Kamoo re ka Hlagolelago Pono E Leka-lekanego Ka mošomo

LEFASENG la lehono leo le nago le kgateletšo e phagamego mebarakeng ya lefase ka bophara, phadišano e šoro le go tšweletšwa ga dilo ka bontši, batho ba bantši ga ba lebelele pele go ya mošomong letšatši le lengwe le le lengwe. Lega go le bjalo, re swanetše go thabela mošomo wa rena. Ka baka la’ng? Ka gobane re bopilwe ka seswantšho sa Modimo​—gomme Modimo o thabela mošomo wa gagwe. Ka mohlala, ge a hlahloba seo a se dirilego mafelelong a ‘matšatši’ a tshelelago goba lebaka le letelele la tlholo, Genesi 1:​31 e re: “Modimo a lebêlêla tšohle tše a di dirilexo, a bôna e le tše botse kudu.”

Ka ntle le pelaelo, lerato la Jehofa la go rata mošomo ke lebaka le lengwe leo ka lona a bitšwago “Modimo yo a thabilego.” (1 Timotheo 1:​11, NW) Ka gona, na ga se mo go kwagalago gore ge re dutše re mo ekiša, ke moo re bago bao ba thabilego kudu? Tabeng ye, Kgoši Salomo wa Isiraele ya bogologolo e lego moagi le morulaganyi yo mogolo o ngwadile gore: “Ké neô ya Modimo, xe motho a e-⁠ja, a e-⁠nwa, ’me a bôna tše di botse ka ’tapišô tš’axwe tšohle.”​—Mmoledi 3:⁠13.

E ka ba tlhohlo go hlagolela pono e leka-lekanego le e botse ka mošomo lefelong la mošomo la lehono leo le fetogago ka lebelo. Eupša Jehofa Modimo o šegofatša bao ba elago hloko tlhahlo ya gagwe e lerato. (Psalme 119:​99, 100) Batho ba bjalo e ba bašomi bao ba tšeelwago godimo le bao ba botwago gomme ka go rialo ga se gantši ba lahlegelwago ke mošomo wa bona. Le gona ba ithuta go lebelela maphelo a bona le mošomo e sego ka pono ya dilo tše di bonagalago feela eupša le ka pono ya moya. Se se dira gore ba kgone go dira diphetho tše di kwagalago bophelong le go bona gore lethabo la bona le maikwelo a tšhireletšego ga se tša ithekga ka mošomo wa bona goba ka mešomo yeo go ka se ithekgwego ka yona. (Mateo 6:​31-33; 1 Ba-Korinthe  2:​14, 15) Se ba thuša go hlagolela go šoma ka thata ka tsela e leka-lekanego e le ka kgonthe.

Hlagolela go Šoma ka Thata mo go Thabišago Modimo

Batho ba bangwe ke balemaledi ba mošomo, ba bea mošomo wa bona pele ga dilo tše dingwe ka moka. Ba bangwe ba fela pelo gore letšatši le sobele ba kgone go tloga mošomong gomme ba ye gae. Pono e leka-lekanego ke efe? Beibele e araba ka gore: “Seatla-tabola-khutšô se phala matsôxô-mašubuka-ditapišô le xo phuthêla môya ka kobô.” (Mmoledi 4:⁠6) Ge e le gabotse, go šoma ka thata kudu goba go šoma nako e telele kudu, go baka mathata go e na le go fihlelela pakane ya gago​—lefeela la “xo phuthêla môya ka kobô.” Ke ka baka la’ng go le bjalo? Ka gobane re ka senya dilo tšeo di re thušago go hwetša lethabo le legolo: tswalano ya rena le lapa le bagwera, boemo bja rena bja moya, maphelo a rena gaešita le go phela nako e telele. (1 Timotheo 6:​9, 10) Pono e leka-lekanego ke go kgotsofala ka dilo tše nyenyane tše di bonagalago gotee le khutšo yeo re nago le yona go e na le go imelwa ke mošomo o montši gotee le mathata le manyami.

Ge e kgothaletša pono e bjalo e leka-lekanego, Beibele ga e kgothaletše bobodu. (Diema 20:⁠4) Bobodu bo fokodiša boitlhompho le tlhompho yeo ba bangwe ba ka re hlomphago ka yona. Go feta fao, bo fokodiša tswalano ya rena le Modimo. Beibele e bolela ka go lebanya gore motho yo a ganago mošomo ga se a swanela go ja dilo tšeo di šometšwego ke ba bangwe. (2 Ba-Thesalonika 3:​10) Go e na le moo, o swanetše go fetoša ditsela tša gagwe gomme a šome ka thata, ka go rialo a itlhokomele gotee le bao a swanetšego go ba hlokomela. Ka go šoma ka thata a ka ba a kgona le go hlokomela bao ba diilago e le ka kgonthe​—mokgwa woo Lentšu la Modimo le o kgothaletšago.​—Diema 21:​25, 26; Ba-Efeso 4:⁠28.

