Tšelang Pele le Hlankela le Bapelane ka Magetla

“Ke tla dira gore batho ba fetogele lelemeng le le sekilego, e le gore ka moka ga bona ba bitše leina la Jehofa, gore ba mo hlankele ba bapelane ka magetla.” ​—TSEFANYA 3:​9, NW.

1. Tsefanya 3:9 e phethagatšwa bjang?

GA BJALE go bolelwa maleme a ka bago 6 000 lefaseng ka bophara. Ntle le a, go na le mebolelo e fapa-fapanego goba dibopego tša lefelong le itšego tša maleme. Lega go le bjalo, go sa šetšwe gore ba4tho ba bolela maleme a fapanego kudu bjalo ka Sepedi le se-China, Modimo o dirile selo se sengwe se se tlogago se makatša. O dirile gore batho ba ba tšwago kae le kae ba ithute le go bolela leleme le tee leo e lego lona le nnoši le sekilego. Se se diragala e le phethagatšo ya kholofetšo yeo e neilwego ka moporofeta Tsefanya gore: “Nna [Jehofa] ke tla dira gore batho ba fetogele lelemeng le le sekilego, e le gore ka moka ga bona ba bitše leina la Jehofa, gore ba mo hlankele ba bapelane ka magetla.”​—Tsefanya 3:9, NW.

2. ‘Leleme le le sekilego’ ke’ng, gomme le dirile gore go kgonege eng?

² ‘Leleme le le sekilego’ ke therešo ya Modimo yeo e hwetšwago ka Lentšung la gagwe e lego Beibele. Ke la therešo kudu-kudu ka Mmušo wa Modimo woo o tlago go kgethagatša leina la Jehofa, o phagamiše bogoši bja gagwe le go šegofatša batho. (Mateo 6:​9, 10) Ka ge e le lona feela leleme le le hlwekilego ka tsela ya moya lefaseng, leleme le le sekilego le bolelwa ke batho ba ditšhaba le ditšo ka moka. Le dira gore ba  hlankele Jehofa “ba bapelane ka magetla.” Ka go rialo ba mo hlankela ka botee goba “ka go kwana.”​​—The New English Bible.

Go Beba Sefahlego ga se gwa Dumelelwa

3. Ke’ng se se dirago gore re kgone go hlankela Jehofa ka botee?

³ Bjalo ka Bakriste, re thabela tirišano yeo e lego gona ya batho ba bolelago maleme a fapa-fapanego gare ga rena. Gaešita le ge re bolela ditaba tše dibotse tša Mmušo ka maleme a mantši, re hlankela Modimo ka botee. (Psalme 133:1) Se se a kgonega ka gobane kae le kae moo re dulago gona lefaseng, re bolela leleme letee le le sekilego bakeng sa go reta Jehofa.

4. Ke ka baka la’ng go sa swanela go ba le go beba sefahlego gare ga batho ba Modimo?

⁴ Ga se gwa swanela gore go be le go beba sefahlego gare ga batho ba Modimo. Ge a be a nea bohlatse ka 36 C.E. ngwakong wa Koronelio yo e bego e le yo mongwe wa ba-Ntle e bile e le molaodi wa madira, moapostola Petro o ile a bolela se ka mo go kwagalago ka go tutueletšega gore: “Ka kxonthe, ke lemoxa xore Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.” (Ditiro 10:​34, 35) Ka ge seo e le therešo, phuthego ya Bokriste ga se lefelo la go beba sefahlego, dihlotswana goba go kgethollana.

