Re ka Dira Bjang Gore Matšatši a Rena a be Bohlokwa Pele ga Jehofa?

“Maabane mo e ka bago magareng ga ge letšatši le hlaba le ge le sobela, go lobilwe diiri tše pedi tša bohlokwa tšeo e tee ya tšona e bego e na le metsotso e masome-tshela ya bohlokwa. Ga go na moputso wo o newago ka gobane di ile di ile!” ​—Lydia H. Sigourney, mongwadi wa mo-Amerika (1791-​1865).

GO BONAGALA matšatši a bophelo bja rena e le a sego kae le ao a fetago kapejana. Mopsalme Dafida o ile a naganišiša ka bokopana bja bophelo gomme o ile a tutueletšega go rapela ka gore: “Morêna, nkxopotšê boyô bya-ka le bokae bya matšatši a-ka; ke tsebê xobane ke motho wa lefêla-fêla. Ka kxonthe O mpeetše matšatši a sa išexo kxolê; pele xa xaxo ’phelô bya-ka xa se selô.” Dafida o be a tshwenyegile ka go phela ka tsela yeo e bego e tla thabiša Modimo, bobedi ka polelo le ka ditiro. Ge a be a bolela go ithekga ga gagwe ka Modimo o itše: “Mong’a-ka, ke hloloxetšwe Wêna fêla.” (Ps. 39:​4, 5, 7) Jehofa o ile a theetša. Ka kgonthe o ile a gopotša Dafida bokae bja mediro ya gagwe gomme a mo putsa ka mo go swanetšego.

Go bonolo go swarega motsotsong o mongwe le o mongwe wa letšatši gomme wa tanywa ke bophelo bja leema-ema bja mediro e mentši. Se se ka dira gore re be le dipelaelo, kudu-kudu ge re e-na le dilo tše dintši tšeo re swanetšego go di dira le go di thabela gomme re na le nako e nyenyane ya go di dira. Na re tshwenyegile go etša Dafida​—go phela maphelo a rena e le gore re ka amogelwa ke Modimo? Ka kgonthe Jehofa o lekola le go hlahloba yo mongwe le yo mongwe wa rena. Jobo, monna yo a bego a boifa Modimo, o tsebile nywageng e 3 600 e fetilego gore Jehofa o bona ditsela tša gagwe gomme o hlahloba mediro ya gagwe ka moka. Jobo o ile a diriša potšišo ya go se nyake karabo a re: “Nkabe ke fetola ka lefé xe a ka nthsekiša?” (Jobo 31:​4-6, 14) Re ka kgona go dira gore matšatši a rena e be a nago le mohola mahlong a Modimo ka go hloma dilo tše di tlago pele tša moya, ka go kwa melao ya gagwe le ka go diriša nako ya rena ka bohlale. Anke re lebeledišišeng ditaba tše.

Etišang Dilo tša Moya Pele

Mangwalo a buduletšwego a re kgothaletša ka mo go nepagetšego go hloma dilo tše di tlago pele tša moya ge a re: “Le kgonthišetše dilo tše bohlokwa kudu.” Ke dife dilo tše tša bohlokwa? Karabo e akaretša “tsebo e nepagetšego le temogo e tletšego.” (Ba-Filipi 1:​9, 10, NW) Bakeng sa go hwetša tsebo ya morero wa Jehofa go nyaka gore re diriše nako ya rena ka bohlale. Lega go le bjalo, go etiša dilo tša moya pele go tla re kgonthišetša bophelo bjo bo putsago le bjo bo kgotsofatšago.

Moapostola Paulo o re gopotša go ‘tšwela pele re kgonthišetša se se amogelegago go Morena.’ Go kgonthišetša ga rena go swanetše go akaretša go lekola merero le dikganyogo tša dipelo tša rena. Moapostola o tšwela pele ka gore: “Tšwelang pele le hlatha seo thato ya Jehofa e lego sona.” (Ba-Efeso 5:​10, 17, bapiša le NW.) Ka gona, Jehofa o amogela’ng? Seema sa Beibele se araba ka gore: “Mathomô a bohlale ké xo re: Rua bohlale! Nthša tšohle O di ruilexo, O rêkê thlaloxanyô. E phaxamišê, e Xo xodišê.” (Diema 4:​7, 8) Jehofa o thabišwa ke motho yo a hwetšago  bohlale bja Modimo gomme a bo diriša. (Diema 23:​15) Se se kgahlišago ka bohlale bja mohuta wo ke gore bo ka se tšewe goba bja fedišwa ke motho. Ge e le gabotse, bo fetoga sebo le tšhireletšo ‘tseleng e befilego le diatleng tša batho-baradia.’​—Diema 2:​10-15.

