PHIHLELO

KABELO YA BOROMIWA E ILE YA FETOGA LEGAE LA RENA

KA GE GO ANEGA DICK WALDRON

E be e le Sontaga mantšiboa ka September 1953. Re be re sa tšwa go fihla South-West Africa (ga bjale ke Namibia). Re be re se ra tšwa re fetša beke re le nageng ye gomme re be re le kgaufsi le go swara seboka sa phatlalatša motse-mošate, Windhoek. Ke’ng seo se re tutueleditšego go huduga Australia go tla nageng ye ya Afrika? Nna le mosadi wa-ka gotee le basadi ba bangwe ba bararo ba bafsa, re be re tlile re le baromiwa ba ditaba tše dibotse tša Mmušo wa Modimo.​—⁠Mateo 24:​14, NW.

BOPHELO bja-ka bo thomile nageng yeo e lego kgole kudu, kua Australia, ka ngwaga wa madi-mabe wa 1914. Ke bile nywageng ya mahlalagading nakong ya Tšhaparego e Kgolo, gomme ke ile ka swanela ke go kgatha tema ya-ka go fepa lapa la gešo. Go be go se na mošomo, eupša ke ile ka loga leano la go tsoma mebutla ya naga, yeo e bego e le e mentši kua Australia. Ka gona, se sengwe sa dilo tše kgolo tšeo ke bego ke tlaleletša ka sona ka lefelong la go bolokela dijo la lapa la gešo e be e le go tsenya nama ya mmutla ka mehla.

Nakong ya ge ntwa ya bobedi ya lefase e be e tsoga ka 1939, ke ile ka kgona go hwetša mošomo dinamelweng tša batho bohle le dipeseng kua motseng wa Melbourne. Go be go na le banna ba ka bago 700 bao ba šomago ditšhifi dipeseng, gomme tšhifing e nngwe le e nngwe ke be ke gahlana le mootledi yo a fapanego wa pese goba molaodi. Gantši ke be ke ba botšiša gore, “Bodumedi bja gago ke bofe?” gomme ke ba dumelele gore ba hlalose ditumelo tša bona. Motho feela yo a ilego a nnea dikarabo tše di kgotsofatšago e be e le yo mongwe wa Dihlatse tša Jehofa. O ile a ntlhalosetša molaetša o theilwego Beibeleng ka lefase la paradeise, moo batho bao ba boifago Modimo ba tlago go phela ka mo go sa felego.​—⁠Psalme 37:⁠29.

Yona nakong yeo, mma le yena o ile a gahlana le Dihlatse tša Jehofa. Gantši, ge ke be ke e-⁠tšwa  tšhifing ya bošego, dijo tša-ka di be di nkemetše gotee le kopi ya makasine wa Consolation (ga bjale o bitšwa Phafoga!). Seo ke bego ke se bala se be se kwagala se kgahliša. Ge nako e dutše e tšwela pele, ke ile ka phetha ka gore bjo e be e le bodumedi bja therešo, gomme ke ile ka kopanela le phuthego ka mafolofolo gomme ka kolobetšwa ka May 1940.

Kua Melbourne go be go na le legae la babulamadibogo, moo go bego go dula badiredi ba nako e tletšego ba Dihlatse tša Jehofa ba 25. Ke ile ka dula le bona. Letšatši le lengwe le le lengwe ke be ke theetša diphihlelo tša bona modirong wa boboledi, gomme ke ile ka ba le kganyogo ya go ba mmulamadibogo. Mafelelong ke ile ka dira kgopelo ya tirelo ya bobulamadibogo. Ke ile ka amogelwa gomme ka biletšwa go hlankela ofising ya lekala ya Dihlatse tša Jehofa ya Australia. Ka gona ke ile ka ba setho sa lapa la Bethele.

Go Golegwa le Thibelo

E nngwe ya dikabelo tša-ka kua Bethele e be e le go diriša motšhene wa go sega dikota. Moo re be re sega dikota go dira malahla e le gore re tšweletše peterole. Ye e be e dirišwa dikoloing tša lekaleng ka gobane peterole yeo e bego e rekišwa e be e hlaela ka baka la ntwa. Re be re šoma motšheneng wa go sega dikota re le ba 12, ka moka ga rena re ile ra kgethelwa go tlatša madira. Kapejana re ile ra ahlolelwa dikgwedi tše tshela kgolegong ka baka la go gana ga rena mo go theilwego Beibeleng go tsenela tirelo ya madira. (Jesaya 2:⁠4) Re ile ra romelwa kampeng ya kgolego bakeng sa go šoma mošomo wa kgapeletšo. Ba ile ba re abela mošomo ofe? Sa go makatša ke gore re ile ra swanela ke go sega dikota, modiro o swanago le wo re bego re tlwaeditšwe go o dira kua Bethele!

