Mafelo a Borapedi​—Na re Swanetše go ba le Ona?

‘Basepedi ba dikete ba bodumedi bao ba aperego diaparo tšeo di nago le mebala e fapa-fapanego ba tšwago dikarolong tše di fapa-fapanego tša naga, dihlopha tša ma-India ao a diragatšago seo go thwego ke metantsho ya pele ga mehla ya ma-Hispanic ka go sepedišana le mošito wa meropa, le bakgomaredi ba kereke ba phatša ka matolo lešabeng ka boiteko bjo bogolo le ka bohloko go ya lefelong le lekgethwa leo le tletšego matsenong a kereke le ditarateng tšeo di dikologilego kerekeng ya tirelo e kgethwa (basilica).’

YE KE tsela yeo kuranta ya El Economista e hlalositšego ka gona lešaba le lentši ka December 2001. Ka nako yeo batho ba ka bago dimilione tše tharo ba ile ba etela kereke ya tirelo e kgethwa kua Mexico City go ya go bontšha tumelo ya bona go Virgin of Guadalupe. Meago e mengwe e megolo ya bodumedi e bjalo ka St. Peter’s Basilica kua Roma, le yona e ile ya gogela baeng ba bantši.

Meago ya bodumedi e ratwa ka mo go kgethegilego ke ba bantši bao ba kganyogago go rapela Modimo. Maria yo a tšwago Brazil o re: “Go nna kereke e be e le lefelo leo go lona nka bago kgaufsi le Modimo. E be e le lefelo le lekgethwa. Ke be ke dumela gore go ya kerekeng go be go hlwekiša moya le gore e be e le sebe go se ye Mmiseng le boipobolong Sontaga se sengwe le se sengwe.” Consuelo yo a tšwago Mexico o anega gore: “Kereke e be e hudua maikwelo a-ka; ke be ke e tšeela godimo kudu. Ge ke be ke le fao, ke be ke ikwa ke le legodimong.”

Gaešita le ge ba bangwe ba lebelela dikereke di le bohlokwa kudu, ba bangwe ba na le dipelaelo mabapi le go nyakega ga tšona e le mafelo a borapedi. Peter Sibert e lego moruti wa Katholika kua Engelane, ge a bolela ka go fokola ga palo ya bao ba bago gona kerekeng o re: “[Batho] ba kgetha dikarolo tša bodumedi tšeo ba di ratago. Bontši bja batho ba bagolo ke Makatholika gomme ba phela ka go dumelelana le tumelo ya bona​—eupša ga go na maikwelo a boineelo gare ga bafsa.” Kuranta ya London e lego Daily Telegraph ya November 20, 1998 e itše: “Ga e sa le go tloga ka 1979 dikereke tše ka bago  1 500 di tswaletšwe kua Engelane ge go bapišwa le dikereke tše 495 tšeo di butšwego le tše 150 tšeo di ilego tša agwa lefsa.”

Ka 1997, kuranta ya Munich, Jeremane e lego Süddeutsche Zeitung e begile gore: “Dikereke di fetošwa go ba mafelo a dipaesekopo le mafelo a mangwe: Badumedi ga ba be gona ditirelong tša kereke, mafelo a borapedi a dirišetšwa merero e mengwe. . . . Seo se šetšego se fetogile setlwaedi kua Netherlands goba kua Engelane se dirwa kua Jeremane.” E okeditše ka gore: “Motho a ka hwetša dikereke tše 30 goba tše 40 tšeo di kgahlišago tše di rekišitšwego kua Jeremane nywageng e sego kae e fetilego.”

Na meago ya borapedi e tloga e le ya bohlokwa gore re rapele Modimo? Na dikereke tša ditirelo tše kgethwa le tše di kgabišitšwego di na le seo di se bolelago ka Mangwalong? Ke meago ya mohuta ofe yeo e bego e tswalanywa le go rapelwa ga Modimo wa therešo yo a phelago? Re ka ithuta’ng go yona ka go nyakega ga mafelo a borapedi le ka seo se swanetšego go direga fao?