Bagoeledi Ba Mmušo Ba A Bega

Ba “kwa” Molaetša wa Mmušo Kua Brazil

E LE gore di tsebatše ditaba tše dibotse tša Mmušo setšhabeng sa batho bao e lego Difoa, bontši bja Dihlatse tša Jehofa kua Brazil bo ile bja amogela tlhohlo ya go ithuta polelo ya Diatla ya Brazil. Maiteko a tšona a tšweletša mafelelo a mabotse bjalo ka ge diphihlelo tše di latelago di bontšha.

Eva * yo e lego mosadi wa sefoa kua São Paulo o ile a thoma go ithuta polelo ya diatla ka morago ga gore yena le bana ba gagwe ba bararo ba thome go dula le monna wa sefoa. Ge ba le lefelong la mabenkele, Eva le lesogana la gagwe ba ile ba kopana le sehlopha sa Dihlatse tšeo e lego difoa gomme ba ile ba laletšwa gore ba be gona sebokeng Holong ya Mmušo. Ba ile ba amogela taletšo ka ge ba be ba nagana gore e be e tla ba pokano ya bogwera.

Ka baka la tsebo ya gagwe e lekanyeditšwego ka polelo ya diatla, Eva o be a kwešiša ganyenyane seo se bego se bolelwa sebokeng. Ka morago ga moo, Dihlatse tše mmalwa di ile tša ba laletša malapeng a tšona bakeng sa dilapološi. Ka go diriša diswantšho tše di lego ka poroutšheng ya Thabela Bophelo Lefaseng ka mo go sa Felego!, di ile tša hlalosa kholofetšo ya Modimo mabapi le lefase la paradeise le le tlago. Eva o ile a rata seo a ilego a ithuta sona gomme a thoma go ba gona dibokeng ka mehla.

Kapejana ka morago ga moo, Eva o ile a tlogela lesogana la gagwe e le gore a phele ka ditekanyetšo tša Beibele. Go sa šetšwe kganetšo e šoro go tšwa lapeng la gabo, o ile a tšwela pele a dira tšwelopele ya moya gomme o ile a kolobetšwa ka 1995. Dikgwedi tše tshela ka morago, Eva o ile a ingwadišetša go ba mmulamadibogo goba mogoeledi wa Mmušo wa nako e tletšego. O šetše a thušitše batho ba bane ba difoa go ba go fihla boemong bja go ineela le go kolobetšwa.

Carlos o belegwe e le sefoa. Go tloga bjaneng o ile a ineela dihlare-taging, boitshwarong bjo bo gobogilego le bohodung. A le kotsing ya sehlopha sa dikebekwa seo se lwantšhanago le sa bona, o ile a tšhabela São Paulo gomme a yo dula le João ka nakwana. Ka go swana le Carlos, João e be e le sefoa gomme a phela bophelo bjo bo gobogilego.

Nywaga e sego kae ka morago, Carlos o ile a ithuta molaetša wa Mmušo, woo o ilego wa mo tutueletša go hlwekiša bophelo bja gagwe le go ngwadiša lenyalo la gagwe ka molao. Ka morago ga go fihlelela dinyakwa tša Mangwalo, Carlos o ile a kolobetšwa e le pontšho ya boineelo bja gagwe go Jehofa. Ka nako e swanago, Carlos a sa tsebe, João le yena o be a tsebišitšwe ditaba tše dibotse gomme le yena o ile a dira diphetogo tše dikgolo bophelong bja gagwe. Ka morago ga go ithuta gore Jehofa ga a amogele go dirišwa ga diswantšho tša borapedi, João o ile a lahla mokgobo wa diswantšho tša gagwe tša “bakgethwa.” Ka morago ga go tlogela tsela ya gagwe ya kgale ya bophelo, João le yena o ile a kolobetšwa.

Carlos le João ba ile ba thaba kudu gakaakang ge ba be ba kopana Holong ya Mmušo gomme ba bona diphetogo tšeo yo mongwe le yo mongwe wa bona a bego a di dirile! Mo nakong ye, bobedi bja bona ke dihlogo tša malapa tšeo di ikarabelago le tšeo di hlankelago e le bagoeledi ba Mmušo ba fišegago.

Mo nakong ye, kua Brazil go na le diphuthego tše 30 tša polelo ya diatla le dihlopha tše 154, tše di nago le bagoeledi ba ka godimo ga 2 500 bao ba 1 500 ba bona e lego difoa. Dikopanong tša Selete tša 2001 tša “Barutiši ba Lentšu la Modimo” bakeng sa difoa kua Brazil, go ile gwa ba le ba fetago 3 000 gomme gwa kolobetšwa ba 36. Ka tšhegofatšo ya Jehofa, re holofela gore ba bantši bao e lego difoa ba tla amogela molaetša wa Mmušo.

[Mengwalo ya ka tlase]