Re ile ra dira gabotse kudu go segeng dikota moo molaodi wa kgolego a ilego a re nea Beibele le dipuku tša rena tše di theilwego Beibeleng, go sa šetšwe ditaelo tše thata tša gore re swanetše go ganwa le dilo tše bjalo. Ke ka nako ye moo ke ilego ka ithuta thuto e holago ditswalanong tša batho. Ge ke be ke dutše ke šoma kua Bethele, go be go na le ngwanabo rena yo mongwe yoo ke bego ke tloga ke sa kwane le yena. Dimelo tša rena di be di tloga di fapane kudu. Ka gona, o nagana gore ke ile ka bewa ka seleng e tee ya kgolego le mang? Ee, le yena ngwanabo rena yoo. Ga bjale re be re tloga re na le nako ya go tsebana, gomme mafelelo e bile gore re ile ra hlagolela bogwera bja kgaufsi le bjo bo swarelelago.

Ge nako e tšwela pele, modiro wa Dihlatse tša Jehofa o ile wa thibelwa kua Australia. Ditšhelete ka moka di ile tša thopša, gomme bana babo rena ba Bethele ba be ba na le tšhelete e nyenyane kudu. Tiragalong e nngwe, yo mongwe wa bona o ile a tla go nna gomme a re: “Dick, ke nyaka go ya go nea bohlatse kua toropong, eupša ga ke na dieta, ke na le diputsi tša go šoma feela.” Ke be ke thabetše go mo thuša, gomme o ile a ya toropong a rwele dieta tša-ka.

Ka morago, re ile ra kwa gore o be a swerwe gomme a išwa kgolegong ka baka la go dira modiro wa boboledi. Ke ile ka gapeletšega go mo romela lengwalwana leo le rego: “Ke go kwela bohloko ka seo se diragetšego. Ke thabela gore mo nakong ye ga se nna ke golegilwego, eupša ke dieta tša-ka feela.” Eupša le nna kgaufsinyane ke ile ka swarwa gomme ka golegwa ka lekga la bobedi ka baka la boemo bja-ka bja boema-gare. Ka morago ga go lokollwa ga-ka, ke ile ka romelwa go ya go hlokomela polase yeo e bego e abela lapa la Bethele dijo. Ka nako yeo re be re fentše molato kgorong ya tsheko, gomme thibelo modirong wa Dihlatse tša Jehofa e ile ya tlošwa.

Go Nyala Moebangedi yo Mafolofolo

Ge ke be ke le polaseng, ke ile ka thoma go naganišiša ka lenyalo gomme ka kgahlišwa ke kgaetšedi yo mofsa wa mmulamadibogo, Coralie Clogan. Makgolo wa Coralie e be e le wa mathomo ka lapeng la gabo go bontšha kgahlego molaetšeng wa Beibele. Ge a be a le diphateng tša lehu, o ile a botša mmago Coralie e lego Vera gore: “Godiša bana ba gago gore ba rate Modimo le go mo hlankela, gomme ka letšatši le lengwe re tla kopana Paradeiseng.” Ka morago ge kgaetšedi wa mmulamadibogo a be a e-⁠tla go etela Vera a swere kgatišo ya Millions Now Living Will Never Die, mantšu ao a ile a thoma go kwagala. Pukwana yeo e ile ya kgonthišetša Vera gore e be e le morero wa Modimo gore batho ba thabele bophelo paradeiseng mo lefaseng. (Kutollo 21:⁠4) O ile a kolobetšwa mathomong a bo-1930, gomme bjalo ka ge mmagwe a ile a kgothatša, o ile a thuša barwedi ba gagwe ba bararo​—⁠Lucy, Jean le Cora­lie⁠—​go hlagolela lerato la go rata Modimo. Lega go le  bjalo, tatago Coralie o be a ganetša kudu dikgahlego tša bodumedi tša lapa la gagwe, bjalo ka ge Jesu a ile a lemoša gore go ka direga ka malapeng.​—⁠Mateo 10:​34-⁠36.

