Go Jela Tafoleng ya Molaodi wa Sekepe

BATHO ba ba kgahlišago, dijo tše dibose le pole­dišano e thabišago di dira gore go jela tafoleng ya molaodi ka sekepeng e be mo go thabišago. Eupša poledišano tafoleng ya Molaodi Robert G. Smith wa khamphani ya dikepe ya White Star Line, e ile ya hlabiša seetša sa monyanya wa moya.​—⁠Jesaya 25:⁠6.

Ka 1894, ge a be a e-⁠na le nywaga e 24, Robert o ile a laola sekepe sa go sesa e lego Kinclune of Dundee go tšea leeto la gagwe la mathomo la go dikologa lefase. Ka morago, e ile ya ba molaodi wa dikepe tša White Star, tše bjalo ka Cedric, Cevic le Runic. * Ge a be a phatša Atlantic go tšwa New York go ya Liverpool, Engelane, ka se sengwe sa dikepe tše, Robert o ile a amogela Charles Taze Russell e le moeng wa gagwe tafoleng ya molaodi. Poledišano le Russell e ile ya tsoša kgahlego ya Robert ka molaetša wa Beibele, gomme e le go mo thuša gore a ithute ka mo go oketšegilego, ka lethabo o ile a amogela dikopi tša Studies in the Scriptures go tšwa go Russell.

Russell o ile a tšwela pele a mo ngwalela mangwalo, gomme mafelelong kgahlego ya Robert molaetšeng wa Beibele e ile ya gola. Robert o ile a abelana le mosadi wa gagwe tsebo yeo a bego a sa tšwa go e hwetša. Kapejana bobedi bja bona ba ile ba thoma go ba Barutwana ba Beibele ba mafolofolo, ka ge Dihlatse tša Jehofa di be di tsebja bjalo ka nako yeo. Ka morago Robert o bile le tokelo ya go nea dipolelo tša Beibele. Ka mohlala kua Brisbane, Australia, o ile a bolela ka “Sehlare sa Gilead” gomme a bontšha kamoo Lentšu la Modimo le nago le molaetša wo e lego “pheko madimabeng ka moka a lefaseng.” Morago kua Engelane, mosadi wa gagwe le bana ba banyenyane ba ile ba thuša go bontšheng “Photo-Drama of Creation,” ba bapala direkhoto tša ditlhaloso tša Russell ge di-slide di be di bontšhwa.

Robert o ile a fetišetša go bana ba gagwe bohwa bja therešo ya Mmušo bjoo a bego a bo hweditše. Lehono, melokong e mehlano ka morago, ditho tše 18 di swaregile go abelaneng ditaba tše dibotse le ba bangwe, ba leboga dijo tšeo di ilego tša newa tafoleng ya molaodi.

Ka dikgatišo le modiro wa tšona wa go ruta ka Beibele, Dihlatse tša Jehofa di thuša batho lefaseng ka bophara go ithuta molaetša wa Beibele wo o ilego wa tanya Molaodi Smith. Le wena o ka hwetša seo se itlhatsetšego e le se se kgahlišago tafoleng ya molaodi.

Robert G. Smith

Charles T. Russell