Na O Tloga O Na Le Tumelo Ditabeng Tše Dibotse?
Na O Tloga O Na Le Tumelo Ditabeng Tše Dibotse?
“Lebaka le tlile; mmušô wa Modimo o batametše; sokoloxang Le dumêlê [“le be le tumelo go,” NW] Ebangedi.”—Mareka 1:15.
1, 2. O ka hlalosa bjang lengwalo la Mareka 1:14, 15?
E BE e le ka ngwaga wa 30 C.E. Jesu Kriste o be a thomile bodiredi bja gagwe bjo bogolo kua Galilea. O be a bolela “ebangedi ya mmušô wa Modimo,” gomme bontši bja ba-Galilea bo ile bja tutuetšwa ke polelo ya gagwe e rego: “Lebaka le tlile; mmušô wa Modimo o batametše: sokoloxang Le dumêlê [“le be le tumelo go,” NW] Ebangedi.”—Mareka 1:14, 15.
2 Go be go fihlile “lebaka” la gore Jesu a thome bodiredi bja gagwe le gore batho ba dire phetho yeo e bego e tla dira gore ba amogelwe ke Modimo. (Luka 12:54-56) Mmušo wa Modimo o be o batametše ka gobane Jesu o be a le gona e le Kgoši e Kgethilwego. Modiro wa gagwe wa boboledi o ile wa tutuetša ba dipelo tše di lokilego gore ba sokologe. Eupša ba kgonne bjang—gomme re ka kgona bjang—go bontšha ‘tumelo ditabeng tše dibotse’?
3. Ke’ng seo batho ba se dirilego seo se bontšhago gore ba na le tumelo go ditaba tše dibotse?
3 Ka go swana le Jesu, moapostola Petro o ile a kgothaletša batho gore ba sokologe. Ge a be a bolela le ba-Juda kua Jerusalema ka Pentekoste ya 33 C.E., Petro o itše: “Sokoloxang; ka moka Le kolobetšwê Leineng la Jesu Kriste, e bê xôna xo lebalêlwa dibe; ké mo Le tl’o xo fiwa neô ya Môya-mokxêthwa.” Ba dikete ba ile ba sokologa, ba kolobetšwa gomme ba fetoga balatedi ba Jesu. (Ditiro 2:38, 41; 4:4) Ka 36 C.E., ba-Ntle bao ba bego ba sokologile ba ile ba gata megato e swanago. (Ditiro 10:1-48) Mehleng ya rena, go ba le tumelo go ditaba tše dibotse go tutuetša ba dikete gore ba sokologe dibeng tša bona, ba ineele go Modimo gomme ba kolobetšwe. Ba amogetše ditaba tše dibotse tša phološo gomme ba bontšha tumelo sehlabelong sa Jesu sa topollo. Go oketša moo, ba bontšha go loka gomme ba eme ka lehlakoreng la Mmušo wa Modimo.
4. Tumelo ke’ng?
4 Eupša tumelo ke’ng? Moapostola Paulo o ngwadile gore: “Tumelo ke tebelelo ye e kgonthišeditšwego ya dilo tše di holofetšwego, ke pontšho ye e bonagalago ya dilo tša kgonthe le ge di se tša bonwa.” (Ba-Hebere 11:1, NW) Tumelo ya rena e re dira gore re kgodišege gore dilo ka moka tšeo Modimo a di holofetšago ka Lentšung la gagwe di bjalo ka ge eka di šetše di phethagetše. Go bjalo ka ge eka re na le sešupo seo se hlatselago gore re laola phahlo e itšego. Le gona tumelo ke “pontšho e lego molaleng,” goba bohlatse bjo bo kgodišago mabapi le dilo tše di sa bonwego. Temogo le tebogo ya rena e tšwago pelong di re nea kgodišego ya gore dilo tše bjalo ke tša kgonthe, gaešita le ge re sa ka ra di bona.—2 Ba-Korinthe 5:7, PK; Ba-Efeso 1:18.
Re Swanetše go ba le Tumelo!