Ka gona, e tloga e le ga bohlale gakaakang go phema tshekamelo le ge e le efe ya go tšea ditaba tša moya ga bohwefo! Re swanetše go hlagolela boemo bja kgopolo bja go leboga mantšu a Jehofa le go mmoifa ka mo go swanetšego. (Diema 23:​17, 18) Gaešita le ge boemo bjo bo bjalo bja kgopolo bo ka hwetšwa nakong le ge e le efe bophelong, ke ga bohlokwa go hloma tsela ye e nepagetšego le go gatiša melao ya motheo ya Beibele semelong sa rena bofseng. Kgoši e bohlale Salomo e re: “Xopola Mmopi wa xaxo Ò sa le yo mofsa.”​—Mmoledi 12:1.

Tsela ya kgaufsi kudu ya go hlagolela go leboga Jehofa ke ka go mo rapela letšatši le letšatši. Dafida o ile a lemoga bohlokwa bja go leba go Jehofa, ka gobane o ile a dira kgopelo ya gore: “Morêna, kwaa thapêlô ya-ka; O utlwêlê ruri xe ke xoeletša. Se nyatšê mexôkxô ya-ka.” (Psalme 39:​12) Na ka dinako tše dingwe tswalano ya rena ya kgaufsi le Modimo e re kgoma maikwelong moo re bilego re lla? Ka kgonthe, ge re dutše re tšwela pele go botša Jehofa ditaba tša rena ka noši gomme re naganišiša ka Lentšu la gagwe, ke mo a tla batamelago kgaufsi kudu le rena.​—Jakobo 4:8.

Ithute go kwa

Moše e bile monna yo mongwe wa tumelo yo a ilego a lemoga go ithekga ga gagwe ka Modimo. Bjalo ka Dafida, Moše o be a kgona go bona gore bophelo bo tletše ka mathata. Ka gona o ile a kgopela Modimo gore a mo rute ‘go bala matšatši a gagwe bakeng sa go ba le pelo e bohlale.’ (Psalme 90:​10-12) Go ba le pelo e bohlale go tla tlišwa feela ke go ithuta le go phela ka go dumelelana le melao ya Jehofa le melao ya gagwe ya motheo. Moše o be a tseba se gomme ka morago o ile a katanela go gatiša therešo yeo ya bohlokwa setšhabeng sa ba-Isiraele ka go boeletša melao le ditaelo tša Modimo go bona pele ba ka tsena Nageng ya Kholofetšo. Kgoši yeo e lego motho yeo ka morago Jehofa a bego a tla e kgethela go buša ba-Isiraele e be e swanetše go ingwalela kopi ya Molao le go e bala matšatšing ka moka a bophelo bja yona. Ka baka la’ng? E le gore e ka ithuta go boifa Modimo. Se e be e tla ba go lekwa ga go kwa ga kgoši. Go be go tla e šireletša go go iphagamišetša bana babo yona gomme go be go tla oketša matšatši a yona pušong ya yona. (Doiteronomio 17:​18-20) Kholofetšo ye e ile ya boeletšwa ge Jehofa a be a botša morwa wa Dafida e lego Salomo gore: “Xe O ka swara ka ditsela tša-ka, wa hlôkômêla melaô ya-ka, le ditaêlô tša-ka bo-ka Dafida tat’axo, ka mo e bexo e le mokxwa wa xaxwe, xôna ke tlo lelefatša bophelô bya xaxo.”​—1 Dikxoši 3:​10-14.