Go Tlwaetšwa go Rata Mošomo go Tloga Bjaneng

Mekgwa e mebotse ya mošomo ga e fo itlela; e ithutwa go tloga bjaneng. Ka gona, Beibele e kgothaletša batswadi gore: “Ngwana mo eteletše tsela y’axwe; ké mo a tl’o xo tšofala à sa ka a e lahla.” (Diema 22:⁠6) Ka ntle le go ba beela mohlala o mobotse e le bašomi bona ka noši, batswadi ba bohlale ba tlwaetša bana ba bona ka go ba nea mešomo yeo e ba lekanego ka gae. Gaešita le ge bana ba ka tenwa ke mešomo e mengwe, ba tla ipona e le ditho tšeo di lego bohlokwa tša lapa​—kudu-kudu ge mma le tate ba ba reta ka mošomo woo ba o dirilego gabotse. Ka manyami, batswadi ba bangwe ba direla bana ba bona mo e ka  bago selo se sengwe le se sengwe, mohlomongwe ba re ba dira bjalo ka botho. Batswadi ba bjalo ba swanetše go naganišiša ka Diema 29:​21 yeo e rego: “Mohlanka wa xo êkelêlwa xo tšwa byaneng, ó tlo ba a re: le bohwa ke a ja.”

Le gona batswadi bao ba nago le boikarabelo ba ba le kgahlego e tseneletšego ka go tsena sekolo ga bana ba bona, ba ba kgothaletša go ithuta le go šoma ka thata ge ba le sekolong. Se se ka thuša bana ka morago ge ba thoma go šoma.

E-ba Bohlale ge o Kgetha Mošomo

Gaešita le ge e sa re botše gore re ka šoma mošomo ofe, Beibele e re nea tlhahlo e botse e le gore tšwelopele ya rena ya moya, tirelo go Modimo le boikarabelo bjo bongwe bjo bohlokwa di ka se be kotsing. Ka mohlala, moapostola Paulo o ngwadile gore: “Lebaka ké la pitlaxanô. . . . Ba ba phelaxo ka tša lefase ba etšê ba ba sa phelexo ka tšôna [“ba be bjalo ka bao ba sa le dirišego ka botlalo,” NW], xobane sebopêxô sa lefase leno se a lôba.” (1 Ba-Korinthe 7:​29-31) Ga go na selo seo e lego sa ka mo go sa felego goba seo se tsepamego tshepedišong ye ya gona bjale ya dilo. Go neela nako ya rena ka moka le matla go yona go swana le go beeletša ditšhelete tša bophelo bja rena ka moka ntlong yeo e agilwego lefelong la mafula. A peeletšo ya bošilo gakaakang!

Diphetolelo tše dingwe tša Beibele di fetolela polelwana ‘go se le diriše ka botlalo’ e le “go se nwelele ka go lona” le “go se swarege ka mo go tletšego ka tšona.” (The Jerusalem Bible; Today’s English Version) Batho ba bohlale le ka mohla ga ba ke ba tšeela fase taba ya gore lebaka ke la “pitlaxanô” bakeng sa tshepedišo ya gona bjale ya dilo le gore go “nwelela” goba go “swarega ka mo go tletšego” go lona ka ntle le pelaelo go tla lebiša manyaming le go itshola.​—1 Johane 2:​15-⁠17.

‘Modimo a ka se ke a go Tlogela’

Jehofa o tseba dinyakwa tša rena kaone go re feta. O tseba gape le gore re kae go phethagatšweng ga morero wa gagwe. Ka gona, o re gopotša gore: “Menaxanô a e se bê ya mexabaru. Le bê ba ba kxodilwexo ke tše di lexo xôna. Yêna mong ó boletše a re: Nka se kê ka Xo lahla; nka se kê ka Xo tloxêla.” (Ba-Hebere 13:⁠5) Mantšu ao ke a kgothatšago gakaakang! A ekiša go tshwenyega ga Modimo ka lerato bakeng sa batho ba gagwe, Jesu o ile a neela karolo ya Thuto ya gagwe ya Thabeng yeo e tumilego go ruta barutiwa ba gagwe pono e nepagetšego ka mošomo le ka dilo tše di bonagalago.​—Mateo 6:​19-⁠33.

