Dithuto go tšwa Pegong ya Matswal o a Jesu

BATHO ba dimilione ba kgahlišwa ke ditiragalo tše di dikologilego matswalo a Jesu. Se se bonwa ditiragatšong tše dintši tša Matswalo a Jesu tše di bontšhwago le dipapadi tša Matswalo a Jesu tšeo di diragatšwago lefaseng ka bophara nakong ya Keresemose. Gaešita le ge e le tše di kgahlišago, ditiragalo tše di dikologilego matswalo a Jesu ga se tša begwa ka Beibeleng bakeng sa go tloša batho bodutu. Go e na le moo, di hlama karolo ya Mangwalo ka moka ao Modimo a a buduletšego go re ruta le go lokiša ditaba.​—⁠2 Timotheo 3:⁠16.

Ge nkabe Modimo a be a nyaka gore Bakriste ba bine matswalo a Jesu, gona Beibele e be e tla nea letšatši-kgwedi la go lebanya. Na e a le nea? Ka morago ga go bolela gore Jesu o belegwe ka nako ya ge badiši ba be ba le merakeng bošego gomme ba letile mehlape ya bona, seithuti sa Beibele sa lekgolong la bo-19 la nywaga e lego Albert Barnes se phethile ka gore: “Go molaleng gore Mophološi wa rena o belegwe pele ga di-25 tša December . . . Ka nako yeo go a tonya, kudu-kudu tikologong e phagamego le ya dithaba yeo e lego kgaufsi le Betlehema. Modimo o utile nako ya matswalo a [Jesu] . . . Le gona ge nkabe go be go le bohlokwa go tseba nako; Modimo a ka be a ile a boloka pego ya yona.”

Ka mo go fapanego, bangwadi ba Diebangedi tše nne ba re botša ka letšatši leo Jesu a hwilego ka lona. O hwile ka letšatši la Paseka, yeo e bego e binwa ka di-14 tša kgwedi ya ba-Juda ya Nisani, ka seruthwane. Go feta moo, Jesu o ile a laela balatedi ba gagwe ka go lebanya gore ba bine letšatši leo e le go mo gopola. (Luka 22:​19) Beibele ga e na taelo ya gore re bine letšatši la matswalo a Jesu, goba gore re bine letšatši la matswalo a motho le ge e le ofe yo mongwe. Ka manyami, dingangišano  tša mabapi le letšatši-kgwedi tša matswalo a Jesu di šira ditiragalo tša bohlokwa kudu tšeo di diragetšego mo e ka bago ka nako yeo.

Batswadi Bao ba Kgethilwego ke Modimo

Gare ga malapa a dikete kua Isiraele, Modimo o kgethile batswadi ba mohuta ofe gore ba godiše Morwa wa gagwe? Na O ile a lebelela dilo tše bjalo ka botumo le lehumo di le bohlokwa? Aowa. Go e na le moo, Jehofa o ile a ela hloko dika tša moya tša batswadi. Ela hloko kopelo ya Maria ya tumišo bjalo ka ge e begilwe go Luka 1:​46-55, yeo a ilego a e opela ka morago ga go botšwa ka tokelo ya gagwe ya go ba mmago Mesia. Gare ga dilo tše dingwe o itše: “Pelo ya-ka e rêta Morêna . . . Ó bone bobôtlana bya nna molata w’axwe.” Ka boikokobetšo o ile a itebelela e le ‘mmotlana,’ molata wa Jehofa. Sa bohlokwa kudu ke gore mantšu a mabotse a tumišo kopelong ya Maria a utolla gore e be e le motho wa moya yo a bego a e-⁠na le tsebo e botse ya Mangwalo. Gaešita le ge e be e le setlogolo sa Adama se se belegetšwego sebeng, e be e le kgetho e swanetšego go ba mma wa lefaseng wa Morwa wa Modimo.

Go thwe’ng ka monna wa Maria, yo a ilego a ba tatago Jesu wa mogodiši? Josefa e be e le monna yo a nago le tsebo ya go betla e holago. Ka baka la go rata ga gagwe go šoma ka thata ka diatla tša gagwe, o ile a kgona go fepa lapa leo mafelelong le bilego le barwa ba bahlano le bonyenyane barwedi ba babedi. (Mateo 13:​55, 56) Josefa e be e se mohumi. Ge go be go fihlile nako ya gore Maria a neele morwa wa gagwe wa leitšibolo tempeleng ya Modimo, Josefa o swanetše go ba a ile a ikwa a nyamile gore a ka se kgone go neela sehlabelo sa nku. Go e na le moo, ba ile ba swanela ke go diriša tokišetšo ya badiidi. Mabapi le mmago lesea la morwa, molao wa Modimo o itše: “Xe a ka hlaêlêlwa ke xo nthša nku, xôna a tšišê maebana a mabedi, xoba mekurwanyana e mebedi; le lengwê e bê la sehlabêlô, le lengwê e bê la selobá; moperisita ó tlo mo dirêla poêlanyô a sêkêxa.”​—⁠Lefitiko 12:⁠9; Luka 2:​22-⁠24.