5. Ke ka baka la’ng go fošagetše go godiša moya wa dihlotswana ka phuthegong?

⁵ Morutwana yo mongwe wa kholetšheng ge a be a bolela mabapi le ketelo ya gagwe Holong ya Mmušo o itše: “Gantši, dikereke di gogela ditho tša sehlopha se itšego sa morafo goba sa moloko. . . . Dihlatse tša Jehofa di be di dutše gotee ka moka e bile e sego ka dihlotswana.” Lega go le bjalo, ditho tše dingwe tša phuthego ya Korinthe ya bogologolo di be di baka dikgohlano. Ka go baka dikgohlano, di be di thibela go šoma ga moya o mokgethwa wa Modimo, ka gobane o godiša botee le khutšo. (Ba-Galatia 5:​22) Ge e ba re be re tla kgothaletša dihlotswana ka phuthegong, re tla be re dira ka go se dumelelane le tlhahlo ya moya. Ka gona, a re gopoleng mantšu a moapostola Paulo go  ba-Korinthe a rego: “Bana-bešo, ke a Le rapêla, ka ’ina la Jesu Kriste Mong ’a rena, ke re: Bohle bolêlang se tee, xore mo xo lena xo se bê le diphapang; Le bê ba xo bapêlana, kxopolô è le e tee, kêlêlô è le e tee.” (1 Ba-Korinthe 1:​10) Paulo o gatelela gape le botee lengwalong la gagwe le le yago go ba-Efeso.​—Ba-Efeso 4:​1-6, 16.

6, 7. Jakobo o ile a nea keletšo efe mabapi le go kgethollana, le gona mantšu a gagwe a šoma bjang?

⁶ Bakriste ka mehla ba kgothaletšwa go se bebe sefahlego. (Ba-Roma 2:​11) Ka gobane ba bangwe ka phuthegong ya lekgolong la pele la nywaga ba be ba bontšha moya wa go rata bahumi kudu, morutiwa Jakobo o ile a ngwala gore: “Bana bešo! Tumêlô ya xo dumêla Jesu Kriste Mong wa rena wa letaxô, xa Le nayô’ xe Le sa fêla Le beba batho. Xe phuthexong xò tsêna monna wa dipalamonwana tša xauta à apere tše di phadimaxo, xwa tsêna le modiitšana wa kobo e thšilafetšexo, me la bôna eo wa diaparô tše di phadimaxo la re: Wene dula fá xabotse! ’me modiitšana la bolêla naê’ la re: Êma moo! xoba la re: Dula fá fase boxatong bya ’nao tša-ka! a e ka se bê xo re Le bebile batho? A xa se xo re Le baahlodi ba ’kxopolô tše mpe?”​—Jakobo 2:​1-4.

⁷ Ge bahumi bao e sego badumedi ba be ba e-tla dibokeng tša Bokriste ba rwele dipalamonwana tša gauta gomme ba apere le diaparo tše dibotse gape go e-tla le badiidi bao e sego badumedi ba apere tša ditšhila, bahumi ba be ba swarwa gabotse. Ba be ba ‘dula gabotse,’ mola badiidi ba be ba botšwa gore ba eme goba ba dule lebatong bogatong bja dinao tša yo mongwe. Eupša Modimo o neile sehlabelo sa Jesu sa topollo bakeng sa bahumi le badiidi a sa bebe sefahlego. (Jobo 34:​19; 2 Ba-Korinthe 5:​14) Ge e ba re nyaka go kgahliša Jehofa le go mo hlankela re bapelane ka magetla, ga se ra swanela go kgethollana goba go ‘reta motho gore re hwetše tše di re holago.’​—Juda 4, 16.

Le se ke la Ngongorega

8. Go ile gwa direga’ng ka baka la go ngongorega ga ba-Isiraele?

⁸ Bakeng sa go dula re kgomaretše botee bja rena le go tšwela pele re amogelwa ke Modimo, re swanetše go ela hloko keletšo ya Paulo e rego: “Dirang tšohle xò se na xo dumaduma.” (Ba-Filipi 2:​14, 15) Ba-Isiraele ba go hloka tumelo ka morago ga go lokollwa bokgobeng kua Egipita ba ile ba ngongoregela Moše le Arone, ka go rialo ba ngongoregela Jehofa Modimo. Ka baka la se, banna ka moka ba nywaga e 20 go ya godimo ga se ba tsena Nageng ya Kholofetšo eupša ba ile ba hwa nakong ya nywaga e 40 ya leeto la ba-Isiraele lešokeng, ka ntle le Jošua le Kalebe le ba-Lefi ba botegago. (Numeri 14:​2, 3, 26-30; 1 Ba-Korinthe 10:​10) A moputso o mo kaakang woo ba o lefilego ka baka la go ngongorega!

