Kgotlelelo ya Gagwe e Ile ya Putswa

Batho ba bantši ba dipelo tše di lokilego ba nyaka gore baratiwa ba bona ba ithute ka morero wa Modimo gomme ba be le bophelo bjo bo thabišago. Ge motho a ineela go Modimo, batho ba bangwe, ba banyenyane le ba bagolo ba ka be ba ile ba thuša motho yoo go dira phetho yeo e bohlale ka boitshwaro bja bona bjo bobotse. Seo se bile bjalo ka Jearim, ngwanenyana yo a lego nywageng ya mahlalagading wa kua Mexico yoo a ilego a nea bana babo rena lengwalo le kopanong ya letšatši le le kgethegilego ya Dihlatse tša Jehofa:

“Ke nyaka go abelana le lena lethabo la-ka. E re ke le botšeng lebaka. Nywaga e 18 e fetilego, pele ga ge ke belegwa, batswadi ba-ka ba ile ba ithuta therešo. Mma o ile a dira tšwelopele, gomme ka morago nna le kgaetšedi ya-ka re ile ra dira bjalo. Re ile ra rapela Jehofa re le gotee gore tate le yena a tsene tseleng ya bophelo. Go fetile nywaga e 18, gomme lehono ke letšatši le le kgethegilego kudu go rena. Tate o a kolobetšwa. Ke leboga Jehofa gore ga se a tliša bofelo pele ga ge go fihla lebaka le le e lego kgale le letetšwe. Ke a leboga Jehofa!”

Go theoša le nywaga, lapa la gabo ngwanenyana yo yo mofsa le be le dutše le naganne ka molao wa motheo wo o lego keletšong e buduletšwego ya 1 Petro 3:​1, 2, wo o rego: “Le lena Basadi, bušwang ke banna ba lena, xore xe xo na le ba ba xanaxo xo kwa Lentšu, ba tlê ba ruiwê ka xo bôna tsela ye e swerwexo ke basadi, xò se lentšu le le bolêlwaxo, xe ba lemoxile tsela ya lena è le ya xo boifa le xo ila thšila.” Le gona ka ntle le pelaelo Jearim yo mofsa o ile a diriša mantšu a Doiteronomio 5:​16 a rego: “Xodiša tat’axo le mm’axo, byalo ka xe Morêna Modimo wa xaxo a Xo laetše.” Go diriša melao ya motheo e bjalo le go leta Jehofa ka go se fele pelo ka ntle le pelaelo go ile gwa tlišetša Jearim le lapa la gabo ditšhegofatšo.