Thabela Thuto ya Motho ka Noši ya Lentšu la Modimo

“Ke êlêlwa [“naganišiša ka,” NW] ditirô tša xaxo ka moka; ke akanya tše Wêna O di dirilexo.”​—⁠PSALME 77:⁠12.

1, 2. (a) Ke ka baka la’ng re swanetše go beela nako ka thoko bakeng sa go naganišiša? (b) Ke’ng seo se bolelwago ke “go naganišiša” le “go eleletša”?

KA GE re le barutiwa ba Jesu Kriste, re swanetše go tshwenyega kudu ka tswalano ya rena le Modimo le mabaka a rena a go Mo hlankela. Lega go le bjalo, lehono batho ba bantši ba phela bophelo bja leema-ema kudu moo ba se nago nako ya go naganišiša. Ba swaregile kudu ka mediro e sa kgaotšego ya dilo tše di bonagalago, go reka le go tsoma maipshino ka tsela e sego ya bohlale. Re ka phema bjang go dira mediro e bjalo ya lefeela? Bjalo ka ge re beela ka thoko nako e itšego letšatši le lengwe le le lengwe bakeng sa mediro ya bohlokwa e bjalo ka go ja le go robala, ka mo go swanago re swanetše go dumelela nako letšatši le lengwe le le lengwe bakeng sa go naganišiša ka mediro le ditirišano tša Jehofa.​—⁠Doiteronomio 8:⁠3; Mateo 4:⁠4.

² Na o ke o eme gore o naganišiše? Go naganišiša go bolela’ng? Pukuntšu e nngwe e hlalosa lentšu le e le “go lebiša tlhokomelo dikgopolong tša motho: go lebelela morago goba go eleletša.” Le gona lentšu “go eleletša” le bolela “go nagana ka: go lebelela morago . . . go nagana goba go ela hloko kudu-kudu ka setu, ka kelohloko le ka mo go tseneletšego.” Se se bolela’ng go rena?

3. Go dira tšwelopele ya moya go tswalana le eng ka go lebanya?

³ Gare ga mabaka a mangwe, se swanetše go re gopotša ka seo moapostola Paulo a se ngwaletšego mohlanka-gotee le yena Timotheo: “Ge ke dutše ke e-⁠tla, tšwela pele o ikgafela go baleng phatlalatša, go eletšeng le go ruteng. . . . Eleletša ka dilo tše; nwelela go tšona, gore tšwelopele ya gago e tle e bonagale go batho bohle.” Ee, tšwelopele le kgatelopele di be di letetšwe, gomme mantšu a Paulo a bontšhitše gore go be go na le tswalano e lebanyago magareng ga go eleletša ka ditaba tša moya le go dira tšwelopele. Se se swanago ke sa therešo lehono. E le gore re thabele kgotsofalo ya go dira tšwelopele ya moya, re sa dutše re swanetše ke go “eleletša” le go “nwelela” dilong tšeo di lego mabapi le Lentšu la Modimo.​—⁠1 Timotheo 4:​13-15, NW.

4. Ke didirišwa dife tšeo o ka di dirišago go go thuša go eleletša ka Lentšu la Jehofa ka mehla?

⁴ Nako e kaone ya gore o naganišiše e ithekgile ka lenaneo la gago le la lapa la gago. Ba bantši ba eleletša ka temana ya Beibele mesong ge ba bala ka pukwaneng ya Go Hlahloba Mangwalo ka Mehla. Ge e le gabotse, baithapi ba ka bago 20 000 magaeng a Bethele lefaseng ka bophara ba thoma letšatši la bona ka go hlahloba temana ya Beibele ya letšatši ka metsotso e 15. Gaešita le ge mesong e mengwe le e mengwe go e-⁠ba le ba sego kae feela bao ba neago ditlhaloso lapeng la Bethele, ba bangwe ka moka ba eleletša ka seo se bolelwago le seo se balwago. Dihlatse tše dingwe di eleletša ka Lentšu la Jehofa ge di le tseleng ya go ya mošomong. Di theetša dikhasete tša Beibele le tša dimakasine tša Morokami le Phafoga! tšeo di hwetšagalago ka maleme a mangwe. Basadi ba bantši bao ba šalago ka gae ba dira se ge ba dutše ba dira mešomo  ya ka ntlong. Ge e le gabotse, ba ekiša mopsalme Asafa yo a ngwadilego gore: “Ke xopola ’tirô tša Morêna. Ruri, ke xopola mehlôlô y’axo ya boxolo-xolo. Ke êlêlwa ditirô tša xaxo ka moka; ke akanya tše Wêna O di dirilexo.”​—⁠Psalme 77:​11, 12.

