Go Botega go a Nyakega, Eupša na go Lekane?

NA GO botega go a nyakega e le ka kgonthe bophelong bja rena bja letšatši le letšatši? Pukuntšu e fetolela lentšu “potego” e le “go se ikgakanye goba go hloka boikaketši; go botega; go ba yo a lebanyago; go rereša.” Go molaleng gore seka se se bohlokwa bakeng sa go matlafatša ditswalano tše dibotse le ba bangwe. Moapostola Paulo o ile a kgothatša gore: “Ba e lexo beng ba lena ka thokô ya mmele Le ba kweng, è se xo fo ba hlankêla mahlong ka mokxwa wa ba-kxahla-batho; ba hlankeleng ka pelo-thereši Lè boifa Modimo.” (Ba-Kolose 3:​22) Ke mang yo a bego a ka se thabele go šomelwa ke motho wa mohuta o bjalo? Lehono, batho ba ba botegago ba ka ba le sebaka se sebotse sa go hwetša le go kgomarela mešomo ya bona.

Lega go le bjalo, seo se dirago gore potego e nyakege ke ka tsela yeo e kgomago tswalano ya rena le Modimo. Ba-Isiraele ba bogologolo ba be ba thabela tšhegofatšo ya Modimo ge ba be ba boloka melao le menyanya ka potego. Ge a be a bolela ka bohlweki bja phuthego, Paulo o ile a kgothaletša Bakriste gore: “A re bineng monyanya woo rè se na komêlô ya kxalê le ya bobe le bokxôpô, rè na le boxôbê byo bo sa omêlwaxo bya thsêkêxô le therešô.” (1 Ba-Korinthe 5:⁠8) Ga se feela gore potego e a nyakega gore borapedi bja rena bo amogelwe ke Modimo, eupša e bile ke ya bohlokwa. Lega go le bjalo, hlokomela gore potego e nnoši ga se ya lekana. E swanetše go sepedišana le therešo.

Baagi le banamedi ba sekepe sa Titanic ba ka ba ba be ba dumela ka potego gore sekepe se segolo sa banamedi se be se ka se nwelele. Lega go le bjalo, leetong la sona la pele ka 1912, se ile sa thula thaba ya lehlwa gomme batho ba 1 517 ba ile ba loba maphelo a bona. Ba-Juda ba bangwe ba lekgolong la pele la nywaga ba ka ba ba be ba dumela ka potego tsela ya bona ya go rapela Modimo, eupša phišego ya bona e be e le ya go “hlôka temoxô [“tsebo e nepagetšego,” NW].” (Ba-Roma 10:⁠2) Ditumelo tša rena tše botegago di swanetše go thewa tsebišong e nepagetšego gore re amogelwe ke Modimo. Dihlatse tša Jehofa tša tikologong ya geno di tla thabela go go thuša go hlahloba seo se akaretšwago tabeng ya go hlankela Modimo ka potego le ka therešo.