“Phakxamang!”
“Phakxamang!”
“Tše ke Le botšaxo tšôna ke botša bohle, ke re: Phakxamang!”—Mareka 13:37.
1, 2. (a) Monna yo mongwe o ile a ithuta’ng ka go šireletša thoto ya gagwe? (b) Re ithuta’ng ka go dula re phafogile seswantšhong sa Jesu sa mabapi le lehodu?
JUAN o be a boloka dilo tša gagwe tše bohlokwa ka gae. O be a di boloka ka tlase ga malao—go ya ka yena ke lefelo le le bolokegilego kudu ka ntlong. Lega go le bjalo, ge yena le mosadi wa gagwe ba be ba robetše, lehodu le ile la tsena ka phapošing ya go robala. Ka mo go lego molaleng, lehodu le be le tseba gabotse moo le swanetšego go lebelela. O ile a tšea selo se sengwe le se sengwe sa bohlokwa ka setu ka tlase ga malao gotee le tšhelete yeo Juan a bego a e tlogetše ka laiking ya tafola yeo e lego kgaufsi le malao. Mesong e latelago, Juan o ile a bona gore go utswitšwe. O tla dula a gopola ka nako e telele thuto e bohloko yeo a ithutilego yona ya gore: Motho yo a robetšego a ka se kgone go šireletša dithoto tša gagwe.
2 Se se swanago ke sa therešo ka kgopolo ya moya. Re ka se kgone go šireletša kholofelo ya rena le tumelo ya rena ge e ba re robala. Ke ka baka leo Paulo a eletšago gore: “A re se keng ra rôbala bo-ka ba bangwê bao. A re phakxameng rè fahloxile.” (1 Ba-Thesalonika 5:6) Jesu o dirišitše seswantšho sa lehodu go bontšha kamoo go lego bohlokwa ka gona go dula re phakgame. O hlalositše ditiragalo tšeo di bego di tla lebiša go tleng ga gagwe e le Moahlodi, ke moka a lemoša gore: “Ké xôna phakxamang, xobane nakô ya xo tla xa Morêna wa lena xa Le e tsebe. Se Le se tsebaxo sé-sé: Xe mong wa ngwakô a ka tseba nakô ya bošexo yeo lehodu le tl’o xo tla ka yôna, a ka phakxama a se dumêle xe ngwakô wa xaxwe o ka tsênwa. Le lena dulang Lè itokišitše, xobane Morwa-motho ó tlo tla ka nakô ye Le sa e xopolexo.” (Mateo 24:42-44) Lehodu ga le tsebiše e sa le pele gore le tlo tla neng. Le duma go fihla nakong yeo go se nago motho yo a le letetšego. Ka mo go swanago, bjalo ka ge Jesu a boletše, bofelo bja tshepedišo ye ya dilo bo tla fihla ‘ka nako yeo re sa gopolago.’
“Phakxamang le Êmê Tumêlong”
3. Jesu o bontšhitše bjang bohlokwa bja go dula re phafogile seswantšhong sa bahlanka bao ba letetšego go boa ga mong wa bona lenyalong?
3 Mantšung a begilwego Ebangeding ya Luka, Jesu o ile a bapiša Bakriste le bahlanka bao ba letilego mong wa bona gore a boe go tšwa lenyalong. Ba swanetše go dula ba le šedi e le gore ge a fihla a hwetše ba phafogile, ba ikemišeditše go mo amogela. Ka tsela e swanago, Jesu o itše: “Xobane Morwa-motho ó tlo tla ka lebaka le Le sa le xopolexo.” (Luka 12:40) Ba bangwe bao ba hlanketšego Jehofa ka nywaga e mentši ba ka lahlegelwa ke maikwelo a go akgofa ga nako mabapi le mehla ye re phelago go yona. Ba ka ba ba phetha ka gore bofelo bo sa le kgole kudu. Eupša kgopolo e bjalo e ka dira gore re hlokomologe dilo tša moya gomme re lebiše tlhokomelo dipakaneng tša dilo tše di bonagalago, e lego mapheko ao a ka re robatšago moyeng.—Luka 8:14; 21:34, 35.