5. Ke ka baka la’ng tumelo e le ya bohlokwa gakaakaa?
5 Re belegwe re e-na le senyakwa sa moya eupša re se na tumelo. Ge e le gabotse, “tumêlô xa se ya bohle.” (2 Ba-Thesalonika 3:2) Lega go le bjalo, Bakriste ba swanetše go ba le tumelo e le gore ba thabele dikholofetšo tša Modimo. (Ba-Hebere 6:12) Ka morago ga go tsopola mehlala e mentši ya tumelo, Paulo o ile a ngwala gore: “Byale le rena xe re na le leru le lekaakao la dihlatse tše di re ukametšexo, a re apoleng tše di re imêlaxo tšohle, le sebe se se re rarêlaxo, ’me re kxôtlêlêlê thlabanong ye re lexo mo xo yôna, Re išê mahlô xo Mo-êta-pele le Mophethi wa tumêlô, Yêna Jesu.” (Ba-Hebere 12:1, 2) “Sebe se se re rarêlaxo” ke eng? Ke go hlaelelwa ke tumelo, gaešita le go lahlegelwa ke tumelo yeo e bego e le gona pele. E le gore re boloke tumelo e matla, re swanetše ‘go iša mahlo go Jesu’ gomme re latele mohlala wa gagwe. Le gona re swanetše go gana boitshwaro bjo bo gobogilego, re pheme mediro ya nama le go rata dilo tše di bonagalago, difilosofi tša lefase gotee le meetlo yeo e sa dumelelanego le Mangwalo. (Ba-Galatia 5:19-21; Ba-Kolose 2:8; 1 Timotheo 6:9, 10; Juda 3, 4) Go feta moo, re swanetše go dumela gore Modimo o na le rena le gore keletšo e lego ka Lentšung la gagwe e šoma e le ruri.
6, 7. Ke ka baka la’ng e le mo go swanetšego go rapelela go ba le tumelo?
6 Ga se ka matla a rena re ka bago le tumelo. Tumelo ke karolo ya dienywa tša moya o mokgethwa wa Modimo, goba matla a šomago. (Ba-Galatia 5:22, 23) Ka gona, go thwe’ng ge e ba go nyakega gore tumelo ya rena e matlafatšwe? Jesu o itše: “Xe ešita lena . . . Lè tseba xo nea bana ba lena dineô tše botse, a Tata-weno wa maxodimong xa a Le fetiše kxolê? Ba ba Mo kxopêlaxo ó ba nea Môya o mokxêthwa.” (Luka 11:13) Ee, a re rapeleleng moya o mokgethwa, ka gobane o ka tšweletša ka go rena tumelo yeo re e hlokago e le gore re dire thato ya Modimo gaešita le ka tlase ga maemo a thata kudu.—Ba-Efeso 3:20.
7 Ke mo go swanetšego go rapelela go ba le tumelo e oketšegilego. Ge Jesu a be a le kgaufsi le go raka matemona a bego a le ka go mošemane, tatago mošemane o ile a bolela gore: “Morêna! Ke a dumêla. Nthlakodišê xo se dumeleng!” (Mareka 9:24) Barutiwa ba Jesu ba ile ba bolela gore: “Re ekeletšê tumêlô.” (Luka 17:5) Ka gona, a re rapeleleng go ba le tumelo, re holofetše gore Modimo o kwa dithapelo tše bjalo.—1 Johane 5:14.
Go ba le Tumelo Lentšung la Modimo go Bohlokwa
8. Go ba le tumelo Lentšung la Modimo go ka re thuša bjang?
8 Nakwana pele ga lehu la gagwe la sehlabelo, Jesu o ile a botša balatedi ba gagwe gore: “Dipelo tša lena di se thšoxê; dumêlang Modimo, le Nna Le ntumêlê.” (Johane 14:1) Re le Bakriste, re na le tumelo go Modimo le go Morwa wa gagwe. Eupša go thwe’ng ka Lentšu la Modimo? Le tutuetša ka tsela e matla bakeng sa gore re dire botse bophelong bja rena ge e ba re ithuta lona le go le diriša ka tumelo e feletšego ya gore le nea keletšo e kaone le tlhahlo yeo re ka e hwetšago.—Ba-Hebere 4:12.
9, 10. O ka hlalosa bjang seo go bolelwago ka sona mabapi le tumelo lengwalong la Jakobo 1:5-8?