Boemo bja Kgopolo bjo Bobotse bo Tliša Mafelelo a Mabotse

5. Ke ka baka la’ng thuto ya motho ka noši e swanetše go ba bohlokwa go rena?

⁵ Mehleng ya rena ya dithelebišene, dibidio le di-computer, batho ba bantši ga ba sa bala kudu. Ka ntle le pelaelo ga se gwa swanela go ba bjalo go Dihlatse tša Jehofa. Go feta moo, go bala Beibele go swana le tsela ya bophelo yeo e re kgokaganyago le Jehofa. Nywaga e dikete e fetilego Jošua o ile a hlatlama Moše e le moetapele wa Isiraele. E le gore a šegofatšwe ke Jehofa, Jošua o ile a swanelwa ke go ipalela Lentšu la Modimo. (Jošua 1:⁠8; Psalme 1:​1, 2) Seo e sa dutše e le seo se nyakegago lehono. Lega go le bjalo, ka baka la go se be le thuto e lekanego, ba bangwe ba ka hwetša go bala go le thata goba e le morwalo. Ka gona, ke eng seo se ka re thušago gore re nyake go bala le go ithuta Lentšu la Modimo? Karabo e ka hwetšwa mantšung a Kgoši Salomo ao a begilwego go Diema 2:​1-⁠6. Hle bula Beibele ya gago gomme o bale ditemana tše. Ke moka re tla di ahla-ahla re le gotee.

6. Re swanetše go bontšha boemo bofe bja kgopolo ka tsebo ya go tseba Modimo?

⁶ Sa mathomo, re hwetša kgothatšo ye: “Ngwan’a-ka! Xe O ka dumêla dikeletšô tša-ka, ’me wa hlôkômêla ditaelô tša-ka, Xe bohlale O bo sêkêxêla tsêbê wa lebiša pelo y’axo mo xo lexo thlaloxanyô, . . . ” (Diema 2:​1, 2) Re ithuta’ng mantšung a? Re ithuta gore yo mongwe le yo mongwe wa rena o na le boikarabelo. Ela hloko kgonagalo ye e rego “xe O ka dumêla dikeletšô tša-ka.” Mo go gatelelwa kudu “ge o ka,” ka gobane batho ba bantši ga ba lebiše tlhokomelo Lentšung la Modimo. E le gore re hwetše lethabo go ithuteng Lentšu la Modimo, re swanetše go ikemišetša go amogela dikeletšo tša Jehofa le go di swara bjalo ka lehumo leo re sa nyakego gore le re lahlegele. Le ka mohla ga se ra swanela go dumelela mediro ya rena ya letšatši le letšatši go re dira gore re swarege kudu goba go re šitiša moo e bile re thomago go swara Lentšu la Modimo ka go se be le taba, gaešita le ka go le belaela.​—⁠Ba-Roma 3:​3, 4.

7. Ke ka baka la’ng re swanetše go ba gona dibokeng tša Bokriste le go ela hloko nako efe le efe ge go kgonega?

⁷ Na re tloga re “hlôkômêla” le go theetša ka kelohloko ge Lentšu la Modimo le hlaloswa dibokeng tša rena tša Bokriste? (Ba-Efeso 4:​20, 21) Na re ‘lebiša pelo’ e le gore re hwetše temogo? Mohlomongwe seboledi ga se seo se nago le phihlelo e ntši, eupša ge se dutše se ratha Lentšu la Modimo, se swanelwa ke gore re se theetše ka kelohloko. Go ba gona, e le gore re ele hloko bohlale bja Jehofa, re swanetše go ba gona dibokeng tša Bokriste nako efe le efe ge go kgonega. (Diema 18:⁠1) Nagana manyami a motho le ge e le ofe yoo a ka bago a ile a se be gona sebokeng ka phapošing ya ka godimo kua Jerusalema ka Pentekoste ya 33 C.E.! Gaešita le ge diboka tša rena e se tšeo di makatšago kudu go swana le seo, go ahla-ahlwa Beibele e lego puku ya rena ya motheo ya go ithuta. Ka gona, seboka se sengwe le se sengwe e ka ba tšhegofatšo go rena ge e ba re ela hloko le go bala ka Dibeibeleng tša rena ge go kgopelwa gore re bale.​—⁠Ditiro 2:​1-⁠4; Ba-Hebere 10:​24, 25.