Lapa la ga-Clogan le be le na le bokgoni bja mmino, ngwana yo mongwe le yo mongwe a letša seletšo. Coralie o be a letša fiolo, gomme ka 1939 ge a be a e-⁠na le nywaga e 15 o ile a newa diploma ya mmino. Go phulega ga Ntwa ya II ya Lefase go ile gwa dira gore Coralie a naganišiše ka bokamoso bja gagwe. Go be go fihlile nako ya gore a dire phetho ya gore o be a tlo dira’ng ka bophelo bja gagwe. Ka lehlakoreng le lengwe, go be go na le kgonagalo ya gore a dire mmino mošomo wa gagwe. Go be go šetše go na le taletšo ya gore a tle a letše sehlopheng sa Melbourne Symphony Orchestra. Ka lehlakoreng le lengwe, go be go na le kgonagalo ya gore a neele nako ya gagwe modirong o mogolo wa go bolela molaetša wa Mmušo. Ka morago ga go naganišiša, Coralie le bana babo ba babedi ba ile ba kolobetšwa ka 1940 gomme ba dira ditokišetšo tša go tsenela modiro wa nako e tletšego wa boebangedi.

Kapejana ka morago ga ge Coralie a be a šetše a dirile phetho ya go tsenela bodiredi bja nako e tletšego o ile a batamelwa ke ngwanabo rena yo a nago le boikarabelo bjo bogolo go tšwa ofising ya lekala la Australia e lego Lloyd Barry, yoo ka morago a ilego a hlankela e le setho sa Sehlopha se Bušago sa Dihlatse tša Jehofa. O be a sa tšwa go nea polelo kua Melbourne gomme a botša Coralie gore: “Ke boela Bethele. Ke ka baka la’ng o sa boele morago le nna ka setimela go ya go tlatša lapa la Bethele?” O ile a amogela taletšo ka go rata.

Coralie le dikgaetšedi tše dingwe tša lapa la Bethele di ile tša kgatha tema ya bohlokwa go neeng dikgatišo tša Beibele go bana babo rena kua Aus­tra­lia nakong ya thibelo ya nywageng ya ntwa. Ge e le gabotse ba be ba dira modiro o montši wa go gatiša, ka tlase ga tlhokomelo ya Ngwanabo rena Malcolm Vale. Puku ya The New World le ya Chil­dren di be di gatišwa gomme di tlengwa, le gona ga go na tokollo le e tee ya makasine wa Morokami yeo e ilego ya se ke ya gatišwa nakong ya nywaga e fetago e mebedi ya ge go be go na le thibelo.

Motšhene wa go gatiša o ile wa swanelwa ke go šuthišwa makga a 15 bakeng sa go phema maphodisa. Tiragalong e nngwe, dipuku tša Beibele di ile tša gatišwa ka phapošing ya ka tlase ga moago yeo go yona go bego go gatišwa dilo tše fapa-fapanego e le go širela. Kgaetšedi yo a bego a šoma lefelong la go amogela baeng o be a ka kgona go kgwatha konotswana ye e bego e letša tšhipi ka phapošing ya ka tlase ge go bonagala go na le kotsi le ge e le efe, e le gore dikgaetšedi fao di ka uta dikgatišo pele ga ge motho le ge e le ofe a ka thoma go lekola.

Nakong e nngwe ge go be go lekolwa, dikgaetšedi tše dingwe di be di tšhogile kudu ge di lemoga gore kopi ya Morokami e be e le godimo ga tafola go ka bonwa ke batho ka moka. Lephodisa le ile la tla, la bea mokotla wa lona godimo ga Morokami gomme la tšwela pele ka go phuruphutša. Ka ge le sa hwetša selo, le ile la tšea mokotla wa lona gomme la tšwa la sepela!

Ka morago ga ge thibelo e fedile gomme lefelo la lekala le be le bušeditšwe go bana babo rena, bontši bja bona ba ile ba newa sebaka sa go ya tšhemong go hlankela e le babulamadibogo ba ba kgethegilego. Yeo ke nako ya ge Coralie a be a ithapa go ya Glen Innes. Ke ile ka mo tlatša moo gomme ra nyalana ka January 1, 1948. Ka nako ya ge re tlogela kabelo yeo, go be go hlomilwe phuthego yeo e atlegilego fao.

Kabelo ya rena e latelago e be e le Rock­hamp­ton, eupša ga se ra ka ra hwetša madulo fao. Ka gona re ile ra hloma tente lefelong leo le bulegilego polaseng ya motho yo a thabelago. Tente yeo e be e tla ba legae la rena ka dikgwedi tše senyane tše di latetšego. Mohlomongwe e ka ba e bile legae la rena ka lebaka le letelele, eupša ge sehla sa dipula  se e-⁠tla, ledimo la molatšatšing le ile la senya tente, gomme pula e matla e ile ya e gogola. *

Go Hudugela Kabelong ya Nageng e Šele

Ge re be re le Rockhampton, re ile ra amogela taletšo ya go ba gona sehlopheng sa bo-19 sa Sekolo sa Beibele sa Watchtower sa Gilead bakeng sa tlwaetšo ya boromiwa. Ka gona, ka morago ga go aloga ka 1952, ye ke tsela yeo ka yona re ilego ra romelwa nageng yeo ka nako yeo e bego e tsebja e le South-West Africa.

