 Timotheo 6:​10) Nyakišišo ya lebaka le letelele yeo e gatišitšwego kua United States ke Arizona Council on Compulsive Gam­bling e kgonthišetša gore batho ba bantši bao ba lemaletšego go petšha ba thomile e sa le ba banyenyane “ka go petšha ka ditšhelete tše nyenyane ditiragalong tša dipapadi goba ka go bapala dikarata le bagwera goba ba leloko.” Pego e nngwe e re “bana ba thoma go petšha ka gae, gantši ka dipapadi tša dikarata le ba lapa le bagwera.” Pego e oketša ka gore “30 lekgolong ya bana bao ba bego ba petšha ba thomile go dira bjalo pele ga ge ba ka ba le nywaga e 11.” Go ya ka nyakišišo e nago le sehlogo se se rego Ke ka Baka La’ng Batho ba Petšha Kudu​—Balemaledi ba go petšha le Mathata a go Petšha se boletše gore bafsa ba bantši bao ba lego nywageng ya mahlalagading ba bapetšhi ba thekga mokgwa wa bona o lemaletšwego ka go dira bosenyi goba boitshwaro bjo bo gobogilego. A mafelelo a boifišago gakaakang a selo seo mathomong se ka bego se be se bonagala se se kotsi!

Ka ge re phela lefaseng leo le šetšego le e na le mereo le diteko tše dintši gakaakaa, ke ka baka la’ng re ipea go e nngwe ka mo go sa hlokegego? (Diema 27:​12) Go petšha​—bana ba le gona goba ba se gona, ka tšhelete e nyenyane goba e ntši​—go senya boemo bja moya gomme go swanetše go phengwa. Go tla ba kaone gore Bakriste bao ba thabelago dipapadi tša letlapeng goba dikarata e le boitapološo ba ngwale dintlha fase goba ba bapale feela bakeng sa go ithabiša ka ntle le go ngwala dintlha. Bakriste ba bohlale bao ba nago le taba le boemo bja bona bja moya gotee le bja bagwera ba bona le malapa a bona ba phema go petšha​—gaešita le ka tšhelete e nyenyane.

[Mongwalo wa ka tlase]