Go Nea go Fihlela re Itlhohlora Dipotla

“OKA fo mpitša mokgopedi; seo ga se ntshwenye. Ke kgopelela Jesu.” Mantšu ao a kwagalago gabotse a moruti wa Moprotestanta a tšweletša kgakgano e lego gona tabeng ya go thekgwa ga bodumedi ka tša ditšhelete. Go bonala bodumedi bjo bo rulagantšwego bo kgona go phela feela ka thekgo e kgolo ya tša ditšhelete. Go swanetše go ba le bao ba godišwago, go swanetše go agwe dikereke gomme di bolokwe di le boemong bjo bobotse gomme masolo a boebangedi a swanetše go thekgwa ka tša ditšhelete. Tšhelete e nyakegago e tla hwetšwa bjang?

Dikerekeng tše dintši, tharollo ke gore go be le karolo ya lesome. * Moebangedi Norman Robertson o bolela gore: “Go ntšha karolo ya lesome ke tsela ya Modimo ya go thekga mmušo wa Gagwe mo lefaseng ka tša ditšhelete. Ke tshepedišo ya Gagwe ya tša ditšhelete yeo e dirago gore go bolela Ebangedi go kgonege.” A sa lewe ke dihlong go gopotša balatedi ba gagwe ka boikarabelo bja bona bja go nea, o ile a bolela ka matla gore: ‘Go ntšha karolo ya lesome ga se selo seo o se dirago ka baka la gore o se fihlelela. Ke tiro ya go bontšha go kwa. Go se ntšhe karolo ya lesome ke go robja mo go lego molaleng ga melao ya Modimo. Ke bohodu.’​—⁠Tith­ing​​—⁠God’s Finan­cial Plan.

Mohlomongwe o dumela gore go nea e swanetše go ba karolo ya borapedi bja Bokriste. Lega go le bjalo, na o hwetša go kgopelwa ga tšhelete mo go tšwelago pele go tena, mohlomongwe go bile go befediša? Rathutatumelo wa mo-Brazil Inácio Strieder o bea dikereke molato wa go diriša go ntšha karolo ya lesome bakeng sa go “rarolla mathata a bona a dikereke” gomme o bitša ditiro tše bjalo gore ke “tšeo e sego tša molao, tše gobošago le tše fapošago dithuto tša tumelo.” O bolela gore mafelelo e ba a gore “batho bao ba sa šomego, bahlologadi, badudi ba mekutwaneng, le bao ba palelwago ke go nagana ka kelohloko ba phetha ka gore Modimo o ba lahlile le gore ba gapeletšega go nea ‘moruti’ kudu mo e lego gore mafelelong malapa a bona ka noši a bolawa ke tlala.”

O ka ipotšiša gore: ‘Na dikereke tšeo di gapeletšago go ntšha karolo ya lesome di diriša Mangwalo ka mo go nepagetšego? Goba na e ka ba e le gore madumedi a mangwe a diriša go boifa go otlwa ke Modimo bakeng sa go hloba mohlape? Na ruri-ruri Modimo o letetše gore re nee go fihlela re itlhohlora dipotla, go etša ge ba bangwe ba bolela?’