8, 9. (a) Thuto ya motho ka noši e nyaka gore re dire’ng? (b) O ka bapiša bjang bohlokwa bja gauta le go kwešiša tsebo ya go tseba Modimo?

⁸ Mantšu a latelago a kgoši e bohlale a re: “Xe O ka bitša temoxô wa hlabošetša thlaloxanyô ’ntšu la xaxo, . . . ” (Diema 2:⁠3) Mantšu a a re botša boemo bofe bja kgopolo goba moya ofe? Go ba gona, a re botša ka kganyogo e tseneletšego ya go kwešiša Lentšu la Jehofa! A šupa kganyogo ya go ithuta ka kgopolo ya go hwetša temogo, go lemoga seo e lego thato ya Jehofa. Go ba gona, se se nyaka boiteko, gomme se se re lebiša mantšung le seswantšhong se se latelago sa Salomo.​—⁠Ba-Efeso 5:​15-⁠17.

⁹ O tšwela pele ka gore: “Xe O ka e tsoma [kwešišo] byalo ka leruô wa e nyakišiša bo-ka ’humô le le fihlilwexo, . . . ” (Diema 2:⁠4) Se se dira gore re nagane ka dilo tšeo banna bao ba bego ba šoma meepong ba di fihleletšego bao ka nywaga-kgolo e mentši ba tsomilego tšeo go thwego ke mafsika a bohlokwa a silifera le gauta. Batho ba ile ba bolayana ka baka la gauta. Ba bangwe ba feditše nako ka moka ya maphelo a bona ba leka  go e hwetša. Lega go le bjalo, gauta e na le bohlokwa bofe bja kgonthe? Ge e ba o be e timetše leganateng gomme o e-⁠hwa ka lenyora, o be o tla kgetha’ng: setsekana sa gauta goba meetse? Lega go le bjalo, batho ba tsomile gauta ka phišego e kgolo gakaakang, ka matla a yona ao e sego a kgonthe le ao a feto-fetogago! * Re swanetše go tsoma bohlale, temogo le kwešišo ya Modimo le thato ya gagwe ka mafolofolo a oketšegilego kudu gakaakang! Eupša mehola ya go tsoma mo go bjalo ke efe?​—⁠Psalme 19:​7-10; Diema 3:​13-⁠18.

10. Re ka hwetša’ng ge e ba re ithuta Lentšu la Modimo?

¹⁰ Tlhaloso ya Salomo e tšwela pele ka gore: “Ké mo O tl’o xo tseba xo boifa Morêna, wa fihlêla xo tseba Modimo.” (Diema 2:⁠5) A kgopolo e makatšago gakaakang​—⁠gore rena batho ba nago le sebe re ka fihlelela “xo tseba Modimo,” Jehofa, Morena yo a Phagamego wa legohle! (Psalme 73:​28; Ditiro 4:​24) Ka nywaga-kgolo bo-radifilosofi le bao go thwego ke dihlalefi tša lefase ba lekile go kwešiša dilo tše di makatšago ka bophelo le ka legohle. Lega go le bjalo, ba ile ba palelwa ke go fihlelela “xo tseba Modimo.” Ka baka la’ng? Gaešita le ge e be e dutše e hwetšagala ka nywaga e dikete ka Lentšung la Modimo e lego Beibele, ba e gana ka gore e bonolo kudu gomme ka go rialo ba palelwa ke go e amogela le go e kwešiša.​—⁠1 Ba-Korinthe 1:​18-⁠21.

