Mehla e Kaone ya go Phela

GE O lebeletšane le maemo a lekago, na o hlologela “nako ya ge naga e sa letše”? Gona ela hloko mantšu a Kgoši e bohlale Salomo a re­go: “Se re: Mehla ya byalo e re’ng e phalwa ke ya kxalê? Yo bohlale xa’ latiše tšeo.”​—⁠Mmoledi 7:⁠10.

Ke ka baka la’ng Salomo a ile a nea keletšo ye? Ka gobane o be a tseba gore go ba le pono ya kgonthe ka mehla e fetilego ke thušo ya kgonthe go lebeletšaneng ka katlego le maemo a sa kgahlišego a mehla ya gona bjale. Ge e le gabotse bao ba hlologelago “nako ya ge naga e sa letše” ba ka lebala gore mehla yeo le yona e be e tletše ka mathata le gore bophelo le ka mohla e be e se bjo bo kgotsofatšago. Dilo tše dingwe di ka be di be di le kaone mehleng e fetilego, eupša mohlomongwe tše dingwe di be di se bjalo. Bjalo ka ge Salomo a bontšhitše, ga se ga bohlale go kgomarela ka tsela e sego ya kgonthe mehla e fetilego, ka ge go le molaleng gore re ka se ke ra fetoša dilo.

Na go ka ba le kotsi le ge e le efe ka go hlologela ka mo go feteletšego mehla e fetilego? Ee, ge e ba go re thibela go dumelelana le maemo le go tlwaelana le mehla ya gona bjale goba ge e ba go re thibela go lemoga ka tebogo mehla yeo re phelago go yona le kholofelo yeo re ka bago le yona.

Ge e le gabotse, ga bjale ke mehla e kaone ya go phela go sa šetšwe mathata a oketšegago a lefase. Ka baka la’ng? Ka gobane re kgaufsi le go phethagatšwa ga morero wa Modimo mabapi le lefase la rena le ditšhegofatšo tša go buša ga Mmušo wa gagwe ka khutšo. Beibele e holofetša gore: “Modimo ó tlo phomola mexôkxô ka moka mahlong a bôná; le lehu le ka se hlwê le e-⁠ba xôna; le xe e le manyami le dillô le bohloko, di ka se hlwê di e-⁠ba xôna; xobane tša pele di fetile.” (Kutollo 21:⁠4) Mehleng yeo ya maemo a lego kaone kudu, ga go na yo a tlago go ba le lebaka la go hlologela “nako ya ge naga e sa letše.”