4. Ke kgodišego efe yeo e tlago go re tutuetša go dula re phakgame, gomme Jesu o bontšhitše bjang se?
4 Re ka ithuta thuto e nngwe seswantšhong sa Jesu. Gaešita le ge bahlanka ba be ba sa tsebe nako yeo mong wa bona a tlago go fihla ka yona, go bonala ba be ba tseba bošego bjoo a bego a tla fihla ka bjona. Go be go tla ba thatafalela go dula ba phafogile bošego ka moka ge e ba ba be ba nagana gore mong wa bona a ka tla bošegong bjo bongwe. Eupša ga se gwa ba bjalo, ba be ba tseba bošego bjoo a bego a e-tla ka bjona, gomme seo se ba neile tutuetšo e matla ya go dula ba phafogile. Ka tsela e swanago, diporofeto tša Beibele di utolla gabotse gore re phela mehleng ya bofelo; eupša ga di re botše letšatši goba iri ya bofelo. (Mateo 24:36) Tumelo ya rena ya go dumela gore bofelo bo e-tla e re thuša go dula re phafogile, eupša ge e ba re kgodišegile gore ka kgonthe letšatši la Jehofa le kgaufsi re tla ba le tutuetšo e matla kudu ya go dula re phakgame.—Tsefanya 1:14.
5. Re ka arabela bjang kgothatšong ya Paulo ya gore re ‘phakgame’?
5 Paulo ge a be a ngwalela ba-Korinthe o ba kgothaditše ka gore: “Phakxamang le êmê tumêlong.” (1 Ba-Korinthe 16:13) Ee, go dula re phafogile go tswalanywa le go ema ka go tia tumelong ya Bokriste. Ke bjang re ka dulago re phafogile? Ka go ba le tsebo e tseneletšego ka Lentšu la Modimo. (2 Timotheo 3:14, 15) Mekgwa e mebotse ya thuto ya motho ka noši le go ba gona dibokeng ka mehla go thuša go matlafatša tumelo ya rena, gomme go dula re bolokile letšatši la Jehofa le le kgaufsi ka kgopolong ke sebopego sa bohlokwa sa tumelo ya rena. Ka gona go boeletša ga rena kgafetša-kgafetša bohlatse bja Mangwalo bja gore re phela kgaufsi le bofelo bja tshepedišo ye ya dilo go tla re thuša gore re se ke ra lebala ditherešo tša bohlokwa tša mabapi le bofelo bjo bo tlago. * Le gona ke ga bohlokwa go ela hloko go utollega ga ditiragalo tša lefase tšeo di phethagatšago boporofeta bja Beibele. Ngwanabo rena yo mongwe kua Jeremane o ngwadile gore: “Nako e nngwe le e nngwe ge ke bogela ditaba—dintwa, ditšhišinyego tša lefase, bošoro le go senyega ga polanete ya rena—di nkgonthišetša go ba kgaufsi ga bofelo.”
6. Jesu o bontšhitše ka tsela efe tshekamelo ya go lahlegelwa ke go phafoga moyeng ge nako e dutše e tšwela pele?
6 Go Mareka kgaolo 13, re hwetša pego e nngwe ya kgothatšo ya Jesu go balatedi ba gagwe ya gore ba dule ba phakgame. Go ya ka kgaolo ye, Jesu o bapetša boemo bja bona le bja moleta-mojako yoo a letetšego mong wa gagwe go boa leetong la kgole. Moleta-mojako o be a sa tsebe nako ya go boa ga mong wa gagwe. O be a swanetše go dula a phakgame. Jesu o boletše ka go phakgama ka makga a mane a fapanego ao ka ona mong wa gagwe a bego a ka fihla ka ona. Go phakgama ga bone go thomile mo e ka bago ka iri ya boraro mesong go fihlela ge letšatši le hlaba. Go phakgameng moo ga mafelelo, go otsela go be go ka fenya moleta-mojako gabonolo. Go begwa gore mašole a lebelela iri ya pele ga masa e le nako e kaone ya go swara lenaba le sa itebetše. Ka mo go swanago, iring ye ya mafelelo, ge ka kgopolo ya moya lefase leo le re dikologilego le robetše, re ka fo lebeletšana le go katana kudu gore re dule re phakgame. (Ba-Roma 13:11, 12) Lega go le bjalo, seswantšhong sa gagwe Jesu o kgothatša leboelela gore: “Fahloxang, Le phakxamê . . . Phakxamang-xê . . . tše ke Le botšaxo tšôna ke botša bohle, ke re: Phakxamang!”—Mareka 13:32-37.