9 Bophelo bja rena re le batho ba sa phethagalago bo tletše ka mathata. Lega go le bjalo, go ba le tumelo Lentšung la Modimo go ka re thuša e le ka kgonthe. (Jobo 14:1) Ka mohlala, mohlomongwe ga re tsebe kamoo re ka lebeletšanago le teko e itšego. Lentšu la Modimo le re nea keletšo ye: “Xe mo xo lena xo ka ba le e a hlaêlwaxo ke bohlale, a a bo kxopêlê xo Modimo, Yêna wa xo nea bohle ka xo rata, à sa nyatše motho. A a kxopêlê a fiwê. A a kxopêlê ka tumêlô, a se dika-dikê; xobane e a dika-dikaxo ó swana le lephoto la lewatlê, le le tsošwaxo ke phefô la akxa-akxwa ke yôna. Motho yo byalo a se kê a re ó tlo fiwa selô ke Morêna; Monna wa pelo-pedi, ditseleng tša xaxwe xa a loke.”—Jakobo 1:5-8.
10 Jehofa Modimo a ka se ke a re nyatša ka gobane re hlaelelwa ke bohlale gomme re bo rapelela. Go e na le moo, o tla re thuša gore re lebelele teko ka tsela e nepagetšego. Re ka gopotšwa mangwalo ao a re holago ke badumedi-gotee le rena goba ge re dutše re ithuta Beibele. Goba moya o mokgethwa wa Jehofa o ka re hlahla ka tsela e itšego. Tatago rena wa legodimong o tla re nea bohlale bja gore re lebeletšane ka katlego le diteko ge e ba ‘re kgopela ka tumelo, re sa dika-dike.’ Ge e ba re be re le bjalo ka lephoto la lewatle le le akga-akgwago ke phefo, re be re ka se letele go amogela selo le ge e le sefe go tšwa go Modimo. Ka baka la’ng? Ka gobane se se be se ka bolela gore re be re dika-dika gomme re belaela ge re rapela goba ka ditsela tše dingwe—ee, go akaretša le go bontšheng tumelo. Ka gona re swanetše go ba le tumelo e matla Lentšung la Modimo le tlhahlong yeo e le neago. A re hlahlobeng mehlala e mengwe ya kamoo le neago thušo le tlhahlo.
Tumelo le Dinyakwa tša Motheo
11. Go ba le tumelo Lentšung la Modimo go re nea kgonthišetšo efe mabapi le dinyakwa tša rena tša letšatši le letšatši?
11 Go thwe’ng ge e ba ga bjale re hloka dijo le madulo goba re diila? Go ba le tumelo Lentšung la Modimo go re nea tebelelo ye e kgonthišeditšwego ya gore Jehofa o tla re hlokomela ka dinyakwa tša letšatši le letšatši gomme mafelelong o tla kgonthišetša gore bohle bao ba mo ratago ba ba le dilo tše dibotse ka boati. (Psalme 72:16; Luka 11:2, 3) Re ka hwetša e le mo go kgothatšago go naganišiša kamoo Jehofa a ilego a nea moporofeta wa gagwe Eliya dijo nakong ya tlala. Ka morago, Modimo ka mohlolo o ile a tšwela pele go nea mosadi, morwa wa gagwe le Eliya folouru le makhura go tšwela pele di ba thuša gore ba phele. (1 Dikxoši 17:2-16) Jehofa ka mo go swanago o ile a hlokomela moporofeta Jeremia nakong ya go hlaselwa ga Jerusalema ke Babele. (Jeremia 37:21) Gaešita le ge Jeremia le Eliya ba be ba hlaelelwa ke dijo, Jehofa o ile a ba hlokomela. O dira se se swanago go bao ba bontšhago tumelo go yena lehono.—Mateo 6:11, 25-34.
12. Tumelo e tla re thuša bjang go ba le dinyakwa tša motheo?
12 Tumelo yeo e sepedišanago le go diriša melao ya motheo ya Beibele e ka se re dire bahumi, eupša e tla re thuša go ba le dinyakwa tša motheo. Ka mohlala: Beibele e re kgothaletša go ba batho ba botegago, ba nago le bokgoni le ba šomago ka thata. (Diema 22:29; Mmoledi 5:18, 19; 2 Ba-Korinthe 8:21) Le ka mohla re se ke ra tšeela fase bohlokwa bja go ba bašomi bao ba nago le botumo bjo bobotse. Gaešita le mafelong ao mešomo e mekaone e hlokwago, mošomi yoo a botegago, yo a nago le bokgoni le yo a šomago ka thata o na le dibaka tše di kaone kudu go feta ba bangwe. Gaešita le ge bašomi ba bjalo ba ka hlaelelwa ke dilo tše di bonagalago, gantši ba na le dinyakwa tša motheo le go kgotsofatšwa ke go ja dijo tšeo ba di šometšego.—2 Ba-Thesalonika 3:11, 12.
