“O Rerešitše, Bophelo bo a Kgahliša!”

NA O be o ka rata go ithuta ka morero wa kgonthe wa bophelo? Magdalena wa nywaga e 18, e lego yo mongwe wa Dihlatse tša Jehofa yo a dulago kua Szczecin, Poland, o ile a thuša Katarzyna morutwana-gotee le yena sekolong se se phagamego go dira sona seo. Katarzyna o be a ipolela gore ke moila-Modimo, eupša ge Magdalena a be a boledišana le yena ka Beibele, o ile a bontšha kgahlego ya kgonthe.

Gaešita le ge Katarzyna a ile a thabela seo Magdalena a se abelanego le yena go tšwa Beibeleng, o be a sa kgone go se amogela ka mo go feletšego. Ge a be a boledišana le Magdalena mabapi le bagwera ba kgonthe, Katarzyna ka nako e nngwe o kile a re: “O na le Beibele; o tseba melao ya motheo yeo o swanetšego go e latela le moo o ka hwetšago bagwera gona. Eupša go thwe’ng ka bao bonyenyane mo nakong ye ba sa amogelego melao yeo ya motheo?”

Phetogo e kgolo e ile ya tšwelela ge Katarzyna a be a tšea leeto la go ya London, Engelane. O ile a etela ofisi ya lekala ya Dihlatse tša Jehofa moo, gomme o ile a kgongwa ke botho bjo a ilego a bo bontšhwa. Ditiro tše bonolo tše bjalo ka go bulelwa lebati le go bontšhwa ga kgahlego ya kgonthe go seo a bego a se bolela di ile tša ipiletša kudu go yena.

Ge ngwaga o mofsa wa sekolo o be o thoma ka September 2001, Katarzyna o ile a dira phetho ya go amogela thuto ya ka mehla ya Beibele. Ga bjale o aga tlhompho ya gagwe ya go hlompha melao ya motheo ya Beibele gomme o šetše a thomile go e šomiša bophelong bja gagwe bja ka mehla. Morago bjale o ile a ntšhetša Magdalena sa mafahleng, a re: “Ke kwa eka ke thoma go phela bophelo bjo bofsa.” O ile a ba a mo romela molaetša o mokopana mogaleng wa gagwe wa cellular ka mantšu a rego: “Ke go leboga kudu ka thuto ya rena lehono! O rerešitše, bophelo bo a kgahliša! Ke mo gobotse go tseba motho yo re swanetšego go mo leboga ka seo.”