7. Ke kotsi efe ya kgonthe yeo e lego gona, gomme re naganne ka se ke kgothatšo efe yeo re balago ka yona leboelela ka Beibeleng?
7 Jesu o kgothaleditše go phakgama ka makga a mantši nakong ya bodiredi bja gagwe le ka morago ga tsogo ya gagwe. Ge e le gabotse, mo e ka bago nako e nngwe le e nngwe ge Mangwalo a bolela ka bofelo bja tshepedišo ye ya dilo, re lemošwa gore re dule re phakgame goba gore re dule re phafogile. * (Luka 12:38, 40; Kutollo 3:2; 16:14-16) Ka mo go kwagalago, go otsela moyeng ke kotsi ya kgonthe kudu. Ka moka ga rena re nyaka ditemošo tšeo!—1 Ba-Korinthe 10:12; 1 Ba-Thesalonika 5:2, 6.
Baapostola ba Bararo Bao ba Ilego ba se Kgone go Dula ba Phakgame
8. Kua serapeng sa Getsemane, baapostola ba Jesu ba bararo ba ile ba arabela bjang kgopelong ya gagwe ya gore ba dule ba phakgame?
8 Bjalo ka ge re bona mohlaleng wa Petro, Jakobo le Johane, go dula re phakgame go nyaka se se fetago maikemišetšo a mabotse. Ba e be e le banna ba bararo bao ba bego ba sekametše dilong tša moya bao ba ilego ba latela Jesu ka potego e sa kwanantšhego gomme ba mo rata kudu. Lega go le bjalo, bošegong bja Nisani 14, 33 C.E., ba ile ba palelwa ke go dula ba phakgame. Ge ba tloga phapošing ya ka godimo moo ba binetšego Paseka gona, baapostola ba bararo ba ile ba sepela le Jesu go ya serapeng sa Getsemane. Fao Jesu o ile a ba botša gore: “Môya wa-ka o nyamile ka xoxolo wa xo iša lehung; dulang fá le itišê le Nna.” (Mateo 26:38) Jesu o ile a rapela Tatagwe wa legodimong ka go tšwa pelong ka makga a mararo, gomme o ile a ya go bagwera ba gagwe ka makga a mararo eupša a hwetša ba robetše.—Mateo 26:40, 43, 45.
9. Ke eng seo mohlomongwe se ka bago se dirile gore baapostola ba otsele?
9 Ke ka baka la’ng banna ba ba botegago ba ile ba nyamiša Jesu bošegong bjoo? E be e le ka baka la gore ba be ba lapile. E be e le bošego, mohlomongwe ka morago ga bošego-gare gomme ‘mahlo a bona a be a imelwa’ ke boroko. (Mateo 26:43) Go sa dutše go le bjalo, Jesu o itše: “Phakxamang Le rapêlê, xore Le se tsênê melekong; xobane môya o mafolofolo, ’me nama e a fôkôla.”—Mateo 26:41.
10, 11. (a) Go sa šetšwe go lapa, ke eng seo se thušitšego Jesu go dula a phakgame serapeng sa Getsemane? (b) Re ka ithuta’ng go seo se diragaletšego baapostola ba bararo ge Jesu a be a ba kgopela gore ba dule ba phakgame?
10 Ka ntle le pelaelo, Jesu le yena o be a lapile bošegong bjoo bja bohlokwa. Lega go le bjalo, go e na le go robala, o feditše dinako tšeo tša bohlokwa tša mafelelo tša ge a be a lokologile go rapela ka go tšwa pelong. Matšatši a sego kae pejana, o be a kgothaditše balatedi ba gagwe gore ba rapele ka go ba botša gore: “Phakxamang-xe, Le fêlê Le rapêla ka mabaka ohle, xore Le hwetšwê Lè loketše xo phônyôkxa tšeo ka moka di tl’o xo dirêxa, le xo tlo êma pele xa Morwa-motho.” (Luka 21:36; Ba-Efeso 6:18) Ge e ba re theetša keletšo ya Jesu gomme re latela mohlala wa gagwe o mobotse tabeng ya thapelo, go lopa ga rena Jehofa ka go tšwa pelong go tla re thuša go dula re phakgame moyeng.
