Tiišang Diatla tša Lena

KA Beibeleng, seatla se bolelwa ka makga a mmalwa. Diema tšeo di akaretšago seatla di dirišwa ka ditsela tše di fapa-fapanego. Ka mohlala, seatla se se hlwekilego se bolela go se be le molato. (2 Samuele 22:​21; Psalme 24:​3, 4) Go bula seatla go bontšha go nea ba bangwe. (Doiteronomio 15:​11; Psalme 145:​16) Motho yo a beago bophelo bja gagwe kotsing go thwe o bea moya wa gagwe ka seatleng sa gagwe. (1 Samuele 19:⁠5, NW) Go repha diatla go bolela go nyama. (2 Koronika 15:⁠7) Go matlafatša seatla sa motho go bolela go tutueletšega le go matlafaletšwa go gata mogato.​—⁠1 Samuele 23:​16, PK.

Lehono go na le go nyakega mo go akgofilego bakeng sa go matlafatša diatla tša rena. Re phela ‘dinakong tše hlobaetšago tšeo go lego thata go lebeletšana le tšona.’ (2 Timotheo 3:⁠1, bapiša le NW.) Tshekamelo ya batho ke gore ge re nyama re nyaka go tlogela, ra rephiša diatla tša rena. Ke mo go tlwaelegilego go bona bafsa bao ba lego mahlalagading ba tlogela sekolo, banna ba tlogela malapa a bona gomme bomma ba lahla bana ba bona. Re le Bakriste, re swanetše go matlafatša diatla tša rena e le gore re kgone go kgotlelela diteko tšeo re lebeletšanago le tšona tirelong ya rena go Modimo. (Mateo 24:​13) Ka go dira bjalo, re thabiša pelo ya Jehofa.​—⁠Diema 27:⁠11.

Kamoo Diatla di Matlafatšwago ka Gona

Ba-Juda ba mehleng ya Esera ba ile ba swanela ke go matlafatša diatla tša bona e le gore ba phethe go agwa lefsa ga tempele ya Jehofa kua Jerusalema. Diatla tša bona di be di tla matlafatšwa bjang? Pego e re: “Ba dira monyanya wa matšatši a šupaxo wa dinkxwa tše di sa omêlwaxo, ba o bina bà thabile, xobane Morêna o be a ba thabišitše ka xo letafatša pelo ya kxoši ya Asuri ya ba thekxa modirong wa Ngwakô wa Modimo, Modimo wa Isiraele.” (Esera 6:​22) Ka mo go kwagalago, Jehofa o dirišitše matla a gagwe a šomago go letefatše “kxoši ya Asuri” go dumelela batho ba Modimo go boa, gomme O ile a tutuetša moya wa batho e le gore ba ka fetša modiro wo ba bego ba o thomile.

Ka morago, ge go be go nyakega gore maboto a Jerusalema a tsošološwe, Nehemia o ile a matlafatša diatla tša bana babo bakeng sa modiro. Re bala gore: “Ka ba botša ka mo seatla sa Modimo se nkêkêlêlaxo, le mantšu ao kxoši e mpoditšexo ôna. ’Me bôná ba re: Eriyeng, re axê! Ba tiišana xo dira modirô o mobotse woo.” Ka diatla tše di matlafaditšwego, Nehemia le ba-Juda gotee le yena ba ile ba kgona go aga lefsa maboto a Jerusalema ka matšatši a 52!​—⁠Nehemia 2:​18; 6:​9, 15.

Ka mo go swanago, Jehofa o matlafatša diatla tša rena go bolela ditaba tše dibotse tša Mmušo. (Mateo 24:​14, NW) O dira bjalo ka go ‘re hlama ka dilo tšohle tše dibotse gore re dire thato ya gagwe.’ (Ba-Hebere 13:​21, bapiša le NW.) O re neile ditlabakelo tša maemo a godimo. Re na le Beibele le dipuku tše di theilwego Beibeleng, dimakasine, diporoutšha, dipampišana gotee le dikhasete le dikhasete tša bidio e le gore re di diriše go fihlelela batho lefaseng ka bophara. Ge e le gabotse, dikgatišo tša rena di hwetšagala ka  maleme a fetago 380. Go oketša moo, ka diboka tša phuthego le ka dikopano tše dinyenyane le tše dikgolo, Jehofa o nea thuto ya pušo ya Modimo le tlwaetšo ya kamoo re ka dirišago ditlabakelo tše tše dibotse go phethagatšeng bodiredi bja rena.

