“E-tlang go nna, . . . gomme ke tla le lapološa”

“Dišang Mohlape wa Modimo”

“Le dula le le gona go re fa tsebe le go abelana le rena mantšu ao a tšwago Beibeleng ao a re kgothatšago.”​—Pamela.

“Re le leboga ka tšohle tšeo le di dirago bakeng sa rena. Go ba le phapano e le ka kgonthe.”​—Robert.

PAMELA le Robert ba ile ba tutueletšega go ngwala mantšu a a tebogo ba a ngwalela bagolo ba Bakriste diphuthegong tša bona tše sa swanego. Ba bangwe gare ga bahlanka ba Modimo lefaseng ka bophara le bona ba leboga thekgo yeo e tšwelago pele le tlhokomelo tšeo ba di amogelago go tšwa go bao ba ‘dišago mohlape wa Modimo.’ (1 Petro 5:2) Ka kgonthe, batho ba Jehofa ke bao ba lebogago dilo tše dintši tšeo bagolo ba di dirago bakeng sa bona le go leboga tsela yeo ba di dirago ka yona.

‘Go ba le go Gontši mo ba Swanetšego go go Dira’

Bagolo ba Bakriste ba neilwe boikarabelo bjo bontši. (Luka 12:​48) Ba lokišetša dipolelo bakeng sa diboka tša phuthego le go ba le karolo go boleleng ditaba tše dibotse tša Mmušo wa Modimo phatlalatša. Mediro ya bona e akaretša le go dira maeto a bodiši go badumedi-gotee le bona. Bagolo ba dirišetša nako go bao ba nyakago tlhokomelo e kgethegilego​—ba tšofetšego le ba bangwe​—ba dira tše ka moka ba sa hlokomologe katlego ya moya le ya dilo tše di bonagalago ya malapa a bona. (Jobo 29:​12-15; 1 Timotheo 3:​4, 5; 5:8) Bagolo ba bangwe ba thuša go agweng ga Diholo tša Mmušo. Ba bangwe ba hlankela Dikomiting tša go Hloma Kwano le Sepetlele goba ke ditho tša Dihlopha tša go Etela Balwetši. Gape bontši bja bona ba dira modiro wa go ithapa dikopanong tše dinyenyane le tše dikgolo. Ee, bagolo ba na le ‘go gontši mo ba swanetšego go go dira modirong wa Morena.’ (1 Ba-Korinthe 15:​58, NW) Ga go makatše ge bagolo ba bjalo ba šomago ka thata ba lebogwa kudu ke bao ba ba gafetšwego gore ba ba hlokomele!​—1 Ba-Thesalonika 5:​12, 13.

Bagolo bao ka mehla ba etelago Bakriste-gotee le bona magaeng goba mafelong a mangwe e le gore ba ba matlafatše moyeng, ke mothopo wa kgothatšo. Thomas, yo a gotšego a se na tate ka gae o itše: “Ge nkabe e be e se ka thekgo e lerato le kgothatšo tša bagolo, ga ke nagane gore lehono nkabe ke hlankela Jehofa bjalo ka modiredi wa nako e tletšego.” Bafsa ba bantši bao ba godišeditšwego malapeng a motswadi o tee ba dumela gore tlhokomelo yeo ba e amogetšego go tšwa go bagolo e ba thušitše go hlagolela tswalano ya motho ka noši le Modimo.

Maeto a bodiši gape a lebelelwa e le a bohlokwa ke bao ba godilego ka phuthegong. Ka morago ga ge banyalani ba baromiwa ba lego nywageng ya bona ya magareng ya bo-80 ba etetšwe ke bagolo ba babedi,  ba ngwadile gore: “Re nyaka go bolela tebogo ya rena bakeng sa ketelo ya lena yeo re e thabetšego kudu. Ka morago ga ge le tlogile, re ile ra bala gape mangwalo ao le a ahla-ahlilego le rena. Re ka se ke ra lebala mantšu a lena a kgothatšo.” Mohlologadi wa nywaga e 70 o ngwaletše bagolo gore: “Ke be ke dutše ke rapela Jehofa bakeng sa thušo, gomme o rometše lena bana bešo ba babedi legaeng la-ka. Ketelo ya lena e bile tšhegofatšo e tšwago go Jehofa!” Na o sa tšwa go holwa ke ketelo ya bagolo ba phuthego ya geno morago bjale? Ka kgonthe, ka moka ga rena re leboga maiteko a bona a go diša mohlape wo ba swanetšego go o hlokomela!