11 Ke therešo gore Jesu o ile a kwešiša—ka ge barutiwa ba gagwe ka nako yeo ba be ba sa kwešiše—gore kgaufsinyane o tla swarwa gomme a ahlolelwa lehu. Diteko tša gagwe di be di tla fihla seremong se se kwešago bohloko o šoro koteng ya tlhokofatšo. Jesu o be a lemošitše baapostola ba gagwe ka dilo tše, eupša ba be ba sa kwešiša seo a bego a se bolela. Ke ka baka leo, ba ilego ba otsela ge yena a be a phafogile gomme a rapela. (Mareka 14:27-31; Luka 22:15-18) Ka ge seo e be e le sa therešo ka baapostola, nama ya rena le yona e a fokola gomme go na le dilo tšeo ga bjale re sa di tsebego. Lega go le bjalo, ge e ba re sa lahlegelwa ke go akgofa ga nako yeo re phelago go yona, re ka otsela ka tsela ya moya. Ke feela ka go dula re le šedi moo re ka dulago re phakgame.
Dika tše Tharo tše Bohlokwa
12. Ke dika dife tše tharo tšeo Paulo a di tswalanyago le go dula re phakgame?
12 Ke bjang re ka dulago re na le maikwelo a go akgofa ga nako? Re šetše re bone bohlokwa bja thapelo le go nyakega ga gore re dule re gopola letšatši la Jehofa. Go oketša moo, Paulo o bolela ka dika tše tharo tše bohlokwa tšeo re swanetšego go di hlagolela. O re: “Rena ba re lexo ba mosexare, a re phafoxeng, re aparê se-phêma-sefêxa sa tumêlô le leratô, kuane e bê xo holofêla phološô.” (1 Ba-Thesalonika 5:8) Anke re hlahlobeng ka bokopana tema e kgathwago ke tumelo, kholofelo le lerato go duleng ga rena re phakgame moyeng.
13. Tumelo e kgatha tema efe go duleng ga rena re phakgame?
13 Re swanetše go ba le tumelo e sa šišinyegego ya gore Jehofa o gona le gore “ba ba Mo nyakaxo ó a ba putsa.” (Ba-Hebere 11:6) Go phethega la mathomo ga lekgolong la pele la nywaga ga boporofeta bja Jesu mabapi le bofelo go matlafatša tumelo ya rena go phethagaleng ga bjona mo gogolo mehleng ya rena. Le gona tumelo ya rena e re boloka re letetše ka phišego letšatši la Jehofa, re kgonthišegile gore “[pono ya boporofeta] go tla e tlo tla, e ka se ke ya diega.”—Habakuku 2:3, PK.
14. Kholofelo e bohlokwa gakaaka’ng ge e ba re tla dula re phakgame?
14 Kholofelo ya rena e kgonthišeditšwego e swana le “thêkxô e tiilexo ya meôya ya rena” yeo e dirago gore re kgone go kgotlelela mathata gaešita le ge re swanetše go leta go phethagatšwa ga dikholofetšo tše itšego tša Modimo. (Ba-Hebere 6:18, 19) Margaret e lego kgaetšedi ya rena yo a tloditšwego ka moya yo a lego nywageng ya gagwe ya bo-90 yo a kolobeditšwego nywaga ya ka godimo ga e 70 e fetilego, o dumela gore: “Ge monna wa-ka a be a bolawa ke kankere ka 1963, ke ile ka nagana gore e be e tla ba mo go botse ge bofelo bo ka tla kapejana. Eupša ga bjale ke lemoga gore ke be ke nagana kudu ka dikgahlego tša-ka. Ka nako yeo re be re sa tsebe gore modiro o be o tla naba lefaseng ka bophara go fihla bokgoleng bofe. Gaešita le gona bjale, go sa dutše go na le mafelo a mantši ao go ona mošomo o sa tšwago go thoma. Ka gona ke thabela gore Jehofa o bontšhitše go se fele pelo.” Moapostola Paulo o re kgonthišetša gore: “Kxôtlêlêlô ya tlo tšweletša pôtêxô; pôtêxô ya tlo tšweletša kholofêlô. Xomme kholofêlô xa e lahletše.”—Ba-Roma 5:3-5.
