Phihlelo

Ngwalwana Leo le Fetotšego Bophelo Bja-ka

KA GE GO ANEGA IRENE HOCHSTENBACH

Se se diragetše mantšiboeng a Labobedi ka ngwaga wa 1972. Ke be ke e-⁠na le nywaga e 16 gomme ke be ke sepetše le batswadi ba-ka go ya sebokeng sa bodumedi kua Eindhoven, motseng wo o lego profenseng ya Brabant, kua Netherlands. Ke ile ka ikwa ke sa šireletšega gomme ke ile ka duma ge nkabe ke be ke le lefelong le lengwe. Ke moka basadi ba babedi ba bafsa ba ile ba nnea lengwalwana leo le nago le molaetša o rego: “Irene yo a rategago, re tla rata go go thuša.” Ga se ka ka ka lemoga gore lengwalwana leo le be le tla fetoša bophelo bja-ka. Eupša pele ga ge ke hlalosa seo se diragetšego ka morago, anke ke le botšeng se sengwe ka setlogo sa-ka.

KE BELEGETŠWE sehlakahlakeng sa Belitung, kua Indonesia. Ke gopola e mengwe ya medumo ya sehlakahlaka seo sa molatšatšing​—go gwaša ga dihlare tša mepalema ge phefo e foka, go elela ga bosele ga noka e lego kgaufsi, lesego la bana bao ba bapalago go dikologa ntlo gotee le modumo wa mmino ka ntlong ya gešo. Ka 1960, ge ke be ke e-⁠na le nywaga e mene, lapa la gešo le ile la huduga Indonesia la ya Netherlands. Re ile ra sepela leeto le letelele ka sekepe, gomme modumo woo ke o gopolago ka mo go kgethegilego ke wa sebapadišwa sa-ka se se rategago seo ke ilego ka sepela le sona​—ra-disorokisi yo monyenyane yo a bego a e-⁠na le meropa. Ge ke e-⁠na le nywaga e šupago, ke ile ka ba sefoa ka baka la bolwetši gomme ga e sa le go tloga ka nako yeo ga se ka ka ka kgona go kwa medumo le ge e le efe. Ke šaletšwe feela ke dikgopolo tša medumo yeo.

Go Gola ke le Sefoa

Ka baka la tlhokomelo e lerato ya batswadi ba-ka, mathomong ga se ka ka ka kwešiša ka mo go  tletšego ditla-morago tša go ba sefoa. Ka ge ke be ke le ngwana, ke be ke nagana gore gaešita le sedirišwa sa-ka se segolo sa go nthuša go kwa e be e le selo se se segišago, gaešita le ge se be se sa nthuše kudu. E le gore ba boledišane le nna, bana ba tikologong ba be ba ngwala dikanegelo tsejaneng ya maoto, gomme ke be ke ba araba gaešita le ge ke be ke sa kwe lentšu la-ka ka noši.

Ge ke dutše ke gola, ke ile ka thoma go lemoga gore ke be ke fapane le batho bao ba ntikologilego. Le gona ke ile ka thoma go lemoga gore batho ba bangwe ba be ba ntshega ka baka la bofoa bja-ka, mola ba bangwe ba be ba sa nthabele. Ke ile ka thoma go ikwa ke le lekatana e bile ke lewa ke bodutu. Ke ile ka thoma go kwešiša seo se bolelwago ke go ba sefoa, gomme ge ke dutše ke gola ke ile ka thoma go boifa batho bao ba kwago.

E le gore ke kgone go tsena sekolo se se kgethegilego sa difoa, batswadi ba-ka ba ile ba huduša lapa ka moka go tloga motseng wa profenseng ya Limburg go ya motseng wa Eindhoven. Tate o ile a nyaka mošomo fao, gomme kgaetšedi ya-ka le bana bešo ba ile ba ya sekolong seo ba sa se tlwaelago. Ke leboga diphetogo ka moka tšeo ba di dirilego ka baka la-ka. Sekolong ke ile ka rutwa go leka-lekanyago modumo wa lentšu la-ka le go bolela ka mo go kwagalago kudu. Gaešita le ge barutiši ba be ba sa diriše polelo ya diatla, bao ke tsenago le bona ka phapošing ba ile ba nthuta go diriša polelo ya diatla.