11. Mehola e mengwe ya thuto ya motho ka noši ke efe?

¹¹ Kgothatšo e nngwe yeo Salomo a e gatelelago ke e rego: “Bohlale motho ó bo newa ke Modimo; tsebô le temoxô di tšwa molomong wa xaxwe.” (Diema 2:⁠6) Jehofa o nea ka bolokologi le ka go rata bohlale, tsebo le temogo mothong le ge e le ofe yo a ikemišeditšego go di tsoma. Ka ntle le pelaelo re na le mabaka ka moka a go tšeela godimo thuto ya motho ka noši ya Lentšu la Modimo, gaešita le ge e nyaka boiteko, boitayo le boikgafo. Bonyenyane re na le dikopi tšeo di gatišitšwego tša Beibele gomme ga go nyakege gore re dire dikopi tšeo di ngwadilwego ka letsogo bjalo ka ge ba bangwe mehleng ya bogologolo ba ile ba dira!​—⁠Doiteronomio 17:​18, 19.

Go Sepela ka mo go Swanetšego go Jehofa

12. Morero wa rena wa go phegelela tsebo ya go tseba Modimo e swanetše go ba ofe?

¹² Morero wa rena wa go ba le thuto ya motho ka noši e swanetše go ba ofe? Na ke go ba ba  bakaone go feta ba bangwe? Go bontšha tsebo e kgolo? Ge e le gabotse, na ke go fetoga di-encyclopedia tše di sepelago? Aowa. Morero wa rena ke go ba Bakriste bao ba dirišago seo ba ithutilego sona dilong ka moka, ka mehla re loketše go thuša ba bangwe ka moya o lapološago wa Kriste. (Mateo 11:​28-30) Moapostola Paulo o lemošitše ka gore: “Temoxô yôna e a xoxomoša; se se axišaxo ké leratô.” (1 Ba-Korinthe 8:⁠1) Ka gona, re swanetše go ba le boemo bja kgopolo bja boikokobetšo bjo Moše a ilego a bo bontšha ge a be a botša Jehofa gore: “Ntsebišê tsela ya xaxo hlê, xore ke Xo tsebê, xe O fêla O ntebeletše ka botho.” (Ekisodo 33:​13) Ee, re swanetše go kganyoga tsebo e le gore re thabiše Modimo, e sego go kgahliša batho. Re nyaka go ba bahlanka ba Modimo bao ba swanelegago le bao ba ikokobeditšego. Re ka fihlelela bjang pakane yeo?

13. Ke eng seo se nyakegago e le gore motho e be mohlanka wa Modimo yo a swanelegago?

¹³ Paulo o eleditše Timotheo mabapi le kamoo a ka kgahlišago Modimo ka gore: “Se O swanetšexo xo se phêxêlêla ké xore Madimo a bônê Ò le mmotexi, Ò le modiri e a se naxo bosodi, e a tsebaxo xo ratha Lentšu la therešô à sa kxopamiše.” (2 Timotheo 2:​15) Polelwana e rego ‘go ratha ka go se kgopamiše’ e tšwa lediring la Segerika leo le bopilwego ka mantšu a mabedi goba go feta moo ao a kwešišegago gabonolo, yeo mathomong e bego e bolela “go segwa thwii,” goba “go sega thwii.” (Kingdom Interlinear) Go ya ka ba bangwe, se se šišinya kgopolo ya moroki yo a segago lešela go ya ka mosego, ya molemi yo a lemago diforo ka terekere mašemong, le tše dingwe. Ditiragalong ka bobedi, mafelelo e swanetše go ba selo seo se lego thwii. Ntlha ke gore e le gore a be mohlanka wa Modimo yo a swanelegago le yo a amogelwago, Timotheo o ile a swanelwa ke go “phêxêlêla” go kgonthišetša gore thuto ya gagwe le boitshwaro bja gagwe di be di dumelelana le lentšu la therešo.​—⁠1 Timotheo 4:⁠16.