Go kwa ke taba ya bohlokwa kudu go Modimo. Ge e ba re be re ka tšea ga bohwefo dibopego tše itšego tša dinyakwa le melao ya Jehofa eka ga se tša bohlokwa, ka kgonthe o tla lemoga boemo bjo bo bjalo bja kgopolo. (Diema 15:3) Go tseba se go swanetše go re tutuetša go tšwela pele re tšeela godimo ditaelo ka moka tša Jehofa, gaešita le ge go dira bjalo go ka se be bonolo ka mehla. Satane o dira sohle seo a ka se kgonago go “re thibêla” ge re dutše re katanela go kwa melao le ditaelo tša Modimo.​—1 Ba-Thesalonika 2:18.

Ke ga bohlokwa kudu go dumelelana le keletšo ya Mangwalo ya go kopana gotee bakeng sa go rapela le bogwera. (Doiteronomio 31:​12, 13; Ba-Hebere 10:​24, 25) Ka gona re dira gabotse go ipotšiša: ‘Na ke na le boikemišetšo le go phegelela mo go nyakegago go dira seo e tlogago e le sa bohlokwa?’ Ge e ba re hlokomologa bogwera le tlhahlo tšeo re di hwetšago dibokeng tša Bokriste  ka baka la go leka go kgonthišetša tšhireletšego ya tša ditšhelete re tla fokodiša tswalano ya rena le Jehofa. Moapostola Paulo o ile a ngwala gore: “Menaxanô a e se bê ya mexabaru. Le bê ba ba kxodilwexo ke tše di lexo xôna. Yêna mong ó boletše a re: Nka se kê ka Xo lahla; nka se kê ka Xo tloxêla.” (Ba-Hebere 13:5) Go kwa ditaelo tša Jehofa ka go rata go bontšha go mmota ka mo go feletšego gore o tla re hlokomela.

Jesu o ile a ithuta go kwa gomme o ile a holega. Le rena re ka dira bjalo. (Ba-Hebere 5:8) Ge re dutše re hlagolela go kwa, ke mo go bago bonolo kudu go kwa gaešita le dilong tše nyenyane. Ke therešo gore ka baka la potego ya rena, re ka swanela ke go kgotlelela go swarwa ke ba bangwe ka tsela e sa thabišego gaešita le e šoro. Se se ka ba bjalo kudu-kudu mešomong, sekolong goba lapeng leo le aroganego bodumeding. Lega go le bjalo, re hwetša khomotšo boipolelong bjo bo dirilwego go ba-Isiraele bja gore ge e ba ‘ba ratile Morena ka go kwa se a se bolelago, ba mo gomaretše, o be a tla ba bophelo bja bona le botelele bja matšatši a bona.’ (Doiteronomio 30:​20) Re neilwe kholofetšo e swanago.

Diriša Nako ka Bohlale

Go diriša nako ya rena ka bohlale le gona go tla re thuša go dira gore matšatši a rena e be a bohlokwa pele ga Jehofa. Ka go se swane le tšhelete yeo e ka bolokwago, nako e swanetše go dirišwa go sego bjalo e tla lahlega. Iri e nngwe le e nngwe ye e fetago e fetetše sa ruri. Ka ge ka mehla go na le dilo tše dintši tšeo re ka di dirago go feta tšeo re ka di kgonago, na re diriša nako ya rena ka go dumelelana le maikemišetšo a rena bophelong? Boikemišetšo bjo bogolo bja Bakriste ka moka e swanetše go ba go tšea karolo ka mehla modirong wa go bolela ka Mmušo le wa go dira barutiwa.​—Mateo 24:​14; 28:​19, 20.

Re tla diriša nako ya rena ka bohlale feela ka morago ga ge re etše hloko ka mo go tseneletšego mohola wa yona. Ka  baka leo, Ba-Efeso 5:​16 e re kgothaletša go ‘thakanela sebaka se sebotse,’ gomme se se bolela go e “reka,” go tlogela dilo tšeo e sego tša bohlokwa bjo bogolo. Se bolela go fokotša mediro yeo e senyago nako. Go bogela thelebišene kudu goba go hlohlomiša Internet, go bala dipuku tša lefase tše di se nago mohola goba go phegelela kudu boitapološo le boithabišo tšeo di ka re tlogelago re lapile. Go oketša moo, go kgoboketša dilo tše di bonagalago ka mo go feteletšego go ka tšea nako e nyakegago go hwetša pelo e bohlale.