Go Phela Lefaseng La-ka ke Nnoši

Ge ke dutše ke gola, batswadi ba-ka ba lekile ka matla go boledišana le nna, eupša go be go na le dilo tše dintši tšeo ke sa kago ka di kwešiša. Ka mohlala, ke be ke sa lemoge gore batswadi ba-ka ba be ba ithuta Beibele le Dihlatse tša Jehofa. Eupša ke gopola gore ka letšatši le lengwe lapa la gešo le ile la etela lefelong leo go bego go tletše batho ba bego ba dutše ditulong. Ka moka ba be ba lebeletše pele, ka dinako tše dingwe ba opa magofsi gomme ba fela ba ema leboelela​—eupša ke be ke sa tsebe gore tše ka moka batho ba ba be ba di direla’ng. Ka morago, ke ile ka tseba gore ke be ke le kopanong ya Dihlatse tša Jehofa. Le gona batswadi ba-ka ba be ba tlwaetše go ya le nna holong e nyenyane motseng wa Eindhoven. Ke be ke nagana gore go be go le kaone fao ka gobane motho yo mongwe le yo mongwe o be a le botho gomme lapa la gešo le ile la bonagala le thabile, eupša ke be ke sa tsebe gore ke ka baka la’ng re be re e-⁠ya fao ka mehla. Ga bjale ke a tseba gore holo e nyenyane e be e le Holo ya Mmušo ya Dihlatse tša Jehofa.

Ka madimabe, go be go se na motho yo a bego a le gona dibokeng go ka fetolela lenaneo le gore ke le kwe. Ga bjale ke lemoga gore bao ba bego ba le gona ba be ba nyaka go nthuša eupša ba be ba sa tsebe gore ba ka swaragana bjang le bofoa bja-ka. Dibokeng tše, ke ile ka ikwa ke le lekatana gomme ka nagana gore, ‘Ke duma ge nkabe ke le sekolong go e na le go ba mo.’ Eupša ge ke be ke dutše ke nagana ka dilo tšeo, basadi ba babedi ba bafsa ba ile ba nngwalela selo se itšego letlakaleng gomme ba nnea lona. Leo ke lengwalwana leo ke boletšego ka lona matsenong. Ke be ke sa tsebe gore lengwalwana le e be e tla ba mathomo a tswalano ya bohlokwa yeo e bego e tla ntokolla lefaseng la-ka la go ba lekatana.

Go Hlagolela Tswalano ya Bohlokwa

Colette le Hermine, bao ba ilego ba nthomela lengwalwana, ba be ba le nywageng ya bona ya bo-20. Ka morago, ke ile ka tseba gore ba be ba tlile go hlankela e le babulamadibogo ba ka mehla goba badiredi ba nako e tletšego phuthegong ya Dihlatse tša Jehofa yeo ke bego ke e etetše. Gaešita le ge Colette le Hermine ba be ba sa tsebe polelo ya diatla gabotse, ke ile ka kgona go kwešiša seo ba se bolelago ka go lebelela melomo ya bona ge ba bolela le nna, gomme ka tsela ye re ile ra boledišana gabotse kudu.

Batswadi ba-ka ba be ba thabile ge Colette le Hermine ba be ba kgopela go ithuta Beibele le nna, eupša basadi ba ba bafsa ba ile ba dira se se fetago seo. Ba ile ba leka ka matla go fetolela diboka  bakeng sa-ka Holong ya Mmušo gotee le go dira gore ke gwerane le ba bangwe ka phuthegong. Ba ile ba itlwaetša dithero tša Beibele le nna tšeo ke tla di dirišago modirong wa boboledi, le gona ba ile ba nthuša go lokišeletša dipolelo tša barutwana bakeng sa Sekolo sa Bodiredi sa Pušo ya Modimo. Nagana, ga bjale ke na le sebete sa go nea polelo ka pele ga sehlopha sa batho bao ba kwago!

Go feta moo, Colette le Hermine ba ile ba dira gore ke ikwe nka ba bota. Ba be ba sa fele pelo e bile ba ntheetša. Gaešita le ge gantši re be re sega diphošo tša-ka, le ka mohla ga se ba ka ba ntira sekwero; le gona ba be ba sa lewe ke dihlong tša go ba gotee le nna. Ba ile ba leka go kwešiša maikwelo a-⁠ka gomme ba ntshwara go swana le batho ba bangwe. Basadi ba ba bafsa ba botho ba nneile mpho e botse​—lerato le bogwera bja bona.