14. Thuto ya rena ya motho ka noši e swanetše go kgoma bjang seo re se dirago le seo re se bolelago?

¹⁴ Paulo o ile a bontšha ntlha e swanago ge a be a kgothaletša Bakriste-gotee le yena ba kua Kolose gore ba “swarê ka tsela ye e loketšexo ba Morêna, e bê xo mo kxahla xohle” ka “xo enywa dienywa ka medirô e botse yohle, [ba] tšwêlêla pele tsebong ya xo tseba Modimo.” (Ba-Kolose 1:​10) Mo Paulo o tswalanya go swanelega go Jehofa le “xo enywa dienywa ka medirô e botse yohle” gotee le go “tšwêlêla pele tsebong ya xo tseba Modimo.” Ka mantšu a mangwe, seo se lego bohlokwa go Jehofa ke gore re tšeela tsebo godimo gakaakang le gore re kgomarela kgaufsi gakaakang Lentšung la Modimo go seo re se dirago le seo re se bolelago. (Ba-Roma 2:​21, 22) Se se bolela gore thuto ya rena ya motho ka noši e swanetše go kgoma tsela yeo re naganago ka yona le boitshwaro bja rena ge e ba re nyaka go kgahliša Modimo.

15. Re ka šireletša le go laola bjang menagano le dikgopolo tša rena?

¹⁵ Lehono Sathane o ikemišeditše go senya boemo bja rena bja moya ka go hlohleletša ntwa ya monagano. (Ba-Roma 7:​14-25) Ka gona, re swanetše go šireletša le go laola dikgopolo le menagano ya rena e le gore re itlhatsele re swanelega go Modimo wa rena Jehofa. Sebetša seo re nago le sona ke ‘tsebo ya go tseba Modimo’ yeo e kgonago go “tlêma menaxanô xore e kwê Kriste.” Le ke lebaka le legolo la gore re ele hloko thuto ya ka mehla ya Beibele, ka ge re nyaka go tloša boithati le dikgopolo tša nama ka menaganong ya rena.​—⁠2 Ba-Korinthe 10:⁠5.

 Dithušo tša Gore re Kwešiše

16. Re ka ikhola bjang ge Jehofa a re ruta?

¹⁶ Dithuto tša Jehofa di tliša mehola ya moya le ya nama. Ga se tšeo di tšwafišago, tša thuto ya tumelo yeo e se nago mohola. Ka gona, re bala gore: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.” (Jesaya 48:​17) Jehofa o dira bjang gore re kgone go sepela tseleng ya gagwe e holago? Sa mathomo, re na le Lentšu leo le buduletšwego, Beibele e Kgethwa. Ye ke puku ya rena ya go ithuta ya motheo, yeo re e balago ka mehla. Ke ka baka leo e lego mo go botse go bula ka Beibeleng ge re le dibokeng tša Bokriste gomme ra bala gotee le seboledi. Mafelelo a holago a go dira se a ka bonwa ka pegong ya molaki wa Ethiopia yeo e begilwego go Ditiro kgaolo 8.

17. Go diragetše’ng go molaki wa Ethiopia, gomme se se bontšha’ng?

¹⁷ Molaki wa Ethiopia o be a sokologetše Bojudeng. O be a dumela e le ka kgonthe go Modimo, gomme o ile a ithuta Mangwalo. Ge a be a sepela ka koloi ya gagwe, o be a bala temana ya Jesaya ge Filipi a be a e-⁠ya go yena gomme a mmotšiša gore: “Afa tše O di balaxo O a di kwa?” Molaki o ile a araba ka go re’ng? “Xomme nka kxôna bya’ng xe ke se na wa xo nthlahla tseleng? A kxopêla Filipi a re a namêlê a dulê le yêna.” Ke moka, Filipi a hlahlwa ke moya o mokgethwa o ile a thuša molaki go kwešiša boporofeta bja Jesaya. (Ditiro 8:​27-35) Se se bontšha’ng? Se bontšha gore go ipalela Beibele re nnoši ga se mo go lekanego. Jehofa ka moya wa gagwe o diriša sehlopha sa molaki yo a botegago le yo bohlale go re thuša go kwešiša Lentšu la gagwe ka nako e swanetšego. Se se dirwa bjang?​—⁠Mateo 24:​45-47; Luka 12:⁠42.