Beibele e re Josefa e be “è le yo boló.” (Mateo 1:​19) Ka mohlala, ga se a ka a ba le dikopano tša botona le botshadi le mosadi wa gagwe wa kgarebe go fihlela ka morago ga matswalo a Jesu. Se se thibetše go se kwešišane le ge e le gofe mabapi le gore yo e lego Tatago Jesu wa kgonthe e be e le mang. Go phema ditswalano tša kopano ya botona le botshadi go banyalani bao ba sa tšwago go nyalana mola ba dula ka ntlong e tee go swanetše go ba go be go se bonolo, eupša go bontšhitše gore bobedi bja bona ba be ba tšeela godimo tokelo ya go kgethelwa go godiša Morwa wa Modimo.​—⁠Mateo 1:​24, 25.

Ka go swana le Maria, Josefa e be e le motho yo a tšeelago godimo dilo tša moya. Ngwaga o mongwe le o mongwe o be a emiša modiro gomme a sepela le lapa la gagwe leeto la matšatši a mararo la go tloga Natsaretha go ya Jerusalema bakeng sa go ba gona monyanyeng wa ngwaga le ngwaga wa Paseka. (Luka 2:​41) Le gona, Josefa o swanetše go ba a ile a tlwaeletša Jesu yo monyenyane mokgweng wa go tšea karolo borapeding sinagogeng ya lefelong leo bekeng e nngwe le e nngwe, moo Lentšu la Modimo le bego le balwa le go hlaloswa. (Luka 2:​51; 4:​16) Ka gona, ga go na pelaelo gore Modimo o be a kgethetše Morwa wa gagwe mma wa lefaseng le tate wa mogodiši bao ba swanetšego.

Tšhegofatšo e Kgolo go Badiši ba Ikokobeditšego

Go sa šetšwe bothata bjo mosadi wa gagwe a bego a lebeletšane le bjona, yoo ga bjale a bego a na le dikgwedi tše senyane a imile, Josefa o ile a tšea leeto la go ya motseng wa bo-rakgolokhukhu ba gagwe gore a yo ngwadišwa, ka go dumelelana  le taelo ya Kesara. Ge banyalani ba be ba fihla Betlehema, ga se ba kgona go hwetša madulo motseng wo o bego o tletše. Maemo a ile a ba gapeletša gore ba diriše setala, moo Jesu a belegetšwego gona gomme a robatšwa ka legopong. E le go matlafatša tumelo ya bona, Jehofa o ile a nea batswadi ba ikokobeditšego kgonthišetšo ya gore matswalo a e be e tloga e le thato ya Modimo. Na o ile a romela baemedi ba bagolo ba tumilego go tšwa Betlehema go tla go kgonthišetša banyalani ba? Aowa. Go e na le moo, Jehofa Modimo o ile a utolla taba go badiši bao ba bego ba šoma ka thata bao ba feditšego bošego ba le ka ntle ba letile mehlape ya bona.

Morongwa wa Modimo o ile a tšwelela go bona gomme a ba botša gore ba ye Betlehema, moo ba bego ba tla hwetša Mesia yo a sa tšwago go belegwa a “letše lexopong.” Na banna ba ba ikokobeditšego ba be ba tšhošitšwe goba ba lewa ke dihlong tša go kwa gore Mesia yo a sa tšwago go belegwa o be a le ka setaleng? Ga go bjalo le gatee! Ka ntle le go dika-dika, ba ile ba tlogela mehlape ya bona gomme ba ya Betlehema. Ge ba hweditše Jesu, ba ile ba laodišetša Josefa le Maria seo morongwa wa Modimo a se boletšego. Ka ntle le pelaelo se se ile sa matlafatša tumelo ya banyalani ya gore dilo ka moka di be di direga ka tsela yeo Modimo a bego a rerile ka gona. Ka lehlakoreng la bona, “badiši ba xoma bà rêta Modimo ba Mo tumiša ka tšohle tše ba di kwilexo le tše ba di bonexo.” (Luka 2:​8-20) Ee, ka go utollela badiši ba ba boifago Modimo ditaba, Jehofa o be a dirile kgetho e nepagetšego.

Go tšwa go se se lego ka mo godimo, re ithuta gore re swanetše go ba batho ba mohuta ofe e le gore re thabele go amogelwa ke Jehofa. Ga se ra swanela go tsoma botumo goba lehumo. Go e na le moo, ka go swana le Josefa, Maria le badiši, re swanetše go kwa Modimo le go hlatsela lerato la rena la go mo rata ka go bea dikgahlego tša moya pele ga dilo tše di bonagalago. Ka kgonthe, go na le dithuto tše dibotse tšeo re ka ithutago tšona ka go naganišiša ka pego ya ditiragalo tše di diragetšego mo e ka bago nakong ya matswalo a Jesu.

Go neela ga Maria maebana a mabedi go bontšha’ng?

Modimo o ile a kgetha go utollela badiši ba sego kae ba ba ikokobeditšego matswalo a Jesu