Dihlatse tša Jehofa di katanela go kwa dithuto tšeo. Ka mohlala, ge mothwadi a be a kgopela Hlatse yeo e lego ramohlagase gore ka mehla e šome nako e oketšegilego, mothwalwa o ile a ganetšana le taba ye. Ka baka la’ng? Ka gobane o be a sa nyake gore mošomo wa gagwe wa tša boiphedišo o šitiše nako yeo a e fetšago a na le lapa la gagwe le yeo a e dirišetšago ditaba tša moya. Ka ge e be e le mošomi yo botse le yo a botwago, mothwadi wa gagwe o ile a hlompha dikganyogo tša gagwe. Go ba gona, ga se ka mehla dilo di bago ka tsela yeo, le gona motho a ka swanelwa ke go nyaka mošomo o mongwe e le gore a boloke tsela ya bophelo e leka-lekanego. Lega go le bjalo, bao ba botago Jehofa ka mo go tletšego gantši ba hwetša gore boitshwaro bja bona bjo bobotse le go šoma ga bona ka thata go dira gore ba ratwe ke bathwadi ba bona.​—Diema 3:​5, 6.

Ge Mošomo ka Moka e tla ba o Putsago

Tshepedišong ya gona bjale ya dilo e sa phethagalago, mošomo le ditebelelo tša go hwetša  mošomo ka mehla di tla dula di na le mathata gomme e le tšeo di sa kgonthišetšwago. Ge e le gabotse, dilo di ka mpefalela pele ge lefase le tšwela pele go se tsepame gomme tša boiphedišo di phuhlama goba gaešita le go palelwa. Eupša boemo bjo ke bja nakwana. Kgaufsinyana ga go na motho yo a tla hlokago mošomo. Ka ntle le moo, mošomo ka moka e tla ba wo o kgahlišago e le ka kgonthe le woo o putsago. Seo se kgonega bjang? Ke’ng seo se tla tlišago phetogo e bjalo?

Ka moporofeta wa gagwe Jesaya, Jehofa o ile a bolela e sa le pele ka nako yeo. Jehofa o itše: “Ke tlo hlôla maxodimo a mafsa le lefase le lefsa; tša kxalê di ka se hlwê di tsebywa, le mo pelong ya motho di ka se hlwê di rotoxa.” (Jesaya 65:​17) O be a bolela ka mmušo wa gagwe o mofsa, woo ka tlase ga wona lekoko le lefsa la batho le leo le fapanego e tlago go ba selo sa kgonthe.​—Daniele 2:⁠44.

Ka gona, mabapi le tsela ya batho ya go phela le go šoma boporofeta bo tšwela pele ka gore: “Nywakô ye ba e axaxo ba tlo dula mo xo yôna; dirapa tša merara ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng. Ba ka se itapiše, ’me ya ba lefêla; ba ka se tswale bana ba xo tlo hwa ka pela; xobane e tlo ba mohuta wa bašexofatšwa ba Morêna, bôná le bana ba bôná.”​—Jesaya 65:​21-⁠23.

A phapano e kaakang e tla dirwago ke lefase le lefsa la Modimo! Na ga o nyake go phela lefaseng le bjalo, leo go lona o ‘ka se itapišetšego lefeela’ eupša o tla thabelago ka mo go tletšego “kenyô” tša mošomo wa gago? Lega go le bjalo, ela hloko gore ke bomang bao ba tla thabelago ditšhegofatšo tše bjalo: “Ba mohuta wa bašexofatšwa ba Morêna.” O ka ba yo mongwe wa “bašexofatšwa” bao ka go ithuta ka Jehofa le ka go fihlelela dilo tšeo a di nyakago. Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:⁠3) Dihlatse tša Jehofa di tla thabela go go thuša go hwetša tsebo yeo e neago bophelo ka thuto yeo e rulagantšwego ya Lentšu la Modimo e lego Beibele.

[Lepokisi go letlakala 6]

“Di Tsongwa Ke Bathwadi Ba bantši”

Beibele e re: “Ka moka tše Le di diraxo, Le di dirê ka pelo e rataxo, e ke Le dirêla Modimo, e sexo batho.” (Ba-Kolose 3:​23) Ka mo go lego molaleng, motho yoo go šoma ga gagwe ka thata go laolwago ke molao wo wa motheo o mobotse e tla ba mošomi yo a ratwago. Ka baka leo, J. J. Luna ka pukung ya gagwe ya How to Be Invisible, o eletša bathwadi bao ba nyakago go thwala bašomi gore ba tsome ditho tše mafolofolo tša dihlopha tše itšego tša bodumedi, eupša o oketša ka gore: “Therešo ke gore re feleletša re phethile ka go thwala Dihlatse tša [Jehofa].” Gare ga mabaka ao a a neago ke gore di tsebalega lefaseng ka moka ka baka la potego ya tšona, gomme seo se dira gore “di tsongwe ke bathwadi ba bantši” mešomong e fapa-fapanego.

[Caption on page 5]

Go leka-lekanya mošomo le mediro ya moya le boitapološo go tliša kgotsofalo