Dipotšišo tše Tšwago go Babadi

Na dikeno tše di dirilwego go Modimo ke tše di tlamago ka mehla?

Go ya ka Mangwalo, keno ke kholofetšo e tiilego yeo e dirwago go Modimo bakeng sa go dira tiro e itšego, go dira sehlabelo, go tsenela tirelo e itšego goba maemo goba go itima dilo tše itšego tšeo ka botšona e sego tše di thulanago le molao. Beibele e na le dipego tša dikeno tšeo e bego e le tša go ya ka maemo ka kwešišo ya gore di be di akaretša kholofetšo ya go latela tsela e itšego ge e ba Modimo a dirile se sengwe pele. Ka mohlala, Hanna, mmago moporofeta Samuele o ile “a ba a êna ka kênô a re: Morêna wa Mašaba, xe O ka . . . nkxopola, wa se ntebalê, nna molata wa xaxo, wa nnea ngwana wa mošemanyana, xôna ke tlo mo xafêla Morêna bophelô bya xaxwe ka moka; xomme mo hloxong ya xaxwe xo ka se kê xwa batamêla lexarê.” (1 Samuele 1:​11) Beibele gape e hlalosa dikeno e le tša go ithapa. Ke bjang dikeno tša Mangwalo e lego tše tlamago?

Kgoši Salomo wa Isiraele ya bogologolo o re: “Xe O enetše Modimo kênô, O se diêxê xo e phêtha.” O oketša ka gore: “Xo êna, wa lesa xo phêtha, xo kaone xe O sa ene.” (Mmoledi 5:​3, 4) Molao wo o bego o neilwe Isiraele ka Moše o re: “Xe O enetše Morêna Modimo wa xaxo kênô, O se kê wa tšwafêla xo e phêtha, xobane Morêna Modimo wa xaxo a ka se kê a lesa xo e tsoma xo wêna. O ka ôba molato ka tše byalo.” (Doiteronomio 23:​21) Ka mo go kwagalago, go dira keno go Modimo ke taba e kgolo. E swanetše go dirwa ka lebaka le le kwagalago, gomme yo a e dirago o swanetše go kgonthišega ka bokgoni bja gagwe bja go phetha seo a se holofetšago kenong. Ge e ba go se bjalo, go kaone gore a se ke a dira keno. Lega go le bjalo, ge di dirilwe, na dikeno ka moka ke tšeo di tlamago?

Go thwe’ng ge e ba keno e be e nyaka gore motho a dire selo seo ka morago se lemogwago gore ga se dumelelane le thato ya Modimo? Go thwe’ng ge e ba mohlomongwe e be e le yeo ka tsela e itšego e bego e tla gokaganya boitshwaro bjo bo gobogilego le borapedi bja therešo? (Doiteronomio 23:​18) Go molaleng gore keno e bjalo ga se e tlamago. Go oketša moo, ka tlase ga Molao wa Moše, keno yeo e dirilwego ke mosadi e be e ka fedišwa ke tatagwe goba monna wa gagwe.​—⁠Numeri 30:​3-⁠15.

Gape ela hloko taba ya motho yo a dirilego keno go Modimo ya go dula a se lenyalong eupša bjale a ikhwetša a le tlalelong. Keno ya gagwe e mmeile boemong bjoo go bjona a ikwago eka go e phethagatša go mo dira gore a be kgaufsi le go roba ditekanyetšo tša Modimo mabapi le boitshwaro. Na o sa dutše a swanetše go katanela go phetha keno ya gagwe? Na go ka se be kaone go yena go iphemela tabeng ya go ba le molato wa boitshwaro bjo bobe ka go se phethe keno ya gagwe gomme go e na le moo a lopa kgaugelo ya Modimo le go kgopela tebalelo? Ke yena feela a ka dirago phetho tabeng yeo. Ga go na motho yo mongwe yo a ka mo direlago phetho.

Go thwe’ng ge e ba motho a dira keno yeo ka morago a lemogago gore e dirilwe ka lephaku-phaku? Na o sa dutše a swanetše go phetha keno yeo? Go be go se bonolo go Jefeta go phetha keno yeo a bego a e dirile go Modimo, eupša o ile a e phethagatša ka potego. (Baahlodi 11:​30-40) Go palelwa ga motho ke go phetha keno go ka “rumola” Modimo gomme gwa senya seo motho a  se fihleletšego. (Mmoledi 5:⁠5) Go tšeela fase taba ya go phethagatša keno go ka feleletša ka go lahlegelwa ke kamogelo ya Modimo.

Jesu Kriste o itše: “Mo xo ya lena polêlô ‘E’ e bê ‘E’, ‘Aowa’ e bê ‘Aowa’; se se eketšwaxo se tšwa bobeng.” (Mateo 5:​37) Mokriste ga se a swanela go tshwenyega feela ka go phetha dikeno tše a di dirilego go Modimo, eupša gape o swanetše go tshwenyega ka go ipontšha a botega mantšung a gagwe ka moka​—⁠go Modimo le go batho. Go thwe’ng ge e ba a ikhwetša a le tlalelong ka ge a ile a dira tumelelano le motho yo mongwe yeo e ilego ya ipontšha e le e lokilego mathomong eupša ge e lekodišišwa e bonagala e le ya bošilo? Ga se a swanela go tšea ditaba tše bjalo gabonolo. Eupša ka baka la poledišano ya potego, motho yoo yo mongwe a ka no phetha ka go mo lokolla boikarabelong bja gagwe.​—⁠Psalme 15:⁠4; Diema 6:​2, 3.

Ge e le mabapi le dikeno le dilo tše dingwe ka moka, ke eng seo re swanetšego go tshwenyega kudu ka sona? Anke ka mehla re tsomeng go kgomarela tswalano e botse le Jehofa Modimo.

Hanna ga se a dika-dika go phetha keno ya gagwe

Jefeta o ile a phetha keno ya gagwe gaešita le ge go be go le thata go dira bjalo