15. Lerato le tla re tutuetša bjang gaešita le ge go bonala eka re be re dutše re letile ka lebaka le letelele?
15 Lerato la Bokriste ke seka se segolo kudu ka gobane ke tutuetšo ya bohlokwa selong se sengwe le se sengwe seo re se dirago. Re hlankela Jehofa ka gobane re mo rata, go sa šetšwe tšhupa-mabaka ya gagwe. Lerato la go rata moagišani le re tutueletša go bolela ditaba tše dibotse tša Mmušo, go sa šetšwe gore re tla di bolela ka lebaka le le telele gakaakang yeo e tla ba e le thato ya Modimo gore re dire bjalo, gape go sa šetšwe gore ke ka makga a makae moo re boelago magaeng a swanago. Bjalo ka ge Paulo a ngwadile, tše “di šalaxo di le xôna ké tumelô, le kholofêlô le leratô, tše tharo tšé. Xomme se sexolo mo xo tšôna ké leratô.” (1 Ba-Korinthe 13:13) Lerato le re dira gore re dule re kgotlelela gomme le re thuša go dula re phakgame. “[Lerato] le holofêla tšohle; le kxôtlêlêla tšohle. Leratô xa le fele neng le neng.”—1 Ba-Korinthe 13:7, 8.
“Swara o Tiiše se o Naxo le Sôna”
16. Go e na le go goga maoto, ke boemo bofe bja kgopolo bjo re swanetšego go bo hlagolela?
16 Re phela mehleng ya bohlokwa bjo bogolo moo ditiragalo tša lefase di re gopotšago leboelela gore re karolong ya mafelelo ya mehla ya bofelo. (2 Timotheo 3:1-5) Ga bjale ga se nako ya go goga maoto eupša ke nako ya go ‘swara ka go tiiša seo re nago le sona.’ (Kutollo 3:11) Ka go ba ‘le kelelo gomme re phakgame dithapelong’ le ka go hlagolela tumelo, kholofelo le lerato, re tla itlhatsela re le ba itokišeleditšego iri ya teko. (1 Petro 4:7) Re na le mo gontši mo re ka go dirago modirong wa Morena. Go swarega medirong ya boineelo go Modimo go tla re thuša go dula re phakgame ka mo go feletšego.—2 Petro 3:11.
17. (a) Ke ka baka la’ng re sa swanelwa ke go nyamišwa ke manyami a felago a re wela? (Bona lepokisi go letlakala 21.) (b) Re ka ekiša bjang Jehofa, gomme ke tšhegofatšo efe yeo e letetšego bao ba dirago bjalo?
17 Jeremia o ngwadile gore: “Nna Wa-ka ké Morêna! Ké ka ’baka leo kè sa holofetše Yêna. Morêna ó setša ba ba mmotilexo, le pelo ye e mo nyakaxo. Ké mo xo botse xe motho a hutša à ikhomoletše, a ba a hlakodišwa ke Morêna.” (Dillo tša Jeremia 3:24-26) Ba bangwe ba rena re letile ka lebaka le lenyenyane. Ba bangwe ba letile ka nywaga e mentši go bona phološo ya Jehofa. Lega go le bjalo, lebaka le la go leta ke le lekopana gakaakang ge le bapetšwa le bosafelego bjo bo lego ka pele! (2 Ba-Korinthe 4:16-18) Le gona ge re dutše re letetše nako ya Jehofa e beilwego, re ka hlagolela dika tša bohlokwa tša Bokriste gomme ra thuša ba bangwe go diriša ka mo go holago go se fele pelo ga Jehofa gomme ba amogela therešo. Ka gona, anke ka moka ga rena re dule re phakgame. Anke re ekišeng Jehofa gomme re se fele pelo, re leboge kholofelo yeo a re neilego yona. Le gona ge re dutše re le šedi ka potego, anke re swareleleng ka go tia kholofetšong ya bophelo bjo bo sa felego. Ka gona, ka ntle le pelaelo dikholofetšo tše tša boporofeta di tla šoma go rena: “[Jehofa] a Xo xodišê O bê mong wa naxa; O bônê xe babe ba lôba.”—Psalme 37:34.