Sa bohlokwa kudu, Colette le Hermine ba nthutile gore ke swanetše go tseba Modimo wa rena, Jehofa, e le mogwera yo a ka botwago. Ba ile ba ntlhalosetša gore Jehofa o mpone ke dutše ka Holong ya Mmušo le gore o be a kwešiša gore go bolela’ng go nna go ba sefoa. Ke leboga gakaakang gore lerato la rena le le swanago la go rata Jehofa le re kgomagantše gotee re le bagwera! Ke ile ka tutuetšwa ke tlhokomelo yeo Jehofa a mpontšhitšego yona, gomme ka baka la lerato la-ka la go mo rata, ke ile ka bontšha boineelo bja-ka go yena ka kolobetšo ya meetseng ka July 1975.

Go Sepela le Mogwera yo a Kgethegilego

Nywageng e latetšego, ke ile ka tlwaelana le bana babo rena le dikgaetšedi ba Bakriste ba oketšegilego. Ngwanabo rena yo mongwe o ile a ba mogwera wa-ka yo a kgethegilego kudu, gomme re ile ra nyalana ka 1980. Kapejana ka morago ga moo, ke ile ka thoma go hlankela ke le mmulamadibogo gomme ka 1994 nna le monna wa-ka e lego Harry, re ile ra abelwa go hlankela re le babulamadibogo ba kgethegilego tšhemong ya se-Dutch yeo go dirišwago Polelo ya Diatla. Ngwageng o latetšego, ke ile ka lebeletšana le kabelo e hlohlago. Ke ile ka swanelwa ke go sepela le monna wa-ka, yo a kgonago go kwa, ge a etela diphuthego tše fapa-fapanego e le moemedi wa molebeledi wa tikologo.

Ke ile ka lebeletšana le kabelo ye ka tsela e latelago. Ge re etela phuthego ka lekga la mathomo, kapejana ke ya go bana babo rena le dikgaetšedi ba bantši kamoo nka kgonago ka gona gomme ka itsebiša. Ke ba botša gore ke sefoa gomme ka ba kgopela gore ba ntebelele ge ba bolela le nna ka go nanya. Le gona ke leka go nea karabo gatee-tee dibokeng tša phuthego. Le gona ke botšiša ge e ba go na le motho yo a ratago go ba mofetoledi wa-ka bekeng yeo bakeng sa diboka le sebokeng sa tirelo ya tšhemo.

Mokgwa wo o šoma gabotse kudu moo ka dinako tše dingwe bana babo rena le dikgaetšedi ba  lebalago gore ke sefoa, e lego seo se lebišago ditiragalong tše di segišago. Ka mohlala, ba mpotša gore ge ba mpona ke sepela ka toropong, ba ntumediša ka go nteletša pele ya koloi ya bona, eupša ga ke arabele. Le nna ke lebala mafokodi a-⁠ka​—go swana le ge ke leka go sebela monna wa-ka selo se itšego sa sephiri. Ge ke mmona a lewa ke dihlong kapejana, ke a tseba gore ke mo sebetše ka lentšu la go hlaboša.

Bana ba thuša ka ditsela tše di sa letelwago. Ka phuthegong e nngwe yeo re bego re e etetše ka lekga la mathomo, mošemane wa nywaga e senyane o ile a lemoga gore batho ba bangwe ka Holong ya Mmušo ba be ba dika-dika go mpolediša, gomme o ile a dira phetho ya go dira selo se itšego ka taba ye. O ile a tla go nna gomme a ntshwara ka letsogo, a nkiša bogareng bja Holo ya Mmušo, gomme a goeletša ka gore, “Anke ke le tsebišeng Irene​—ke sefoa!” Bao ba bego ba le gona ba ile ba tla go nna gomme ba itsebiša.

Ge ke dutše ke sepela le monna wa-ka modirong wa tikologo, bagwera ba-ka ba tšwela pele go ata. Bophelo bja-ka ke bjo bo fapanego gakaakang lehono go tloga nywageng ya ge ke be ke ikwa ke hlaolwa e bile ke le lekatana! Ga e sa le go tloga mantšiboeng a ge Colette le Hermine ba be ba nnea lengwalwana lela, ke bona matla a bogwera gomme ke tsebane le batho bao ba bilego bohlokwa kudu go nna. Go feta bohle, ke tsebile Jehofa, Mogwera yo bohlokwa go ba feta bohle. (Ba-Roma 8:​38, 39) Lengwalwana leo le fetošitše bophelo bja-ka gakaakang!

[Seswantšho go letlakala 24]

Ke gopola modumo wa sebapadišwa sa-ka se se rategago

[Diswantšho go letlakala 25]

Ke le bodireding le ge ke e-⁠na le monna wa-ka, Harry