9. Miryama o ile a welwa ke eng ka baka la go ngongorega ga gagwe?

⁹ Se se bontšha gabotse seo se ka diregago ka setšhaba ka moka seo se ngongoregago. Go thwe’ng ka batho bao ba ngongoregago? Go ba gona, Miryama kgaetšedi ya Moše, yena gotee le kgaetšedi ya gagwe Arone ba ile ba ngongorega ba re: “Afa Morêna ó bolêla ka Mošê fêla? A xa a bolêle le ka rena?” Pego e oketša ka gore: “Morêna a di kwa.” (Numeri 12:​1, 2) Mafelelo e bile afe? Miryama, yoo go lego molaleng gore ke yena yoo a bego a eteletše pele ngongorego ye, Modimo o ile a mo kokobetša. Bjang? Ka go otlwa ka lephera le go gapeletšega go ba ka ntle ga mešaša ka matšatši a šupago go fihlela a hlweka.​—Numeri 12:​9-15.

10, 11. Go ngongorega mo go sa thibelwego go ka feleletša ka eng? Bontšha.

¹⁰ Go ngongorega ga e fo ba go belaela ka go dirwa mo go itšego ga bobe. Bangongoregi ba phegelelago ba kgomegile kudu ka maikwelo goba maemo a bona, ba inyakela theto go e na le go reta Modimo. Ge e ba maikwelo a a sa thibelwe,  se se baka dikgohlano magareng ga bana babo rena ba moya gomme se thibela maiteko a bona a go hlankela Jehofa ba bapelane ka magetla. Se se dirwa ke gore bangongoregi ba dula ba ntšha dipelaelo tša bona, ba kgodišegile gore ba bangwe ba tla ba thekga.

¹¹ Ka mohlala, yo mongwe a ka no bolela gampe ka tsela yeo mogolo yo a itšego a neago ka gona dipolelo tša gagwe ka phuthegong goba a hlokomelago dikabelo tša gagwe ka gona. Ge e ba re theetša mmelaedi, re ka thoma go nagana bjalo ka yena. Pele ga ge peu ya go se kgotsofale e bjalwa ka megopolong ya rena, mediro ya mogolo e be e sa re belaetše, eupša ga bjale e a re belaetša. Mafelelong, ka moka tšeo mogolo a di dirago e tla ba tše di fošagetšego mahlong a rena, gomme le rena re ka thoma go ba le dipelaelo ka yena. Boitshwaro bja mohuta wo ga bo nyakege ka phuthegong ya batho ba Jehofa.

12. Go ngongorega go ka kgoma bjang tswalano ya rena le Modimo?

¹² Go ngongorega ka banna bao modiro wa bona e lego go diša mohlape wa Modimo go ka lebiša borabeleng. Go ngongorega mo go bjalo goba go ba thomeletša ka bobe go ka kgoma tswalano ya rena le Jehofa gampe. (Ekisodo 22:​28) Marabele a sa sokologego a ka se tsene Mmušong wa Modimo. (1 Ba-Korinthe 5:​11; 6:​10) Morutiwa Juda o ile a ngwala ka bangongoregi bao ba bego ba “nyatša maxoši, ba xoboša tše e lexo tša letaxô,” goba banna ba nago le boikarabelo ka phuthegong. (Juda 8) Bangongoregi bao ba be ba sa amogelwe ke Modimo, gomme re phema tsela ya bona e kgopo ka bohlale.