[Mengwalo ya ka tlase]
^ ser. 5 E ka ba mo go thušago go boeletša mabaka a tshelelago a bohlatse bjo bo bontšhago gore re phela “mehleng ya bofêlô” ao a lokeleditšwego go matlakala 12-13 ka tokollong ya Morokami wa January 15, 2000.—2 Timotheo 3:1.
^ ser. 7 Mongwadi wa dipukuntšu e lego W. E. Vine, ge a bolela ka lediri la Segerika leo le fetoletšwego e le go ‘phakgama’ o hlalosa gore ka go lebanya le bolela ‘go raka boroko,’ gomme “ga le gatelele feela go fo phafoga, eupša le gatelela go ba šedi ga bao ba ikemišeditšego go dira selo se itšego.”
[Dipotšišo tša Thuto]
[Lepokisi/Seswantšho go letlakala 21]
“Wa Lehlôxônôlô ké eo a Dulaxo a na le Lehutšô.”—Daniele 12:12
Nagana moleti a belaela gore lehodu le ka be le rulaganya go thuba meagong yeo a e letago. Ge e e-ba bošego, moleti o theetša ka kelohloko lešata le ge e le lefe leo le ka bontšhago go ba gona ga lehodu. Nako le nako o bula ditsebe le mahlo a gagwe. Go bonolo go bona kamoo a ka forwago ke temošo ya maaka—modumo wa go gwaša ga dihlare ge phefo e foka goba ge katse e wiša selo se itšego.—Luka 12:39, 40.
Selo se se swanago se ka diragalela bao ba “letetšexo kutoloxô ya Mong wa rena Jesu Kriste.” (1 Ba-Korinthe 1:7) Baapostola ba be ba nagana gore Jesu o be a tlo ‘tsošetša mmušo go Isiraele’ kapejana ka morago ga tsogo ya gagwe. (Ditiro 1:6) Nywaga ka morago, Bakriste ba kua Thesalonika ba ile ba swanelwa ke go gopotšwa gore go ba gona ga Jesu go be go tla ba nakong e itšego e tlago. (2 Ba-Thesalonika 2:3, 8) Go sa dutše go le bjalo, ditemošo tša maaka tše di lego mabapi le letšatši la Jehofa ga se tša ka tša dira balatedi bao ba pele ba Jesu go hlokomologa tsela e išago bophelong.—Mateo 7:13.
Mehleng ya rena, go nolwa moko ke seo se bonagalago e le go diega ga go tla ga bofelo bja tshepedišo ye ya dilo ga se gwa swanela go re dira gore re se ke ra dula re phakgame. Moleti yo a phakgamego a ka forwa ke temošo ya maaka, lega go le bjalo o swanetše go dula a phakgame! Woo ke mošomo wa gagwe. Go bjalo le ka Bakriste.
[Caption on page 18]
Na o kgodišegile gore letšatši la Jehofa le kgaufsi?
[Caption on page 19]
Diboka, thapelo le mekgwa e mebotse ya go ithuta di re thuša go dula re phakgame
[Caption on page 22]
Go swana le Margaret, anke re duleng re phakgame ka go se fele pelo le ka mafolofolo
[Caption on page 22]
O tla Araba Bjang?
• Re ka matlafatša bjang kgodišego ya rena ya gore bofelo bja tshepedišo ye ya dilo bo kgaufsi?
• Re ka ithuta’ng mehlaleng ya Petro, Jakobo le Johane?
• Ke dika dife tše tharo tšeo di ka re thušago go dula re phakgame moyeng?
• Ke ka baka la’ng ye e le nako ya go ‘swara ka go tiiša seo re nago le sona’?