Gaešita le ge Jehofa a matlafatša diatla tša rena ka ditsela tše dintši gakaakaa, ka lehlakoreng le lengwe o letetše gore re katane. Gopola seo moporofeta Elisa a se boditšego Kgoši Joase yo a bego a tlile go Elisa bakeng sa go kgopela thušo ya go lwa le madira a Siria. Elisa o ile a botša kgoši gore e tšee mesebe gomme e hlabe lefase ka yona. Pego ya Beibele e re: “A le tia xararo a kxaotša. Monna wa Modimo a napa a mo xalefêla a re: Xe O ka be O tiile lefase xa-hlano, O ka be O tlo fenya Ba-Siria wa ba fediša; Ba-Siria byale O tlo ba fenya xa-raro fêla.” (2 Dikxoši 13:​18, 19) Ka go palelwa ke go katana ka mafolofolo, Joase o bile le katlego e lekanyeditšwego go lweng le ba-Siria.

Molao wa motheo o swanago o šoma le go rena ge e ba re nyaka go phetha seo Jehofa a re neilego sona gore re se dire. Go e na le go tshwenyega ka mapheko ao a lego tseleng ya rena goba ka gore kabelo e ka be e le thata gakaakang, re swanetše go e dira ka mafolofolo le ka pelo ka moka. Re swanetše go matlafatša diatla tša rena gomme re ithekge ka Jehofa bakeng sa thušo.​—⁠Jesaya 35:​3, 4.

Jehofa o tla Matlafatša Diatla tša Rena

Jehofa a ka se palelwe ke go re thuša le go matlafatša diatla tša rena gore re dire thato ya gagwe. Go ba gona, Modimo a ka se ke a dira mohlolo gomme a re direla dilo ka moka. O letetše gore re dire karolo ya rena​—⁠go bala Beibele ka mehla, go lokišeletša le go ba gona dibokeng ka mehla, go tšea karolo bodireding ka mehla kamoo re ka kgonago ka gona le go mo rapela ka go se kgaotše. Ge e ba re kgatha tema ya rena ka potego le ka mafolofolo ge re sa na le sebaka, Jehofa o tla re nea matla a go dira seo a letetšego gore re se dire.​—⁠Ba-Filipi 4:⁠13.

Nagana ka taba ya Mokriste yo mongwe yo a ilego a lahlegelwa ke mosadi wa gagwe gotee le mmagwe lehung ka ngwaga o tee. O be a sa le bohlokong ge ngwetši ya gagwe e be e tlogela morwa wa gagwe gomme e tlogela tsela ya Bokriste ya bophelo. Ngwanabo rena yo o itše: “Ke ithutile gore re ka se ikgethele diteko le nako ya tšona goba gore di tla direga gantši gakaakang.” O hwetša bjang matla a go tšwela pele? “Thapelo le thuto ya motho ka noši e bile dithušo tše dikgolo tšeo di nthušitšego go phologa. Le gona thekgo ya bana babo rena ba moya le dikgaetšedi e nkhomoditše kudu. Go feta tšohle, ke lemogile bohlokwa bja go ba le tswalano e botse le Jehofa pele ga ge maemo a thata a ka tšwelela.”

Go sa šetšwe gore phihlelo ya gago ke efe bophelong, ikemišetše go bota Jehofa ka mo go feletšego le go diriša gabotse ditokišetšo ka moka tšeo a di dirago bakeng sa go matlafatša diatla tša gago. Ke moka o tla kgona go nea Jehofa tirelo ya maemo a godimo gomme ka go rialo wa tliša theto le tumišo leineng la gagwe le lebotse.​—⁠Ba-Hebere 13:⁠15.

Ka go palelwa ke go katana ka mafolofolo, Joase o bile le katlego e lekanyeditšwego go lweng le ba-Siria