Tumelo e re Thuša go Kgotlelela ge re E-kwa Bohloko
13, 14. Tumelo e re thuša bjang go kgotlelela ge re e-kwa bohloko?
13 Lentšu la Modimo le bontšha gore ke ga tlhago go kwa bohloko ge motho yo o mo ratago a e-hwa. Mopatriareka yo a botegago Aborahama o ile a kwešwa bohloko ke lehu la mosadi wa gagwe yo a rategago, Sara. (Genesi 23:2) Dafida o ile a kwa bohloko kudu ka morago ga go kwa gore morwa wa gagwe Abesalomo o hwile. (2 Samuele 18:33) Gaešita le motho yo a phethagetšego e lego Jesu o ile a llišwa ke lehu la mogwera wa gagwe Latsaro. (Johane 11:35, 36) Ge moratiwa a e-hwa, re ka nyama ka tsela e nolago moko, eupša go ba le tumelo dikholofetšong tša Lentšu la Modimo go ka re thuša go kgotlelela bohloko bjo bo bjalo.
14 Paulo o boletše gore: “Kholofêlô ye ke holofetšexo Modimo ka yôna [ke] ya xo re: Bahu ba tlo tsoxa, bohle, baloki le ba s’a lokaxo.” (Ditiro 24:15) Re swanetše go ba le tumelo tokišetšong ya Modimo ya gore ba dikete ba tla tsošwa. (Johane 5:28, 29) Gare ga bona go tla ba go na le Aborahama le Sara, Isaka le Rebeka, Jakobo le Lea—bao ka moka ga bona ba robetšego lehung gomme ba letetše go tsošetšwa lefaseng le lefsa la Modimo. (Genesi 49:29-32) E tla ba lethabo gakaakang ge baratiwa ba tsošwa borokong bja lehu go tla go phela mo lefaseng! (Kutollo 20:11-15) Ga bjale, tumelo e ka se tloše manyami ka moka, eupša e tla re batametša kgaufsi le Modimo, yoo a re thušago go kgotlelela ge re e-kwa bohloko.—Psalme 121:1-3; 2 Ba-Korinthe 1:3.
Tumelo e Matlafatša ba Gateletšegilego
15, 16. (a) Ke ka baka la’ng re ka bolela gore kgateletšego ga e thome ka bao ba bontšhago tumelo lehono? (b) Ke’ng seo re ka se dirago e le gore re lebeletšane ka katlego le kgateletšego?
15 Lentšu la Modimo le bontšha gore gaešita le bao ba bontšhago tumelo ba ka ba le kgateletšego. Nakong ya teko ya gagwe e šoro, Jobo o ile a kwa eka Modimo o mo lahlile. (Jobo 29:2-5) Boemo bjo bo nyamišago bja Jerusalema le maboto a yona bo ile bja šulafatša Nehemia. (Nehemia 2:1-3) Petro o be a nyamile kudu ka morago ga gore a gane Jesu moo a ilego a ba a “lla xa-bohloko.” (Luka 22:62) Le gona Paulo o ile a kgothaletša badumedi-gotee le yena ba phuthego ya Thesalonika gore “ba bolele le meoya e gateletšegilego ka tsela e homotšago.” (1 Ba-Thesalonika 5:14, NW) Ka gona, go gateletšega ga bao ba bontšhago tumelo ga go thome ka bona. Ka gona, ke’ng seo re ka se dirago go lebeletšana ka katlego le kgateletšego?
16 Mohlomongwe re ka gateletšega ka gobane re lebeletšane le mathata a magolo a mmalwa. Go e na le go a lebelela e le thaba, re ka kgona go a rarolla ka go latelana re diriša melao ya motheo ya Beibele. Se se ka re thuša go fokotša kgateletšego. Go se ipolaiše ka mošomo le go khutša ka tsela e lekanego le gona go ka thuša. Selo setee seo re kgodišegilego ka sona se se: Go ba le tumelo go Modimo le go Lentšu la gagwe go godiša boemo bjo bobotse bja moya ka gobane go matlafatša kgodišego ya rena ya gore o tloga a re hlokomela.