Ka ntle le go senya nako, baruti ba Bojakane ba ile ba re bontšha kamoo ba bego ba ikwa ka gona ka modiro wa rena wa boromiwa. Sontaga se sengwe le se sengwe ka dibeke tše tshela tše di latelanago, ba le phuluphithing ba ile ba lemoša diphuthego tša bona ka rena. Ba ile ba botša batho gore ba se ke ba re bulela mejako le gona ba se ke ba re dumelela re ba balela Beibele, ka ge e tla ba gakantšha. Tikologong e nngwe, re ile ra sepediša dikgatišo tše mmalwa, eupša moruti o ile a re šala morago ka ntlo le ntlo gomme a di tšea. Ka letšatši le lengwe re ile ra swara poledišano thutong ya moruti gomme ra bona gore o be a na le dipuku tše dintšinyana tša rena.

E be e le nakwana pele ga ge balaodi ba lefelong leo le bona ba thoma go bontšha go tshwenyega ka mediro ya rena. Ga go na pelaelo gore ka tlhohleletšo ya moruti, ba ile ba sola gore re ka be re na le kgokagano le Makomanisi. Ka gona re ile ra gatišwa menwana, gomme ba bangwe ba batho bao re ilego ra ba etela ba ile ba botšološišwa. Go sa šetšwe kganetšo ye ka moka, ganyenyane-ganyenyane palo ya bao ba bago gona dibokeng e ile ya oketšega.

Go tloga mathomong a go dula ga rena fao, re ile ra tsoša kganyogo e tseneletšego ya go phatlalatša molaetša wa Beibele gare ga badudi ba setlogo sa ma-Ovambo, ma-Herero le ma-Nama. Lega go le bjalo, se se be se se bonolo. Morago mehleng yeo, South-West Africa e be e wela ka tlase ga taolo ya mmušo wa kgethologanyo wa Afrika Borwa. Ka ge re be re le batho ba bašweu, re be re sa dumelelwa go nea bohlatse ditikologong tša batho ba baso ka ntle le tumelelo ya mmušo. Re ile ra dira kgopelo leboelela, eupša balaodi ba ile ba fo gana go re nea tumelelo.

Ka morago ga nywaga e mebedi kabelong ya nageng e šele, re ile ra welwa ke semaka. Coralie o ile a ima. Ka October 1955, morwedi wa rena Charlotte o ile a belegwa. Gaešita le ge re be re ka se kgone go tšwela pele re le baromiwa, ke ile ka kgona go hwetša mošomo wa nakwana gomme ka tšwela pele ke le mmulamadibogo ka nakwana.

Karabo Dithapelong tša Rena

Ka 1960 re ile ra lebeletšana le tlhohlo e nngwe. Coralie o ile a amogela lengwalo leo le bego le bolela gore mmagwe o be a babja moo e lego gore ge e ba Coralie a ka se tle gae, go ka direga gore a se sa bona mmagwe gape. Ka gona re ile ra rulaganya go tloga South-West Africa gomme re boele morago Australia. Ke moka selo se sengwe se ile sa direga​—⁠yona bekeng yeo re bego re tlo tloga ka yona,  ke ile ka amogela tumelelo e tšwago go babuši ba lefelong leo go tsena motse-toropong wa batho ba baso wa Katutura. Re be re tla dira’ng bjale? Re boetše tumelelo morago ka morago ga go tlaišega ka nywaga e šupago go e hwetša? Go be go le bonolo go bolela gore ba bangwe ba ka tšwela pele moo re tlogetšego gona. Eupša na ye e be e se tšhegofatšo e tšwago go Jehofa, karabo ya dithapelo tša rena?

Ke ile ka dira phetho kapejana. Ke be ke tla šala, ka go boifa gore go tlaišega ga rena go hwetša tumelelo ya go ba badudi go be go tla bewa kotsing ge e ba ka moka ga rena re be re tla ya Australia. Letšatšing le latelago, ke ile ka phumola peeletšo ya-ka ya sekepe gomme ka romela Coralie le Charlotte go ya Australia bakeng sa maikhutšo a lebaka le letelele.