18. Sehlopha sa molaki yo a botegago le yo bohlale se re thuša bjang?

¹⁸ Gaešita le ge sehlopha sa molaki se hlaloswa e le se se ‘botegago le se bohlale,’ Jesu ga se a bolela gore e tla ba se se phethagetšego. Sehlopha se sa bana babo rena ba botegago se sa dutše se dirilwe ka Bakriste bao ba sa phethegago. Gaešita le ka maikemišetšo a mabotse, ba ka dira diphošo, ka ge banna ba bjalo ka dinako tše dingwe ba ile ba dira diphošo lekgolong la pele la nywaga. (Ditiro 10:​9-15; Ba-Galatia 2:​8, 11-14) Lega go le bjalo, boikemišetšo bja bona ke bjo bobotse, gomme Jehofa o ba diriša go re nea dithušo tša go ithuta Beibele bakeng sa go aga tumelo ya rena Lentšung la Modimo le dikholofetšong tša gagwe. Sedirišwa sa motheo bakeng sa thuto ya motho ka noši seo molaki a re neilego sona ke New World Translation of the Holy Scriptures. Ga bjale e hwetšagala e feletše goba e sa felela, ka maleme a 42 gomme go šetše go gatišitšwe dikopi tše dimilione tše 114 ka dikgatišo tše mmalwa. Re ka e diriša bjang ka mo go holago thutong ya rena ya motho ka noši?​—⁠2 Timotheo 3:​14-⁠17.

19. Ke dibopego dife tše dingwe tša New World Translation​​—⁠With References tšeo di ka thušago thutong ya motho ka noši?

¹⁹ Ka mohlala, lebelela New World Translation of the Holy Scriptures​—⁠With References. E na le ditšhupetšo, mengwalo ya tlase, tšhupane e ­kgaoleditšwego ka mokgwa wa “Bible Words  Indexed” le “Footnote Words Indexed,” le Mametletšo yeo e akaretšago dihlogo tše 43, go akaretša mebapa le ditšhate. Le gona go na le “Intro­duc­tion” (Matseno), ao a hlalosago methopo e mentši yeo e dirišitšwego phetolelong ye ya moswana-noši ya Beibele. Ge e ba e hwetšagala ka leleme leo o ka le kwešišago, leka ka mo o ka kgonago go tlwaelana gabotse le dibopego tše gomme o di diriše. Go ba gona, Beibele ke yona ya mathomo lenaneong la rena la go ithuta, gomme ka go New World Translation re na le phetolelo yeo e gatelelago ka mo go swanetšego leina la Modimo ka ge e gatelela pušo ya Mmušo wa Modimo.​—⁠Psalme 149:​1-⁠9; Daniele 2:​44; Mateo 6:​9, 10.

20. Ke dipotšišo dife ka thuto ya rena ya motho ka noši tšeo ga bjale di nyakago go arabja?

²⁰ Ga bjale re ka botšiša gore: ‘Ke thušo efe e oketšegilego yeo re e nyakago bakeng sa go kwešiša Beibele? Re ka dira bjang nako bakeng sa thuto ya motho ka noši? Re ka dira bjang gore go ithuta ga rena e be mo go atlegago kudu? Go ithuta ga rena go swanetše go kgoma ba bangwe bjang?’ Sehlogo se se latelago se tla ahla-ahla dibopego tše tša bohlokwa tša tšwelopele ya rena ya Bokriste.

Ditho tša lapa la Bethele di hwetša e le mo go matlafatšago moyeng go thoma letšatši le lengwe le le lengwe ka go ahla-ahla temana ya Beibele

Nako ya bohlokwa e ka dirišwa ka go theetša dikhasete tša Beibele ge re le leetong

Batho ba ile ba šoma ka thata le ka lebaka le letelele bakeng sa go hwetša gauta. O dira boiteko bjo bokaaka’ng bakeng sa go ithuta Lentšu la Modimo?

Courtesy of California State Parks, 2002

Beibele ke lehumo leo le ka lebišago bophelong bjo bo sa felego

Na o a Gopola?

• Ke’ng seo se bolelwago ke “go naganišiša” le “go eleletša”?

• Re swanetše go ba le boemo bofe bja kgopolo ka thuto ya Lentšu la ­Modimo?

• Morero wa rena e swanetše go ba ofe thutong ya rena ya motho ka noši?

• Re na le dithušo dife tša go re thuša go kwešiša Beibele?