17. Re tseba bjang gore Jehofa o a re hlokomela?
17 Petro o re nea kgonthišetšo ye e homotšago: “Ikokobetšeng ka tlase xa seatla se matla sa Modimo, xore a Le xodišê lebakeng la xôna. Dipelaêlô tša lena ka moka di lahleleng xodimo xa xaxwe, xobane ké Yêna a Le belaêlêlaxo.” (1 Petro 5:6, 7) Mopsalme o opetše ka gore: “Morêna ó thêkxa bohle ba ba waxo, ó tsoša bohle ba xo bôkalêla.” (Psalme 145:14) Re swanetše go dumela dikgonthišetšo tše, ka gobane di hwetšwa ka Lentšung la Modimo. Le ge kgateletšego e ka tšwela pele, ke mo go matlafatšago tumelo gakaakang go tseba gore re ka lahlela dipelaelo tša rena ka moka go Tatago rena yo lerato wa legodimong!
Tumelo le Diteko tše Dingwe
18, 19. Tumelo e re thuša bjang go lebeletšana ka katlego le bolwetši le go homotša badumedi-gotee le rena bao ba babjago?
18 Re ka lebeletšana le go lekwa mo gogolo ga tumelo ya rena ge rena ka noši goba baratiwa ba rena re swerwe ke bolwetši bjo bošoro. Gaešita le ge Beibele e sa bege ka go fodišwa ka mohlolo ga Bakriste ba bjalo ka Epaforodito, Timotheo le Torofimo, ka ntle le pelaelo Jehofa o ile a ba thuša go kgotlelela. (Ba-Filipi 2:25-30; 1 Timotheo 5:23; 2 Timotheo 4:20) Go feta moo, mopsalme o opetše mabapi le “mo-setša-mohloki” gore: “Xe a babya à le dilaong, Morêna ó tlo mo thêkxa; xo lala xa xaxwe à le bohlokong—Morêna ó tlo di phekxola tšohle.” (Psalme 41:1-3) Mantšu a mopsalme a ka re thuša bjang go homotša badumedi-gotee le rena bao ba babjago?
19 Tsela e nngwe ya go nea bao ba babjago thušo ya moya ke ka go rapela le bona le ka go ba rapelela. Gaešita le ge re sa kgopele diphodišo tša mohlolo lehono, re ka kgopela Modimo gore a ba nee matla a monagano bakeng sa gore ba lebeletšane ka katlego le bolwetši bja bona le gore a ba nee matla a nyakegago gore ba kgotlelele dinakong tše bjalo tša ge ba fokola. Jehofa o tla ba thekga, gomme tumelo ya bona e tla matlafatšwa ke go lebelela pele nakong ya ge “mo xo ba ba axilexo [fao] xo ka se bê le e a rexo: Ke a babya!” (Jesaya 33:24) Go homotša gakaakang go tseba gore ka Jesu Kriste yo a tsošitšwego le ka Mmušo wa Modimo, batho bao ba kwago ba tla lokollwa ka mo go feletšego sebeng, malwetšing le lehung! Re leboga Jehofa bakeng sa ditebelelo tše tše dikgolo, e lego yena ‘a tlago go fodiša malwetši a rena ka moka.’—Psalme 103:1-3; Kutollo 21:1-5.
20. Ke ka baka la’ng go ka bolelwa gore tumelo e ka re thuša ‘matšatšing a mabe’ a botšofadi?
20 Le gona tumelo e ka re thuša ‘matšatšing a mabe’ a botšofadi, ge matla le boemo bjo bobotse bja maphelo di phuhlama. (Mmoledi 12:1-7) Ka gona batšofadi bao ba lego gare ga rena ba ka rapela go etša ge mopsalme yo a bego a tšofala a opetše gore: “Wena o kholofelo ya-ka, Morena Jehofa . . . O se ntahle lebakeng la ge ke tšofala, gomme o se ntlogele ge matla a-ka a felela.” (Psalme 71:5, 9, PK) Mopsalme o ile a kwa a nyaka thekgo ya Jehofa, go swana le ge Bakriste-gotee le rena bao ba tšofaletšego tirelong ya Modimo ba ikwa bjalo. Ka baka la tumelo ya bona, ba ka kgodišega ka gore ba na le thekgo e sa palelwego le ya ka mo go sa felego ya Jehofa.—Doiteronomio 33:27.