13. Ke ka baka la’ng e se dipelaelo ka moka tše di fošagetšego?

¹³ Lega go le bjalo, ga se gore Modimo o nyatša dipelaelo ka moka. Ga se a hlokomologa ‘sello sa go belaela’ ka Sodoma le Gomora, eupša o ile a fediša metse yeo e kgopo. (Genesi 18:​20, 21, bapiša le NW; 19:​24, 25.) Kua Jerusalema, nakwana ka morago ga Pentekoste ya 33 C.E., go ile “xwa tsoxa dipelaêlô mo xo Ba-Gerika, ba tsôta Ba-Hebere ba re: Bahlôlôxadi ba rena ba a tingwa, xe xo nthšiwa dikabêlô tša matšatši.” Ka lebaka leo, “ba lesome la metšô e mebedi” ba ile ba lokiša boemo ka go hlaola “banna ba ba šupaxo, ba ba tsebyaxo xore ba lokile” bakeng sa go “ba xafêla modirô woo” wa go aba dijo. (Ditiro 6:​1-6) Bagolo ba mehleng yeno ga se ba swanela go ba ‘difoa’ dipelaelong tša go kwagala. (Diema 21:​13) Le gona, go e na le go bolela gampe ka barapedi-gotee le bona, bagolo ba swanetše go ba ba kgothatšago le ba agago.​—1 Ba-Korinthe 8:1.

14. Ke seka sefe seo se nyakegago ka mo go kgethegilego e le gore re se ke ra ngongorega?

¹⁴ Ka moka ga rena ga se ra swanela go ngongorega, ka gobane moya wa go ngongorega o senya boemo bja moya. Boemo bjo bjalo bja kgopolo bo tla šitiša botee bja rena. Go e na le moo, anke ka mehla re dumelele moya o mokgethwa go tšweletša lerato ka go rena. (Ba-Galatia 5:​22) Go kwa ‘molao wa bogoši wa lerato’ go tla re thuša go tšwela pele re hlankela Jehofa re bapelane ka magetla.​—Jakobo 2:8, bapiša le NW; 1 Ba-Korinthe 13:​4-8; 1 Petro 4:8.

Itišeng Malebana le go Thomeletša

15. O ka hlalosa bjang phapano magareng ga lesebo le go thomeletša?

¹⁵ Ka ge go ngongorega go ka lebiša lesebong le le gobatšago, re swanetše go ela hloko seo re se bolelago. Lesebo ke polelo ya bošilo ka batho le ditaba tša bona. Lega go le bjalo, go thomeletša ke pego ya maaka yeo e reretšwego go senya botumo bja motho yo mongwe. Polelo e bjalo e kotsi gomme ga e bontšhe go boifa Modimo. Ka gona Modimo o ile a botša ba-Isiraele gore: “O se ke wa ba moneanyi mo sethšabeng sa xeno.”​—Lefitiko 19:16.

16. Paulo o boletše’ng mabapi le basebi ba itšego, gomme keletšo ye e swanetše go re kgoma bjang?

¹⁶ Ka ge polelo ya bošilo e ka lebiša go thomeletšeng, Paulo o ile a kgalemela ka matla basebi ba itšego. Ka morago ga go bolela ka bahlologadi bao ba swanelegago bakeng sa go thušwa ke phuthego, o ile a bolela ka bahlologadi ba bego ba tlwaetše ‘go thetha le malapa ba se na modiro, e le ba go tšwafa, ba ditshele le ba go bolela tše di sa lokago.’ (1 Timotheo 5:​11-15) Ge e ba mosadi wa Mokriste a lemoga gore o na le bofokodi bja mohuta o bjalo wa polelo yeo e ka lebišago go thomeletšeng, o tla ba a dira gabotse go  ela hloko keletšo ya Paulo ya go ba ‘šedi, e sego yo a thomeletšago.’ (1 Timotheo 3:​11, bapiša le NW.) Ke therešo gore le banna ba Bakriste ba swanetše gore le bona ba itiše malebana le lesebo le le gobatšago.​—Diema 10:19.

Le se ke la Ahlola!

17, 18. (a) Jesu o boletše’ng mabapi le go ahlola ngwanabo rena? (b) Re ka diriša bjang mantšu a Jesu a mabapi le go ahlola?

