Ka Moka ga Rena re Nyaka Theto

EBE e le letšatši le lebotse go ngwanenyana yo monyenyane. Gaešita le ge ka dinako tše dingwe a be a nyaka phošollo, letšatšing le o be a tloga a itshwere gabotse. Lega go le bjalo, bošegong bjoo ka morago ga gore ngwanenyana yo monyenyane a bewe malaong gore a robale, mmagwe o ile a mo kwa a lla. Ge a be a botšišwa gore ke ka baka la’ng a be a befetšwe, o ile a lla ka megokgo ka gore: “Na ga se ka itshwara gabotse lehono?”

Potšišo yeo e ile ya kweša mmagwe bohloko bjo bo tseneletšego. Ka mehla o be a dula a akgofela go phošolla morwedi wa gagwe. Eupša bjale, go sa šetšwe gore o lemogile kamoo ngwanenyana wa gagwe yo monyenyane a lekilego ka thata go itshwara gabotse ka gona, mmagwe o ile a hlokomologa go bolela gaešita le lentšu le letee la theto.

Banenyana ba banyenyane ga se bona ba nnoši ba nyakago theto le kgothatšo. Ka moka ga rena re a e nyaka​—go swana le ge re nyaka keletšo le phošollo.

Re ikwa bjang ge re amogela theto e tšwago pelong? Na ga e ruthetše dipelo tša rena le go re thabiša? Ka ntle le pelaelo re ikwa gore motho yo mongwe o re lemogile, motho yo mongwe o na le taba. E re kgonthišetša gore seo re se dirilego se be se swanetšwe ke boiteko, gomme e re tutuetša go šoma ka thata gape le nakong e tlago. Ga se mo go makatšago gore theto ya kgonthe gantši e re gogela go motho yo a dirišago nako ya gagwe go bolela selo se itšego seo se kgothatšago.​—Diema 15:23.

Jesu Kriste o ile a kwešiša go nyakega ga go nea theto. Seswantšhong sa ditalente, mong (yo a swantšhetšago Jesu ka boyena) o reta ka borutho yo mongwe le yo mongwe wa bahlanka ba babedi ba botegago ka gore: “Axee, mohlanka o botse e a bôtêxaxo!” Ke mo go ruthetšago pelo gakaakang! Gaešita le ge ba be ba na le bokgoni bjo bo fapanego kudu e bile ba fihleletše dilo tše di fapa-fapanego, ba ile ba hwetša theto e lekanago.​—Mateo 25:​19-23.

Ka gona anke re gopoleng mmago ngwanenyana yola yo monyenyane. Ga se ra swanela go leta gore ba bangwe ba lle pele ga ge re ka ba reta. Go e na le moo, re ka kgonthišetša go nyaka dibaka tša go reta ba bangwe. Ka kgonthe, re na le lebaka le le kwagalago la go nea theto ya kgonthe sebakeng se sengwe le se sengwe.