Dula o na le Tumelo Lentšung la Modimo
21, 22. Ge e ba re e-na le tumelo, seo se kgoma bjang tswalano ya rena le Modimo?
21 Go ba le tumelo ditabeng tše dibotse le Lentšung la Modimo go re thuša go batamela kgaufsi le Jehofa go feta le ge e le neng pele. (Jakobo 4:8) Ka kgonthe, ke Morena wa rena wa Legohle, eupša gape ke Mmopi le Tatago rena. (Jesaya 64:8; Mateo 6:9; Ditiro 4:24) Mopsalme o opetše ka gore: “O Tate! O Modimo wa-ka, O lentswê la xo mphološa.” (Psalme 89:26) Ge e ba re bontšha tumelo go Jehofa le Lentšung la gagwe le le buduletšwego, le rena re ka mo lebelela e le ‘lentswe la go re phološa.’ A tokelo e ruthetšago pelo gakaakang!
22 Jehofa ke Tatago Bakriste bao ba tloditšwego ka moya le badirišani ba bona bao ba nago le kholofelo ya go phela mo lefaseng. (Ba-Roma 8:15) Le gona go ba le tumelo go Tatago rena wa legodimong le ka mohla ga go tliše manyami. Dafida o itše: “Tate le mmê bôná ba ntloxetše; ’me Wêna Morêna O a nkamoxêla.” (Psalme 27:10) Go oketša moo, re na le kgonthišetšo ye: “Morêna Yêna a ka se kê a lahla sethšaba sa xaxwe ka ’baka la boxolo bya leina la xaxwe.”—1 Samuele 12:22.
23. Ke’ng seo se nyakegago go rena gore re thabele tswalano ya ka mo go sa felego le Jehofa?
23 Go ba gona, gore re thabele tswalano ya ka mo go sa felego le Jehofa, re swanetše go ba le tumelo go ditaba tše dibotse gomme re amogele seo Mangwalo a lego sona e le ka kgonthe—Lentšu la Modimo. (1 Ba-Thesalonika 2:13) Re swanetše go ba le tumelo e feletšego go Jehofa gomme re dumelele Lentšu la gagwe le bonega ditsela tša rena. (Psalme 119:105; Diema 3:5, 6) Tumelo ya rena e tla gola ge re dutše re mo rapela re holofela gore o tla re kwela-bohloko, a re gaugela le go re thekga.
24. Ke kgopolo efe e homotšago yeo go boletšwego ka yona go Ba-Roma 14:8?
24 Tumelo e re šušumeleditše gore re ineele go Modimo ka mo go sa felego. Ge re na le tumelo e matla, re bahlanka ba gagwe bao ba ineetšego bao ba nago le kholofelo ya tsogo gaešita le ge re ka hwa. Ee, “re ba Morêna xe re phela; le xe re e-hwa re ba xaxwe.” (Ba-Roma 14:8) A re bolokeng ka dipelong tša rena kgopolo yeo e homotšago ge re dutše re beile kholofelo ya rena Lentšung la Modimo gomme re tšwele pele re e-na le tumelo go ditaba tše dibotse.
[Dipotšišo tša Thuto]
O tla Araba Bjang?
• Tumelo ke’ng, gomme ke ka baka la’ng re swanetše go ba le seka se?
• Ke ka baka la’ng go le bohlokwa gore re be le tumelo ditabeng tše dibotse le Lentšung la Modimo ka moka?
• Tumelo e re thuša bjang go lebeletšana le diteko tša mehuta-huta?
• Ke’ng seo se tlago go re thuša go boloka tumelo?
[Caption on page 12]
Jehofa o ile a hlokomela Jeremia le Eliya ka gobane ba be ba na le tumelo
[Caption on page 13]
Jobo, Petro le Nehemia ba be ba na le tumelo e matla
[Caption on page 15]
Gore re thabele tswalano ya ka mo go sa felego le Jehofa, re swanetše go ba le tumelo go ditaba tše dibotse