¹⁷ Gaešita le ge re sa thomeletše motho le ge e le ofe, re ka no swanela ke gore re leke ka matla go phema go ahlola ba bangwe. Jesu o ile a kgothaletša moya o bjalo ge a be a re: “Le se kê la ahlola, xore le lena Le se tlo ahlolwa. Xobane moahlolêlô wo Le ahlolaxo ka wôna, le lena Le tlo ahlolwa ka wôna; le seêlô se Le êlaxo ka sôna, le lena Le tlo êlêlwa ka sôna. O re’ng-xê Ò bôna lehlôkwana la mo ’ihlong la ngwaneno, Ò sa lemoxe kwata ya mo ’ihlong la xaxo? ’Me O ka bolêla bya’ng le ngwan’eno wa re: A nkê ke nthšê lehlôkwana mo ’ihlong la xaxo! mola leihlong la xaxo xò na le kwata? Moikaketši-tena! Thôma xo nthša kwata ya mo ’ihlong la xaxo; ké mo O tl’o xo boneša, wa kxôn’o nthša lehlôkwana mo ’ihlong la ngwana weno.”​—Mateo 7:​1-5.

¹⁸ Ga se ra swanela go nagana gore re ka ntšha ngwanabo rena “lehlôkwana” e le go mo thuša mola bokgoni bja rena ka noši bja go ba le kahlolo e botse bo širilwe ke “kwata” ya seswantšhetšo. Ge e le gabotse, ge e ba re tloga re kwešiša kamoo Modimo e lego wa kgaugelo ka gona, re ka se sekamele go ahloleng bana babo rena le dikgaetšedi tša moya. Ke bjang re ka kgonago go ba kwešiša go etša Tatago rena wa legodimong? Ga go makatše ge Jesu a re lemošitše gore ‘re se ahlole, gore le rena re se tlo ahlolwa’! Go itlhahloba ka potego mafokodi a rena ka noši go swanetše go re thibela go dira dikahlolo tšeo Modimo a tla di lebelelago e le tše di sa lokago.

Re a Fokola Eupša re ba Bohlokwa

19. Re swanetše go lebelela bjang badumedi-gotee le rena?

¹⁹ Ge e ba re ikemišeditše go hlankela Modimo re bapelane ka magetla le badumedi-gotee le rena, re ka se no phema go ba bao ba ahlolago ba bangwe. Re tla gata mogato wa pele go ba hlompheng. (Ba-Roma 12:​10) Ge e le gabotse re tla etiša dikgahlego tša bona pele e sego tša rena, gomme re tla thabela go ba direla mediro e nyatšegago. (Johane 13:​12-17; 1 Ba-Korinthe 10:​24)  Ke ka tsela efe re ka kgomarelago moya o bjalo o mobotse? Ka go dula re gopola gore modumedi yo mongwe le yo mongwe ke wa bohlokwa go Jehofa le gore re a hlokana go etša ge setho se sengwe le se sengwe sa mmele wa motho se ithekgile ka se sengwe.​—1 Ba-Korinthe 12:​14-27.

20, 21. Mantšu a 2 Timotheo 2:​20, 21 a bolela’ng go rena?

²⁰ Re tloga re dumela gore Bakriste ke dibjana tša go fokola tšeo di neilwego lehumo le kgahlišago la bodiredi. (2 Ba-Korinthe 4:7) Ge e ba re tla tšwela pele go dira modiro wo o mokgethwa bakeng sa go reta Jehofa, re swanetše go dula re e-na le boemo bjo bo hlomphegago ka pele ga gagwe le Morwa wa gagwe. Ke feela ka go dula re hlwekile boitshwarong le moyeng moo re ka dulago re le dibjana tše di hlomphegago bakeng sa go dirišwa ke Modimo. Paulo o ile a ngwala mabapi le se gore: “Ngwakong o moxolo dibya xa se tša xauta le tša silifêra fêla; le tša phata le tša letsopa di xona; tše dingwê ké tša xo neneketšwa; tše dingwê ké tša xo nyatšêxa. Byale xe motho a ka ila tše mpe ó tlo ba sebyana sa xo neneketšwa, sa xo kxêthêxa, sa xo kxahla mong wa ngwakô, se se tl’o xo dirišwa modirô o botse.”​—2 Timotheo 2:​20, 21.