Ge ba be ba sepetše, ke ile ka thoma go nea bohlatse go badudi ba motse-toropo wa batho ba baso. Kgahlego yeo e ilego ya bontšhwa e be e le e kgolo. Ge Coralie le Charlotte ba boa, batho ba mmalwa go tšwa motse-toropong wa batho ba baso ba be ba e-⁠ba gona dibokeng tša rena.

Ka nako ye, ke be ke e-⁠na le koloi ya kgale yeo ka yona ke bego ke kgona go tliša batho bao ba thabelago dibokeng. Ke be ke dira maeto a mane goba a mahlano bakeng sa seboka se sengwe le se sengwe, ke tšea batho ba šupago, ba seswai goba ba senyane leetong le lengwe le le lengwe. Ge motho wa mafelelo a be a e-⁠tšwa, Coralie o be a tla botšiša ka metlae gore: “Go sa šetše ba bakae ka mo fase ga setulo?”

Bakeng sa go atlega kudu modirong wa boboledi, re be re nyaka dipuku ka leleme la batho ba setlogo. Ka gona, ke bile le tokelo ya go rulaganya gore pampišana ya Bophelo Lefaseng le Lefsa e fetolelwe ka maleme a mane a lefelong leo: se-Herero, se-Nama, se-Ndonga le se-Kwanyama. Bafetoledi e be e le batho ba rutegilego bao re bego re ithuta Beibele le bona, eupša ke ile ka swanela go šoma le bona go kgonthišetša gore lefoko le lengwe le le lengwe le be le fetolelwa ka mo go nepagetšego. Se-Nama ke leleme leo le nago le tlotlontšu e lekanyeditšwego. Ka mohlala, ke be ke leka go hlalosa ntlha ya gore: “Mathomong Adama e be e le monna yo a phethagetšego.” Mofetoledi o ile a ingwaya hlogo gomme a re ga a kgone go gopola lentšu la se-Nama bakeng sa “go phethagala.” Mafelelong o ile a re: “Ke le hweditše. Mathomong Adama o be a swana le perekisi yeo e budulego.”

Re Kgotsofetše ka Legae la Rena Leo re le Abetšwego

Go šetše go fetile nywaga e ka bago 49 re fihlile nageng ye, yeo ga bjale e bitšwago Namibia. Ga go sa nyakega gore re hwetše tumelelo ya go tsena ditšhabeng tša batho ba baso. Namibia e bušwa ke mmušo o mofsa wo o theilwego molaotheong wa go se kgetholle. Lehono, re na le diphuthego tše kgolo tše nne tšeo di kopanelago ka Diholong tša Mmušo tše dibotse Windhoek.

Gantši re nagana ka mantšu ao re a kwelego Gilead a rego: “Dirang kabelo ya lena nageng e šele go ba legae la lena.” Go ya le ka tsela yeo Jehofa a ilego a lokiša ditaba, re kgodišegile gore e be e le thato ya gagwe gore naga ye e šele e be legae la rena. Re rata bana babo rena, ka ditšo tša bona tše di kgahlišago tšeo di fapa-fapanego. Re segile le bona ge ba be ba thabile gomme ra lla le bona ge ba be ba nyamile. Ba bangwe ba bao ba bego ba sa tšwa go thoma go kopanela bao re bego re ba rwala ka koloi gomme re ba iša dibokeng ga bjale ke dikokwane ka diphuthegong tša gabo bona. Ge re be re fihla nageng ye e kgolo ka 1953, go be go na le bagoeledi ba lefelong leo ba ka tlase ga ba lesome bao ba bego ba bolela ditaba tše dibotse. Go tloga mathomong ao a manyenyane, palo ya rena e oketšegile go fihla go ba ka godimo ga 1 200. Ka go rereša ga kholofetšo ya gagwe, Jehofa o neile kgolo moo rena le ba bangwe re ‘bjetšego le go nošetša.’​—⁠1 Ba-Korinthe 3:⁠6.

Ge re lebelela morago nywageng e mentši ya tirelo, go thoma kua Australia gomme ga bjale mo Namibia, nna le Coralie re na le maikwelo a tseneletšego a kgotsofalo. Re holofela le go rapela gore Jehofa o tla tšwela pele go re nea matla a go dira thato ya gagwe gona bjale le ka mo go sa felego.

Go hudugela kabelong ya rena kua Rockhampton, Australia

Lebopong ge re be re le tseleng ya go ya Sekolong sa Gilead

Go nea bohlatse kua Namibia go re tlišetša lethabo le legolo