Batho bao ba ratago go rulaganya nako ba re: “Ga go kgonege go diriša nako ya gago gabotse ka ntle le ge o na le dipakane tšeo di beilwego gabotse.” Ba šišinya ditekanyetšo tše hlano tša go bea dipakane: tša go lebanya, tše di ka kwagalago, tše di fihlelegago, tša kgonthe le tše di rulagantšwego.

Pakane e nngwe ya bohlokwa ke go kaonefatša go bala ga rena Beibele. Mogato wa mathomo ke go dira gore pakane ya rena e be e lebanyago​—go bala Beibele ka moka. Mogato o latelago ke go dira gore pakane ya rena e be e kwagalago. Ka go dira se, re ka kgona go bona tšwelopele ya rena. Dipakane di swanetše go re kgothaletša go ineela le go gola. E swanetše go ba tše di fihlelegago le tša kgonthe. Bokgoni bja motho ka noši, mediro le nako yeo e hwetšagalago di swanetše go naganelwa. Go ba bangwe, go ka nyakega nako e oketšegilego go fihlelela pakane. Sa mafelelo, pakane ya rena e swanetše go ba e rulagantšwego. Go bea letšatši-kgwedi la go phethagatša selo se itšego le gona go ka oketša go tutueletšega ga rena go e phetha.

Ditho ka moka tša lapa la Bethele lefaseng ka bophara tšeo di hlankelago ntlong-kgolo ya lefase ya Dihlatse tša Jehofa goba go le lengwe la makala a tšona lefaseng ka bophara, di na le pakane e lebanyago ya go bala Beibele ka moka ga yona ngwageng wa tšona wa mathomo Bethele. Di lemoga gore go bala Beibele mo go nago le mohola go tlaleletša kgolong ya moya le tswalanong ya kgaufsi le Jehofa, yo a di rutago go ikhola. (Jesaya 48:​17) Na le rena ka mo go swanago re ka dira go bala Beibele ka mehla pakane ya rena?

Mehola ya go Dira Gore Matšatši a Rena e be a Bohlokwa

Go lebiša tlhokomelo e kgolo ditabeng tša moya go tla feleletša ka ditšhegofatšo tše dintši kudu. Selo se sengwe ke gore go re thuša go thabela maikwelo a magolo kudu a seo re se fihleletšego le go ba le morero bophelong. Go boledišana le Jehofa ka mehla ka thapelo e tšwago pelong go re batametša kgaufsi kudu le yena. Tiro ye ya go rapela ka boyona e bontšha go mmota ga rena. Go bala Beibele ka mehla le dikgatišo tše di theilwego Beibeleng tše di newago ke “molaki e a bôtêxaxo yo bohlale” go bontšha go rata ga rena go theetša Modimo ge a bolela le rena. (Mateo 24:​45-47) Se se re thuša go ba le pelo e bohlale e le gore re ka dira diphetho le dikgetho tše di nepagetšego bophelong.​—Psalme 1:​1-3.

Re thabela go kwa ditaelo tša Jehofa, ka gobane go dira bjalo ga se morwalo. (1 Johane 5:3) Ge re dutše re dira gore letšatši le lengwe le le lengwe le be bohlokwa pele ga Jehofa, re matlafatša tswalano ya rena le yena. Le gona re ba thekgo ya kgonthe ya moya go Bakriste-gotee le rena. Le gona ditiro tše bjalo di thabiša Jehofa Modimo. (Diema 27:​11) Le gona ga go na moputso o mogolo go feta go thabela go amogelwa ke Jehofa gona bjale le ka mo go sa felego!

[Seswantšho go letlakala 21]

Bakriste ba lebelela ditaba tša moya e le tša bohlokwa kudu

[Diswantšho go letlakala 22]

Na o diriša nako ya gago ka bohlale?

[Seswantšho go letlakala 23]

Re matlafatša tswalano ya rena le Jehofa ge re dira gore letšatši le lengwe le le lengwe e be la bohlokwa go yena