²¹ Batho bao ba sa itshwarego ka go dumelelana le dinyakwa tša Modimo ke ‘dibjana tša go nyatšega.’ Lega go le bjalo, ka go phegelela tsela ya go boifa Modimo, re tla ba ‘dibjana tša go neneketšwa, tša go kgethega, goba tše di beetšwego ka thoko bakeng sa tirelo ya Jehofa le go dirišetšwa modiro o mongwe le o mongwe o mobotse.’ Ka gona e tla ba mo go botse go ipotšiša gore: ‘Na ke “sebyana sa xo neneketšwa”? Na ke na le tutuetšo e botse go badumedi-gotee le nna? Na ke setho sa phuthego se se šomago se bapelane ka magetla le barapedi-gotee le nna?’

Tšwelang Pele le Hlankela le Bapelane ka Magetla

22. Phuthego ya Bokriste e ka swantšhwa le eng?

²² Phuthego ya Bokriste ke thulaganyo e swanago le ya lapa. Go na le moya wa lerato, wa go thuša le o mobotse ka lapeng ge ditho tša lona ka moka di rapela Jehofa. Lapa le ka ba le batho ba mmalwa bao ba nago le dimelo tše di fapa-​­fapanego, eupša yo mongwe le yo mongwe o na le karolo ya bohlokwa. Boemo ke bjo bo swanago le ka phuthegong. Gaešita le ge ka moka ga rena re sa swane​—gomme re sa phethagala​—Modimo o re gogetše go yena ka Kriste. (Johane 6:​44; 14:6) Jehofa le Jesu ba a re rata, gomme bjalo ka lapa le le lego boteeng, ka kgonthe re swanetše go bontšhana lerato.​—1 Johane 4:​7-11.

23. Ke’ng seo re swanetšego go se gopola le go ikemišetša go se dira?

²³ Phuthego ya Bokriste yeo e swanago le lapa le yona ke lefelo leo ka mo go swanetšego re letetšego go hwetša potego e sa kwanantšhego go lona. Moapostola Paulo o ngwadile gore: “Byale ke rata xore banna e bê ba xo rapêla xohle, ba emišê diatla tše kxêthwa xò se bonaba le dikxang.” (1 Timotheo 2:8) Ka gona Paulo o ile a tswalanya potego e sa kwanantšhego le thapelo ya phatlalatša yeo e rapelwago “xohle” moo Bakriste ba bokanago gotee. Ke feela banna bao ba botegago ka go se kwanantšhe bao ba swanetšego go emela phuthego ka thapelo phatlalatša. Ke therešo gore Modimo o letetše gore ka moka ga rena re mmotegele ka go se kwanantšhe le go botegelana ka go se kwanantšhe. (Mmoledi 12:​13, 14) Ka gona, anke re ikemišetšeng go šoma gotee ka botee, bjalo ka ditho tša mmele wa motho. Le gona anke re hlankeleng ka botee re le karolo ya lapa la barapedi ba Jehofa. Go feta tšohle, anke re gopoleng gore re a hlokana gomme re tla thabela ditšhegofatšo le go amogelwa ke Modimo ge e ba re tšwela pele re hlankela Jehofa re bapelane ka magetla.

O tla Araba Bjang?

• Ke’ng seo se dirago gore batho ba Jehofa ba kgone go mo hlankela ba ­bapelane ka magetla?

• Ke ka baka la’ng Bakriste ba phema go beba sefahlego?

• Ke’ng seo o ka rego se fošagetše ka go ngongorega?

• Ke ka baka la’ng re swanetše go hlompha badumedi-gotee le rena?

[Seswantšho go letlakala 15]

Petro o ile a lemoga gore “Modimo xa a bebe motho”

[Seswantšho go letlakala 16]

Na o tseba lebaka leo ka lona Modimo a ilego a kokobetša Miryama?

[Seswantšho go letlakala 18]

Bakriste bao ba botegago ka go se kwanantšhe ba hlankela Jehofa ka lethabo ba bapelane ka magetla