Dipotšišo tše Tšwago go Babadi

Go ya ka Kutollo 20:​8, na re swanetše go phetha ka gore go tla ba le palo e kgolo ya batho bao ba tla timetšwago ke Sathane tekong ya mafelelo?

Kutollo 20:⁠8 e hlalosa tlhaselo ya mafelelo ya Sathane go batho bao ba tla bego ba phela lefaseng mafelelong a pušo ya nywaga e sekete ya Mmušo wa Mesia. Temana yeo ge e bolela ka Sathane e re: “A tlo tšwêla xo aroša ba dithšaba ba mathokong a manê a lefase, Bô-Gogo le Magogo, a ba rapa a ba iša thlabanong, palô ya bôná è le ya lešabašaba la lewatlê.”

Go sa šetšwe go tšwela pele mekgweng ya tša thutamahlale le go dirišweng ga ditlabakelo bakeng sa go ela, palo ya “lešabašaba la lewatlê” ga e tsebje. Ka gona, go ka bolelwa gore polelwana yeo e emela palo yeo e sa tsebjego. Eupša na e bolela palo e kgolo, e makatšago gaešita le e kgolo ka mo go sa kgodišego goba e fo ba feela palo yeo e sa tsebjego eupša e le e kgolo?

Ka Beibeleng, polelwana “lešabašaba la lewatlê” e dirišitšwe ka ditsela tše dintši. Ka mohlala, go Genesi 41:​49 re bala gore: “Josefa a kxobêla mabêlê a kaka lešabašaba la lewatlê, ba bá ba lesa le xo a êla, ka xobane a be a se sa kxôna xo êlwa.” Mo go gatelelwa go se balege ga ona. Ka mo go swanago, Jehofa o itše: “Makôkô a lexodimong a ka se kê a bá a balwa; lešabašaba la lewatlê le ka se kê la bá la êlwa. Le ba peu ya Dafida mohlanka wa-ka ke tlo ba atiša xa-kaa-kao.” Ka ge e le mo go kgonthišeditšwego gore dinaledi tša legodimo le lešabašaba la lewatle ga di balege, ke mo go kgonthišeditšwego ka mo go swanago gore Jehofa o tla phethagatša kholofetšo ya gagwe go Dafida.​—⁠Jeremia 33:⁠22.

Gantši polelwana e rego “lešabašaba la lewatlê” e šupa go selo se itšego se e lego se sentši kudu ka palo. Ba-Isiraele kua Giligala ba be ba tshwenyegile kudu ka madira a ba-Filisita ao a bego a bokane kua Mikimasa, ao e bego e le “a mantši-ntši a kakaxo lešaba-šaba la lebotong la lewatlê.” (1 Samuele 13:​5, 6; Baahlodi 7:​12) Le gona “Modimo a nea Salomo bohlale le tsebô e kxolo ka kudu. Pelo ya xaxwe e be e akaretša dilô tše bontši bo-ka lešabašaba la lewatleng.” (1 Dikxoši 4:​29) Gaešita le ge seo go bego go bolelwa ka sona tabeng e nngwe le e nngwe e be e le se segolo, se be se sa dutše se balega.

Le gona “lešabašaba la lewatlê” le ka emela palo e sa tsebjego, go sa šišinywe go ba ga yona e kgolo. Jehofa o boditše Aborahama gore: “Ke tlo Xo šexofatša xaxolo; bana ba xaxo ke tlo ba atiša xaxolo byalo ka dinaledi tša lexodimong, le byalo ka lešabašaba la lebotong la lewatlê.” (Genesi 22:​17) Ge a boeletša kholofetšo ye go setlogolo sa Aborahama e lego Jakobo, Jehofa o ile a diriša polelwana “lerole la lefase,” yeo Jakobo a ilego a e bolela gape e le “lešabašaba la lewatleng.” (Genesi 28:​14; 32:​13) Ge ditaba di phethagala, ka ntle le Jesu, “peu” ya Aborahama ke ba 144 000, yeo Jesu a e bitšago “mohlatswana o monyenyane.”​—⁠Luka 12:​32; Ba-Galatia 3:​16, 29; Kutollo 7:⁠4; 14:​1, 3.

Re ithuta’ng mehlaleng ye? Re ithuta gore polelwana e rego, ‘bjalo ka lešabašaba la lewatle,’ ga se ka mehla e bolelago palo e sa balegego le e kgolo ka mo go sa kgodišego; le gona ga se ka mehla e dirišetšwago go hlalosa selo se itšego se segolo kudu goba sa bogolo bjo bo makatšago. Gantši e emela palo e sa tsebjego eupša e le yeo e ka lekanywago. Ka gona, ke mo go kwagalago go dumela gore lešaba la marabele leo le tla thekgago Sathane tlhaselong ya gagwe ya mafelelo go batho ba Modimo e ka se be le legolo kudu, eupša e tla ba le legolo ka mo go lekanego go ka ba kotsi. Lega go le bjalo, ga bjale palo ya lona ga e tsebje.