Ke ka Baka La’ng go le Thata go Kgopela Tshwarelo?

KA July 2000, California State Legislature kua United States e ile ya fetišetša molao wo o hlametšwego go imolla batho bothateng ge e ba ba bontšha kwelobohloko go motho yo a gobaditšwego kotsing yeo ba akareditšwego go yona. Ke ka baka la’ng go ile gwa hlongwa molao wo? Go lemogilwe gore ge kotsi e baka kgobalo goba tshenyo, gantši batho ba dika-dika go kgopela tshwarelo ka ge ba boifa gore ba tla išwa kgorong ya tsheko e le bona ba dumetšego go ba molato. Ka lehlakoreng le lengwe, bao ba ikwago gore ba swanetše go kgopelwa tshwarelo kapejana ba ka befelwa, gomme kotsi e nyenyane e ka fetoga kgakgano e kgolo.

Go ba gona, ga go bohlokwa go kgopela tshwarelo bakeng sa kotsi yeo e sego phošo ya gago. Le gona go ka ba le dinako tšeo ka tšona e ka bago ga bohlale go ba šedi ka seo o se bolelago. Seema sa bogologolo se re: “Boati bya phokô xa bo hloke diphapoxô; matsebe ó swara molomo.” (Diema 10:​19; 27:​12) Lega go le bjalo, o ka itshwara gabotse le go ba yo a thušago.

Lega go le bjalo, na ga se therešo gore batho ba bantši ba kgaoditše go kgopela tshwarelo, gaešita le ge ba sa išwe dikgorong tša tsheko? Mosadi ka gae a ka lla ka gore, ‘Monna  wa-ka ga a ke a kgopela tshwarelo ka selo le ge e le sefe.’ Molaodi mošomong a ka belaela ka gore, ‘Bašomedi ba-ka ga ba amogele diphošo tša bona, le gona ke ka sewelo moo ba kgopelago tshwarelo.’ Morutiši sekolong a ka bega gore, ‘Bana ga se ba tlwaetšwa gore ba re tshwarelo hle.’

Lebaka le lengwe leo ka lona motho a ka dika-dikago go kgopela tshwarelo e ka ba go boifa go se amogelwe. A tshwenywa ke kgopolo ya go bethišwa moya, a ka fo se bolele maikwelo a gagwe a kgonthe. Ge e le gabotse, motho yo a bego a kwešitšwe bohloko a ka phema ka mo go feletšego motho yo a mo kwešitšego bohloko, a dira gore go be thata kudu go boelana.

Go se naganele maikwelo a batho ba bangwe e ka ba lebaka le lengwe leo ka lona ba bangwe ba ka dika-dikago go kgopela tshwarelo. Ba ka nea mabaka ka gore, ‘Go kgopela tshwarelo go ka se phumole phošo ye ke šetšego ke e dirile.’ Lega go le bjalo, go sa dutše go na le ba bangwe bao ba dika-dikago go kgopela tshwarelo ka baka la ditla-morago tšeo di ka bago gona. Ba ipotšiša gore, ‘Na ke tla bewa molato gomme ka kgopelwa go o lefa?’ Lega go le bjalo, lepheko le legolo la go se dumele molato ke boikgantšho. Motho yo a ikgantšhago kudu go ka re “ke kgopela tshwarelo” ge e le gabotse a ka phetha ka gore ‘ga ke nyake go itheoša seriti ka go dumela phošo ya-ka. Seo se tla theoša maemo a-ka.’

Ka mabaka le ge e le afe, ba bantši ba hwetša go le thata go kgopela tshwarelo. Eupša na go tloga go le bohlokwa go kgopela tshwarelo? Mehola ya go kgopela tshwarelo ke efe?

[Seswantšho go letlakala 3]

“Bana ga se ba tlwaetšwa gore ba re tshwarelo hle”

[Seswantšho go letlakala 3]

“Bašomedi ba-ka ga ba amogele diphošo tša bona”

[Seswantšho go letlakala 3]

“Monna wa-ka ga a ke a kgopela tshwarelo”