Badiši Bao ba Ekišago Modimo le Kriste

Jehofa ke Modiši yo lerato. (Psalme 23:​1-4; Jeremia 31:​10; 1 Petro 2:​25) Jesu Kriste le yena ke Modiši yo a lemogegago wa moya. Ge e le gabotse, o bitšwa “modiši yo boló” le “modiši e moxolo.” (Johane 10:​11; Ba-Hebere 13:​20; 1 Petro 5:4) Jesu o ile a dirišana bjang le bao ba bego ba kganyoga go ba barutiwa ba gagwe? O ile a ba nea taletšo e borutho: “E-tlang go nna lena bohle ba le šomago ka thata, le ba imelwago, gomme nna ke tla le lapološa.”​—Mateo 11:​28, NW.

Bagolo ka mo go swanago lehono ba katanela go ba mothopo wa kgothatšo le tšhireletšo go mohlape. Banna ba bjalo ba ipontšha e le ‘tšhireletšo ge phefo e foka, le setšhabelo sa go tšhabela pula; ba bjalo ka noka ya meetse nageng e omilego le bjalo ka moriti wa lefsika le legolo nageng e nyorilwego.’ (Jesaya 32:2, PK) Bašireletši ba bjalo ba botho ba nea tapološo, ba ithuela tlhompho ya mohlape gomme ba hwetša kamogelo ya Modimo.​—Ba-Filipi 2:​29; 1 Timotheo 5:17.

Thekgo e Bohlokwa go tšwa go Basadi ba Bona

Batho ba Modimo ke bao ba lebogago bagolo ba Bakriste le thekgo e lerato yeo banna ba ba e hwetšago go tšwa go basadi ba bona. Go ba yo a thekgago gantši go nyaka boikgafo ka lehlakoreng la basadi ba bjalo. Ka dinako tše dingwe ba ba ba le gae ge banna ba bona ba hlokomela ditaba tša phuthego goba ba dira maeto a bodiši. Ka dinako tše dingwe, dithulaganyo tša motho ka noši tšeo di dirilwego ka kelohloko e sa le pele di beelwa ka thoko ka baka la ge go tšwelela bothata bja tšhoganetšo ka phuthegong. Michelle o itše: “Lega go le bjalo, ge ke bona tsela yeo monna wa-ka a swaregilego ka yona ka go lokišetša diboka goba go dira maeto a bodiši, ke dula ke gopola gore o dira modiro wa Jehofa gomme ke leka go mo thekga kamoo nka kgonago ka gona.”

Cheryl, yo le yena e lego mosadi wa mogolo o itše: “Ke a tseba gore bana bešo le dikgaetšedi ka phuthegong ba nyaka bagolo gore ba bolele le bona, gomme ke nyaka gore ba ikwe ba ka batamela monna wa-ka ka nako le ge e le efe yeo ba mo nyakago ka yona.” Basadi bao ba nago le thekgo ba bjalo ka Michelle le Cheryl, ba ikgafa ka go rata e le gore banna ba bona ba ka hlokomela dinku tša Modimo. Basadi ba bagolo ba a lebogwa ka baka la moya wa bona wa thekgo.

Lega go le bjalo, mogolo yo a swaregilego ga se a swanela go hlokomologa dinyakwa tša moya le tše dingwe tša mosadi wa gagwe le bana. Mogolo yo a nyetšego o swanetše go ba yo a “se naxo bosodi, monna . . . wa mosadi o tee, e a naxo le bana ba ba dumetšexo, e sexo ba xo tsebya bohlôla le xo se kwe.” (Tito 1:6) O swanetše go hlokomela lapa la gagwe ka tsela ya go boifa Modimo yeo e nyakwago go ya ka Mangwalo go balebeledi ba Bakriste.​—1 Timotheo 3:​1-7.

Go mogolo yo a swaregilego, mosadi yo a nago le thekgo ke yo bohlokwa kudu! Yeo ke tsela yeo bagolo bao ba nyetšego bao ba naganelago ba ikwago ka yona. Go fo ba bjalo ka ge Beibele e bolela: “Na motho o hweditše mosadi yo botse? Gona o hweditše selo se sebotse.” (Diema 18:​22, NW) Ka mantšu le ka ditiro, bagolo ba bjalo ba bontšha basadi ba bona tebogo yeo e tšwago pelong. Go tlaleletša thapelong e tšwago pelong le go ithuteng gotee ka tsela e thabišago, banyalani ba ba Bakriste ba beela nako ka thoko ya go thabela dilo tše swanago le go sepela lebopong, go sepela bakeng sa go hlabja ke moya dithokgweng goba go fo sepe-sepela phakeng. Ee, bagolo ba thabela go nea basadi ba bona tlhokomelo e lerato.​—1 Petro 3:7.

Bagolo bao ba dišago mohlape wa Modimo ka go hloka boithati ke mothopo wa tapološo ya moya go batho ba Jehofa. Ka kgonthe ke “dimpho tšeo e lego banna,” e lego tšhegofatšo phuthegong!​—Ba-Efeso 4:​8, 11-13.